Tiʼ Cʼajtesʌntel i chʌmel Jesús miʼ mejlel lac wen ñaʼtan tiʼ pejtelel muʼ bʌ caj lac taj come tsaʼix tojle lac mul, cheʼ bajcheʼ jiñi chaʼ chʼojyel. Jehová maʼañic ba ora yom tsiʼ yʌlʌ chaʼan mi lac chʌmel. Jin chaʼan, wen wocol mi la cubin cheʼ miʼ chʌmel juntiquil lac piʼʌl (1 Co. 15:26). Cheʼ bʌ tsaʼ chʌmi Lázaro, Jesús cʼux tsiʼ yubi cheʼ bʌ tsiʼ qʼuele ti uqʼuel jiñi xcʌntʼañob (Jn. 11:33-35). Jesús cheʼ yilal bajcheʼ Jehová, jin chaʼan mi lac ñaʼtan chaʼan cʼux miʼ yubin jaʼel cheʼ bʌ miʼ qʼuelonla ti uqʼuel cheʼ bʌ an majqui miʼ chʌmel lac chaʼan (Jn. 14:7). Jehová yomix miʼ cʼotel i yorajlel chaʼan miʼ chaʼ tejchesan i wiñicob, i cheʼʌch joñonla jaʼel (Job 14:14, 15).

Dios miʼ mulan i mel chuqui toj, jin chaʼan tsolocña miʼ cajel jiñi chaʼ chʼojyel (1 Co. 14:33, 40). Mi caj lac taj lac tijicñʌyel cheʼ bʌ miʼ yujtel jiñi chaʼ chʼojyel come maʼañix miʼ cajel jiñi chʌmel. ¿Muʼ baʼ locʼsʌben i yorajlel chaʼan maʼ wen ñaʼtan ili pijtaya yicʼot cheʼ an majqui miʼ chʌmel? (2 Co. 4:17, 18). ¿Muʼ baʼ wʌqʼuen wocolix i yʌlʌ Jehová cheʼ miʼ yʌcʼ jiñi majtañʌl chaʼan bʌ chaʼ chʼojyel yicʼot cheʼ miʼ subeñonla ti Biblia chaʼan mi caj i chaʼ chumtʌlob jiñi tsaʼix bʌ chʌmiyob? (Col. 3:15).

• ¿Majqui bʌ a wamigo o a familia a wom a chaʼ qʼuel?

• ¿Majqui muʼ bʌ i yʌjlel ti Biblia a wom a cʌn yicʼot a pejcan?