2 Timoteo 2:1-26
2 Jin chaʼan, calobil, chʌn pʼʌtʼesan a bʌ ti jiñi ñuc bʌ i yutslel Dios am bʌ ti Cristo Jesús.
2 Pejtelel jiñi tsaʼ bʌ c subeyet i cabʌlob yujilob chaʼan i sujmʌch, aqʼueñob tiʼ wenta jiñi xucʼul bʌ wiñicob, i cheʼ bajcheʼ jiñi chajpʌbilob chaʼan miʼ cʌntesañob yambʌlob.
3 Bajcheʼ wem bʌ i soldado Cristo Jesús, yom maʼ ñusan jiñi wocol tac yom bʌ maʼ ñusan.
4 Mi juntiquilic soldado miʼ yotsan i bʌ tiʼ chaʼan tac bʌ taqʼuin* mi yom i tijicñesan jiñi tsaʼ bʌ i yotsa bajcheʼ soldado.
5 Cheʼto jaʼel, ti jiñi alas tac maʼañic majqui miʼ yʌqʼuentel i corona mi mach cheʼic miʼ chaʼlen alas cheʼ bajcheʼ yom miʼ mejlel.
6 Jiñi xpacʼ muʼ bʌ i chaʼlen tsʌts bʌ eʼtel jiñʌch yom bʌ miʼ ñaxan cʼuxben i wut jiñi i pʌcʼʌb.
7 Chʌn ñaʼtan jiñi woli bʌ cʌl, jiñi lac Yum mi caj i yʌqʼueñet a laj chʼʌmben i sujm.
8 Cʼajtesan chaʼan Jesucristo tsaʼ chʼojyesʌnti* yaʼ baqui an chʌmeñoʼ bʌ i tilem tiʼ pʼolbal David, cheʼ bajcheʼ miʼ yʌl jiñi wen tʼan muʼ bʌ c sub,
9 i tiʼ caj jiñi woli c ñusan wocol i cʌchʌlon bajcheʼ juntiquil jontol bʌ wiñic. Pero jiñi i tʼan Dios mach cʌchʌlic ti cadena.
10 Jin chaʼan woli c chʌn cuch tiʼ pejtelel chaʼan i wenlel jiñi yajcʌbiloʼ bʌ, chaʼan miʼ tajob jaʼel jiñi i coltʌntel tiʼ tojlel Cristo Jesús yicʼot jiñi ñuclel mach bʌ añic miʼ jilel.
11 Ili tʼan mucʼʌch i mejlel ti ñojpel: Mi tsaʼ chʌmiyonla la quicʼot, mi caj lac chumtʌl la quicʼot jaʼel,
12 mi mucʼʌch lac bej cuch, mi caj lac chaʼlen yumʌntel la quicʼot, mi tsaʼ la cʌlʌ chaʼan mach laj cʌñʌyic, mi caj i yʌl chaʼan mach i cʌñʌyoñicla jaʼel,
13 mi xucʼulonla, chʌn xucʼul mi caj i yajñel, come maʼañic miʼ mejlel i wʌlʌc contrajin i tʼan.
14 Chʌn cʼajtesʌbeñob pejtelel iliyi yicʼot tiʼ tojlel Dios subeñob chaʼan maʼañic miʼ techob leto* tiʼ caj tʼan tac, mach bʌ wis añic i cʼʌjñibal, come miʼ ticʼlan jiñi muʼ bʌ i yubiñob.
15 Chaʼlen wersa chaʼan utsʼat maʼ qʼuejlel tiʼ wut Dios, juntiquil xʼeʼtel mach bʌ añic chuqui miʼ quisñin, muʼ bʌ i cʼʌn ti wen jiñi i tʼan Dios.*
16 Pero mach a jacʼ jiñi tʼan tac mach bʌ añic i cʼʌjñibal mach bʌ añic miʼ qʼuel ti ñuc chuqui chʼujul, come miʼ yʌqʼueñob i ñumen ñajtʼesañob i bʌ tiʼ tojlel Dios,
17 i jiñi tʼan tac mi caj i pam pujquel bajcheʼ lecoj bʌ tsoy* muʼ bʌ i jisan majlel lac bʌcʼtal. Jiñʌch tsaʼ bʌ ujti tiʼ tojlel Himeneo yicʼot Fileto.
