Santiago 2:1-26
2 Quermañujob, ¿bajcheʼqui an cheʼ jatetla wolito laʼ qʼuel ti ñuc chaʼtiqui uxtiquil i mach laʼ womic laʼ qʼuel yambʌlob cheʼ tsaʼix laʼ ñopo jiñi lac Yum Jesucristo tsaʼ bʌ aqʼuenti i ñuclel?
2 Mi tsaʼ cʼoti ti laʼ tempa bʌ juntiquil wiñic lʌpʌl bʌ i chaʼan anillo tac melbil bʌ ti oro yicʼot wen lets bʌ i tojol i pislel i miʼ cʼotel jaʼel juntiquil pʼumpʼum bʌ bibiʼ bʌ i pislel,
3 ¿muʼ ba laʼ qʼuel ti wen jiñi wen lets bʌ i tojol i pislel i mi laʼ suben «Buchiʼ ti ili wem bʌ ajñibʌl», pero jiñi pʼumpʼum bʌ mi laʼ suben «Waʼal jaxto maʼ cʌytʌl» o «Buchiʼ ixi, yaʼ tiʼ tʼejl i cʼʌclib coc»?
4 Mi cheʼ mi laʼ mel bajcheʼ jiñi, ¿mach ba junmojt jach lac piʼʌlob woli laʼ qʼuel ti ñuc i jatetla mach tojix bajcheʼ woli laʼ chaʼlen meloñel?
5 Cʼuxbibil bʌ quermañujob, ubinla. ¿Mach ba jiñic tsiʼ yajca Dios jiñi pʼumpʼuñoʼ bʌ tiʼ wut lac piʼʌlob chaʼan ricojob tiʼ ñopoñelob i miʼ yʌqʼuentelob jiñi Yumʌntel tsaʼ bʌ i yʌlʌ Dios chaʼan mi caj i yʌqʼuen jiñi muʼ bʌ i cʼuxbiñob?
6 Pero jatetla tsaʼix laʼ tsʼaʼle jiñi pʼumpʼuñoʼ bʌ. ¿Mach ba jiñic jiñi ricojoʼ bʌ muʼ bʌ i ticʼlañetobla i miʼ pʌyetobla majlel ti meloñibʌl?
7 Dios tsiʼ yʌqʼueyetla wem bʌ cʼabaʼʌl. Pero ¿mach ba añic woliʼ chaʼleñob tʼan tiʼ contra jiñi cʼabaʼʌl?
8 Jin chaʼan, mi mucʼʌch laʼ tsʼʌctesan i mandar jiñi rey cheʼ bajcheʼ miʼ yʌl jiñi Tsʼijbujel «Cʼuxbin a piʼʌl cheʼ bajcheʼ maʼ bajñel cʼuxbin a bʌ», weñʌch woli bʌ laʼ mel.
9 Pero mi chaʼtiqui uxtiquil jach woli laʼ bej qʼuel ti ñuc, woli laʼ chaʼlen mulil i jiñi mandar miʼ yʌqʼueñetla laʼ toj laʼ mul bajcheʼ xñusatʼañob.
10 Come mi an muʼ bʌ i jacʼ pejtelel jiñi Mandar pero miʼ ñusan ti pʼis jumpʼejl mandar, an i mul come lajal bajcheʼ woliʼ ñusan ti pʼis pejtelel jiñi Mandar.
11 Come jiñi tsaʼ bʌ i yʌlʌ «Mach a piʼlen mach bʌ a piʼʌlic» tsiʼ yʌlʌ jaʼel «Mach a chaʼlen tsʌnsa». Weno, mi maʼañic maʼ piʼlen mach bʌ a piʼʌlic pero maʼ chaʼlen tsʌnsa, an a mul come maʼañic tsaʼ jacʼʌ jiñi mandar.
12 Chʌn chaʼlenla tʼan yicʼot bej melela cheʼ bajcheʼ miʼ melob jiñi muʼ bʌ caj i yujtel meloñel tiʼ tojlelob cheʼ bajcheʼ miʼ yʌl i mandar jiñi libre bʌ tejclum.
