Come Jesús mach xmulilic, maʼañic tsiʼ chaʼle pensar i maʼañic tsiʼ ñusa wocol cheʼ bajcheʼ joñonla. Pero tsaʼʌch i chʼʌmbe i sujm i wocol yambʌ lac piʼʌlob, i tsiʼ coltayob come tsaʼʌch i pʼuntayob.

Jesús maʼañic tsiʼ qʼuele i bʌ ti ñuc i majqui jach tsiʼ lʌcʼtesa i bʌ tiʼ tojlel mach yʌlʌyic mi alʌlob, xcolelob o ñoxobix. Jiñi lac piʼʌlob tsiʼ yubiyob chaʼan mucʼʌch i chʼʌjmelob ti ñuc. Jin chaʼan tijicña tsiʼ yubiyob i bʌ cheʼ yaʼañob yicʼot Jesús.

Jesús miʼ mel oración tiʼ pejtelel ora, cheʼ i bajñel jach yicʼot cheʼ yaʼan yicʼot yambʌlob. Mach jiñic jach miʼ mel oración cheʼ mi caj i cʼux i waj. Miʼ yʌqʼuen wocolix i yʌlʌ i Tat, miʼ yʌqʼuen i ñuclel i miʼ cʼajtiben i coltaya cheʼ an chuqui mi caj i mel.

An i tajol Jesús yom i cʼaj i yo, pero miʼ cʼotel jiñi lac piʼʌlob chaʼan miʼ cʼajtiñob i coltʌntel, i Jesús mucʼʌch i coltañob. Mach i bajñelic jach tsiʼ ñaʼta i bʌ. Tsiʼ pʌsbeyonla wem bʌ ejemplo chaʼan cheʼʌch yom mi lac mel jaʼel.

Jesús tsiʼ yʌlʌ chaʼan yom mi lac ñusʌben i mul yambʌlob, cheʼʌch tsiʼ mele jaʼel cheʼ bʌ tsiʼ ñusʌbe i mul jiñi xcʌntʼañob i chaʼan yicʼot yambʌ lac piʼʌlob.

Jiñi profecía tac tsiʼ wʌn alʌ chaʼan jiñi judíojob mi caj i tsʼaʼleñob jiñi Mesías i chaʼan mi caj i tsʌnsʌntel tiʼ contrajob. Jin chaʼan, cheʼic yom Jesús jin jach tsiʼ tsʼʌctesa jiñi wʌn albilix bʌ, pero tsiʼ chaʼle wersa chaʼan miʼ yʌcʼ ti cʌjñel jiñi i sujm bʌ chʼujutesaya. Cheʼ bajcheʼ ili tsiʼ pʌsbeyonla wem bʌ ejemplo yom bʌ mi lac lajin cheʼ woli lac ñusan wocol o cheʼ mi laj contrajintel.

Jesús toj, mach lajalic bajcheʼ yambʌ wiñicob, wen an i ñaʼtʌbal i wen pʼʌtʌl. Pero tsiʼ pʌsʌ i pecʼlel i tsiʼ colta yambʌlob.

Jesús mach orajic miʼ michʼan cheʼ bʌ jiñi apóstolob yicʼot jiñi yambʌ lac piʼʌlob maʼañic miʼ melob cheʼ bajcheʼ miʼ yʌl. Wen jach miʼ chaʼ subeñob chuqui yom miʼ melob chaʼan miʼ ñumen lʌcʼtesañob i bʌ tiʼ tojlel Jehová.