18 Ili wiñicob tsaʼix i cʌyʌyob jiñi i sujmlel, miʼ yʌlob chaʼan tsaʼix ujti jiñi chaʼ chʼojyel, i woliʼ jisʌbeñob i ñopoñel yambʌlob.
19 Anquese woliʼ yujtel jiñi, jiñi cʼʌclib tsaʼ bʌ i yʌcʼʌ Dios bej xucʼulʌch an i an i chaʼan ili sello: «Jehová* i cʌñʌ jiñi i chaʼañoʼ bʌ», yicʼot «Pejtelel muʼ bʌ i ñop tiʼ cʼabaʼ Jehová* yom miʼ cʌy i mel mach bʌ weñic».
20 Ti jumpʼejl colem otot mach cojic jach an jiñi pʼejt tac melbil bʌ ti oro yicʼot ti plata, an melbil bʌ ti teʼ yicʼot ti lum. An muʼ bʌ i cʼʌjñel chaʼan chuqui tac wem bʌ i an muʼ bʌ i cʼʌjñel chaʼan chuqui mach bʌ weñic.
21 Jin chaʼan, jiñi muʼ bʌ i ñajtʼesan i bʌ ti ili wiʼilix bʌ, mi caj i cʼʌjñel chaʼan chuqui tac wem bʌ, mi caj i sujtel ti chʼujul, mi caj i cʼʌjñibʌyel tiʼ tojlel i yum yicʼot chajpʌbil chaʼan miʼ mel pejtelel chuqui tac wen.
22 Jin chaʼan, putsʼtan chuqui yomob jiñi xcolelob i sʌclan chuqui toj, jiñi ñopoñel, jiñi cʼuxbiya yicʼot jiñi ñʌchʼtʌlel, temel a wicʼotob jiñi muʼ bʌ i ñopob tiʼ cʼabaʼ lac Yum ti sʌcoʼ bʌ i pusicʼal.
23 Cheʼ jaʼel, mach a ñʌchʼtan jiñi tʼan tac mach bʌ añic i cʼʌjñibal yicʼot mach bʌ añic i sujmlel, come a wujil chaʼan miʼ yʌcʼ ti tejchel leto.
24 Jiñi xyaj eʼtel i chaʼan lac Yum mach yomic miʼ chaʼlen leto, yom uts tiʼ tojlel yambʌlob, yom chajpʌbil chaʼan miʼ chaʼlen cʌntesa, yom miʼ ticʼ i bʌ cheʼ bʌ miʼ ticʼlʌntel
25 i yicʼot i yutslel yom miʼ cʌntesan jiñi muʼ bʌ i chañʼesañob i bʌ. Tajol Dios miʼ yʌqʼueñob i chaʼ ñaʼtañob i bʌ* chaʼan miʼ cʌñob ti tsʼʌcʌl jiñi i sujmlel,
26 i cheʼ bajcheʼ jiñi miʼ chaʼ ñaʼtañob pañimil i miʼ putsʼtañob i yac jiñi Diablo, come cuxulob tsaʼ chujquiyob chaʼan miʼ melbeñob chuqui yom.
Nota tac
^ O tajol: «ti chuqui tac miʼ mejlel ti jujumpʼejl qʼuin».
^ O «tejchesʌnti».
^ O «quera».
^ O «jiñi i sujm bʌ tʼan».
^ O «cʼamʌjel».
^ Qʼuele jiñi Glosario.
^ Qʼuele jiñi Glosario.
^ Qʼuele jiñi Glosario, chaʼ ñaʼtan a bʌ.
