Marcos 4:1-41
-
LAJIYA TAC CHAʼAN BɅ JIÑI YUMɅNTEL (1-34)
-
Jiñi xpacʼ (1-9)
-
Chucoch Jesús tsiʼ cʼʌñʌ lajiya tac tiʼ cʌntesa (10-12)
-
I tsictesʌntel jiñi lajiya chaʼan bʌ jiñi xpacʼ (13-20)
-
Maʼañic miʼ ñujpʼel jumpʼejl candil ti jumpʼejl chiquib (21-23)
-
«Cheʼ bajcheʼ mi laʼ melben yambʌlob» (24, 25)
-
Jiñi xpacʼ muʼ bʌ i wʌyel (26-29)
-
Jiñi i bʌcʼ mostaza (30-32)
-
I cʼʌñol jiñi lajiya tac (33, 34)
-
-
Jesús miʼ ñʌchʼchocon tsʌts bʌ icʼ (35-41)
4 Jesús tsaʼ chaʼ caji ti cʌntesa yaʼ tiʼ tiʼ jiñi mar. Cabʌl quixtañujob tsiʼ tempayob i bʌ yaʼ tiʼ joytʌlel, jin chaʼan tsaʼ letsi ti barco, tsaʼ buchle i tiʼ tsʼitaʼ ñajtʼesa i bʌ. Pero jiñi lac piʼʌlob yaʼ tsaʼ cʌyleyob tiʼ tiʼ jiñi mar.
2 I cabʌl chuqui tsaʼ caji i cʌntesañob yicʼot lajiya tac. Cheʼ bʌ woliʼ cʌntesañob tiʼ subeyob:
3 «Ubinla iliyi: Jiñi wiñic tsaʼ majli ti pʌcʼ trigo.
4 I cheʼ bʌ woliʼ pʌcʼ majlel, an tsaʼ tac bʌ yajli tiʼ tiʼ bij, tsaʼ tili jiñi xmateʼmut tac i tsiʼ bucʼu.
5 An tsaʼ tac bʌ yajli ti xajlelol,* baqui mach cabʌlic i lumil, i ti ora tsaʼ pasi come mach tamic ochem.
6 Pero cheʼ bʌ tsiʼ pulu jiñi qʼuin, tsaʼ tiqui come mach wen tamic ochem i wiʼ.
7 An yan tac bʌ tsaʼ bʌ yajli ti chʼixol, i cheʼ bʌ tsaʼ coli jiñi chʼix maʼañix tsiʼ yʌcʼʌ ti colel, jin chaʼan maʼañic tsiʼ yʌcʼʌ i wut.
8 Pero an yan tac bʌ tsaʼ bʌ yajli ti wem bʌ lum, tsaʼ pasi yicʼot tsaʼ coli i tsaʼ caji i yʌcʼ i wut: An 30 bʌ i ñumelal tsiʼ yʌcʼʌ i wut, an 60 bʌ yicʼot an 100 bʌ».
9 Cheʼ jiñi tsiʼ yʌlʌ: «Jiñi am bʌ i chiquin chaʼan miʼ ñʌchʼtan, laʼ i wen ñʌchʼtan».
10 Pero cheʼ bʌ i bajñel jax, jiñi 12 apóstolob yicʼot jiñi yambʌ xcʌntʼañob yaʼ bʌ añob tiʼ joytʌlel tsaʼ caji i cʼajtibeñob i sujmlel jiñi lajiya tac.
11 Jesús tsiʼ jacʼbeyob: «Jatetla mi laʼ wʌqʼuentel laʼ chʼʌmben i sujm jiñi chʼujul bʌ tʼan mucul bʌ chaʼan jiñi i Yumʌntel Dios. Pero jiñi yambʌlob ti lajiya tac miʼ laj pʌsbentelob
12 chaʼan, anquese miʼ qʼuelob, maʼañic mi caj i cʼotelob i wut, i anquese miʼ yubiñob, maʼañic mi caj i chʼʌmbeñob i sujm. Cheʼ bajcheʼ jiñi maʼañic baʼ ora mi caj i chaʼ sujtelob baʼan Dios i maʼañic mi caj i ñusʌbentelob i mul».
