2 Corintios 2:1-17
-
Pablo yom i tijicñesan jiñi corintiojob (1-4)
-
Yom miʼ ñusʌbentel i mul juntiquil xmulil yicʼot miʼ chaʼ chʼʌjmel ti utsʼat (5-11)
-
Pablo an ti Troas yicʼot ti Macedonia (12, 13)
-
Jiñi subtʼan lajal bajcheʼ woli lac pʌjyel majlel chaʼan jiñi lac piʼʌlob miʼ yʌqʼueñoñobla lac ñuclel (14-17)
-
«Maʼañic mi lon c chon ñumel jiñi i tʼan Dios» (17)
-
2 Come tsaʼix c ñaʼta chaʼan mach yicʼotic c chʼijyemlel mi caj c chaʼ majlel c julaʼtañetla.
2 Cheʼ muqʼuic cʌqʼueñetla laʼ chʼijyemlel, ¿majqui mi caj i tijicñesañon? Cojach jiñi tsaʼ bʌ cʌqʼue i chʼijyemlel.
3 Jiñi tsaʼ bʌ c tsʼijbubeyetla tsaʼ c tsʼijbu chaʼan, cheʼ bʌ mic majlel, maʼañic mi cubin c chʼijyemlel tiʼ tojlelob jiñi yom bʌ miʼ yʌqʼueñoñob c tijicñʌyel, come mic ñop chaʼan jiñi muʼ bʌ i yʌqʼueñon c tijicñʌyel miʼ yʌqʼueñetla laʼ tijicñʌyel jaʼel.
4 Come jiñi wocol woli bʌ cubin tic pusicʼal yicʼot jiñi j cʼojol* tsiʼ ñijcayon c tsʼijbubeñetla jiñi carta yicʼot cabʌl i yaʼlel c wut. Pero mach chaʼañic mi cʌqʼueñetla laʼ chʼijyemlel tsaʼ c mele jiñi, chaʼañʌch mi laʼ ñaʼtan bajcheʼ cʼamel j cʼuxbiya ti laʼ tojlel.
5 Pero mi an majqui tsiʼ pʼolo chʼijyemlel, mach joñoñic tsiʼ yʌqʼueyon c chʼijyemlel, jatetʌchla tsiʼ yʌqʼueyetla laʼ chʼijyemlel baqui chilil (chaʼan mach cʌlʌx tsʌtsoñic ti chuqui mi cʌl).
6 Jasʌlix jiñi i tojʼesʌntel tsaʼ bʌ aqʼuenti jiñi wiñic, jiñi tojʼesʌntel tsaʼ bʌ laʼ wʌqʼue lʌcʼʌ ti laʼ pejtelel.
7 Wʌle yom mi laʼ ñusʌben i mul yicʼot laʼ wutslel i yom mi laʼ ñuqʼuesʌben i pusicʼal chaʼan maʼañic miʼ cʌlʌx ubin i chʼijyemlel i miʼ lujbʼan.
8 Jin chaʼan, mic subeñetla chaʼan mi laʼ pʌsben chaʼan mucʼʌch laʼ cʼuxbin.
9 Jiñʌch tiʼ caj jaʼel iliyi cheʼ tsaʼ c tsʼijbubeyetla majlel: Chaʼan mij qʼuel mi xjacʼtʼañetʌchla.
10 Mi jatetla mi laʼ ñusʌben i mul juntiquil lac piʼʌl, joñon mic ñusʌben i mul jaʼel. Tiʼ sujm, pejtelel jiñi mulil tsaʼix bʌ c ñusa (mi añʌch mulil yom bʌ tsaʼ c ñusa) chaʼañʌch laʼ wenlel tiʼ tojlel Cristo,
11 chaʼan Satanás maʼañic miʼ lotiñonla, come laj cʌñʌyʌch chuqui tac miʼ cʼʌn.*
12 Weno, cheʼ bʌ tsaʼ cʼotiyon ti Troas chaʼan mic sub jiñi wen tʼan tiʼ tojlel Cristo i tsaʼ jambentiyon jumpʼejl puerta chaʼan mic melben i yeʼtel lac Yum,
13 mach tijicñayoñic tsaʼ cubi c bʌ come maʼañic tsaʼ c taja jiñi quermañu Tito. Jin chaʼan tsaʼ c subu c bʌ i tsaʼ loqʼuiyon majlel ti Macedonia.
14 ¡Mi la cʌqʼuen wocolix i yʌlʌ Dios! Tiʼ pejtelel ora miʼ pʌyonla majlel la quicʼot Cristo chaʼan pejtelel lac piʼʌlob miʼ yʌqʼueñoñobla lac ñuclel i ti lac tojlel miʼ yʌcʼ chaʼan baqui jach miʼ pam pujquel jiñi i yujtsʼil i ñaʼtʌbal.
15 Come tiʼ tojlel Dios lajalonla bajcheʼ xojocña bʌ i yujtsʼil Cristo muʼ bʌ i cʼotel tiʼ tojlelob jiñi majlel bʌ mucʼob i taj i coltʌntel* yicʼot tiʼ tojlelob jiñi majlel bʌ mucʼob chaʼan miʼ jisʌntelob.*
16 Tiʼ tojlel ili wiʼilobix bʌ i yujtsʼilʌch chʌmel muʼ bʌ i yʌcʼob ti chʌmel, tiʼ tojlel jiñi ñaxañoʼ bʌ i yujtsʼilʌch cuxtʌlel muʼ bʌ i yʌqʼueñob i cuxtʌlel. ¿I majqui chajpʌbil chaʼan miʼ meleʼ tac iliyi?
17 Joñon lojon, come maʼañic mi lon c chon ñumel* jiñi i tʼan Dios, cheʼ bajcheʼ miʼ melob cabʌl wiñicob. Chocbilon lojon tilel ti Dios i mi lon c chaʼlen tʼan tiʼ sujmlel tiʼ wut i quicʼot lon Cristo.
Nota tac
^ O «c pensal».
^ O «ñaʼtʌbil i mel».
^ O «woli bʌ i coltʌntelob».
^ O «woli bʌ i chʌmelob».
^ O «maʼañic mi lon c taj taqʼuin ti».
