Romanos 4:1-25
4 Jin chaʼan, ¿chuqui tsiʼ taja mi caj la cʌl jiñi lac ñojteʼel Abrahán?
2 Jumpʼejl ejemplo, cheʼ tsaʼic sujbi ti toj jiñi Abrahán tiʼ caj jiñi i melbal tac, tajol tsaʼʌch i qʼuele i bʌ ti ñuc, anquese mach cheʼic tiʼ tojlel Dios.
3 Come ¿chuqui miʼ yʌl jiñi Tsʼijbujel tac? «Abrahán tsiʼ yʌcʼʌ i ñopoñel ti Jehová* i tsaʼ qʼuejli ti toj».
4 Jiñi i tojol jiñi muʼ bʌ i chaʼlen eʼtel maʼañic miʼ mejlel ti ajlel chaʼan i majtan jach, jiñʌch yom bʌ miʼ yʌqʼuentel.
5 Pero jiñi wiñic mach bʌ cʌyʌlic ti chuqui miʼ bajñel mel i miʼ yʌcʼ i ñopoñel tiʼ tojlel jiñi muʼ bʌ i mejlel i yʌl chaʼan toj jiñi xmulil, miʼ qʼuejlel ti toj chaʼan i ñopoñel.
6 David miʼ taj ti tʼan jaʼel jiñi i tijicñʌyel jiñi wiñic toj bʌ miʼ qʼuejlel ti Dios, pero mach chaʼañic jiñi i melbal tac:
7 «Tijicñayob jiñi tsaʼix bʌ ñusʌbentiyob jiñi mach bʌ weñic tac tsiʼ meleyob yicʼot jiñi tsaʼix bʌ ñusʌbentiyob i mul,
8 Jehová* maʼañic mi caj i cʼajtesʌben i mul jiñi wiñic muʼ bʌ i chaʼlen mulil, tijicña jiñi wiñic».
9 Cheʼ jiñi, ¿cojach ba jiñi tsepbiloʼ bʌ i pʌchʌlel* añob i chaʼan ili tijicñʌyel, o añob i chaʼan jaʼel jiñi mach bʌ tsepbilobic i pʌchʌlel? Come mi la cʌl: «Abrahán tsaʼ qʼuejli ti toj chaʼan i ñopoñel».
10 Weno, ¿jalixqui tsaʼ qʼuejli ti toj? ¿Jimba cheʼ bʌ tsepbilix i pʌchʌlel, o jin cheʼ bʌ maxto tsepbilic i pʌchʌlel? Maxto tsepbilic i pʌchʌlel cheʼ bʌ toj tsaʼ qʼuejli ti Dios.
11 Dios tiʼ sube chaʼan miʼ tsep i pʌchʌlel. Iliyi chaʼañʌch miʼ pʌs chaʼan toj tiʼ caj jiñi i ñopoñel am bʌ i chaʼan cheʼ bʌ maxto tsepbilic i pʌchʌlel. Cheʼ jiñi tsaʼ sujti tiʼ tat pejtelel jiñi añoʼ bʌ i ñopoñel cheʼ bʌ maxto tsepbilobic i pʌchʌlel chaʼan Dios miʼ qʼuelob ti toj
12 yicʼot chaʼan miʼ sujtel tiʼ tat junmojt pʼolbalʌl tsepbilix bʌ i pʌchʌlel, mach jiñic jach tiʼ tojlel jiñi muʼ bʌ i wersa chucob i bʌ ti jiñi tsep pʌchʌlel, yicʼotʌch jaʼel jiñi muʼ bʌ i tsajcʌbeñob i bijlel jiñi lac tat Abrahán chaʼan bajcheʼ tsiʼ pʌsʌ i ñopoñel cheʼ bʌ maxto tsepbilic i pʌchʌlel.
13 Come mach tiʼ cajic jiñi mandar cheʼ Abrahán o jiñi i pʼolbal tsaʼ aqʼuentiyob jiñi tʼan chaʼan mi caj i yʌqʼuentel jiñi pañimil. Abrahán tsiʼ pʌsʌ i ñopoñel i Dios tsiʼ qʼuele ti toj, jin chaʼan tsaʼ aqʼuenti jiñi tʼan.
