Romanos 14:1-23
14 Yom utsʼat mi laʼ chʼʌm jiñi am bʌ i cʼunlel tiʼ ñopoñel, pero mach laʼ chaʼlen meloñel tiʼ tojlelob jiñi qʼuexel bʌ chuqui miʼ ñaʼtañob.
2 Jiñi pʼʌtʌl bʌ i ñopoñel miʼ cʼux baqui jach bʌ bʌlñʌcʼʌl, pero jiñi cʼun bʌ i ñopoñel pimel jach miʼ cʼux.
3 Jiñi muʼ bʌ i cʼux pejtelel chuqui an, laʼ i qʼuel ti ñuc jiñi pimel jach bʌ miʼ cʼux, jiñi pimel jach bʌ miʼ cʼux, laʼ i qʼuel ti ñuc jiñi muʼ bʌ i cʼux pejtelel chuqui an, come Dios utsʼat tsiʼ chʼʌmʌ.
4 ¿Majquiyet chaʼan maʼ chaʼlen meloñel tiʼ tojlel i yaj eʼtel yambʌ? An tiʼ wenta i yum mi waʼal miʼ cʌytʌl o miʼ yajlel. Tiʼ sujm, miʼ mejlel ti ajñel ti wen tiʼ tojlel Jehová* come jin miʼ coltan.
5 Juntiquil wiñic an jumpʼejl qʼuin ñumen ñuc bʌ i cʼʌjñibal miʼ qʼuel, pero jiñi yambʌ junlajal miʼ qʼuel jiñi qʼuin tac. Jujuntiquil yomʌch miʼ wen ñop chuqui miʼ ñaʼtan.
6 Jiñi muʼ bʌ i qʼuel ti ñuc jumpʼejl qʼuin, miʼ qʼuel ti ñuc tiʼ caj Jehová.* Cheʼ jaʼel, jiñi muʼ bʌ i chaʼlen uchʼel tiʼ cajʌch Jehová* miʼ mel come miʼ yʌqʼuen wocolix i yʌlʌ Dios, i jiñi maʼañic bʌ miʼ chaʼlen uchʼel tiʼ cajʌch Jehová* miʼ mel jaʼel, pero mucʼʌch i yʌqʼuen wocolix i yʌlʌ Dios.
7 Tiʼ sujm mi juntiquiloñicla cuxulonla chaʼan bajñel lac ñuclel i mi juntiquiloñicla mi lac chʌmel chaʼan bajñel lac ñuclel.
8 Come mi cuxulonla, cuxulonla chaʼan Jehová,* i mi tsaʼ chʌmiyonla, mi lac chʌmel chaʼan Jehová.* Jin chaʼan, mi cuxulonla o mi lac chʌmel, i chaʼañoñʌchla Jehová.*
9 Come Cristo tsaʼ chʌmi i tsaʼ chaʼ cuxtʌyi chaʼan iliyi: Chaʼan miʼ sujtel tiʼ Yum jiñi chʌmeñoʼ bʌ yicʼot jiñi cuxuloʼ bʌ.
10 Pero ¿chucoch maʼ chaʼlen meloñel tiʼ tojlel a wermañu? ¿O chucoch maʼañic maʼ qʼuel ti ñuc a wermañu? Come ti lac pejtelel mi caj la cajñel tiʼ tojel baqui miʼ chaʼlen meloñel Dios.
11 Come tsʼijbubil: «Miʼ mejlel laʼ ñop chaʼan joñon cuxuloñʌch, cheʼʌch miʼ yʌl Jehová,* tiʼ pejtelelob mi caj i ñocchocoñob i bʌ tic tojlel i tiʼ pejtelelob mi caj i yʌcʼob i tʼan chaʼan xucʼul mi caj i yajñelob tic tojlel».
12 Ti jujuntiquilonla mi caj lac waʼtʌl tiʼ tojlel Dios chaʼan miʼ yujtel meloñel ti lac tojlel chaʼan tsaʼ bʌ lac mele.
13 Jin chaʼan, laʼ laj cʌy meloñel tiʼ tojlel yambʌlob. Yom bʌ mi laʼ mel jiñʌch chaʼan mi laʼ chaʼlen wersa chaʼan maʼañic chuqui miʼ yʌcʼ ti yajlel o miʼ mʌctan juntiquil hermano.
14 Cujil yicʼot mucʼʌch c wen ñop ti lac Yum Jesús chaʼan maʼañic chuqui toj bibiʼix. Cojach cheʼ bʌ juntiquil an chuqui bibiʼ miʼ qʼuel, bibiʼix tiʼ tojlel.
15 Jin chaʼan, mi woli a wʌcʼ ti yajlel jiñi a wermañu tiʼ caj chuqui maʼ cʼux, maʼañix woli a tsajcan jiñi bij chaʼan bʌ cʼuxbiya. Cristo tsaʼix chʌmi tiʼ tojlel, jin chaʼan mach a wʌcʼ ti yajlel tiʼ caj chuqui maʼ cʼux.
16 Jin mecu chaʼan, mach laʼ wʌcʼ ti ajlel mach bʌ weñic tiʼ tojlel chuqui wem bʌ woli laʼ mel.
17 Come mach cʌyʌlic ti chuqui mi laj cʼux o chuqui mi lac jap chaʼan mi lac taj jiñi i Yumʌntel Dios, yaʼʌch cʌyʌl tiʼ melol chuqui toj, ti jiñi ñʌchʼtʌlel yicʼot ti jiñi tijicñʌyel muʼ bʌ i tajtʌl tiʼ coltaya jiñi chʼujul bʌ espíritu.
18 Come jiñi wiñic am bʌ i chaʼan ili melbal tac i juntiquilʌch xyaj eʼtel i chaʼan Cristo, miʼ chʼʌjmel ti Dios i utsʼat miʼ qʼuejlel tiʼ tojlel wiñicob.
19 Jin chaʼan, laʼ lac chʌn sʌclan jiñi muʼ bʌ i yʌqʼueñonla lac ñʌchʼtʌlel yicʼot jiñi muʼ bʌ i comol ñuqʼuesan lac pusicʼal.
20 Cʌyʌ a jem jiñi i yeʼtel Dios tiʼ caj jiñi bʌlñʌcʼʌl. I sujmʌch chaʼan sʌc pejtelel chuqui an, pero mach weñic miʼ chaʼlen uchʼel juntiquil mi jiñi miʼ yʌcʼ ti yajlel yambʌ.
21 Ñumen wen cheʼ maʼañic maʼ cʼux weʼel yicʼot maʼañic maʼ jap vino i maʼañic maʼ wis mel muʼ bʌ i yʌcʼ tiʼ yajlel a wermañu.
22 Jiñi ñopol bʌ a chaʼan cʌylem jach ti a tojlel yicʼot tiʼ tojlel Dios. Tijicña jiñi wiñic maʼañic bʌ i mul miʼ yubin tiʼ caj chuqui miʼ yajcan i mel.
23 Pero mi tile bixel i pusicʼal i miʼ chaʼlen uchʼel, añix i mul, come mach yicʼotic i ñopoñel miʼ chaʼlen uchʼel. Tiʼ sujm, mulil jiñi mach bʌ yicʼotic lac ñopoñel mi lac mel.
Nota tac
^ Qʼuele jiñi Glosario.
^ Qʼuele jiñi Glosario.
^ Qʼuele jiñi Glosario.
^ Qʼuele jiñi Glosario.
^ Qʼuele jiñi Glosario.
^ Qʼuele jiñi Glosario.
^ Qʼuele jiñi Glosario.
^ Qʼuele jiñi Glosario.
