Tito 3:1-15
3 Chʌn cʼajtesʌbeñob chaʼan miʼ chucob i bʌ tiʼ tojlel yumʌlob yicʼot añoʼ bʌ i yeʼtel i miʼ jacʼbeñob i tʼan, yom chajpʌbilob chaʼan miʼ melob pejtelel chuqui wem bʌ,
2 mach i yʌlob yambʌlob, mach i techob wocol, mach yomic miʼ tsʌtsʼesañob i bʌ tiʼ tʼan yicʼot yom utsob tiʼ pejtelel ora tiʼ tojlel pejtelel wiñicob.
3 Come ti wajali, joñonla jaʼel maʼañic lac ñaʼtʌbal yicʼot xñusatʼañonla, lotibilonla i chuculonla tiʼ melol chuqui jach la com yicʼot chuqui jach miʼ tijicñesañonla, jontolonla, an i tsʌytsʌyñiyel lac pusicʼal, tsʼaʼlebilonla yicʼot mi lac tsʼaʼlen lac bʌ.
4 Pero cheʼ bʌ jiñi i yutslel la caj Coltaya, Dios, yicʼot jiñi i cʼuxbiya tiʼ tojlel lac piʼʌlob tsaʼ tsictiyi,
5 tsiʼ coltayonla (mach chaʼañic tsaʼ lac mele chuqui tac wem bʌ, chaʼañʌch i pʼuntaya) yicʼot jiñi jaʼ tsaʼ bʌ i yʌqʼueyonla laj cuxtʌlel i cheʼ bʌ tiʼ sujtesayonla ti tsijiʼ bʌ lac piʼʌlob tiʼ coltaya jiñi chʼujul bʌ espíritu.
6 Tsiʼ wen aqʼueyonla ili espíritu tiʼ coltaya Jesucristo jiñi la caj Coltaya,
7 chaʼan cheʼ bʌ tsaʼix sujbiyonla ti toj tiʼ coltaya jiñi ñuc bʌ i yutslel Dios, mi la cʌqʼuentel jiñi cuxtʌlel maʼañic bʌ miʼ jilel cheʼ bajcheʼ an jiñi lac pijtaya.
8 Ili tʼan tac mucʼʌch i mejlel ti ñojpel, i com maʼ bej tajeʼ tac ti tʼan iliyi chaʼan jiñi tsaʼ bʌ i ñopoyob ti Dios miʼ yʌcʼob i ñaʼtʌbal tiʼ bej melol chuqui tac wen. Weñʌch pejtelel iliyi i miʼ yʌqʼuen i wenlel wiñicob.
9 Pero mach a wotsan a bʌ ti leto* mach bʌ añic i sujmlel, mi jiñicto tiʼ sʌclʌntel baqui tsʼijbubil i cʼabaʼ lac ñojteʼelob, mi jiñicto ti jiñi leto chaʼan bʌ Mandar, come maʼañic i cʼʌjñibal i maʼañic miʼ yʌcʼ wenlel.
10 Tiʼ tojlel jiñi wiñic muʼ bʌ i pʌs yambʌ cʌntesa, cʌyʌ a ñochtan mi maʼañic miʼ jacʼ i ticʼol i mi chaʼyajlix tsaʼ wʌn subenti,
11 come a wujil chaʼan jiñi wiñic tsiʼ tʌtsʼʌ i bʌ* ti jiñi bij chaʼan bʌ i sujmlel, woliʼ chaʼlen mulil i wolix i bajñel otsan i mul chaʼan miʼ yujtel meloñel tiʼ tojlel.
12 Cheʼ bʌ mic chocbeñet majlel Ártemas yicʼot Tíquico, chaʼlen wersa chaʼan maʼ majlel a qʼuelon ti Nicópolis, come tsaʼix c ñaʼta chaʼan yaʼʌch mi caj c ñusan jiñi i yorajlel tsʌñal.
13 Aqʼuen Zenas, juntiquil wen yujil bʌ chaʼan jiñi Mandar, yicʼot Apolos pejtelel chuqui i cʼʌjñibal i chaʼañob chaʼan tsʼʌcʌl chuqui añob i chaʼan ti jiñi i xʌmbal.
14 Pero jiñi lac chaʼañoʼ bʌ jaʼel laʼ i cʌñob i mel chuqui tac wen tiʼ pejtelel ora chaʼan miʼ chaʼleñob coltaya cheʼ bʌ ti ora yom miʼ mejlel, chaʼan añʌch wem bʌ i melbalob.
15 Pejtelel jiñi wʌʼ bʌ añob quicʼot miʼ chocbeñetob majlel saludo. Aqʼueñob c saludo jiñi xñoptʼañob muʼ bʌ i cʼuxbiñon lojon.
Laʼ ajñic laʼ wicʼot jiñi ñuc bʌ i yutslel Dios.
