Apocalipsis 7:1-17
7 Cheʼ jiñi, tsaʼ j qʼuele chʌntiquil ángelob waʼaloʼ bʌ tiʼ chʌmpʼejlel i xujc pañimil. Woliʼ chucob jiñi icʼ tac tilem bʌ tiʼ chʌmpʼejlel i xujc pañimil chaʼan maʼañic miʼ ñumel ti pañimil mi yaʼicto ti mar mi ti juntejquicto teʼ.
2 Tsaʼ j qʼuele jaʼel yambʌ ángel woli bʌ i letsel tilel cʼʌlʌl tiʼ pasibal qʼuin,* woliʼ chʼʌm majlel i sello jiñi cuxul bʌ Dios, i cʼam tsiʼ yota jiñi chʌntiquil ángelob tsaʼ bʌ aqʼuentiyob i ticʼlan jiñi pañimil yicʼot jiñi mar.
3 Tiʼ subeyob: «¡Mach laʼ ticʼlan jiñi pañimil, jiñi mar mi jiñicto jiñi teʼ tac jinto mi la cʌqʼueñob i sellojlel tiʼ pam jiñi xyaj eʼtelob i chaʼan lac Dios!».
4 I tsaʼ cubi jaytiquilob jiñi añoʼ bʌ i chaʼan jiñi sello: 144 mil, loqʼuemoʼ bʌ tiʼ pejtelel i pʼolbal jiñi i yalobilob Israel.
5 Tiʼ pʼolbal Judá, an 12 mil añoʼ bʌ i sellojlel,tiʼ pʼolbal Rubén, an 12 mil,tiʼ pʼolbal Gad, an 12 mil,
6 tiʼ pʼolbal Aser, an 12 mil,tiʼ pʼolbal Neftalí, an 12 mil,tiʼ pʼolbal Manasés, an 12 mil,
7 tiʼ pʼolbal Simeón, an 12 mil,tiʼ pʼolbal Leví, an 12 mil,tiʼ pʼolbal Isacar, an 12 mil,
8 tiʼ pʼolbal Zabulón, an 12 mil,tiʼ pʼolbal José, an 12 mil,tiʼ pʼolbal Benjamín, an 12 mil añoʼ bʌ i sellojlel.
9 Cheʼ jiñi tsaʼ j qʼuele yonlel lac piʼʌlob maʼañic bʌ miʼ mejlel i tsic mi juntiquilic wiñic. Loqʼuemob ti ñuqui tejclum tac, pʼolbalʌl tac, alʌ tejclum tac yicʼot tʼan tac i waʼalob tiʼ tojel jiñi trono yicʼot tiʼ tojel jiñi Tiñʌmeʼ. Lʌpʌlob i chaʼan pʌl bʌ i pislel sʌsʌc bʌ yicʼot chuculob i chaʼan i cʼʌb tac teʼ.*
10 I woliʼ yʌlob ti cʼam bʌ tʼan: «¡Jiñi laj coltʌntel tilem ti lac Dios, jiñi buchul bʌ yaʼ ti trono, yicʼot tilem ti jiñi Tiñʌmeʼ!».
11 Pejtelel jiñi ángelob waʼalob tiʼ joytʌlel jiñi trono, tiʼ joytʌlel jiñi ancianojob yicʼot tiʼ joytʌlel jiñi chʌntiquil querubiñob, tsiʼ ñocchocoyob i bʌ tiʼ tojel jiñi trono i tsiʼ chʼujutesayob Dios.
12 Tsiʼ yʌlʌyob: «¡Amén! Jiñi lac Dios am bʌ i ñaʼtʌbal yicʼot i pʼʌtʌlel yom miʼ yʌqʼuentel i ñuclel, yom miʼ sujbel ti ñuc i tiʼ pejtelelob yom miʼ qʼuelob ti ñuc yicʼot miʼ yʌqʼueñob wocolix i yʌlʌ tiʼ pejtelel ora. Amén».
13 Cheʼ jiñi, juntiquil ti jiñi ancianojob tsiʼ cʼajtibeyon: «¿Majquiyob jiñi lʌpʌloʼ bʌ i chaʼan pʌl bʌ i pislel sʌsʌc bʌ? ¿I baqui tsaʼ loqʼuiyob?».
14 Jin chaʼan ti ora tsaʼ c jacʼbe: «C Yum, jatetʌch a wujil». Cheʼ jiñi tiʼ subeyon: «Jiñʌch muʼ bʌ i loqʼuelob ti jiñi cabʌl wocol,* tsaʼix i wutsʼuyob jiñi pʌl bʌ i pislelob yicʼot tsaʼix i sʌqʼuesayob tiʼ chʼichʼel jiñi Tiñʌmeʼ.
15 Jin chaʼan yaʼañob tiʼ tojel jiñi i trono Dios i miʼ melbeñob chʼujul bʌ i yeʼtel ti qʼuiñil yicʼot ti acʼʌlel yaʼ tiʼ templo. I jiñi yaʼ bʌ buchul ti trono mi caj i mel jumpʼejl pisil bʌ otot chaʼan miʼ cʌntañob.
16 Maʼañix mi caj i ñusañob wiʼñal yicʼot tiquin tiʼ, mi muqʼuicto caj i ticʼlañob jiñi i ticwʌlel qʼuin yicʼot cʌlʌx ticwal.
17 Come jiñi Tiñʌmeʼ, yaʼ bʌ an tiʼ yojlil jiñi trono, mi caj i cʌntañob bajcheʼ xcʌnta tiñʌmeʼ i mi caj i pʌyob majlel baqui miʼ loqʼuel cuxul bʌ jaʼ muʼ bʌ i yʌcʼ cuxtʌlel. I Dios mi caj i sujcubeñob pejtelel i yaʼlel i wut».
Nota tac
^ O «ti este».
^ Ili i cʼʌb tac teʼ lajalʌch bajcheʼ i yopol tac chʼib.
^ Qʼuele jiñi Glosario.
