2 Pedro 3:1-18
3 Cʼuxbibiletbʌla, ili jiñix i chaʼpʼejlel carta muʼ bʌ c tsʼijbubeñetla i cheʼ bʌ woli j cʼajtesʌbeñetla jiñi laʼ wujilix bʌ woli c subeñetla chaʼan mi laʼ cʼʌn laʼ ñaʼtʌbal, cheʼ bajcheʼ tsaʼ c subeyetla ti jiñi ñaxam bʌ j carta,
2 chaʼan mi laʼ cʼajtesan jiñi tʼan tac tsaʼ bʌ i yʌlʌyob jiñi chʼujul bʌ xʼaltʼañob ti wajali yicʼot jiñi mandar tsaʼ bʌ i yʌcʼʌ lac Yum yicʼot la caj Coltaya tiʼ tojlel jiñi laʼ wapóstolob.
3 Pero jiñi ñumen ñuc bʌ i cʼʌjñibal, jiñʌch cheʼ yom mi laʼ ñaʼtan chaʼan ti cojix bʌ qʼuin mi caj i tilelob xwajalob yicʼotob i wajal i mi caj i melob cheʼ bajcheʼ bajñel yomob,
4 i mi caj i yʌlob: «¿Bacan tsiquil chaʼan wʌʼix an* cheʼ bajcheʼ wʌn albil? Come maʼañic chuqui qʼuextʌyem cʼʌlʌl bajcheʼ tsaʼ chʌmiyob jiñi lac ñojteʼelob, pejtelel chuqui an cheʼ jach yilal cʼʌlʌl bajcheʼ tiʼ tejchibal cheʼ bʌ tsaʼ mejli pejtelel chuqui an».
5 Yilol i chaʼañob maʼañic tsiʼ mulayob i cʼajtesan chaʼan jiñi panchan añix cʼʌlʌl ti wajali yicʼot chaʼan jiñi lum tsiʼ tʼoxo i bʌ ti jiñi jaʼ yicʼot tiʼ yojlil jiñi jaʼ come cheʼʌch tsiʼ yʌlʌ Dios,
6 iliyi tsiʼ jisa jiñi lac piʼʌlob ti jimbʌ ora. Tsaʼ ujti iliyi cheʼ bʌ jiñi jaʼ tsiʼ junyajl bujtʼesa jiñi lum.
7 I chaʼan cheʼ tsiʼ yʌlʌ Dios jaʼel, jiñi panchan yicʼot jiñi pañimil am bʌ ili ora cʌylem chaʼan miʼ jisʌntel ti cʼajc cheʼ tiʼ qʼuiñilel meloñel tiʼ tojlel jiñi jontoloʼ bʌ cheʼ miʼ jisʌntelob.
8 Pero, cʼuxbibiletbʌla, mach ñajʌyic laʼ chaʼan iliyi: Tiʼ tojlel Jehová* jumpʼejl qʼuin lajal bajcheʼ mil jab i mil jab lajal bajcheʼ jumpʼejl qʼuin.
9 Jehová* mach cʼunteʼic chaʼan miʼ tsʼʌctesan jiñi i tʼan, cheʼ bajcheʼ miʼ ñaʼtan chaʼtiqui uxtiquil lac piʼʌlob. Pero miʼ pʌsbeñetla i pijt come mach yomic chaʼan mi juntiquilic miʼ jisʌntel, yom chaʼan pejtelel lac piʼʌlob miʼ chaʼ ñaʼtañob i bʌ.*
10 Pero, jiñi i qʼuiñilel Jehová* mi caj i tilel bajcheʼ xujchʼ. Ti jiñi bʌ qʼuin jiñi panchan mi caj i jilel cheʼ bajcheʼ an chuqui cʼam bʌ woliʼ sub i bʌ. Jiñi an tac bʌ ti panchan yicʼot ti pañimil wen ticʌw bʌ mi caj i jilel. Jiñi pañimil yicʼot chuqui tac an yaʼi mi caj i pulel.
11 Come cheʼʌch mi caj i laj jilel pejtelel iliyi, ¡ñaʼtanla bajcheʼ yilal bʌ lac piʼʌl yometla! Yom mi laʼ pʌs chʼujul tac bʌ laʼ melbal yicʼot yom mi laʼ pʌs laʼ xucʼtʌlel ti Dios
12 cheʼ bʌ woli laʼ pijtan yicʼot yom yʌxʌl laʼ wo cheʼ bʌ miʼ tilel i qʼuiñilel Jehová,* cheʼ bʌ miʼ julel jiñi qʼuin, jiñi panchan mi caj i jisʌntel ti cʼajc i chuqui tac an yaʼi mi caj i yulmʌn tiʼ ticwʌlel jiñi cʼajc.
13 Pero an tsijiʼ bʌ panchan yicʼot tsijiʼ bʌ pañimil woli bʌ lac pijtan cheʼ bajcheʼ tsaʼ wʌn ajli, i yaʼi mi caj i mejlel chuqui toj.
14 Jin chaʼan, cʼuxbibiletbʌla, come woli laʼ pijtan tac iliyi, chaʼlenla wersa chaʼan ti wiʼil maʼañic laʼ bibiʼlel miʼ tajetla, maʼañic laʼ sajtemal yicʼot añetla ti laʼ ñʌchʼtʌlel.
15 Cheʼ jaʼel, ñaʼtanla chaʼan cheʼ yujil pijt jiñi lac Yum i wentʌlelʌch laj coltʌntel, cheʼ bajcheʼ tiʼ tsʼijbubeyetla jaʼel jiñi cʼuxbibil bʌ la quermañu Pablo cheʼ bajcheʼ Dios tsiʼ yʌqʼue i ñaʼtʌbal.
16 Pablo tsiʼ taja ti tʼan jiñi yaʼ tiʼ carta tac. Pero yaʼ tiʼ carta tac an wocol bʌ ti chʼʌmbentel i sujm i jiñi mach bʌ añobic i ñaʼtʌbal* yicʼot jiñi mach bʌ pʼʌtʌlobic ti chuqui miʼ ñopob miʼ yʌmbeñob i sujmlel, cheʼ bajcheʼ miʼ melob yicʼot pejtelel jiñi Tsʼijbujel, ili mi caj i yʌcʼ chaʼan miʼ jisʌntelob.
17 Jin chaʼan, cʼuxbibiletbʌla, come wʌn laʼ wujilix iliyi, yom chʌn yʌxʌl laʼ wo chaʼan maʼañic mi laʼ lotintel bajcheʼob tiʼ caj jiñi mach bʌ i sujmic i cʌntesa jiñi jontoloʼ bʌ* i mach chʌn xucʼuletixla ti jiñi wem bʌ bij.
18 Pero chumlenla cheʼ bajcheʼ yom chaʼan mi laʼ ñumen taj jiñi ñuc bʌ i yutslel yicʼot i ñaʼtʌbal jiñi lac Yum yicʼot la caj Coltaya Jesucristo. Laʼ aqʼuentic i ñuclel ti ili ora yicʼot tiʼ pejtelel ora. Amén.
Nota tac
^ Ti griego, parousía. Qʼuele jiñi Glosario, wʌʼix an.
^ Qʼuele jiñi Glosario.
^ Qʼuele jiñi Glosario.
^ Qʼuele jiñi Glosario, chaʼ ñaʼtan a bʌ.
^ Qʼuele jiñi Glosario.
^ Qʼuele jiñi Glosario.
^ O «jiñi mach bʌ cʌntesʌbilobic».
^ O «jiñi muʼ bʌ i ñusañob mandar».
