ANI tajol, Jehová cabʌl jax chuqui miʼ mel chaʼan miʼ cʌntan jiñi xcolelob come maʼañic miʼ mejlel i bajñel cʌntañob i bʌ. Cheʼ maʼ chaʼlen xʌmbal ti mateʼel, an i tajol maʼ taj a qʼuel yambʌ muʼ bʌ i mel Jehová maʼañic bʌ maʼ chʼʌmben i sujm ti ñaxan.

Laʼcu lac ñaʼtan chaʼan woliyet ti xʌmbal i miʼ cʼotel a taj juncojt xmateʼmut i maʼ ñaʼtan chaʼan xujlem i wichʼ come woli jach i tujcʼan majlel. Cheʼ bʌ maʼ lʌcʼtesan majlel a bʌ baʼan, miʼ ñajtʼesan majlel i bʌ, i cheʼ bʌ maʼ ñumen lʌcʼtesan a bʌ, miʼ bej ñajtʼesan majlel i bʌ, i cheʼ bʌ maʼ qʼuel tsaʼix wejli. Mach xujlemic i wichʼ, ¿a wujil ba chuqui miʼ chaʼlen?...

Yaʼ baqui tsaʼ qʼuele jiñi xmateʼmut yaʼ lʌcʼʌl mucul i chaʼan jiñi i yal, baqui an jiñi alʌ teʼ tac. Jiñi xmateʼmut tsiʼ bʌcʼña chaʼan an chuqui mi caj a tumben i yal, jin chaʼan tsiʼ pʌsʌ chaʼan xujlem i wichʼ chaʼan miʼ ñajtʼesañet yaʼi. ¿A wujil ba majqui miʼ mejlel i cʌntañet jaʼel cheʼ bajcheʼ miʼ cʌntan i yal jiñi xmateʼmut?... Yaʼ ti Biblia, Jehová miʼ lajintel bajcheʼ juncojt xiyeʼ muʼ bʌ i cʌntan i yal (Deuteronomio 32:11, 12).

Jehová miʼ wen cʼuxbin jiñi i Yalobil, Jesús. Cheʼ bʌ yaʼto an ti panchan, juntiquilʌch ángel wen pʼʌtʌl bʌ bajcheʼ i Tat, muʼ bʌ i mejlel i bajñel cʌntan i bʌ. Pero cheʼ bʌ tsiʼ yila pañimil wʌʼ ti lum, juntiquilʌch alʌl maxto bʌ añic miʼ mejlel i bajñel cʌntan i bʌ.

Chaʼan miʼ tsʼʌctesan jiñi eʼtel tsaʼ bʌ i yʌqʼue Jehová yomʌch miʼ colel i miʼ sujtel ti juntiquil quixtañu, pero mach xmulilic. Pero Satanás tsiʼ ñopo i tsʌnsan chaʼan maʼan miʼ tsʼʌctesan jiñi i yeʼtel. Wen utsʼatax cheʼ mi lac pejcan jiñi relato baqui miʼ yʌl cheʼ bʌ Satanás tsiʼ ñopo i tsʌnsan Jesús i bajcheʼ Jehová tsiʼ colta. ¿A wom baʼ ñaʼtan?...

Cheʼ bʌ mach jalix yom miʼ yilan pañimil Jesús, Satanás tsiʼ yʌcʼʌ ti tsʼʌjyel yaʼ ti Oriente lajal bʌ bajcheʼ ecʼ, chaʼtiqui uxtiquil astrólogojob muʼ bʌ i pejcañob jiñi ecʼ, tiʼ tsajcayob majlel jiñi ecʼ cʼʌlʌl ti Jerusalén. Yaʼi tsiʼ cʼajtiyob baqui mi caj i yilan pañimil jiñi muʼ bʌ caj i yochel tiʼ rey jiñi judíojob. Ti wiʼil, tsaʼ melbentiyob jaʼel jiñi cʼajtiya chaʼtiqui uxtiquil wiñicob yujiloʼ bʌ muʼ bʌ i yʌl jiñi Biblia, i tsiʼ yʌlʌyob: «Ti Belén» (Mateo 2:1-6).

