Hebreos 3:1-19
3 Jin chaʼan, chʼujul bʌ hermanojob, pʌybiletbʌla chaʼan mi laʼ majlel ti panchan, wen ñaʼtanla tiʼ tojlel jiñi muʼ bʌ lac sub bajcheʼ apóstol yicʼot ñumen ñuc bʌ sacerdote: Jesús.
2 Xucʼul tsaʼ ajñi tiʼ tojlel jiñi tsaʼ bʌ i waʼchoco, cheʼ bajcheʼ xucʼul tsaʼ ajñi Moisés tiʼ yotot Dios.
3 Jesús yom miʼ ñumen aqʼuentel i ñuclel bajcheʼ Moisés, come jiñi xmel otot ñumen an i ñuclel bajcheʼ jiñi otot.
4 I sujmʌch, pejtelel ototʌl añʌch majqui tsiʼ mele, pero jiñi tsaʼ bʌ i mele pejtelel chuqui tac an jiñʌch Dios.
5 Weno, Moisés xucʼul tsaʼ ajñi bajcheʼ xʼeʼtel yaʼ tiʼ yotot Dios, iliyi tsaʼ cʼʌjñibʌyi chaʼan miʼ tsictiyel chuqui mi caj i sujbel ti wiʼil,
6 pero Cristo, bajcheʼ i Yalobil Dios, xucʼul tsaʼ ajñi cheʼ bʌ tsiʼ cʌntʌbe i yotot i Tat. I joñonla i yototoñʌchla mi cʼʌlʌl tiʼ yujtibal tsʌtsʌch mi lac chuc lac bʌ ti jiñi lac librejlel chaʼan mi lac chaʼlen tʼan yicʼot ti jiñi lac pijtaya muʼ bʌ i yʌqʼueñonla tijicñʌyel.
7 Jin chaʼan, cheʼʌch bajcheʼ miʼ yʌl jiñi chʼujul bʌ espíritu: «Mi wʌle mucʼʌch laʼ ñʌchʼtʌbeñon c tʼan,
8 mach laʼ tsʌtsʼesan laʼ pusicʼal cheʼ bajcheʼ tsiʼ meleyob jiñi laʼ ñojteʼelob cheʼ bʌ tsiʼ wen acʼʌyoñob ti michʼ i tsiʼ qʼuelbeyoñob c pusicʼal yaʼ tiʼ tiquiñal lum,
9 baqui jiñi laʼ ñojteʼelob tsiʼ qʼueleyob c pusicʼal anquese 40 jab tsiʼ qʼueleyob chuqui tac tsaʼ c mele.
10 Jin chaʼan tsaʼ c tsʼaʼle jiñi quixtañujob añoʼ bʌ ti jiñi bʌ ora i tsaʼ cʌlʌ: ‹Tiʼ pejtelel ora miʼ tʌtsʼob* i pusicʼal tic tojlel i maxto i cʌñʌyobic jiñi c bijlel tac›.
11 Jin chaʼan tic michʼajel tsaʼ cʌcʼʌ c tʼan: ‹Maʼañic mi caj i yochelob tij cʼaj o›».
12 Hermanojob, cʌntan laʼ bʌ ame an juntiquil ti laʼ tojlel muʼ bʌ i tejchel jontol bʌ i pusicʼal yicʼot mach bʌ añic i ñopoñel tiʼ caj miʼ ñajtʼesan i bʌ tiʼ tojlel jiñi cuxul bʌ Dios.
13 Ti jujumpʼejl qʼuin yom mi laʼ tijicñesʌben laʼ bʌ laʼ pusicʼal, cheʼ bʌ anto jiñi i yorajlel cʌmbil bʌ bajcheʼ «wʌle», chaʼan jiñi i pʼʌtʌlel mulil yujil bʌ lot maʼañic majqui miʼ tsʌtsʼesʌben i pusicʼal.
14 Come tiʼ sujm cojach mi caj lac taj muʼ bʌ caj i yʌqʼuentel Cristo mi cʼʌlʌl tiʼ yujtibal tsʌtsʌch mi lac chuc lac bʌ ti jiñi lac ñopoñel am bʌ lac chaʼan ti ñaxan.
15 Cheʼʌch bajcheʼ miʼ yʌjlel: «Mi wʌle mucʼʌch laʼ ñʌchʼtʌbeñon c tʼan, mach laʼ tsʌtsʼesan laʼ pusicʼal cheʼ bajcheʼ tsiʼ meleyob jiñi laʼ ñojteʼelob cheʼ bʌ tsiʼ wen acʼʌyoñob ti michʼ».
16 Come ¿majquiyob jiñi tsaʼ bʌ i ñʌchʼtayob pero tsiʼ wen acʼʌyob ti michʼ? ¿Mach ba jiñobic tsaʼ bʌ loqʼuiyob ti Egipto tiʼ coltaya Moisés?
17 ¿Majquiyob jiñi tsaʼ bʌ tsʼaʼlentiyob ti Dios ti jiñi 40 jab? ¿Mach ba jiñobic tsaʼ bʌ i chaʼleyob mulil, jiñi tsaʼ bʌ chʌmiyob yaʼ tiʼ tiquiñal lum?
18 ¿Majqui jiñi tsaʼ bʌ i subeyob chaʼan maʼañic mi caj i yochelob tiʼ cʼaj o? ¿Mach ba jiñobic tsaʼ bʌ i ñusʌbeyob i tʼan?
19 Jin chaʼan, mi laj qʼuel chaʼan maʼañic tsaʼ mejliyob ti ochel come mach wen añobic i ñopoñel.
Nota tac
^ O «ñajtʼesañob».
