Romanos 9:1-33
-
Jiñi i chʼijyemlel Pablo tiʼ tojlel jiñi tejclum Israel (1-5)
-
Jiñi ñoj i pʼolbal bʌ Abrahán (6-13)
-
Maʼañic majqui miʼ mejlel i yʌl chaʼan mach weñic chuqui tsiʼ yajca i mel Dios (14-26)
-
Pʼejt tac chaʼan bʌ michʼajel yicʼot pʼejt tac chaʼan bʌ cʼuxbiya (22, 23)
-
-
«Junmojt jach mi caj i coltʌntel» (27-29)
-
Israel tsaʼ yajli (30-33)
9 Joñon xcʌntʼañon i chaʼan Cristo. Jiñi j conciencia tojʼesʌbil ti jiñi chʼujul bʌ espíritu i woli cʌl chuqui i sujm. Maʼañic woliyon ti lot cheʼ bʌ mi cʌl
2 chaʼan wen an c chʼijyemlel yicʼot chaʼan tiʼ pejtelel ora cʼux c pusicʼal.
3 Come ñumen wen cheʼ joñoñic mic ñajtʼesʌntel tiʼ tojlel Cristo chaʼan mic jisʌntel tiʼ wenta jiñi quermañujob, c piʼʌloʼ bʌ,
4 jiñi israelitajob. Jiñobʌch yom bʌ miʼ chʼʌjmelob bajcheʼ i yalobilob Dios, i tsaʼ aqʼuentiyob jiñi ñuclel, jiñi trato tac, jiñi Mandar, jiñi chʼujul bʌ eʼtel yicʼot jiñi tʼan tac wʌn albilix bʌ.
5 I pʼolbalob jiñi lac ñojteʼelob i jiñi Cristo yaʼ tsaʼ loqʼui tiʼ tojlelob. Laʼ aqʼuentic i ñuclel tiʼ pejtelel ora jiñi Dios ñumen ñuc bʌ tiʼ pejtelel chuqui an. Amén.
6 Pero mach chaʼañic maʼañic tsaʼ tsʼʌctiyi jiñi i tʼan Dios. Come mach tiʼ pejtelelobic jiñi i pʼolbaloʼ bʌ Israel ñoj «israelitajob».
7 Cheʼ jaʼel, mach tiʼ pejtelelobic i yalobilob tiʼ caj tilemob tiʼ pʼolbal Abrahán, cheʼʌch bajcheʼ tsʼijbubil: «Tiʼ tojlel Isaac mi caj i tilel jiñi muʼ bʌ caj i cʌjñel bajcheʼ a pʼolbal».
8 Ili yom i yʌl chaʼan mach tiʼ pejtelelobic jiñi i yalobilob Abrahán ñoj i yalobilob Dios. Pero jiñi muʼ bʌ i yilañob pañimil chaʼan jiñi tʼan tsaʼ bʌ wʌn ajli ñoj i yalobilobʌch Abrahán.
9 Come ili jiñʌch jiñi tʼan tsaʼ bʌ wʌn ajli: «Ti jiñi yambʌ jab, cheʼ ora majlel bajcheʼ iliyi, mi caj c chaʼ tilel i Sara tsaʼix i yʌcʼʌ ti pañimil i yalobil».
10 I mach cojic jach ti jiñi bʌ ora tsaʼ ujti jiñi, cheʼʌch tsaʼ ujti jaʼel cheʼ bʌ Rebeca tsiʼ cʌnta xloj bʌ* i yalobil tsaʼ bʌ i taja ti juntiquil wiñic, jiñi lac ñojteʼel Isaac.
11 Cheʼ bʌ maxto i yilayob pañimil yicʼot maxto i meleyob chuqui wen yicʼot mach bʌ weñic, Dios tsiʼ wʌn alʌ majqui mi caj i yajcan. Come Dios miʼ yajcan majqui jach yom i mach jiñic cheʼ bajcheʼ yilal i melbal jiñi wiñic.
12 Jin chaʼan tsaʼ subenti Rebeca: «Jiñi ascuñʌl bʌ mi caj i sujtel tiʼ yaj eʼtel jiñi ijtsʼiñʌl bʌ».
13 Cheʼ bajcheʼ tsʼijbubil: «Tsaʼ j cʼuxbi Jacob, pero tsaʼ c tsʼaʼle Esaú».
14 Cheʼ jiñi, ¿chuqui mi caj la cʌl? ¿Am ba chuqui mach bʌ tojic tiʼ tojlel Dios? ¡Maʼañic!
15 Come tiʼ sube Moisés: «Mi caj c pʌsben j cʼuxbiya majqui jach com c pʌsben j cʼuxbiya, i mi caj c pʌsben c pʼuntaya majqui jach com c pʌsben c pʼuntaya».
16 Jin chaʼan, mach cʌyʌlic ti chuqui yom juntiquil lac piʼʌl o ti chuqui miʼ mel, an tiʼ wenta Dios, muʼ bʌ i pʌs i cʼuxbiya.
17 Come yaʼ ti Tsʼijbujel an jumpʼejl parte muʼ bʌ i suben Faraón: «Tsaʼ cʌcʼʌ chaʼan cuxul maʼ wajñel tiʼ caj iliyi: Chaʼan mij cʼʌñet chaʼan mic pʌs c pʼʌtʌlel yicʼot miʼ sujbel jiñi j cʼabaʼ tiʼ pejtelel pañimil».
