Efesios 3:1-21
3 Jin chaʼan, joñon, Pablo, xcʌjchelon come i chaʼañon Cristo Jesús yicʼot tiʼ caj woli j coltañetla jatetla, mach bʌ judíojeticla...
2 Mi cʌl tsaʼix laʼ wubi chaʼan tsaʼ aqʼuentiyon tic wenta chaʼan mij coltañetla laʼ taj laʼ wenlel ti jiñi ñuc bʌ i yutslel Dios,
3 cheʼʌchi, Dios tsiʼ yʌqʼueyon j cʌn jiñi chʼujul bʌ tʼan mucul bʌ, cheʼ bajcheʼ tsaʼix c tsʼitaʼ tsʼijbubeyetla ti ñaxan.
4 Jin chaʼan, cheʼ bʌ mi laʼ pejcan iliyi, mi caj laʼ cʌn chaʼan mucʼʌch c chʼʌmben i sujm jiñi chʼujul bʌ tʼan mucul bʌ tiʼ tojlel Cristo.
5 Ili mucul bʌ maʼañic tsaʼ aqʼuentiyob i cʌn jiñi quixtañujob ti wajali cheʼ bajcheʼ wʌle tsaʼix i yʌqʼueyob i cʌn jiñi chʼujuloʼ bʌ i yapóstolob yicʼot xʼaltʼañob tiʼ coltaya jiñi espíritu:
6 Chaʼan jiñi mach bʌ judíojobic, come temelob yicʼot Cristo Jesús i wocolix i yʌlʌ jiñi wen tʼan mi caj i yʌqʼuentelob jaʼel jiñi muʼ bʌ caj i yʌqʼuentel Cristo, junmojt jax mi caj i sujtelob yicʼot mi caj i yʌqʼuentelob jaʼel jiñi tsaʼ bʌ wʌn subentiyonla.
7 Chaʼan jiñi wen ñuc bʌ i yutslel Dios tsaʼ sujtiyon bajcheʼ juntiquil xyaj eʼtel i chaʼan ili mucul bʌ. Jin tsiʼ yʌqʼueyon ili majtañʌl tiʼ coltaya i pʼʌtʌlel.
8 Joñon, mach bʌ ñoj ñuquic j cʼʌjñibal bajcheʼ pejtelel jiñi chʼujuloʼ bʌ, tsaʼ aqʼuentiyon jiñi ñuc bʌ i yutslel Dios chaʼan mic subeñob mach bʌ judíojobic jiñi wen tʼan chaʼan bʌ jiñi i bendición tac Cristo mach bʌ añic i tsicol,
9 i chaʼan mi cʌqʼuen i qʼuel jiñi lac piʼʌlob bajcheʼ Dios woliʼ yʌcʼ ti cʌñol jiñi chʼujul bʌ tʼan mucul bʌ, jiñʌch tsaʼ bʌ i mele pejtelel chuqui an.
10 Tsaʼ ujti iliyi chaʼan ili ora jiñi yumʌlob yicʼot añoʼ bʌ i yeʼtel ti panchan miʼ cʌñob tiʼ tojlel congregación jiñi i ñaʼtʌbal Dios tiʼ chajp tiʼ chajp.
11 Ili miʼ taj i bʌ yicʼot jiñi wʌn ñaʼtʌbil bʌ i chaʼan muʼ bʌ i jalijel tiʼ pejtelel ora tsaʼ bʌ i waʼchoco tiʼ tojlel Cristo, jiñi lac Yum Jesús.
12 Tiʼ tojlel, libre mi lac chaʼlen tʼan i maʼañic chuqui miʼ mʌctañonla chaʼan miʼ mejlel lac lʌcʼtesan lac bʌ ti Dios, come mi lac ñop tiʼ tojlel Cristo.
13 Jin chaʼan, mic subeñetla chaʼan mach yomic mi laʼ cʼuñʼan tiʼ caj jiñi wocol tac muʼ bʌ c ñusan ti laʼ tojlel, come iliyi miʼ yʌqʼueñetla laʼ taj laʼ ñuclel.
14 Jin chaʼan mic ñocchocon c bʌ tiʼ tojlel jiñi lac Tat,
15 come jiñʌch tsaʼ bʌ i mele pejtelel familia am bʌ ti panchan yicʼot ti lum.
16 Mij cʼajtin ti oración chaʼan, tiʼ tojlel jiñi cabʌl bʌ i ñuclel, miʼ pʼʌtʼesan laʼ pusicʼal tiʼ pʼʌtʌlel jiñi i yespíritu
17 yicʼot chaʼan, tiʼ tojlel jiñi laʼ ñopoñel, jiñi Cristo miʼ yajñel ti laʼ pusicʼal yicʼot cʼuxbiya. Mij cʼajtin ti oración jaʼel chaʼan wen xucʼuletla yicʼot tsʌts chuculetla yaʼ baqui chucul laʼ ñopoñel,
18 chaʼan laʼ wicʼot pejtelel jiñi chʼujuloʼ bʌ chajpʌbiletla chaʼan wen mi laʼ chʼʌmben i sujm i pochtʌlel, i ñajtlel, i chanlel yicʼot i tamlel,
19 yicʼot chaʼan mi laʼ cʌn jiñi i cʼuxbiya Cristo ñumen ñuc bʌ bajcheʼ chuqui tac la cujil bʌ, chaʼan mi laʼ bujtʼesʌntel tiʼ pejtelel chuqui tac wem bʌ muʼ bʌ i yʌcʼ Dios.
20 Wʌle, jiñi muʼ bʌ i cʼʌn i pʼʌtʌlel, woli bʌ i mel i yeʼtel ti lac tojlel, ñumento miʼ mejlel i mel cheʼ bajcheʼ pejtelel chuqui mi laj cʼajtiben o chuqui mi lac ñaʼtan,
21 laʼ aqʼuentic i ñuclel tiʼ tojlel jiñi congregación yicʼot tiʼ tojlel Cristo Jesús tiʼ pejtelel ora. Amén.
