Romanos 11:1-36
11 Jin chaʼan, joñon mij cʼajtin: ¿Tsaʼ ba i choco i tejclum jiñi Dios? ¡Maʼañic! Come israelitajon jaʼel, tilemon tiʼ pʼolbal Benjamín, loqʼuem bʌ tiʼ pʼolbal Abrahán.
2 Dios maʼañic tsiʼ choco i tejclum, jiñi tsaʼ bʌ i ñaxan qʼuele. ¿Mach ba laʼ wujilic muʼ bʌ i yʌl tiʼ tojlel Elías jumpʼejl parte yaʼ ti Tsʼijbujel cheʼ bʌ tiʼ subu Israel tiʼ tojlel Dios?
3 «Jehová,* tsaʼix i tsʌnsayob jiñi xʼaltʼañob a chaʼan i tsaʼix i jemeyob jiñi a pulʌntib tac, joñon jax cʌylemon i wʌleʼli woliʼ ñopob i tsʌnsañoñob».
4 Pero ¿bajcheʼ tsiʼ jacʼʌ Dios? «Cʌylemto 7 mil c wiñicob mach bʌ añic tsiʼ ñocchocoyob i bʌ tiʼ tojlel Baal».
5 Cheʼ jaʼel, ili ora an junmojt yajcʌbiloʼ bʌ chaʼan jiñi ñuc bʌ i yutslel Dios.
6 Pero mi yajcʌbilob chaʼan jiñi ñuc bʌ i yutslel Dios, yom i yʌl chaʼan mach yajcʌbilobic chaʼan jiñi i melbalob. Cheʼ chaʼañic jiñi i melbalob, mach chaʼañix jiñi ñuc bʌ i yutslel Dios.
7 Cheʼ jiñi, ¿chuqui mi caj la cʌl? Israel maʼañic tsiʼ taja jiñi woli bʌ i chaʼlen wersa i sʌclan, pero jiñi yajcʌbiloʼ bʌ tsaʼʌch i tajayob. Jiñi yañoʼ bʌ tsaʼ tsʌtsʼayob i pusicʼal,
8 cheʼʌch bajcheʼ tsʼijbubil: «Cʼʌlʌl ili ora, Dios tsiʼ yʌcʼʌ chaʼan miʼ yochelob tam bʌ i wʌyel, tsiʼ yʌqʼueyob i wut pero maʼañic miʼ cʼotelob i wut, i tsiʼ yʌqʼueyob i chiquin pero maʼañic chuqui miʼ yubiñob».
9 David miʼ yʌl jaʼel: «Laʼ sujtic ti jumpʼejl lazo jiñi i mesa, ti jumpʼejl yac, ti junchajp muʼ bʌ i yʌcʼob ti yajlel yicʼot ti junchajp muʼ bʌ i yʌqʼueñob i toj i mul.
10 Laʼ mʌjquicob i wut chaʼan maʼañic miʼ cʼotelob i wut. I acʼʌ chaʼan tiʼ pejtelel ora miʼ cʼuchchocoñob i pat».
11 Jin chaʼan, joñon mij cʼajtin: ¿Tsaʼ ba i jatsʼʌyob i yoc i tsaʼ yajliyob chaʼan maʼañix miʼ mejlelob ti tejchel? ¡Maʼañic! Pero tiʼ caj mach weñic baqui tsiʼ yʌcʼʌyob i yoc, jiñi chʼoyoloʼ bʌ ti yambʌ tejclum tac miʼ mejlel i tajob i coltʌntel, ili chaʼañʌch miʼ techbeñob i michʼajel.
12 Weno, mi chaʼan mach weñic baqui tsiʼ yʌcʼʌyob i yoc yicʼot tiʼ caj tsʼitaʼ jax tsaʼ cʌyleyob miʼ tajob bendición jiñi lac piʼʌlob ti yan tac bʌ tejclum, ¡muʼto caj i ñumen tajob bendición cheʼ bʌ tsʼʌcʌlobix!
13 Wʌleʼli mic subeñetla, jatetla loqʼuemetbʌla ti yambʌ tejclum tac. Apóstolon chaʼan jiñi tejclum tac, jin chaʼan mi cʌqʼuen i ñuclel jiñi c subtʼan
14 chaʼan mij qʼuel mi an bajcheʼ miʼ mejlel c techben i michʼajel jiñi c tejclum yicʼot chaʼan mij coltan chaʼtiqui uxtiquil.
15 Dios tsiʼ chocoyob, cheʼ bajcheʼ jiñi tsiʼ jamʌ jiñi bij chaʼan jiñi yambʌ lac piʼʌlob ti pañimil miʼ chaʼ utsʼañob yicʼot. ¿Bajcheʼ yilal miʼ cajel cheʼ bʌ Dios miʼ chaʼ chʼʌmob? Lajal bajcheʼ miʼ chaʼ cuxtʌyelob anquese chʌmeñob ti ñaxan.
16 Mi chʼujul jiñi ñaxam bʌ junxujtʼ pan muʼ bʌ i yʌjqʼuel, chʼujul jaʼel pejtelel jiñi pan. I mi chʼujul jiñi i wiʼ teʼ, chʼujul jaʼel jiñi i cʼʌb tac.
17 Pero mi jiñi olivo an i cʼʌb tac tsaʼ bʌ jajqui loqʼuel i jatet olivojet bajñel colemet jach bʌ tsaʼ bʌ pʌjqʼuiyet ochel i maʼ taj a wenlel tiʼ wiʼ jiñi olivo,
18 mach a ñaʼtan chaʼan ñumen ñuquet bajcheʼ jiñi i cʼʌb tac. Mi maʼ ñaʼtan chaʼan ñumen ñuquet, cʼajtesan chaʼan mach jatetic chucul a chaʼan jiñi i wiʼ, jin chucul i chaʼañet.