13 Cheʼ jaʼel tiʼ subeyob: «Mi maʼañic mi laʼ ñaʼtʌben i sujmlel ili lajiya, ¿bajcheʼ mi caj laʼ chʼʌmben i sujm pejtelel jiñi yan tac bʌ lajiya?».
14 «Jiñi xpacʼ miʼ pʌcʼ jiñi tʼan.
15 Weno, an pacʼ tac muʼ bʌ i yajlel yaʼ tiʼ tiʼ bij baqui miʼ pʌjqʼuel jiñi i tʼan Dios. Ili jiñobʌch muʼ bʌ i yubiñob, pero ti ora miʼ tilel Satanás i miʼ choc loqʼuel jiñi tʼan tsaʼ bʌ pʌjqʼui tiʼ tojlelob.
16 An muʼ bʌ i pʌjqʼuel ti xajlelol jaʼel. Ili jiñobʌch muʼ bʌ i yubiñob jiñi tʼan i ti ora miʼ jacʼob yicʼot i tijicñʌyel.
17 Pero mach tamic ochem i wiʼ tiʼ tojlelob. Jin chaʼan, anquese mucʼʌch i jumucʼ chaʼleñob wersa, ti ora miʼ yajlelob* cheʼ bʌ miʼ tilel wocol yicʼot contrajintel tiʼ caj jiñi i tʼan Dios.
18 Cheʼ jaʼel, an muʼ bʌ i pʌjqʼuel yaʼ ti chʼixol. Ili jiñʌch muʼ bʌ i yubiñob jiñi tʼan,
19 pero jiñi cʼojol tac* chaʼan ili ora, i mulʌntel chubʌʼañʌl yicʼot i mulʌntel yan tac bʌ chuqui an, miʼ yochel i miʼ tsʌnsan jiñi tʼan, jin chaʼan jiñi wen tʼan maʼañic miʼ yʌcʼ i wut.
20 Ti wiʼil, yaʼan jiñi muʼ bʌ i pʌjqʼuel ti wem bʌ lum. Ili jiñobʌch muʼ bʌ i yubiñob jiñi i tʼan Dios, miʼ jacʼob yicʼot i tijicñʌyel i miʼ yʌcʼ tac i wut: An 30 bʌ i ñumelal miʼ yʌcʼ i wut, an 60 bʌ yicʼot an 100 bʌ».
21 I tiʼ subeyob jaʼel: «Maʼañic miʼ locʼsʌntel jumpʼejl candil chaʼan miʼ ñujpʼel ti chiquib o chaʼan miʼ yʌjqʼuel tiʼ yebal wʌyib, ¿o mucʼʌch? ¿Mach ba añic miʼ locʼsʌntel chaʼan miʼ yʌjqʼuel ti chan bʌ i yajñib?
22 Come maʼañic chuqui mucul bʌ maʼañic bʌ mi caj i tsictiyel yicʼot maʼañic chuqui wen mucbil bʌ mach bʌ añic mi caj i jamʌ pʌstʌl.
23 Pejtelel jiñi am bʌ i chiquin chaʼan miʼ ñʌchʼtan, laʼ i wen ñʌchʼtan».
24 Cheʼ jiñi tiʼ subeyob: «Wʌle wen ñʌchʼtanla chuqui woli c subeñetla. Cheʼ bajcheʼ mi laʼ melben* yambʌlob cheʼʌch mi caj laʼ melbentel jaʼel, i ñumento mi caj laʼ wʌqʼuentel cheʼ bajcheʼ mi laʼ mel.
25 Come jiñi añix bʌ i chaʼan mi caj i ñumen aqʼuentel, pero jiñi maʼañic bʌ i chaʼan mi caj i chilbentel jiñi cojim bʌ an i chaʼan».
26 Tsiʼ bej alʌ: «Jiñi i Yumʌntel Dios lajal bajcheʼ juntiquil wiñic cheʼ baʼ ora miʼ wejchʼun i pacʼ ti lum.
27 Jiñi wiñic miʼ wʌyel ti acʼʌlel i miʼ chʼojyel* ti qʼuiñil. Jiñi i pacʼ miʼ pasel i colem miʼ majlel, anquese mach ñoj yujilic bajcheʼ miʼ yujtel.
