Apocalipsis 16:1-21
16 Cheʼ jiñi tsaʼ cubi cʼam bʌ tʼan tilem bʌ ti jiñi chʼujul bʌ ajñibʌl i woliʼ suben jiñi 7 ángelob: «Cucula i beqʼuela jubel ti lum jiñi i michʼajel Dios am bʌ yaʼ ti 7 colem tsima».
2 Jiñi ñaxam bʌ ángel tsaʼ majli i tsiʼ beqʼue ti lum i bʌl jiñi i colem tsima. I jiñi lac piʼʌlob añoʼ bʌ i chaʼan i marcajlel jiñi jontol bʌ bʌteʼel yicʼot muʼ bʌ i chʼujutesʌbeñob i yejtal tsaʼ loqʼuiyob cʼux bʌ yicʼot jontol bʌ i tsoy* tsaʼ bʌ i yʌqʼueyob i ñusan wocol.
3 Jiñi i chaʼticlel ángel tsiʼ beqʼue ti mar jiñi i bʌl i colem tsima. Jiñi mar tsaʼ sujti ti chʼichʼ bajcheʼ i chʼichʼel juntiquil chʌmen bʌ, i tsaʼ chʌmi pejtelel cuxul tac bʌ, jiñi an tac bʌ yaʼ ti mar.
4 Jiñi i yuxticlel ángel tsiʼ beqʼue ti colem jaʼ yicʼot tiʼ pasibal jaʼ i bʌl jiñi i colem tsima. Pejtelel iliyi tsaʼ sujti ti chʼichʼ.
5 Cheʼ jiñi tsaʼ cubi i yʌl jiñi ángel am bʌ i pʼʌtʌlel tiʼ tojlel jiñi jaʼ tac: «Jatet, jiñi am bʌ ili ora yicʼot jiñi añix bʌ cʼʌlʌl ti wajali, jiñi Xucʼul bʌ, tojetʌch come tsaʼix a chaʼle meloñel.
6 Come tsiʼ becʼbeyob i chʼichʼel jiñi chʼujuloʼ bʌ yicʼot jiñi xʼaltʼañob, tsaʼ wʌqʼueyob i jap chʼichʼ. Cheʼ yomob».
7 I tsaʼ cubi i yʌl jiñi pulʌntib: «Cheʼʌchi, Jehová* Dios, jiñi Mach bʌ añic i pʼisol i pʼʌtʌlel, i sujmʌch yicʼot tojʌch bajcheʼ maʼ chaʼlen meloñel».
8 Jiñi i chʌnticlel ángel tsiʼ beqʼue ti qʼuin jiñi i bʌl i colem tsima. I jiñi qʼuin tsaʼ aqʼuenti i pul yicʼot cʼajc jiñi lac piʼʌlob.
9 I jiñi cʌlʌxix bʌ i ticwʌlel cʼajc tsiʼ pulu jiñi lac piʼʌlob. Pero tsiʼ chaʼleyob tʼan tiʼ contra jiñi i cʼabaʼ Dios, jiñi am bʌ i pʼʌtʌlel ti jiñi wocol tac, i maʼañic tsiʼ chaʼ ñaʼtayob i bʌ* mi tsaʼicto i yʌqʼueyob i ñuclel.
10 Jiñi i joʼticlel ángel tsiʼ beqʼue i bʌl jiñi i colem tsima yaʼ tiʼ trono jiñi jontol bʌ bʌteʼel. I tsaʼ icʼa jiñi i yumʌntel. Jiñi lac piʼʌlob tsaʼ caji i cʼuxob i yacʼ come woliʼ ñusañob wocol,
11 pero tsiʼ chaʼleyob tʼan tiʼ contra jiñi Dios am bʌ ti panchan tiʼ caj jiñi i wocolob yicʼot jiñi lecoj bʌ i tsoyob, i maʼañic tsiʼ chaʼ ñaʼtayob i bʌ chaʼan chuqui tac tsiʼ meleyob.
