I MELBAL JIÑI XÑOPTʼAN
Mach a mel iliyi cheʼ bʌ maʼ wʌcʼ estudio
Cheʼ bʌ maʼ cʌlʌx chaʼlen tʼan. Mach a ñaʼtan chaʼan jatet yom maʼ luʼ tsictesan. Jesús tsiʼ mele cʼajtiya tac chaʼan miʼ chʼʌmbeñob isujm jiñi quixtañujob (Mt. 17:24-27). Jiñi cʼajtiya tac miʼ coltañet a qʼuel chuqui miʼ ñop yicʼot mi choncolʌch i ñaʼtan (be-S i yopol 253 párr. 3, 4). Cheʼ bʌ maʼ mel jumpʼejl cʼajtiya, pijtan chaʼan miʼ yʌqʼuen i jacʼbal. Mi mach yujilic, mach a suben, melben yambʌ cʼajtiya chaʼan miʼ tajben i jacʼbal (be-S i yopol 238 párr. 1, 2). Mach orajic yom maʼ tsictesʌben jiñi tʼan tac woli jaxto bʌ i cʌn (be-S i yopol 230 párr. 4).
Cheʼ mi laj cʌlʌx tsictesan. Mach a luʼ suben chuqui a wujil chaʼan jiñi temaj (Jn. 16:12). Qʼuele jiñi yom bʌ miʼ ñumen tsictesʌntel (be-S i yopol 226 párr. 4 cʼʌlʌl tiʼ yopol 227 párr. 1). Cheʼ mi laj cʌlʌx tsictesan miʼ sʌtben i sujmlel jiñi ñuc bʌ i cʼʌjñibal (be-S i yopol 235 párr. 3). Mi tsaʼix i ñaʼta, ñumen ti yambʌ párrafo.
Pʼisbil jach baqui yom maʼ pejcan. Laj com chaʼan miʼ cʼotel tiʼ pusicʼal, mach chaʼan jach miʼ pejcan jiñi jun (Lc. 24:32). Cʼʌñʌ i Tʼan Dios chaʼan maʼ tsictesan jiñi texto tac am bʌ ti jiñi cʌntesʌntel (2 Co. 10:4; He. 4:12; be-S i yopol 144 párr. 1-3). Cʼʌñʌ lajiya tac mach bʌ wocolic (be-S i yopol 245 párr. 2-4). Ñaʼtan chuqui ti wocol miʼ ñusan yicʼot chuqui ñopol i chaʼan, i jiñi miʼ caj i coltañet a ñaʼtan bajcheʼ yom maʼ cʌntesan. Cʼajtiben: «¿Chuqui maʼ ñaʼtan chaʼan jiñi tsaʼ bʌ a cʌñʌ ili ora? ¿Chuqui miʼ cʌntesañonla tiʼ tojlel Jehová? ¿Bajcheʼ mi caj i coltañet cheʼ maʼ jacʼ ili ticʼojel tac?» (be-S i yopol 238 párr. 3-5; i yopol 259 párr. 1).