2 Corintios 7:1-16
7 Jin chaʼan, cʼuxbibiletbʌla, come an lac chaʼan ili tʼan tac tsaʼ bʌ wʌn aqʼuentiyonla, laʼ lac sʌqʼuesan lac bʌ tiʼ pejtelel muʼ bʌ i bibʼesan lac bʌcʼtal yicʼot lac ñaʼtʌbal, chaʼan mi lac ñumen sujtel majlel ti chʼujul cheʼ mi lac bʌcʼñan Dios.
2 Jambeñon lojon laʼ pusicʼal. Joñon lojon maʼañic majqui tsaʼ lon c toʼol ticʼla, maʼañic majqui tsaʼ lon c soco i maʼañic majqui tsaʼ lon c loti chaʼan lon c wenlel.
3 Maʼañic woli c subeñetla iliyi chaʼan an laʼ mul mi laʼ wubin, come tsaʼix c ñaxan subeyetla chaʼan añetla ti lon c pusicʼal, chaʼan mi lac tem chʌmel o chaʼan tem cuxulonla.
4 Mic jamʌ pejcañetla. Ñuc mi cubin c bʌ chaʼañetla. Anquese wen an lon c wocol, wen ñuqʼuesʌbil c pusicʼal yicʼot wen tijicñayon.
5 Tiʼ sujm, cheʼ bʌ tsaʼ cʼotiyon lon ti Macedonia maʼañic tsaʼ c taja lon c ñʌchʼtʌlel, tsaʼ lon c bej ñusa baqui jach bʌ wocol: Jiñi lac piʼʌlob tsiʼ contrajiyoñob lon yicʼot tsaʼ lon j cʼojoʼta* jiñi congregación tac.
6 Pero Dios, muʼ bʌ i ñuqʼuesʌben i pusicʼal jiñi chʼijyemoʼ bʌ, tsiʼ ñuqʼuesa lon c pusicʼal cheʼ bʌ tsaʼ tili Tito.
7 I mach cojach cheʼ tsaʼ tili, yicʼotʌch jaʼel cheʼ tsaʼ laʼ ñuqʼuesʌbe i pusicʼal. Tiʼ subeyon lon chaʼan wen laʼ womix laʼ qʼuelon, chaʼan wen chʼijyemetla yicʼot mi laʼ wen cʼojoʼtañon, i jiñi tsaʼto i ñumen aqʼueyon c tijicñʌyel.
8 Jin chaʼan, mi tsaʼ cʌqʼueyetla laʼ chʼijyemlel ti jiñi j carta, mach cʼuxic mi cubin. Anquese ti ñaxan cʼuxʌch tsaʼ cubi (cheʼ bʌ tsaʼ j qʼuele chaʼan jiñi carta tsiʼ yʌqʼueyetla laʼ chʼijyemlel, anquese mach wen jalic),
9 wʌle mi cubin c tijicñʌyel, pero mach chaʼañic tsaʼ cʌqʼueyetla laʼ chʼijyemlel, chaʼañʌch jiñi laʼ chʼijyemlel tsiʼ yʌqʼueyetla laʼ chaʼ ñaʼtan laʼ bʌ.* Tsaʼ laʼ wubi laʼ chʼijyemlel cheʼ bajcheʼ miʼ mulan Dios, jin chaʼan maʼañic chuqui tsaʼ laʼ chaʼle ti lon c mul.
10 Come jiñi chʼijyemlel muʼ bʌ i mulan Dios miʼ yʌqʼueñonla lac chaʼ ñaʼtan lac bʌ chaʼan mi lac taj laj coltʌntel, i maʼañic majqui cʼux miʼ yubin iliyi, pero jiñi chʼijyemlel muʼ bʌ i yubiñob jiñi añoʼ bʌ ti pañimil miʼ yʌcʼ chʌmel.
11 Tsiquil chaʼan jatetla tsaʼ laʼ wubi jiñi chʼijyemlel muʼ bʌ i mulan Dios, jin chaʼan tsaʼ laʼ chaʼle wersa chaʼan mi laʼ mel chuqui utsʼat. Tsaʼ laʼ sʌqʼuesa laʼ cʼabaʼ, tsaʼ michʼayetla chaʼan jiñi mach bʌ weñic tsaʼ laʼ mele, tsaʼ laʼ bʌcʼña Dios, tsaʼ laʼ mulaj laʼ chaʼ ñaʼtan laʼ bʌ, tsaʼ laʼ melbe i yeʼtel Dios tiʼ pejtelel laʼ pusicʼal i tsaʼ laʼ tojʼesa jiñi mach bʌ weñic tsaʼ laʼ mele. Wen tsaʼ mejli tiʼ pejtelel chaʼan miʼ tojʼesʌntel ili wocol.
12 Anquese tsaʼ c tsʼijbubeyetla, maʼañic tsaʼ c mele tiʼ caj jiñi tsaʼ bʌ i mele mach bʌ weñic i mi jiñicto tiʼ caj jiñi tsaʼ bʌ ticʼlʌnti, chaʼañʌch miʼ tsictiyel ti laʼ tojlel yicʼot tiʼ tojlel Dios chaʼan tsaʼʌch laʼ chaʼle wersa laʼ jacʼbeñon lon c tʼan.
13 Jiñʌch tsaʼ bʌ i ñuqʼuesa lon c pusicʼal.
Pero mach cojach tsaʼ ñuqʼuesʌnti lon c pusicʼal, tsaʼto i ñumen tijicñesayon lon jiñi i tijicñʌyel Tito, come ti laʼ pejtelel tsaʼ laʼ tijicñesʌbe i pusicʼal.
14 Come, mi tsaʼ cʌlʌ chuqui tac wem bʌ chaʼañetla tiʼ tojlel Tito, maʼañic tsaʼ laʼ wʌcʼʌyon ti quisin. Cheʼʌch bajcheʼ i sujmʌch pejtelel tsaʼ bʌ lon c subeyetla, tsaʼix tsictiyi jaʼel chaʼan i sujmʌch pejtelel tsaʼ bʌ lon c sube Tito chaʼañetla.
15 Cheʼ jaʼel, muʼto i ñumen pʼojlel i cʼuxbiya ti laʼ tojlel cheʼ miʼ cʼajtesan bajcheʼ tsaʼ laʼ jacʼʌ tʼan yicʼot chaʼan tsaʼ laʼ wen qʼuele ti ñuc cheʼ bʌ tsaʼ cʼoti.
16 Tijicña mi cubin c bʌ chaʼan pejtelel muʼ bʌ laʼ mel, i pʼʌtʼesʌbil c pusicʼal ti laʼ tojlel.
