Santiago 4:1-17
4 ¿Chucoch mi laʼ contrajin laʼ bʌ yicʼot mi laʼ letojin* laʼ bʌ? ¿Mach ba yaʼic tilem ti chuqui tac yom laʼ bʌcʼtal woli bʌ i contrajin jiñi wen tac bʌ laʼ wom bʌ laʼ mel am bʌ ti laʼ pusicʼal?
2 Jatetla an chuqui laʼ wom, pero maʼañic laʼ chaʼan. Wolito laʼ chaʼlen tsʌnsa yicʼot laʼ cʌlʌx mulan chuqui tac an, pero maʼañic miʼ mejlel laʼ taj chuqui laʼ wom. Wolito laʼ letojin laʼ bʌ yicʼot laʼ contrajin laʼ bʌ. Maʼañic laʼ chaʼan come maʼañic mi laʼ cʼajtin.
3 Cheʼ bʌ mi laʼ cʼajtin, maʼañic mi laʼ wʌqʼuentel come mach weñic chucoch mi laʼ cʼajtin, chaʼan jach mi laʼ cʼʌn ti chuqui tac yom laʼ bʌcʼtal.
4 Jatetla mach bʌ xucʼuleticla, ¿mach ba laʼ wujilic chaʼan cheʼ mi laʼ sujtel tiʼ yamigo ili pañimil mi laʼ sujtel tiʼ contra Dios? Jin chaʼan, majqui jach yom sujtel tiʼ yamigo ili pañimil woliʼ sujtel tiʼ contra Dios.
5 ¿O muʼ ba laʼ wʌl chaʼan jiñi Tsʼijbujel lolom jach miʼ yʌl: «Jiñi lac pusicʼal muʼ bʌ i ñijcañonla ti tsʌytsʌyñiyel miʼ yʌqʼueñonla laj cʌlʌx mulan chuqui tac jach»?
6 Pero ñumen ñucto jiñi ñuc bʌ i yutslel Dios muʼ bʌ i pʌs. Jin chaʼan, jiñi Tsʼijbujel miʼ yʌl: «Dios miʼ contrajin jiñi chanchan jax bʌ miʼ melob i bʌ, pero miʼ pʌsben ñuc bʌ i yutslel jiñi añoʼ bʌ i pecʼlel».
7 Jin chaʼan, acʼʌ laʼ bʌ tiʼ wenta Dios, pero acʼʌ laʼ bʌ tiʼ contra jiñi Diablo i mi caj i putsʼtañetla.
8 Lʌcʼtesan laʼ bʌ ti Dios i mi caj i lʌcʼtesan i bʌ ti laʼ tojlel. Xmulilob, sʌqʼuesan laʼ cʼʌb, i jatetla tile bixel bʌ laʼ pusicʼal, sʌqʼuesan laʼ pusicʼal.
9 Ubinla laʼ chʼijyemlel, i cʼuxel laʼ pusicʼal yicʼot chaʼlenla uqʼuel. Laʼ sujtic tiʼ cʼuxel laʼ pusicʼal jiñi laʼ tseʼñal, i jiñi laʼ tijicñʌyel laʼ sujtic ti joybajqʼuiyel.
10 Peqʼuesan laʼ bʌ tiʼ wut Jehová* i mi caj i yʌqʼueñetla laʼ ñuclel.
11 Hermanojob, cʌyʌx laʼ wʌl mach bʌ weñic tiʼ tojlel yambʌlob. Majqui jach miʼ yʌl mach bʌ weñic tiʼ tojlel i yermañu o miʼ chaʼlen meloñel tiʼ tojlel woliʼ chaʼlen tʼan tiʼ contra jiñi mandar i woliʼ chaʼlen meloñel tiʼ contra jiñi mandar. Weno, mi woli a chaʼlen meloñel tiʼ tojlel jiñi mandar, maʼañic woli a tsʼʌctesan jiñi mandar, woli a sujtel ti juez.
12 Juntiquil jach Xʼacʼ mandar yicʼot Juez, jiñi muʼ bʌ i mejlel ti coltaya yicʼot ti jisaya. Pero ixcu jatet, ¿majquiyet chaʼan maʼ chaʼlen meloñel tiʼ tojlel a piʼʌl?
13 Wʌle, ubinla jatetla muʼ bʌ laʼ wʌl «Wʌle o ijcʼʌl mi caj lac majlel ti jiñi tejclum i jumpʼejl jab mi caj la cajñel yaʼi, mi caj lac chaʼlen choñoñel i mi caj lac taj taqʼuin»,
14 pero jatetla mach laʼ wujilic chuqui mi caj i yujtel ti laʼ tojlel ijcʼʌl. Come jiñi laʼ cuxtʌlel lajal bajcheʼ yeʼeb* muʼ bʌ i jumucʼ pʌs i bʌ i cheʼ jiñi miʼ sʌc majlel.
15 Yom bʌ mi laʼ wʌl, jiñʌch iliyi «Mi cheʼ yom Jehová,* cuxul mi caj la cajñel, mi caj lac mel iliyi i mi caj lac mel ili yambʌ».
16 Pero wʌleʼli jatetla chanchan jax mi laʼ mel laʼ bʌ i mi laʼ bajñel qʼuel laʼ bʌ ti ñuc. Mach weñic cheʼ mi laʼ chañʼesan laʼ bʌ bajcheʼ jiñi.
17 Jin chaʼan, mi an yujil bʌ melol chuqui wen i maʼañic miʼ mel, wolix i chaʼlen mulil.
