Ti 23 i chaʼan marzo mi lac pijtan cheʼ bʌ 12 millón quixtañujob tiʼ Cʼajtesʌntel i chʌmel Jesús. Jiñi muʼ bʌ caj i ñusan jiñi discurso mi caj i tsictesan chaʼan Jehová tsiʼ yʌqʼueyonla jumpʼejl ñuc bʌ majtañʌl cheʼ tsiʼ tojo jiñi mulil yicʼot chaʼan ti lac pejtelel miʼ mejlel lac taj lac wenlel chaʼan jiñi (Is. 11:6-9; 35:5, 6; 65:21-23; Jn. 3:16). Mach cojach jiñi muʼ bʌ caj i ñusan jiñi discurso miʼ mejlel i yʌl chuqui wen ti jiñi ñuc bʌ qʼuin. Joñonla jaʼel mi caj i mejlel lac subeñob chaʼan weñʌch cheʼ tsaʼ tiliyob (Ro. 15:7). Laʼ laj qʼuel bajcheʼ tac miʼ mejlel lac mel.

• Mach cojach yom maʼ buchtʌl a pijtan chaʼan miʼ tejchel jiñi tempa bʌ, subeñob chaʼan weñʌch cheʼ tsaʼ tiliyob jiñi tsaʼ bʌ a pʌyʌyob yicʼot jiñi inactivojoʼ bʌ. Yom tseʼtseʼñayet i pejcañob ti uts.

• Wen qʼuele jiñi tsaʼ bʌ a pʌyʌyob tilel, pero qʼuele jaʼel mi tsaʼ cʼoti jiñi tsaʼ bʌ i chʼʌmʌ i pʌyol cheʼ tiʼ yorajlel jiñi ñuc bʌ subtʼan. Pʌyʌ ti buchtʌl a wicʼot, pʌsben a Biblia yicʼot a cʼʌyoñib.

• Ti wiʼil, cʼajtiben jiñi quixtañu mi an chuqui yom i ñaʼtan. Mi yom miʼ loqʼuel ti ora jiñi a congregación chaʼan miʼ yochel yambʌ, suben chaʼan a wom a pejcan ti yambʌ qʼuin. Miʼ mejlel a suben: «Mic mulan c ñaʼtan bajcheʼ yilal tsaʼ qʼuele jiñi tempa bʌ. ¿Baqui miʼ mejlel c pejcañet?».