2 Corintios 6:1-18
6 Woli lon c chaʼlen eʼtel lon quicʼot Dios, jin chaʼan mi lon j cʼajtibeñetla ti wocol tʼan chaʼan maʼañic mi laʼ chʼʌm jiñi ñuc bʌ i yutslel Dios i ti wiʼil miʼ ñajʌyel laʼ chaʼan chuqui yom i taj jiñi ñuc bʌ i yutslel Dios.
2 Come Dios miʼ yʌl: «Tsaʼ c ñʌchʼtayet cheʼ bʌ wen jiñi i yorajlel chaʼan mi cʌqʼueñet bendición, i cheʼ bʌ i yorajlel coltʌntel tsaʼ j coltayet». Ili i yorajlelʌch chaʼan miʼ yʌqʼueñonla i bendición Dios yicʼot i yorajlelʌch chaʼan miʼ coltañonla.
3 Maʼañic woli lon c wis mel muʼ bʌ i yʌcʼ ti yajlel yambʌlob, chaʼan maʼañic majqui miʼ mejlel i taj chuqui mach bʌ weñic ti lon queʼtel tiʼ chaʼan bʌ Dios.
4 Tiʼ pejtelel chuqui mi lon c mel mic pʌs lon c bʌ bajcheʼ xʼeʼtelob i chaʼan Dios: Cheʼ cabʌl chuqui tsaʼ lon j cuchu, cheʼ mi lon c ñusan wocol tac, cheʼ bʌ anto chuqui yom c chaʼan lojon, cheʼ bʌ wen wocol* bajcheʼ woli lon c ñusan,
5 cheʼ mic jajtsʼel lojon, mi lon cotsʌntel ti cárcel, mi lon j contrajintel tiʼ tojlel jiñi jontol bʌ lac piʼʌlob, cheʼ mic chaʼlen lojon tsʌts bʌ eʼtel, cheʼ maʼañic mic wʌyel lojon ti acʼʌlel, cheʼ an i tajol maʼañic chuqui mi lon j cʼux,
6 cheʼ sʌc mi cajñel lojon, cheʼ mi lon c pʌs ti lon c melbal jiñi cʌmbil bʌ lon c chaʼan, cheʼ mic pʌs lon c pijt yicʼot lon cutslel, cheʼ mi lon cʌcʼ chaʼan jiñi chʼujul bʌ espíritu miʼ ñijcañon lojon, cheʼ mi lon c pʌs i sujm bʌ cʼuxbiya,
7 cheʼ mi lon cʌl chuqui i sujm, cheʼ mi lon c ñop tiʼ pʼʌtʌlel Dios, cheʼ bajcheʼ woli lon j cʼʌn eʼtijib tac chaʼan guerra ti lon c ñoj* yicʼot ti lon c tsʼej* chaʼan miʼ mejlel lon c mel chuqui utsʼat,
8 cheʼ mij qʼuejlel lojon ti ñuc o cheʼ maʼañic mi lon j qʼuejlel ti ñuc, cheʼ miʼ yʌjlel chuqui tac wen ti lon c tojlel yicʼot cheʼ maʼañic. Mi lon j qʼuejlel bajcheʼ xlotob, anquese mi lon cʌl chuqui i sujm,
9 lajal bajcheʼ mach cʌmbiloñic lon, anquese wen cʌmbilon lojon, lajal bajcheʼ woli lon c chʌmel, anquese cuxulon lojon, lajal bajcheʼ tsaʼ aqʼuentiyon lon c toj lon c mul, anquese maxto ajqʼuiyon lojon chaʼan mi lon c chʌmel,
10 lajal bajcheʼ chʼijyemon lon, anquese tiʼ pejtelel ora tijicñayon lon, lajal bajcheʼ pʼumpʼuñon lon, pero cabʌl chuqui tac wem bʌ mi lon cʌqʼuen jiñi lac piʼʌlob, lajal bajcheʼ maʼañic chuqui an lon c chaʼan, anquese laj tsʼʌcʌl chuqui an lon c chaʼan.
11 Corintiojob, tsaʼ c jamʌ lon quej chaʼan mic pejcañet lon yicʼot tsaʼ c jambeyet lon c pusicʼal.
12 Joñon lojon mach pʼisbilic jach mi lon c pʌsbeñetla jiñi cʼuxbiya, pero jatetla pʼisbil jach mi laʼ pʌsbeñon lon laʼ cʼuxbiya.
13 Woli c pejcañetla bajcheʼ calobilob, jin chaʼan melela cheʼ bajcheʼ woli lon c mel i jambeñon lojon laʼ pusicʼal jaʼel.
14 Mach laʼ tem laʼ bʌ laʼ wicʼotob jiñi mach bʌ xñoptʼañobic. Come ¿bajcheʼ miʼ taj i bʌ chuqui toj yicʼot jiñi jontolil?* ¿O bajcheʼqui lajal jiñi sʌclel yicʼot jiñi icʼyochʼañiyel?
15 Cheʼ jaʼel, ¿muʼ ba i mejlel i tem i tʼan Cristo yicʼot Belial?* ¿O bajcheʼqui lajal juntiquil xñoptʼan* yicʼot juntiquil mach bʌ xñoptʼañic?
16 ¿Chuqui miʼ mejlel i melob tiʼ templo Dios jiñi melbil tac jach bʌ dios? Come i templojonla juntiquil cuxul bʌ Dios. Cheʼ bajcheʼ tsiʼ yʌlʌ Dios: «Mi caj cajñel quicʼotob i mi caj cajñel yaʼ baqui añob, mi caj c sujtel tiʼ Diosob i mi caj i sujtelob tic tejclum».
17 «Jin chaʼan loqʼuenla yaʼ baqui añob yicʼot tʌtsʼʌ laʼ bʌ,* cheʼ miʼ yʌl Jehová,* i cʌyʌ laʼ tʌl chuqui tac bibiʼ», «i joñon mi caj c chʼʌmetla».
18 «‹I joñon mi caj c sujtel ti laʼ tat, jatetla mi caj laʼ sujtel ti calobilob yicʼot ti quixicʼalob›, cheʼ miʼ yʌl Jehová,* jiñi Mach bʌ añic i pʼisol i pʼʌtʌlel».
Nota tac
^ O «tsʌts».
^ Tajol chaʼan miʼ chaʼlen jatsʼ.
^ Tajol chaʼan miʼ coltan i bʌ.
^ Yom i yʌl: Maʼañic miʼ qʼuelob ti ñuc jiñi i mandar tac Dios.
^ Ili cʼabaʼʌl tilem ti jumpʼejl tʼan ti hebreo yom bʌ i yʌl ‹mach bʌ añic i cʼʌjñibal›. Chaʼañʌch miʼ tajtʌl ti tʼan Satanás.
^ O «xucʼul bʌ lac piʼʌl».
^ O «ñajtʼesan laʼ bʌ».
^ Qʼuele jiñi Glosario.
^ Qʼuele jiñi Glosario.
