¿Baqui bʌ majtañʌl ñumen ñuc bʌ muʼ bʌ mejlel laʼ wʌqʼuen laʼ walobilob? An cabʌl chuqui yomob ti a tojlel, cheʼ bajcheʼ a cʼuxbiya, a cʌntesa yicʼot a cʌntaya. Pero jiñi ñaʼtʌbal tilem bʌ ti Jehová yicʼot jiñi i sujmlel am bʌ ti Biblia, jiñʌch jiñi ñumen ñuc bʌ majtañʌl muʼ bʌ mejlel laʼ wʌqʼuen laʼ walobilob (Juan 17:3). Jiñi ñaʼtʌbal mi caj i coltañob chaʼan miʼ cʼuxbiñob Jehová yicʼot chaʼan miʼ melbeñob i yeʼtel tiʼ pejtelel i pusicʼalob, anquese alʌ chʼitoñob to (Mateo 21:16).

Cabʌl tatʌlob an i qʼueleyob chaʼan jiñi alʌ chʼitoñob miʼ ñumen cʌñob cheʼ bʌ miʼ pʌsbentelob cʌntesʌntel yicʼot eʼtel tac mach bʌ wen cabʌlic. Jin chaʼan, mi cubin lojon c tijicñʌyel cheʼ bʌ mic pʌsbeñetla ili jun loqʼuem bʌ ti Biblia am bʌ i cʼabaʼ, Ñaxam bʌ j cʌntesʌntel am bʌ ti Biblia. Mach wocolic ti chʼʌmbentel isujm jiñi cʌntesʌntel tac. Jiñi dibujo tac yicʼot jiñi texto tac am bʌ ti ili folleto ñaʼtʌbil chaʼan jiñi alʌ chʼitoñob an jax to bʌ uxpʼejl i jabilelob o maxto bʌ tajalic. Cheʼ jaʼel, miʼ chʼʌm tilel eʼtel tac yom bʌ miʼ mejlel. Ili folleto mach chaʼañic miʼ cʼʌn ti alas jiñi alʌ chʼitoñob. Tsaʼ mejli chaʼan mi laʼ pejcʌben laʼ walobilob yicʼot jaʼel chaʼan mi laʼ ñumen pejcan laʼ bʌ.

Miʼ mejlel lon cʌl chaʼan ili folleto mi caj i coltañetla chaʼan mi laʼ cʌntesan laʼ walobilob tiʼ sujmlel loqʼuem bʌ ti Biblia ‹cʼʌlʌl cheʼ alʌlob to› (2 Timoteo 3:14, 15).

Laʼ wermañojob,

Junmojt muʼ bʌ i pʌsob bij i chaʼan i testigojob Jehová