13 Come jiñi mach bʌ yujilic pʼuntaya maʼañic mi caj i pʼuntʌntel cheʼ bʌ miʼ yujtel meloñel tiʼ tojlel. Ñumen ñuc jiñi pʼuntaya i mach jiñic jiñi meloñel.
14 Quermañujob, ¿am ba i cʼʌjñibal mi an majqui miʼ yʌl chaʼan an i ñopoñel pero maʼañic miʼ pʌs tiʼ melbal? Jiñi ñopoñel maʼañic miʼ mejlel i coltan.
15 Mi juntiquil hermano o juntiquil hermana i cʼʌjñibal i chaʼan i pislel i mach cabʌlic i bʌl i ñʌcʼ chaʼan jiñi qʼuin,
16 pero anquese cheʼ an bajcheʼ jiñi, juntiquil ti laʼ tojlel miʼ suben «Cucu ti a ñʌchʼtʌlel, qʼuixñesan a bʌ i weʼsan a bʌ ti wen», pero maʼañic miʼ yʌqʼuen chuqui i cʼʌjñibal i chaʼan i bʌcʼtal, ¿anto ba i cʼʌjñibal jiñi?
17 Cheʼʌch jaʼel yicʼot jiñi lac ñopoñel, lajal bajcheʼ chʌmeñix mi maʼañic wen tac bʌ lac melbal.
18 Pero an muʼ bʌ caj i yʌl: «Jatet an a ñopoñel i joñon an wen tac bʌ c melbal. Pʌsbeñon a ñopoñel cheʼ mach yicʼotic a melbal i joñon mi caj c pʌsbeñet c ñopoñel temel yicʼot c melbal».
19 Jatet maʼ ñop chaʼan juntiquil jach Dios, ¿mach ba cheʼiqui? Weñʌch woli bʌ a mel. Pero jinto jiñi xibajob miʼ ñopob i miʼ bʌcʼñañob.
20 Tonto wiñiquet, ¿maʼañic ba maʼ ñaʼtan chaʼan jiñi ñopoñel maʼañic i cʼʌjñibal mi mach yicʼotic wem bʌ a melbal?
21 ¿Tsaʼ ba sujbi ti toj jiñi lac tat Abrahán chaʼan jiñi tsaʼ tac bʌ i mele? Tsaʼʌch, tsaʼ sujbi ti toj cheʼ bʌ tsaʼix i yʌcʼʌ Isaac bajcheʼ majtañʌl yaʼ ti pulʌntib.
22 Miʼ mejlel a qʼuel chaʼan jiñi i ñopoñel temel tsiʼ pʌsʌ yicʼot i melbal, yicʼot chaʼan jiñi i ñopoñel tsaʼ weñʼesʌnti chaʼan tsaʼ bʌ i mele.
23 Cheʼʌch tsaʼ tsʼʌctiyi jiñi Tsʼijbujel muʼ bʌ i yʌl: «Abrahán tsiʼ yʌcʼʌ i ñopoñel ti Jehová* i tsaʼ qʼuejli ti toj». I tsaʼ cʼoti ti cʌjñel bajcheʼ i yamigo Jehová.*
24 Wʌle mi laʼ qʼuel chaʼan jiñi wiñic miʼ sujbel ti toj chaʼan jiñi i melbal tac i mach chaʼañic jach jiñi i ñopoñel.
25 Cheʼ jaʼel, ¿mach ba añic tsaʼ sujbi ti toj Rahab, jiñi xʼixic muʼ bʌ i chon i bʌ, chaʼan jiñi wen tac bʌ i melbal cheʼ bʌ tsiʼ yotsa tiʼ yotot jiñi xsuboñelob yicʼot cheʼ bʌ tsiʼ chocoyob majlel ti yambʌ bij?
26 Cheʼʌchi, jiñi lac bʌcʼtal chʌmeñix cheʼ bʌ maʼañic jiñi pʼʌtʌlel muʼ bʌ i yʌcʼ cuxtʌlel, cheʼʌch miʼ yujtel jaʼel yicʼot jiñi lac ñopoñel, chʌmeñix mi maʼañic mi lac mel chuqui tac wen.
