Apocalipsis 13:1-18
13 Jiñi dragón waʼal tsaʼ cʌyle tiʼ jiʼil jiñi mar.
Cheʼ jiñi tsaʼ j qʼuele juncojt jontol bʌ bʌteʼel woli bʌ i loqʼuel tilel ti mar. An 10 i xulub yicʼot 7 i jol. Yaʼ tiʼ xulub tac an i chaʼan 10 corona* i yaʼ tiʼ jol tac an cʼabaʼʌl tac muʼ bʌ i pʼaj* Dios.
2 Jiñi jontol bʌ bʌteʼel tsaʼ bʌ j qʼuele cheʼ yilal bajcheʼ juncojt leopardo, pero jiñi i yoc lajal bajcheʼ i chaʼan oso i jiñi i yej cheʼ yilal bajcheʼ i chaʼan juncojt león. I jiñi dragón tsiʼ yʌqʼue i pʼʌtʌlel, i trono yicʼot ñuc bʌ i yeʼtel jiñi jontol bʌ bʌteʼel.
3 Tsaʼ j qʼuele chaʼan an jumpʼejl i jol tsaʼ bʌ lowbenti yilal chaʼan miʼ chʌmel, pero jiñi i lojweñal tsaʼix lajmesʌbenti. I pejtelel jiñi lac piʼʌlob ti pañimil toj sajtelob i pusicʼal tsaʼ caji i tsajcañob jiñi jontol bʌ bʌteʼel.
4 Tsiʼ chʼujutesayob jiñi dragón come tsiʼ yʌqʼue i yeʼtel jiñi jontol bʌ bʌteʼel, tsiʼ chʼujutesayob jiñi jontol bʌ bʌteʼel i tsiʼ yʌlʌyob: «¿Majqui lajal bajcheʼ jiñi jontol bʌ bʌteʼel? ¿I majqui miʼ mejlel i contrajin?».
5 Tsaʼ aqʼuenti i pʼʌtʌlel chaʼan miʼ qʼuel i bʌ ti ñuc yicʼot chaʼan miʼ yʌl mach bʌ weñic tiʼ tojlel Dios, i tsaʼ aqʼuenti i pʼʌtʌlel jaʼel chaʼan 42 uw miʼ mel chuqui jach yom.
6 Cheʼ jiñi tsiʼ jamʌ i yej chaʼan miʼ yʌl mach bʌ weñic tiʼ contra Dios, chaʼan miʼ yʌl mach bʌ weñic tiʼ contra i cʼabaʼ, tiʼ contra jiñi i chumlib, cheʼʌchi, tiʼ contra jiñi chumuloʼ bʌ ti panchan.
7 Tsaʼ ajqʼui ti guerra tiʼ contra jiñi chʼujuloʼ bʌ i miʼ mʌlbeñob,* i tsaʼ aqʼuenti i yeʼtel tiʼ tojlel pejtelel pʼolbalʌl, alʌ tejclum tac, tʼan tac yicʼot ñuqui tejclum tac.
8 I pejtelel jiñi chumuloʼ bʌ ti pañimil mi caj i chʼujutesañob. Cʼʌlʌl tiʼ cajibal pañimil, maxto añic mi juntiquilic tsʼijbubil bʌ i cʼabaʼ yaʼ ti bʌlbil bʌ jun chaʼan cuxtʌlel i chaʼan bʌ jiñi Tiñʌmeʼ tsaʼ bʌ ajqʼui bajcheʼ majtañʌl.
9 Mi an am bʌ i chiquin, laʼ i yubin.
10 Mi an yom bʌ miʼ chujquel, mi caj i chujquel. Mi an muʼ bʌ i chaʼlen tsʌnsa ti espada,* mi caj i tsʌnsʌntel ti espada. Jin chaʼan jiñi chʼujuloʼ bʌ yom miʼ cuchob wocol yicʼot yom añob i ñopoñel.
11 Cheʼ jiñi, tsaʼ j qʼuele yambʌ jontol bʌ bʌteʼel woli bʌ i loqʼuel tilel ti lum. An chaʼpʼejl i xulub bajcheʼ i chaʼan i tat tiñʌmeʼ, pero tsaʼ caji ti tʼan bajcheʼ juncojt dragón.
12 I lajal i pʼʌtʌlel miʼ pʌs bajcheʼ jiñi ñaxam bʌ jontol bʌ bʌteʼel am bʌ tiʼ tojel i wut. Miʼ yʌcʼ chaʼan jiñi pañimil yicʼot jiñi chumuloʼ bʌ yaʼi miʼ chʼujutesañob jiñi ñaxam bʌ jontol bʌ bʌteʼel, jiñi tsaʼ bʌ lajmesʌbenti i lojweñal.
13 I cabʌl chuqui ñuc tac bʌ miʼ mel, muʼto i yʌcʼ ti jubel tilel cʼajc yaʼ ti panchan tiʼ tojel i wut jiñi lac piʼʌlob.
14 Jiñi ñuc tac bʌ tsaʼ bʌ aqʼuenti i mel cheʼ bʌ yaʼan jiñi jontol bʌ bʌteʼel miʼ cʼʌn i lotin jiñi chumuloʼ bʌ ti pañimil, i miʼ suben jiñi añoʼ bʌ ti pañimil chaʼan miʼ melbeñob jumpʼejl i yejtal jiñi jontol bʌ bʌteʼel, jiñi tsaʼ bʌ lojwi ti jumpʼejl espada pero maʼañic tsaʼ chʌmi.
15 I tsaʼ aqʼuenti i yʌqʼuen i cuxtʌlel jiñi i yejtal jontol bʌ bʌteʼel, chaʼan miʼ chaʼlen tʼan yicʼot miʼ yʌcʼ ti tsʌnsʌntel pejtelel jiñi mach bʌ añic miʼ chʼujutesañob i yejtal jiñi jontol bʌ bʌteʼel.
16 Tiʼ pejtelelob, jiñi mach bʌ ñucobic yicʼot ñucoʼ bʌ, ricojoʼ bʌ yicʼot pʼumpʼuñoʼ bʌ, librejoʼ bʌ yicʼot xyaj eʼteloʼ bʌ, miʼ subeñob chaʼan wersa yom miʼ yʌqʼuentelob i marcajlel ti ñoj bʌ i cʼʌbob o tiʼ pamob
17 chaʼan maʼañic majqui miʼ mejlel ti mʌñoñel o ti choñoñel, cojach jiñi am bʌ i chaʼan jiñi marca, i cʼabaʼ jiñi jontol bʌ bʌteʼel o i númerojlel jiñi i cʼabaʼ.
18 Chaʼan mi lac chʼʌmben i sujm iliyi yomʌch an lac ñaʼtʌbal: Jiñi am bʌ i ñaʼtʌbal, laʼ i ñaʼtan baqui bʌ i númerojlel jiñi jontol bʌ bʌteʼel, come i número wiñic, jiñi i númerojlel jiñʌch 666.
Nota tac
^ Literal: «diadema tac».
^ O «ñiqʼuisuben».
^ O «jotbeñob».
^ O tajol: «Mi an yom bʌ miʼ chʌmel ti espada».
