Filipenses 1:1-30
1 I chaʼan Pablo yicʼot Timoteo, xyaj eʼteloʼ bʌ i chaʼan Cristo Jesús, tiʼ tojlel pejtelel jiñi chʼujuloʼ bʌ xcʌntʼañob i chaʼan Cristo Jesús ti Filipos yicʼot jiñi superintendentejob yicʼot siervo ministerialob:
2 Tajala jiñi ñuc bʌ i yutslel yicʼot i ñʌchʼtʌlel Dios jiñi lac Tat yicʼot jiñi i chaʼan lac Yum Jesucristo.
3 Tiʼ pejtelel ora mi cʌqʼuen wocolix i yʌlʌ c Dios cheʼ bʌ mij cʼajtesañetla,
4 ti jujumpʼejl coración muʼ bʌ c mel ti wocol tʼan ti laʼ tojlel. Yicʼot c tijicñʌyel mic mel iliyi,
5 chaʼan bajcheʼ an laʼ chaʼle coltaya tiʼ subol jiñi wen tʼan cheʼ bʌ tsaʼ tejchi cʼʌlʌl ili ora.
6 Come tiʼ sujm mic ñop iliyi: Jiñi tsaʼ bʌ i teche jumpʼejl wem bʌ eʼtel ti laʼ tojlel mi caj i bej mel jinto miʼ yujtesan cheʼ tiʼ qʼuiñilel Cristo Jesús.
7 Weñʌch cheʼ cheʼ mic ñaʼtan ti laʼ tojlel bajcheʼ jiñi, come añetla tic pusicʼal. Ti laʼ pejtelel tsaʼ laʼ coltayon cheʼ bʌ añon ti cárcel, yicʼot tiʼ coltaya jiñi mandar, chaʼan maʼañic chuqui miʼ mʌctan chaʼan miʼ sujbel jiñi wen tʼan. Cheʼ bajcheʼ jiñi tsaʼ lac tem taja jiñi ñuc bʌ i yutslel Dios.
8 Dios c testigojʌch chaʼan mic wen ñaʼtañetla yicʼot chaʼan mij cʼuxbiñetla cheʼ bajcheʼ miʼ cʼuxbiñetla Cristo Jesús.
9 Ili jiñʌch muʼ bʌ c chʌn cʼajtin ti coración: Chaʼan jiñi laʼ cʼuxbiya yicʼot tsʼʌcʌl bʌ laʼ ñaʼtʌbal yicʼot muʼ bʌ laʼ wen chʼʌmben i sujm miʼ ñumen pʼojlel majlel,
10 chaʼan mi laʼ qʼuel chuqui tac jiñi ñumen ñuc bʌ i cʼʌjñibal chaʼan mach wis añic mach bʌ weñic ti laʼ tojlel i maʼañic mi laʼ wʌcʼ ti yajlel yambʌlob cʼʌlʌl tiʼ qʼuiñilel Cristo
11 yicʼot chaʼan butʼuletla ti toj bʌ laʼ melbal, muʼ bʌ i tilel tiʼ coltaya Jesucristo, chaʼan miʼ yʌqʼuentel i ñuclel yicʼot miʼ cʼʌyintel Dios.
12 Hermanojob, com mi laʼ ñaʼtan chaʼan ili woli bʌ c ñusan coltʌbil i chaʼan chaʼan miʼ pujquel jiñi wen tʼan,
13 come pejtelel jiñi xcʌntayajob i chaʼan jiñi rey yicʼot pejtelel jiñi yambʌlob yujilob chaʼan tiʼ caj Cristo cʌchʌlon ti cadena.
14 I wʌleʼli, lʌcʼʌ tiʼ pejtelel jiñi hermanojob ti lac Yum tsaʼ ñumen pʼʌtʼayob tiʼ caj cʌchʌlon i wolito i ñumen pʌsob i chʼejlel* chaʼan maʼañobic i bʌqʼuen miʼ subob jiñi i tʼan Dios.
15 I sujmʌch chaʼan an woli bʌ i subob jiñi wen tʼan tiʼ tojlel Cristo tiʼ caj i tsʌytsʌyñiyelob i pusicʼal yicʼot tiʼ caj miʼ contrajiñob i bʌ, pero an yambʌlob muʼ bʌ i melob come añʌch chuqui wem bʌ miʼ ñijcʌbeñob i pusicʼal.
