2 Corintios 3:1-18
3 ¿Yom ba mic chaʼ acʼ lon c bʌ ti cʌjñel ti laʼ tojlel? ¿Cʼʌñʌl ba lon c chaʼan carta tac, bajcheʼ yambʌlob, muʼ bʌ i yʌl chuqui wen ti lon c tojlel? ¿Cʼʌñʌl ba lon c chaʼan mi laʼ tsʼijbun carta tac cheʼ bʌ bajcheʼ iliyi? Maʼañic.
2 Jatetla lajaletla bajcheʼ jiñi lon j carta, tsʼijbubil ti lon c pusicʼal i cʌmbil yicʼot pejcʌbil tiʼ tojlel pejtelel lac piʼʌlob.
3 Come wen tsiquil chaʼan lajaletla bajcheʼ i carta Cristo tsaʼ bʌ lon c tsʼijbu jiñi xyaj eʼtelon bʌ lon i chaʼan Dios. Mach tsʼijbubilic yicʼot tinta, tsʼijbubil yicʼot i yespíritu juntiquil cuxul bʌ Dios, yicʼot mach tsʼijbubilic ti wechel tac bʌ xajlel,* tsʼijbubil ti laʼ pusicʼal.
4 Tiʼ tojlel Cristo, Dios tsiʼ yʌqʼueyon lon c ñop jiñi.
5 Maʼañic mi lon cʌl chaʼan ti bajñel lon c pʼʌtʌlel miʼ mejlel lon c mel ili eʼtel, Dios jiñʌch muʼ bʌ i coltañon lojon chaʼan miʼ mejlel lon c mel.
6 Jiñʌch tsaʼ bʌ i chajpayon lojon chaʼan mi lon c sujtel ti xyaj eʼtel i chaʼan jiñi tsijiʼ bʌ trato, mach chaʼañic jiñi tsʼijbubil bʌ mandar, chaʼañʌch jiñi espíritu. Come jiñi tsʼijbubil bʌ mandar miʼ yʌcʼ chʌmel, pero jiñi espíritu miʼ yʌcʼ cuxtʌlel.
7 Weno, jiñi mandar muʼ bʌ i yʌcʼ chʌmel tsaʼ bʌ tsʼijbunti ti xajlel wen cabʌl i ñuclel tsaʼ cʼoti, i jiñi i yalobilob Israel maʼañic tsaʼ mejli i qʼuelbeñob i ñiʼ i wut Moisés come wen tsʼʌylaw, pero jiñi tsʼʌylaw bʌ mi caj i jilel.
8 Jin chaʼan, ¿mach ba yomic ñumen an i ñuclel bajcheʼ miʼ yʌjqʼuel jiñi espíritu?
9 Come mi añʌch i ñuclel tsaʼ ajñi jiñi mandar muʼ bʌ i yʌcʼ chʌmel, ¡yomʌch ñumen an i ñuclel bajcheʼ miʼ sujbelob ti toj jiñi lac piʼʌlob!
10 Cheʼ jaʼel, jinto jiñi mandar tsaʼ bʌ aqʼuenti i ñuclel ti wajali tsiʼ sʌtʌ jiñi i ñuclel tiʼ caj jiñi ñumen anto bʌ i ñuclel.
11 Come mi an i ñuclel tsaʼ cʼoti jiñi muʼ bʌ caj i jisʌntel, ¡yom ñumen an i ñuclel jiñi muʼ bʌ caj i yajñel tiʼ pejtelel ora!
12 Come an lac chaʼan jiñi pijtaya, mi lac jamʌ chaʼlen tʼan
13 i mach cheʼic mi lac mel bajcheʼ Moisés, tsaʼ bʌ i moso i ñiʼ i wut yicʼot jumpʼejl pisil chaʼan jiñi i yalobilob Israel maʼañic miʼ mejlel i qʼuelob chuqui mi caj i chaʼlen jiñi muʼ bʌ caj i jisʌntel.
14 Pero maʼañic tsaʼ mejli i chʼʌmbeñob i sujm. I cʼʌlʌlto ili ora, cheʼ bʌ miʼ pejcʌntel jiñi ñoxix bʌ trato, bej mosolobto ti jiñi pisil come tiʼ tojlel jach Cristo miʼ mejlel ti locʼsʌntel.
15 Tiʼ sujm, cʼʌlʌl ili ora, jajayajl miʼ pejcʌntel jiñi i tsʼijbujel Moisés, lajal bajcheʼ bej mosolobto i pusicʼal.
16 Pero cheʼ bʌ juntiquil miʼ sujtel baʼan Jehová,* miʼ locʼsʌntel jiñi pisil.
17 Weno, Jehová* jiñʌch jiñi Espíritu, i yaʼ baqui an i yespíritu Jehová* an librejlel.
18 I ti lac pejtelel, joñonla tsaʼix bʌ lac choco loqʼuel ti ñiʼ lac wut jiñi pisil, lajalonla bajcheʼ espejo muʼ bʌ i pʌs i ñuclel Jehová.* Woli laj qʼuextʌyel chaʼan mi lac sujtel tiʼ yejtal Dios* yicʼot chaʼan miʼ mejlel lac ñumen pʌs jiñi i ñuclel, cheʼʌch bajcheʼ yom Jehová,* jiñi Espíritu.*
Nota tac
^ O «tun».
^ Qʼuele jiñi Glosario.
^ Qʼuele jiñi Glosario.
^ Qʼuele jiñi Glosario.
^ Qʼuele jiñi Glosario.
^ O «chaʼan cheʼ yilal mi lac sujtel bajcheʼ Dios».
^ Qʼuele jiñi Glosario.
^ O tajol: «jiñi i yespíritu Jehová».