12 Jiñi i seislel ángel tsiʼ beqʼue i bʌl i colem tsima yaʼ ti colem jaʼ i cʼabaʼ Éufrates. Tsaʼ tiqui chaʼan miʼ chajpʌben i bijlel jiñi reyob loqʼuemoʼ bʌ tilel yaʼ baqui miʼ pasel qʼuin.*
13 I tsaʼ j qʼuele uxpʼejl tʼan bibiʼ bʌ cheʼ bʌ yilal bajcheʼ xpequec woli bʌ i loqʼuel tiʼ yej jiñi dragón, tiʼ yej jiñi jontol bʌ bʌteʼel yicʼot tiʼ yej jiñi xlot bʌ xʼaltʼan.
14 Tiʼ sujm, tʼan tacʌch tilem bʌ ti xibajob i miʼ pʌs i yejtal i pʼʌtʌlel,* iliyi woliʼ majlel tiʼ tojlel jiñi reyob tiʼ petol pañimil chaʼan miʼ tempañob ti jiñi guerra chaʼan bʌ jiñi ñuc bʌ i qʼuiñilel Dios, jiñi Mach bʌ añic i pʼisol i pʼʌtʌlel.
15 «¡Ubin! Mi caj c tilel bajcheʼ juntiquil xujchʼ. Tijicña jiñi cañal bʌ i wut* miʼ yajñel yicʼot lʌpʌl i chaʼan i pislel, chaʼan mach chacalic miʼ yajñel i maʼañic miʼ yubin quisin tiʼ tojlel lac piʼʌlob».
16 I tsiʼ tempayob jiñi reyob ti jiñi ajñibʌl i cʼabaʼ Armagedón* ti jiñi tʼan hebreo.
17 Jiñi i sietejlel ángel tsiʼ beqʼue ti icʼ jiñi i bʌl i colem tsima. Cheʼ jiñi, tsaʼ loqʼui cʼam bʌ tʼan yaʼ ti chʼujul bʌ ajñibʌl, cʼʌlʌl yaʼ ti trono, i tsiʼ yʌlʌ: «¡Tsaʼix ujti!».
18 I tsaʼ caji ti loqʼuel i cʼʌcʼal chajc, tʼan tac yicʼot chajc tac, i tsaʼ ujti jumpʼejl tsʌts bʌ yujquel maʼañic bʌ baʼ ujtem cʼʌlʌl bajcheʼ tsaʼ mejli jiñi wiñic wʌʼ ti pañimil. Wen pʼʌtʌl yicʼot wen ñuc jiñi yujquel.
19 Jiñi colem tejclum tsaʼ tʼoxle ti uxpʼejl i jiñi alʌ tejclum am bʌ yaʼ ti ñuqui tejclum tac tsaʼ jili, i Dios tsaʼ cʼajtiyi i chaʼan jiñi Ñuc bʌ Babilonia chaʼan miʼ yʌqʼuen i jap jiñi copa chaʼan bʌ vino butʼul bʌ ti ñuc bʌ i michʼajel.
20 Cheʼ jaʼel, tsaʼ putsʼi pejtelel jiñi isla i jiñi wits tac tsaʼ sʌc jili.
21 Cheʼ jiñi yaʼ ti panchan tsaʼ yajli tilel ñuqui tuñijaʼ tiʼ tojlel lac piʼʌlob, jujumpʼejl tuñijaʼ lʌcʼʌ jumpʼejl talento* i yʌlel. I jiñi lac piʼʌlob tsiʼ chaʼleyob tʼan tiʼ contra Dios tiʼ caj jiñi wocol chaʼan bʌ tuñijaʼ, come wen ñuc jiñi wocol.
Nota tac
^ O «pʌcʼmeñal».
^ Qʼuele jiñi Glosario.
^ Qʼuele jiñi Glosario, chaʼ ñaʼtan a bʌ.
^ O «yaʼ ti este».
^ O «señal tac».
^ O «pʼixil bʌ».
^ Ti griego, Har Maguedṓn. Tilem ti jumpʼejl tʼan am bʌ ti hebreo yom bʌ i yʌl ‹wits am bʌ ti Meguidó›.
^ Talento woliʼ taj ti tʼan taqʼuin i an 20.4 kilo i yʌlel.