14 Come cheʼ jiñic miʼ yʌqʼuentelob pañimil jiñi muʼ bʌ i wersa chucob i bʌ yaʼ ti mandar, lolom jach jiñi ñopoñel i jiñi tʼan tsaʼ bʌ wʌn ajli miʼ jisʌbentel i cʼʌjñibal.
15 Tiʼ sujm, jiñi Mandar miʼ pʼol michʼajel, pero baqui maʼañic mandar maʼañic chuqui miʼ ñusʌntel ti pʼis.
16 Jin chaʼan, jiñi tʼan tsaʼ bʌ wʌn ajqʼui mi la cʌqʼuentel tiʼ caj jiñi lac ñopoñel, chaʼan tsiquil chaʼan tiʼ cajʌch jiñi ñuc bʌ i yutslel Dios, chaʼan jiñi tʼan miʼ tsʼʌctiyel tiʼ tojlel pejtelel i pʼolbal Abrahán, i mach jiñic jach tiʼ tojlel jiñi muʼ bʌ i wersa chucob i bʌ ti jiñi Mandar, i chaʼañobʌch jaʼel jiñi muʼ bʌ i chucob i bʌ tiʼ ñopoñel Abrahán, jiñi lac tat bʌ ti lac pejtelel.
17 (Cheʼʌch bajcheʼ tsʼijbubil: «Tsaʼ c waʼchocoyet tiʼ tat cabʌl tejclum»). Ili tsaʼ ujti tiʼ tojlel Dios, yaʼ baqui Abrahán tsiʼ yʌcʼʌ i ñopoñel, tiʼ tojlel jiñi muʼ bʌ i yʌqʼuen i cuxtʌlel jiñi chʌmeñoʼ bʌ i jiñi maxto bʌ ujtemic lajal bajcheʼ ujtemix cheʼ bʌ miʼ yʌl.
18 Anquese maʼañix pijtaya, tsiʼ chucu i bʌ ti jiñi pijtaya i tsiʼ ñopo chaʼan mucʼʌch caj i sujtel tiʼ tat cabʌl tejclum, cheʼ bajcheʼ tsaʼ ajli: «Cheʼʌch i yonlel miʼ cajel jiñi a pʼolbal».
19 I anquese maʼañic tsaʼ cʼuñʼa i ñopoñel, tsaʼʌch i cʌñʌ chaʼan lajal bajcheʼ chʌmeñix jiñi i bʌcʼtal (come añix cheʼ bʌ 100 i jabilel) yicʼot chaʼan Sara maʼañic miʼ mejlel ti tilel i yalobil.
20 Pero chaʼan jiñi tʼan tsaʼ bʌ i wʌn sube Dios, maʼañic tsaʼ tili tile bixel bʌ i pusicʼal tiʼ caj maʼañic i ñopoñel. Tsaʼto ñumen pʼʌtʼa chaʼan jiñi i ñopoñel, jin chaʼan tsiʼ yʌqʼue i ñuclel Dios,
21 i tsaʼʌch i junyajl ñopo chaʼan Dios miʼ mejlel i tsʼʌctesan tsaʼ bʌ i wʌn sube.
22 Jin chaʼan «tsaʼ qʼuejli ti toj».
23 Pero jiñi tʼan «tsaʼ qʼuejli» mach bajñel i chaʼañic tsaʼ tsʼijbunti,
24 lac chaʼañʌch jaʼel, joñonla muʼ bʌ caj laj qʼuejlel ti toj come mi lac ñop tiʼ tojlel jiñi tsaʼ bʌ i chʼojyesa* jiñi lac Yum Jesús yaʼ baqui an chʌmeñoʼ bʌ.
25 Tsaʼ ajqʼui tiʼ caj lac mul i tsaʼ chʼojyesʌnti chaʼan mi lac sujbel ti toj.
Nota tac
^ Qʼuele jiñi Glosario.
^ Qʼuele jiñi Glosario.
^ Qʼuele jiñi Glosario, tsep pʌchʌlel.
^ O «teche».