16 Ili wiʼilobix bʌ woliʼ subob tiʼ tojlel Cristo come miʼ cʼuxbiñob, come yujilob chaʼan tsaʼ waʼchocontiyon chaʼan mij coltan jiñi wen tʼan,
17 pero jiñi yambʌlob chaʼan jach miʼ techob wocol miʼ melob, maʼañic chuqui wem bʌ woliʼ ñijcʌbeñob i pusicʼal, come miʼ ñopob i yʌqʼueñoñob wocol cheʼ bʌ cʌchʌlonto ti cadena.
18 ¿Chuqui woliʼ tajob? Chaʼan, mach yʌlʌyic mi an chuqui wem bʌ woliʼ ñijcʌbeñob i pusicʼal o mach cheʼiqui, woliʼ sujbel tiʼ tojlel Cristo, i jiñi miʼ yʌqʼueñon c tijicñʌyel. Tiʼ sujm mi caj c bej ubin c tijicñʌyel
19 come cujil chaʼan jiñi muʼ bʌ caj c taj jiñʌch jiñi j coltʌntel tiʼ caj jiñi laʼ woración muʼ bʌ laʼ mel ti wocol tʼan yicʼot tiʼ coltaya jiñi i yespíritu Jesucristo.
20 Ili lajalʌch yicʼot jiñi com bʌ i lajalʌch yicʼot jiñi c pijtaya chaʼan maʼañic chucoch mi caj c wis ubin quisin. Cujil chaʼan maʼañic chuqui mi caj i mʌctañon chaʼan mic bej chaʼlen tʼan i cheʼ bajcheʼ jiñi mi cʌqʼuen i ñuclel Cristo tic bʌcʼtal, cheʼ bajcheʼ melbil c chaʼan tiʼ pejtelel ora, mach yʌlʌyic mi cuxulon o mi chʌmeñon.
21 Come, tic tojlel, mi cuxulon i chaʼañoñʌch Cristo i mi tsaʼ chʌmiyon tsaʼix c mʌlʌ.*
22 Pero mi yom bej cuxulon ti ili c bʌcʼtal, jiñi* i wutʌch queʼtel. Pero maʼañic mi cʌcʼ ti cʌñol chuqui mic yajcan.
23 Tʼoxolon mi cubin c bʌ ti ili chaʼchajp, com cheʼ librejoñix i mi cajñel quicʼot Cristo, tiʼ sujm jiñʌch jiñi ñumen wem bʌ.
24 Pero, chaʼan laʼ wenlel, ñumen ñuc i cʼʌjñibal cheʼ cuxulonto ti ili c bʌcʼtal.
25 Jin chaʼan, come mucʼʌch c ñop iliyi, cujil chaʼan bej cuxulto mi caj cajñel i mi caj c bej ajñel quicʼotetla chaʼan mi laʼ colel majlel yicʼot tijicñayetla ti laʼ ñopoñel,
26 i cheʼ bajcheʼ jiñi mi laʼ wen ubin laʼ tijicñʌyel ti Cristo Jesús tij caj cheʼ bʌ yaʼix chaʼ añon quicʼotetla.
27 Chaʼan jach yom wen mi laʼ mel laʼ bʌ cheʼ bajcheʼ yom chaʼan jiñi wen tʼan tiʼ tojlel Cristo, chaʼan cheʼ bʌ mic majlel j qʼueletla o cheʼ bʌ mach yaʼic añon, xucʼul mi laʼ wajñel, jumpʼejl jach laʼ ñaʼtʌbal, temel mi laʼ wajñel yicʼot jumpʼejl jach laʼ pusicʼal chaʼan mi laʼ chʌn ñop ti jiñi wen tʼan
28 i maʼañic mi laʼ wis bʌcʼñan jiñi laʼ contrajob. Ili miʼ pʌs chaʼan mi caj i jisʌntelob pero jatetla mi caj laʼ coltʌntel, iliyi tilemʌch ti Dios.
29 Come jatetla mach tsaʼic jach aqʼuentiyetla jiñi majtañʌl chaʼan mi laʼ wʌcʼ laʼ ñopoñel tiʼ tojlel Cristo, yicʼotʌch chaʼan mi laʼ ñusan wocol tiʼ caj.
30 Jin chaʼan woli laʼ ñusan jiñi wocol tsaʼ bʌ laʼ qʼuele tsaʼ c ñusa, i cheʼ bajcheʼ laʼ wujilix, wolito c bej ñusan.