28 Jiñi lum cʼunteʼ cʼunteʼ miʼ yʌcʼ i wut: Ñaxan miʼ colel i teʼel, cheʼ jiñi miʼ loqʼuel i ñich, i ti wiʼil miʼ loqʼuel i wut.
29 Cheʼ bʌ cʼʌñix jiñi i wut, jiñi wiñic miʼ cʼʌn jiñi eʼtijib* chaʼan miʼ tsep come tsaʼix cʼoti i yorajlel chaʼan miʼ lot jiñi i pʌcʼʌb».
30 Tsiʼ yʌlʌ: «¿Chuqui miʼ mejlel laj cʼʌn chaʼan mi lac lajin jiñi i Yumʌntel Dios, o chuqui ti lajiya miʼ mejlel laj cʼʌn chaʼan mi lac tsictesan?
31 Lajal bajcheʼ jumpʼejl i bʌcʼ mostaza, cheʼ bʌ miʼ pʌjqʼuel yaʼ ti lum jiñʌch ñumen chut bʌ tiʼ pejtelel jiñi i bʌcʼ chuqui tac an ti lum,
32 pero cheʼ bʌ tsaʼix pʌjqʼui, miʼ colel i miʼ sujtel ti colem teʼ. Wen colem tac i cʼʌb miʼ colel, i cabʌl xmateʼmut miʼ mejlel ti tilel chaʼan miʼ melob i met i chaʼan maʼañic miʼ tajtʌlob ti qʼuin».
33 Tsiʼ wen cʼʌñʌ lajiya tac cheʼ bajcheʼ ili chaʼan miʼ subeñob jiñi wen tʼan, tsiʼ chʼʌmʌ ti ñuc bajcheʼ cʼamel miʼ mejlel i chʼʌmbeñob i sujm.
34 Tiʼ sujm, tiʼ pejtelel ora tsiʼ cʼʌñʌ lajiya tac chaʼan miʼ pejcañob, pero tsiʼ bajñel tsictesʌbeyob i sujmlel jiñi xcʌntʼañob i chaʼan.
35 Ti jimbʌ qʼuin, cheʼ bʌ iqʼuix, tiʼ sube jiñi xcʌntʼañob i chaʼan: «Laʼ cʼaxiconla tiʼ junwejlel jiñi mar».
36 Cheʼ bʌ jiñi xcʌntʼañob tsaʼix i chocoyob sujtel jiñi quixtañujob, tsiʼ pʌyʌyob majlel Jesús ti barco, cheʼʌch bajcheʼ an. I an yan tac bʌ barco yaʼ bʌ majlel yicʼotob.
37 Pero ti ora tsaʼ tili tsʌts bʌ icʼ. Jiñi jaʼ muʼ bʌ i wecʼulan i bʌ woliʼ wen jatsʼ jiñi barco i tsʼitaʼ jax yom chaʼan miʼ bujtʼel ti jaʼ.
38 Pero Jesús wʌyʌl yaʼ tiʼ pat jiñi barco, i cʼʌcʌl i jol ti cʼʌnjol. Jin chaʼan, tsiʼ ñijcayob chʼojyel i tiʼ subeyob: «Maestro, mi caj lon c chʌmel..., ¿mach ba a wentajic?».
39 Cheʼ jiñi tsaʼ chʼojyi, tsiʼ tiqʼui jiñi icʼ i tiʼ sube jiñi mar: «¡Ñʌjchʼen! ¡Chʼabix!». Tsaʼ lajmi jiñi icʼ i tsaʼ laj ñʌjchʼi.
40 Cheʼ jiñi tiʼ subeyob: «¿Chucoch wen woliyetla ti bʌqʼuen? ¿Maxto ba añic mi laʼ ñop?».
41 Cheʼ jiñi, tsaʼ wen cajiyob ti bʌqʼuen i tsaʼ caji i subeñob i bʌ: «¿Pero majqui ili wiñic tiʼ sujm? Jinto jiñi icʼ yicʼot jiñi mar miʼ jacʼbeñob i tʼan».
Nota tac
^ O «tuñil».
^ O «cʌyob jiñi ñopoloʼ bʌ i chaʼan».
^ O «pensal».
^ O «chaʼlen».
^ O «tejchel».
^ O «i troñijib».