Apocalipsis 20:1-15
20 Tsaʼ j qʼuele juntiquil ángel woli bʌ i jubel tilel ti panchan chucul i chaʼan i llavejlel jiñi abismo* yicʼot jumpʼejl colem cadena.
2 Tsiʼ chucu jiñi dragón, jiñi wajalix bʌ lucum, ili jiñʌch jiñi Diablo yicʼot Satanás, i tsiʼ cʌchʌ mil jab.
3 I tsiʼ choco ochel yaʼ ti abismo, yaʼ baqui tsiʼ ñupʼu, i tsiʼ yʌqʼue i sellojlel jiñi i puertajlel chaʼan maʼañic miʼ chaʼ lotin jiñi tejclum jinto miʼ yujtel jiñi mil jab. Cheʼ jiñi yom miʼ chaʼ jumucʼ cojlel.
4 Tsaʼ j qʼuele trono tac, i jiñi buchuloʼ bʌ yaʼi tsaʼ aqʼuentiyob i yeʼtel chaʼan miʼ chaʼleñob meloñel. Cheʼʌchi, tsaʼ j qʼuelbeyob i chʼichʼel jiñi tsaʼ bʌ tsʌnsʌntiyob tiʼ caj tsiʼ yʌcʼʌyob ti cʌñol i chaʼan bʌ Jesús yicʼot chaʼan tiʼ subuyob i chaʼan bʌ Dios, jiñi maʼañic bʌ tsiʼ chʼujutesayob jiñi jontol bʌ bʌteʼel yicʼot i yejtal i maʼañic tsaʼ aqʼuentiyob i marcajlel tiʼ pamob yicʼot tiʼ cʼʌbob. Iliyob tsaʼ chaʼ cuxtʌyiyob i tsiʼ chaʼleyob yumʌntel mil jab yicʼotob Cristo.
5 Ili jiñʌch jiñi ñaxam bʌ chaʼ chʼojyel.* (Jiñi yambʌ xchʌmelob maʼañic tsaʼ cuxtʌyiyob jinto tsaʼ tsʼʌctiyi jiñi mil jab).
6 Tijicña yicʼot chʼujul jiñi tsaʼ bʌ i taja jiñi ñaxam bʌ chaʼ chʼojyel, jiñi i chaʼyajlel bʌ chʌmel maʼañic i pʼʌtʌlel tiʼ tojlelob, mi caj i sujtelob tiʼ sacerdote Dios yicʼot tiʼ chaʼan Cristo, i mi caj i chaʼleñob yumʌntel mil jab yicʼot.
7 Pero cheʼ bʌ ujtemix jiñi mil jab, Satanás mi caj i cojlel yaʼ baqui ñupʼul
8 mi caj i loqʼuel chaʼan miʼ lotin jiñi tejclum tac am bʌ tiʼ chʌmpʼejlel i xujc pañimil, Gog yicʼot Magog, chaʼan miʼ tempañob ti jiñi guerra. Cheʼ yonlelob bajcheʼ i jiʼil mar.
9 Iliyob tsiʼ xʌñʌyob tiʼ petol pañimil i tsiʼ joyoyob baqui chumulob jiñi chʼujuloʼ bʌ yicʼot jiñi cʼuxbibil bʌ tejclum. Pero tsaʼ jubi tilel cʼajc ti panchan i tsiʼ jisayob.
10 Jiñi Diablo, tsaʼ bʌ i lotiyob, tsaʼ chojqui ochel yaʼ ti cʼajc yicʼot bʌ azufre, yaʼ baqui yaʼix an jiñi jontol bʌ bʌteʼel yicʼot jiñi xlot bʌ xʼaltʼan. Mi caj i yʌqʼuentelob i ñusan wocol* ti qʼuiñil yicʼot ti acʼʌlel tiʼ pejtelel ora.
11 Tsaʼ j qʼuele jumpʼejl ñuc bʌ trono sʌsʌc bʌ yicʼot jiñi buchul bʌ yaʼi. Jiñi pañimil yicʼot panchan tsaʼ putsʼiyob tiʼ tojlel i maʼañix tsaʼ chʌn qʼuejliyob.
12 I tsaʼ j qʼuele jiñi chʌmeñoʼ bʌ, jiñi ñucoʼ bʌ yicʼot jiñi mach bʌ ñucobic, waʼalob tiʼ tojel jiñi trono, i tsaʼ jajmi bʌlbil tac bʌ jun. Pero tsaʼ jajmi yambʌ bʌlbil bʌ jun: Jiñi bʌlbil bʌ jun chaʼan bʌ cuxtʌlel. I cheʼ bajcheʼ tsʼijbubil yaʼi, tsaʼ ujti meloñel tiʼ tojlel jiñi chʌmeñoʼ bʌ chaʼan chuqui tac tsiʼ meleyob.
13 Jiñi mar tsiʼ yʌcʼʌ jiñi yaʼ bʌ tsaʼ chʌmiyob, jiñi chʌmel yicʼot jiñi Mucoñibʌl* tsiʼ yʌcʼʌyob jiñi xchʌmelob añoʼ bʌ yaʼi. I jujuntiquil tsaʼ ujti meloñel tiʼ tojlelob chaʼan chuqui tac miʼ melob.
14 Jiñi chʌmel yicʼot jiñi Mucoñibʌl* tsaʼ chojqui ochel yaʼ ti cʼajc. Jiñi cʼajc yom i yʌl jiñi i chaʼyajlel bʌ chʌmel.
15 Cheʼ jaʼel, tsaʼ chojquiyob ochel yaʼ ti cʼajc jiñi mach bʌ tsʼijbubilobic i cʼabaʼ yaʼ ti libro chaʼan bʌ cuxtʌlel.
Nota tac
^ Qʼuele jiñi Glosario.
^ O «tejchel»
^ O «ñujpʼelob».
^ O «jiñi Hades». Yom i yʌl, jumpʼejl ajñibʌl muʼ bʌ i cʼʌjñel ti lajintel baqui miʼ cʼaj i yo jiñi chʌmeñoʼ bʌ. Qʼuele jiñi Glosario, mucoñibʌl.
^ O «jiñi Hades». Yom i yʌl, jumpʼejl ajñibʌl muʼ bʌ i cʼʌjñel ti lajintel baqui miʼ cʼaj i yo jiñi chʌmeñoʼ bʌ. Qʼuele jiñi Glosario, mucoñibʌl.
