2 Juan 1:1-13
1 I chaʼan jiñi anciano,* tiʼ tojlel jiñi yajcʌbil bʌ xʼixic yicʼot jiñi i yalobilob, jiñi mucʼʌch bʌ j cʼuxbiñob tiʼ sujm, i mach joñoñic jach, yicʼotʌch pejtelel jiñi tsaʼ bʌ i cʌñʌyob i sujmlel,
2 come jiñi i sujmlel an ti lac pusicʼal i miʼ yajñel ti lac tojlel tiʼ pejtelel ora.
3 Jiñi ñuc bʌ i yutslel, i pʼuntaya yicʼot i ñʌchʼtʌlel Dios, jiñi Tatʌl, yicʼot i chaʼan Jesucristo, i Yalobil jiñi Tatʌl, mi caj i yajñel ti lac tojlel yicʼot i sujmlel i yicʼot cʼuxbiya.
4 Tsaʼ c wen ubi c tijicñʌyel cheʼ bʌ tsaʼ cubi chaʼan an a walobilob añoʼ bʌ ti jiñi i sujmlel, cheʼ bajcheʼ miʼ yʌl jiñi mandar tsaʼ bʌ i yʌqʼueyonla jiñi Tatʌl.
5 Jin chaʼan, xʼixic, wʌle mij cʼajtibeñet ti wocol tʼan chaʼan mi lac tem cʼuxbin lac bʌ. (Maʼañic woli c tsʼijbubeñetla jumpʼejl tsijiʼ bʌ mandar, jumpʼejlʌch ñoxix bʌ añix bʌ lac chaʼan cʼʌlʌl tiʼ cajibal).
6 Jiñi cʼuxbiya jiñʌch iliyi: Chaʼan mi lac chʌn mel cheʼ bajcheʼ miʼ yʌl jiñi i mandar tac. Cheʼ bajcheʼ tsaʼ laʼ wubi cʼʌlʌl tiʼ cajibal, jiñi mandar jiñʌch iliyi: Chaʼan mi laʼ chʌn ajñel ti jiñi cʼuxbiya.
7 Come loqʼuemob ti pañimil cabʌl xlotob, jiñi maʼañic bʌ miʼ pʌsob chaʼan Jesucristo tsajñi bajcheʼ wiñic. Ili jiñʌch jiñi xlot yicʼot muʼ bʌ i contrajin Cristo.*
8 Cʌntan laʼ bʌ chaʼan maʼañic mi laʼ sʌt jiñi i chobejtʌbal la queʼtel yicʼot chaʼan tsʼʌcʌl mi laʼ taj jiñi laʼ majtan.
9 Majqui jach miʼ tʌtsʼ i bʌ* tiʼ cʌntesa Cristo i miʼ pʌs mach bʌ i sujmic, mach yicʼotic Dios. Jiñi maʼañic bʌ miʼ tʌtsʼ i bʌ ti jiñi cʌntesa tac añʌch yicʼot Dios yicʼot i Yalobil.
10 Mi an muʼ bʌ i tilel ti laʼ tojlel i mach cheʼic i cʌntesa bajcheʼ jiñi i cʌntesa tac Cristo, mach laʼ wotsan ti laʼ wotot i mi yomicto mi laʼ chaʼlen ti saludar.
11 Come jiñi muʼ bʌ i chaʼlen ti saludar miʼ coltan tiʼ melol chuqui tac mach bʌ weñic.
12 Anquese cabʌl chuqui yom bʌ mic tsʼijbubeñetla, mach comic c mel ti jun yicʼot ti tinta, mic pijtan mic majlel j qʼueletla i mic chaʼlen tʼan quicʼotetla, chaʼan tsʼʌcʌl jiñi laʼ tijicñʌyel.
13 Jiñi i yalobilob jiñi yajcʌbil bʌ xʼixic miʼ chocbeñetla majlel saludo.
