Tito 2:1-15
2 Pero jatet chʌn subu cheʼ bajcheʼ an yaʼ ti wem bʌ cʌntesa.*
2 Jiñi wiñicob añobix bʌ i jabilel yom pʼisbilob ti chuqui miʼ melob yicʼot yom yujilob tsʼʌctesʌntel i yeʼtel, yom añob wem bʌ i ñaʼtʌbal yicʼot yom xucʼulob tiʼ ñopoñel, tiʼ cʼuxbiya yicʼot tiʼ cuchol wocol.
3 Cheʼ jaʼel, jiñi xʼixicob añobix bʌ i jabilel yom miʼ yʌqʼueñob i ñuclel Dios tiʼ melbalob, mach yomic xjopʼtʼañob mi yomicto miʼ cʌlʌx japob vino i yom xcʌntesajob chaʼan chuqui tac wem bʌ,
4 chaʼan miʼ mejlel i ticʼob* jiñi xchʼocobto bʌ chaʼan miʼ cʼuxbiñob i ñoxiʼal yicʼot i yalobilob,
5 chaʼan miʼ tajob wem bʌ i ñaʼtʌbal, sʌcob tiʼ melbal yicʼot tiʼ ñaʼtʌbal, xʼeʼtelob tiʼ yotot,* utsob yicʼot miʼ chucob i bʌ tiʼ tojlel i ñoxiʼal, i cheʼ bajcheʼ jiñi maʼañic miʼ yʌjlel mach bʌ weñic tiʼ tojlel i tʼan Dios.
6 Cheʼ jaʼel, bej tiqʼui jiñi chʼiton wiñicobto bʌ chaʼan miʼ tajob wem bʌ i ñaʼtʌbal,
7 i jatet jaʼel pʌsʌ wem bʌ a melbal tiʼ pejtelel chuqui maʼ mel ti a cuxtʌlel. Pʌsʌ chuqui wen bajcheʼ juntiquil añix bʌ i ñaʼtʌbal
8 i yicʼot wen tac bʌ tʼan* chaʼan maʼañic miʼ mejlel i yʌletob, chaʼan jiñi laj contrajob miʼ yubiñob quisin tiʼ caj maʼañic chuqui miʼ mejlel i yʌlob ti laj contra.
9 Jiñi xyaj eʼtelob yom chuculob tiʼ tojlel jiñi i yumob tiʼ pejtelel chuqui miʼ melob: Laʼ i yʌqʼueñob i tijicñʌyel, mach yomic lecoj miʼ jacʼbeñob i tʼan
10 i mach yomic miʼ chaʼleñob xujchʼ, laʼ i pʌsob chaʼan jiñi i yumob mucʼʌch i mejlel i ñopob tiʼ tojlelob, chaʼan ti chuqui jach miʼ melob miʼ chʼʌlbeñob i cʌntesa tac jiñi la caj Coltaya, Dios.
11 Come jiñi ñuc bʌ i yutslel Dios tsaʼ tsictiyi cheʼ bʌ tsiʼ yʌcʼʌ jiñi coltʌntel tiʼ tojlel pejtelel lac piʼʌlob.
12 Ili miʼ cʌntesañonla chaʼan maʼañic mi lac mel jiñi mach tac bʌ weñic yicʼot chuqui yom jiñi pañimil, i mi lac pʌs wem bʌ lac ñaʼtʌbal ti laj cuxtʌlel, mi lac mel chuqui toj yicʼot xucʼulonla tiʼ tojlel Dios ti ili ora,
13 cheʼ bʌ wolito lac pijtan jiñi utsʼatax bʌ lac pijtaya i cheʼ bʌ yicʼot i ñuclel miʼ tsictiyel jiñi ñuc bʌ Dios yicʼot jiñi la caj Coltaya, Jesucristo.
14 Tsiʼ yʌcʼʌ i bʌ chaʼañonla chaʼan miʼ colonla* ti baqui jach bʌ jontolil* i tiʼ sʌqʼuesayonla chaʼan mi lac sujtel tiʼ tejclum wen ñuc bʌ i cʼʌjñibal yicʼot wen yomix bʌ i mel chuqui tac wen.
15 Bej subu tac iliyi, bej acʼʌ ticʼojel yicʼot bej suben yambʌlob chaʼan an chuqui mach bʌ weñic woliʼ melob come jatet an a weʼtel. Mach a wʌcʼ chaʼan an majqui maʼañic miʼ qʼuelet ti ñuc.
Nota tac
^ O «cʌntesa muʼ bʌ i yʌcʼ wenlel».
^ O «cʌntesañob».
^ O «miʼ cʌntañob ti wen jiñi i yotot».
^ O «tʼan tac muʼ bʌ i yʌcʼ wenlel».
^ O «coltañonla loqʼuel».
^ O «tiʼ pejtelel chuqui an tiʼ contra jiñi mandar»
