2 Timoteo 4:1-22
4 Tiʼ tojlel Dios yicʼot Cristo Jesús, muʼ bʌ caj i chaʼlen meloñel tiʼ tojlel cuxuloʼ bʌ yicʼot chʌmeñoʼ bʌ cheʼ bʌ miʼ pʌs i bʌ yicʼot miʼ mel i yeʼtel bajcheʼ Rey yaʼ tiʼ Yumʌntel, mic subeñet iliyi:
2 Subu jiñi tʼan, ti ora yom maʼ mel cheʼ bʌ an wem bʌ i yorajlel yicʼot cheʼ mach weñic, tojʼesan yambʌlob, wʌn subeñob ti tsʌts bʌ tʼan yicʼot tiqʼuiyob, yicʼot a pijt yom maʼ mel i bajcheʼ wem bʌ xcʌntesa.
3 Come tal i yorajlel cheʼ bʌ maʼañic mi caj i mulañob i ñʌchʼtan jiñi wem bʌ cʌntesa,* tiʼ caj miʼ melob chuqui bajñel yomob, mi caj i ñochtañob jiñi xcʌntesajob muʼ bʌ i yʌlob chuqui yomob i yubin.
4 Mi caj i cʌy i ñʌchʼtañob jiñi i sujmlel i mi caj i ñʌchʼtañob jiñi mach bʌ i sujmic tac muʼ bʌ i yʌjlel.
5 Pero jatet pʌsʌ wem bʌ a ñaʼtʌbal tiʼ pejtelel chuqui maʼ mel, cuchu jiñi wocol tac, mele jiñi a weʼtel bajcheʼ xsubtʼan* i tsʼʌctesan ti wen jiñi a weʼtel.
6 Come wolix c bejqʼuel bajcheʼ majtañʌl lajal bʌ bajcheʼ vino, i lʌcʼʌlix i yorajlel chaʼan libre mij cʌytʌl.
7 Tsaʼ c chaʼle wersa ti jiñi wem bʌ guerra, tsaʼ cujtesa jiñi ajñel i maʼañic tsaʼ j cʌyʌ jiñi c ñopoñel.
8 Cʼʌlʌl ili ora yajcʌbilix jiñi corona chaʼan bʌ tojel muʼ bʌ caj i yʌqʼueñon jiñi lac Yum, jiñi toj bʌ xmeloñel, bajcheʼ c majtan ti jiñi cojix bʌ qʼuin, pero mach joñoñic jach, mi caj i yʌqʼuentelob jaʼel pejtelel tsaʼ bʌ i wen pijtayob chaʼan miʼ pʌs i bʌ.
9 Chaʼlen wersa chaʼan ti ora maʼ tilel a julaʼtañon.
10 Come Demas, tsaʼ bʌ i cʌyʌyon tiʼ caj miʼ cʼuxbin ili pañimil, tsaʼ majli ti Tesalónica, Crescente tsaʼ majli ti Galacia, i Tito tsaʼ majli ti Dalmacia.
11 I bajñel jach Lucas wʌʼan quicʼot. Pʌyʌ tilel Marcos, come miʼ wen coltañon chaʼan mic melben i yeʼtel Dios.
12 Tíquico tsaʼ c choco majlel ti Éfeso.
13 Cheʼ bʌ maʼ tilel, chʼʌmʌ tilel jiñi capa tsaʼ bʌ j cʌyʌ yaʼ ti Troas tiʼ yotot Carpo yicʼot jiñi bʌlbil tac bʌ jun, ñumento jiñi pergamino tac.*
14 Alejandro, jiñi muʼ bʌ i cʼʌn ti eʼtel cobre, tsiʼ wen ticʼlayon. Jehová* mi caj i yʌqʼuen i toj i mul.
15 Cʌntan a bʌ tiʼ tojlel jaʼel, come tsiʼ chaʼle wersa i wen contrajin jiñi tʼan muʼ bʌ lac sub.
16 Cheʼ bʌ tsaʼ c ñaxan colta c bʌ maʼañic majqui an quicʼot, tiʼ pejtelelob tsiʼ cʌyʌyoñob. Com chaʼan maʼañic miʼ cʼotelob tiʼ wenta jiñi.
17 Pero jiñi lac Yum tsaʼ ajñi yicʼoton i tsiʼ pʼʌtʼesayon, chaʼan tic tojlel miʼ sujbel ti tsʼʌcʌl jiñi tʼan i miʼ yubintel tiʼ pejtelel jiñi tejclum tac, i tsiʼ coltayon loqʼuel tiʼ yej jiñi león.
18 Jiñi lac Yum mi caj i cʌntañon tiʼ pejtelel chuqui mach bʌ weñic i mi caj i coltañon chaʼan jiñi i Yumʌntel ti panchan. Laʼ aqʼuentic i ñuclel tiʼ pejtelel ora. Amén.
19 Aqʼuen c saludo Prisca yicʼot Áquila yicʼot jiñi añoʼ bʌ tiʼ yotot Onesíforo.
20 Erasto tsaʼ cʌyle ti Corinto, i Trófimo cʼam tsaʼ j cʌyʌ ti Mileto.
21 Chaʼlen wersa chaʼan maʼ julel cheʼ bʌ maxto i yorajlelic tsʌñal.
Eubulo miʼ chocbeñet majlel saludo yicʼot Pudente, Lino, Claudia yicʼot pejtelel jiñi hermanojob.
22 Laʼ ajñic ti a tojlel jiñi lac Yum come a wom a mel chuqui tac wen. Laʼ ajñic ti laʼ tojlel jiñi ñuc bʌ i yutslel.
Nota tac
^ O «cʌntesa muʼ bʌ i yʌcʼ wenlel».
^ O «chʌn subu jiñi wen tʼan».
^ Yom i yʌl: Jiñi tsʼijbujel melbil bʌ ti pʌchi.
^ Qʼuele jiñi Glosario.