18 Jin chaʼan, Dios miʼ pʌsben i cʼuxbiya majqui jach yom i pʌsben, pero miʼ yʌcʼ chaʼan jiñi yambʌlob miʼ tsʌtsʼesañob i pusicʼal.
19 Pero jatet mi caj a subeñon: «¿Chucoch muʼto i bej aqʼuen tiʼ mul jiñi lac piʼʌlob? ¿Am ba majqui miʼ mejlel i mʌctan jiñi yom bʌ i mel?».
20 Pero wiñiquet jach, ¿majquiyet chaʼan maʼ sujtel a jacʼben i tʼan Dios? Jiñi melbil bʌ, ¿muʼ ba i mejlel i suben jiñi tsaʼ bʌ i mele «¿Chucoch tsaʼ meleyon bajcheʼ ili?»?
21 ¿Maʼañic ba tiʼ wenta jiñi xmel pʼejt chaʼan miʼ cʼʌn jiñi lum chaʼan miʼ mel jumpʼejl pʼejt muʼ bʌ i cʼʌjñel ti jumpʼejl qʼuin ñuc bʌ i cʼʌjñibal i yambʌ chaʼan baqui jach bʌ ora miʼ cʼʌjñel?
22 ¿A wenta ba mi Dios tsiʼ pʌsʌ i pijt tiʼ tojlel jiñi pʼejt melbil bʌ chaʼan miʼ jisʌntel, anquese yom i pʌs i michʼajel yicʼot i yʌcʼ ti cʌñol i pʼʌtʌlel?
23 ¿A wenta ba mi tsiʼ mele iliyi chaʼan miʼ tsictiyel chaʼan cabʌl i ñuclel tiʼ tojlel jiñi pʼejt tac chaʼan bʌ cʼuxbiya tsaʼ bʌ i wʌn chajpa chaʼan i ñuclel,
24 ili joñoñʌchla, mach bʌ cojach tiʼ tojlel jiñi judíojob tsiʼ pʌyʌyonla loqʼuel, tiʼ tojlelʌch jaʼel jiñi lac piʼʌlob chʼoyoloʼ bʌ ti yambʌ tejclum tac?
25 Cheʼʌch bajcheʼ tsiʼ yʌlʌ yaʼ ti Oseas: «Mi caj c suben tic tejclum jiñi mach bʌ c tejclumic i mi caj c suben ti cʼuxbibil bʌ c chaʼan jiñi mach bʌ cʼuxbibilic ti ñaxan.
26 I yaʼ baqui tsaʼ subentiyob ‹Jatetla mach c tejclumeticla›, yaʼ mi caj i subentelob bajcheʼ i yalobilob jiñi cuxul bʌ Dios».
27 Cheʼ jaʼel, Isaías miʼ sub tiʼ tojlel Israel: «Anquese jiñi i yalobilob Israel cheʼ yonlelob bajcheʼ jiñi jiʼ am bʌ ti mar, junmojt jach mi caj i coltʌntel.
28 Come Jehová* ti tsʼʌcʌl yicʼot ti ora mi caj i chaʼlen meloñel tiʼ tojlel jiñi pañimil».
29 I cheʼ bajcheʼ tsiʼ wʌn alʌ Isaías jaʼel: «Cheʼ machic Jehová* jiñi yumʌl bʌ ti panchan tsiʼ cʌybeyonla lac pʼolbal, cheʼ tsaʼ ujtiyonla bajcheʼ Sodoma i cheʼ tsaʼ sujtiyonla bajcheʼ Gomorra».
30 Cheʼ jiñi, ¿chuqui mi caj la cʌl? Chaʼan jiñi lac piʼʌlob ti yan tac bʌ tejclum tsaʼ qʼuejliyob ti toj tiʼ wut Dios chaʼañob i ñopoñel anquese maʼañic woliʼ sʌclañob chaʼan miʼ qʼuejlelob ti toj.
31 Pero Israel, anquese tiʼ sʌcla jumpʼejl mandar chaʼan jiñi tojel, maʼañic tsaʼ cʼoti i taj jiñi mandar.
32 ¿Chucoch? Come mach yicʼotobic i ñopoñel tiʼ sʌclayob, yicʼotob jach i melbal tac. Tsiʼ jatsʼʌyob i yoc ti jiñi «xajlel* muʼ bʌ i yʌcʼob ti yajlel»,
33 cheʼʌch bajcheʼ tsʼijbubil: «¡Qʼuelela! Ti Sion mi cʌcʼ jumpʼejl xajlel muʼ bʌ i yʌqʼuen i jatsʼ i yoc yambʌlob yicʼot jumpʼejl colem xajlel muʼ bʌ i yʌcʼ ti yajlel yambʌlob, pero jiñi muʼ bʌ i yʌcʼ i ñopoñel tiʼ tojlel maʼañic mi caj i chaʼ ñaʼtan i bʌ».*
Nota tac
^ O «xlut bʌ».
^ Qʼuele jiñi Glosario.
^ Qʼuele jiñi Glosario.
^ O «tun».
^ Qʼuele jiñi Glosario, chaʼ ñaʼtan a bʌ.
