Hebreos 2:1-18
2 Jin chaʼan, pejtelel jiñi tsaʼix bʌ la cubi yom mi lac ñumen ñaʼtan i mach cheʼic jach bajcheʼ ñʌmʌlonla chaʼan maʼañic mi laj cʌy jiñi lac ñopoñel.
2 Come mi i sujmʌch pejtelel tsaʼ bʌ i subuyob jiñi ángelob i pejtelel tsaʼ bʌ i ñusayob jiñi mandar yicʼot jiñi xñusatʼañob tsaʼʌch aqʼuentiyob i toj i mul cheʼ bajcheʼ yom,
3 ¿bajcheʼ mi caj lac putsʼtan joñonla mi maʼañic mi laj cʌntan jiñi wen ñuc bʌ laj coltʌntel? Come jiñi lac Yum jiñʌch jiñi tsaʼ bʌ i ñaxan subu i jiñi tsaʼ bʌ i yubiyob tsiʼ pʌsbeyoñobla chaʼan i sujmʌch,
4 ti jin jach bʌ ora jaʼel Dios tsiʼ yʌcʼʌ ti cʌñol tiʼ melol milagro tac, tiʼ melol chuqui ñuc tac bʌ yicʼot cheʼ bʌ tsiʼ tʼoxo jiñi chʼujul bʌ i yespíritu cheʼ bajcheʼ yom.
5 Come maʼañic tsiʼ yʌqʼue tiʼ wenta ángelob jiñi pañimil muʼto bʌ caj i tilel muʼ bʌ lac sub.
6 Pero junsujtel juntiquil wiñic tsiʼ yʌlʌ: «¿Chuquiyes jiñi wiñic chaʼan maʼ cʼajtesan? ¿O chuquiyes jiñi i yalobil wiñic chaʼan maʼ cʌntan?
7 Jatet mach wen ñuquic tsaʼ wʌcʼʌ bajcheʼ jiñi ángelob, tsaʼ wʌqʼue jiñi corona chaʼan bʌ ñuclel, i tsaʼ wʌqʼue tiʼ wenta pejtelel chuqui tsaʼ mele.
8 Tsaʼ wʌqʼue tiʼ yebal i yoc pejtelel chuqui an». Cheʼ bʌ Dios tsiʼ yʌqʼue tiʼ wenta pejtelel chuqui an, maʼañic chuqui mach bʌ añic tsiʼ yʌqʼue tiʼ wenta. Anquese maxto añic mi lac taj laj qʼuel chaʼan añix tiʼ wenta pejtelel chuqui an,
9 muqʼuix laj qʼuel Jesús, mach bʌ wen ñuquic tsaʼ ajqʼui bajcheʼ jiñi ángelob, tsaʼix aqʼuenti jiñi corona chaʼan bʌ ñuclel come tsiʼ ñusa wocol jinto tsaʼ chʌmi, come chaʼan jiñi ñuc bʌ i yutslel Dios tsaʼ chʌmi chaʼañonla ti lac pejtelel.
10 Pejtelel chuqui an chaʼañʌch i ñuclel Dios, i an come jiñʌch tsiʼ mele. Jin chaʼan, Dios weñʌch tsiʼ qʼuele cheʼ miʼ ñusan wocol jiñi Waʼchocobil bʌ chaʼan miʼ yʌcʼ coltʌntel chaʼan miʼ mejlel i yʌqʼuen i ñuclel cabʌl i yalobilob. Cheʼ bajcheʼ ili chajpʌbilix chaʼan miʼ coltañob.
11 Come jiñi woli bʌ ti sʌqʼuesaya yicʼot jiñi woli bʌ i sʌqʼuesʌntelob, junsujm jach baqui tilemob. Jin chaʼan, maʼañic miʼ quisñin i subeñob tiʼ yermañu
12 cheʼ bʌ miʼ yʌl: «Mi caj c suben a cʼabaʼ jiñi quermañujob, yicʼot cʼay tac mi caj cʌqʼueñet a ñuclel yaʼ ti congregación».
13 Miʼ yʌl jaʼel: «Mi caj cʌcʼ c ñopoñel tiʼ tojlel». I miʼ bej al: «¡Qʼuelela! Joñon yicʼot jiñi calobilob tsaʼ bʌ i yʌqʼueyon Jehová».*
14 Jin chaʼan, come ili «i yalobilob» añob i bʌquel yicʼot i bʌcʼtal, tsaʼ sujti ti am bʌ i bʌcʼtal yicʼot i bʌquel jaʼel, chaʼan cheʼ bʌ miʼ chʌmel miʼ mejlel i jisan jiñi muʼ bʌ i mejlel i yʌcʼ chʌmel, ili jiñʌch jiñi Diablo,
15 yicʼot chaʼan miʼ col pejtelel jiñi lajaloʼ bʌ bajcheʼ xyaj eʼtel cʼʌlʌl ti wajali tiʼ caj miʼ bʌcʼñañob chʌmel.
16 Come tiʼ sujm maʼañic tsaʼ tili i coltan ángelob, tsaʼ tili i coltan jiñi i pʼolbal Abrahán.
17 Jin chaʼan, cʼʌñʌlʌch tsaʼ sujti bajcheʼ jiñi i «yermañujob» yicʼot miʼ ñusan jiñi muʼ bʌ i ñusañob, chaʼan miʼ sujtel ti ñumen ñuc bʌ sacerdote yujil bʌ pʼuntaya yicʼot xucʼul bʌ tiʼ chaʼan bʌ Dios, yicʼot chaʼan miʼ mejlel i yʌcʼ jumpʼejl majtañʌl chaʼan miʼ ñusʌbentelob i mul jiñi lac piʼʌlob i miʼ chaʼ utsʼañob yicʼot Dios.
18 Chajpʌbil chaʼan miʼ coltan jiñi muʼ bʌ i qʼuelbentelob i pusicʼal come tsiʼ ñusa wocol cheʼ bʌ tsaʼ qʼuelbenti i chaʼan jaʼel.
Nota tac
^ Qʼuele jiñi Glosario.