19 Cheʼ jiñi mi caj a wʌl: «An i cʼʌb tac tsaʼ bʌ jajqui loqʼuel chaʼan mic pʌjqʼuel ochel».
20 ¡I sujmʌch! Tsaʼ jajquiyob loqʼuel come maʼañic tsiʼ wen ñopoyob, pero jatet wʌʼañet chaʼan jiñi a ñopoñel. Jin chaʼan, cʌntan a bʌ i mach a qʼuel a bʌ ti ñuc.
21 Come mi Dios maʼañic tsiʼ ñusʌbe i mul jiñi ñoj i cʼʌb bʌ olivo, maʼañic mi caj i ñusan a chaʼan jaʼel.
22 Jin chaʼan, ñaʼtan jiñi i yutslel Dios yicʼot chaʼan tsʌtsʌch miʼ mel i bʌ. Tsʌts miʼ mel i bʌ tiʼ tojlel jiñi tsaʼ bʌ yajliyob, pero miʼ pʌsbeñet i yutslel mi mucʼʌch a chʌn ajñel tiʼ yutslel. Mi maʼañiqui, mi caj a tsejpel loqʼuel.
23 I cheʼʌch tiʼ tojlelob jaʼel, mi mucʼʌch i chaʼ ñopob, mi caj i chaʼ pʌjqʼuelob ochel, come Dios miʼ mejlel i chaʼ pʌcʼob.
24 Come mi jatet tsaʼ tsejpiyet loqʼuel ti jiñi olivo tsaʼ bʌ bajñel coli i tsaʼ pʌjqʼuiyet ochel ti juntejc olivo pʌcʼbil bʌ anquese mach cheʼic ñʌmʌl ti melol, ¡ñumento jiñi ñoj i cʼʌb bʌ jiñi olivo, mi caj i chaʼ pʌjqʼuel ochel yaʼ baqui tsaʼ jajqui loqʼuel!
25 Hermanojob, com mi laʼ ñaʼtan chaʼan Dios muculto i chaʼan iliyi chaʼan mach cʌlʌxic laʼ ñaʼtʌbal mi laʼ mel laʼ bʌ. Tiʼ sujm, jiñi mucul bʌ i chaʼan Dios jiñʌch iliyi: An israelitajob tsaʼ bʌ tsʌtsʼayob i pusicʼal jinto miʼ yochelob jiñi chʼoyoloʼ bʌ ti yambʌ tejclum tac,
26 i cheʼ bajcheʼ jiñi pejtelel Israel mi caj i coltʌntel. Cheʼ bajcheʼ tsʼijbubil: «Jiñi xcoltaya mi caj i loqʼuel ti Sion i mi caj i tʌtsʼ* tiʼ tojlel Jacob pejtelel jiñi mach bʌ weñic.
27 Ili jiñʌch jiñi c trato quicʼotob cheʼ bʌ mic jisʌbeñob i mul».
28 I sujmʌch, i contrajob Dios come tsiʼ chocoyob jiñi wen tʼan, i jatetla mi laʼ taj laʼ wenlel chaʼan jiñi. Pero tiʼ caj jiñi tʼan tsaʼ bʌ i waʼchoco Dios tiʼ tojlel i ñojteʼelob, tsiʼ yajca chaʼtiqui uxtiquil chaʼan miʼ sujtelob tiʼ yamigo.
29 Come Dios maʼañic mi caj i chaʼ ñaʼtan i bʌ chaʼan jiñi majtan tac yicʼot chaʼan majqui tsiʼ pʌyʌ.
30 Ti wajali jatetla maʼañic tsaʼ laʼ jacʼbe i tʼan Dios, pero wʌleʼli tsaʼ pʼuntʌntiyetla tiʼ caj i ñusatʼañob.
31 Cheʼ jaʼel, wʌleʼli tsiʼ chaʼleyob ñusatʼan, i tiʼ caj iliyi tsaʼ pʼuntʌntiyetla, chaʼan wʌleʼli miʼ pʼuntʌntelob jaʼel.
32 Dios tsiʼ yʌcʼʌ chaʼan mi laʼ laj sujtel bajcheʼ xcʌjchelob tiʼ caj laʼ ñusatʼan chaʼan miʼ mejlel i laj pʌsbeñetla jiñi i pʼuntaya.
33 ¡Wen ñuc jax jiñi i bendición tac Dios, maʼañic i pʼisol jiñi i ñaʼtʌbal yicʼot chuqui tac yujil! ¡Maʼañic miʼ mejlel ti laj chʼʌmbentel i sujm bajcheʼ miʼ chaʼlen meloñel yicʼot maʼañic miʼ mejlel lac laj cʌmben jiñi i bijlel!
34 Come «¿majqui tsaʼix cʼoti i cʌmben i ñaʼtʌbal Jehová?* ¿O majqui tsaʼ sujti tiʼ yaj ticʼojel?».
35 O «¿am ba majqui an chuqui tsiʼ ñaxan aqʼue Dios chaʼan wʌleʼli Dios miʼ qʼuextʌben?».
36 Come pejtelel chuqui an tilem ti Dios, jin an tiʼ wenta yicʼot i chaʼañʌch. Laʼ aqʼuentic i ñuclel tiʼ pejtelel ora. Amén.