Cheʼ bʌ jiñi jontol bʌ rey yaʼ ti Jerusalén i cʼabaʼ Herodes tsiʼ yubi chaʼan yaʼ tiʼ tʼejl Belén tsaʼix i yila pañimil jiñi alʌl muʼ bʌ caj i yochel ti rey, tiʼ sube jiñi astrólogojob: Sʌclanla jiñi alʌl i cheʼ mi laʼ taj, miʼ tilel laʼ subeñon. ¿A wujil ba chucoch Herodes tsaʼ caji i sʌclan Jesús?... ¡Come mach yomic i qʼuel i yom i tsʌnsan!

¿Bajcheʼ tsiʼ cʌnta Dios jiñi i yalobil chaʼan maʼañic chuqui miʼ chaʼlen?... Cheʼ bʌ jiñi astrólogojob tsaʼix i tajayob Jesús tsiʼ yʌqʼueyob i majtan tac, pero Dios tsiʼ pejcayob tiʼ ñajal baqui tsaʼ subentiyob chaʼan maʼañix miʼ chaʼ sujtelob baʼan Herodes. Cheʼ bʌ Herodes tsiʼ ñaʼta chaʼan jiñi astrólogojob tsaʼix chaʼ sujtiyob majlel tiʼ tejclum, tsaʼ wen michʼa. I tsiʼ yʌcʼʌ i tʼan chaʼan miʼ tsʌnsʌntel pejtelel jiñi alʌlob maxto bʌ chaʼpʼejlic i jabilelob. Pero Jesús mach yaʼix an ti jimbʌ ora.

¿A wujil ba bajcheʼ maʼan tsaʼ tsʌnsʌnti?... Cheʼ bʌ jiñi astrólogojob tsaʼix chaʼ sujtiyob majlel tiʼ lumal, Jehová tsiʼ pejca José tiʼ ñajal, i ñoxiʼal María, chaʼan miʼ pʌy majlel jiñi alʌl ti Egipto, yaʼi maʼañic chuqui mi caj i chaʼlen come mach yaʼic an Herodes. Ti wiʼil, cheʼ bʌ María yicʼot José tsaʼ chaʼ sujtiyob ti Egipto, Jehová tsiʼ chaʼ pejca José tiʼ ñajal baqui tiʼ sube chaʼan miʼ majlelob ti Nazaret, baqui maʼañix chuqui mi caj i tumbentel jiñi alʌl (Mateo 2:7-23).

Cheʼ bajcheʼ jiñi xmateʼmut tsiʼ cʌnta jiñi i yal, Jehová jaʼel cheʼʌch tsiʼ cʌnta Jesús cheʼ bʌ chutto. Ili ora yomʌch miʼ cʌntʌntelob jaʼel jiñi xbiʼtalob.

Jiñi Biblia miʼ yʌl chaʼan Satanás lajalʌch bajcheʼ juncojt juʼucña bʌ bajlum come yom i cʼuxonla. Cheʼ bajcheʼ jiñi bajlum miʼ sʌclan añimal tac mach bʌ wen colemic chaʼan miʼ cʼux, cheʼ miʼ mel jaʼel Satanás yicʼot i xibajob, miʼ sʌclan jiñi xbiʼtalob chaʼan miʼ ticʼlañob (1 Pedro 5:8). Pero Jehová ñumen pʼʌtʌlʌch bajcheʼ Satanás, Jehová miʼ mejlel i cʌntan jiñi xbiʼtalob muʼ bʌ i melbeñob i yeʼtel i miʼ tojʼesʌbeñob i wocol muʼ bʌ i yʌqʼueñob Satanás.

¿Chuqui yom jiñi Satanás yicʼot i xibajob chaʼan mi lac mel?... Yom chaʼan mi lac mel piʼleya mach tac bʌ weñic miʼ qʼuel Dios. ¿Cʼajal baʼ chaʼan majqui jach miʼ mejlel i piʼleñob i bʌ?... Cojach juntiquil wiñic yicʼot juntiquil xʼixic ñujpuñemoʼ bʌ.

Pero an jontoloʼ bʌ lac piʼʌlob muʼ bʌ i piʼleñob jiñi xbiʼtalob, i tiʼ caj muʼ bʌ i melbentelob ili xbiʼtalob mach weñix mi caj i tech i cʼʌñob jiñi i yat o i vagina. Ili tsaʼ ujti ti wajali yaʼ ti tejclum i cʼabaʼ Sodoma. Jiñi Biblia miʼ yʌl chaʼan jinto jiñi «chʼiton yicʼot ñox bʌ wiñicob» tsiʼ ñopo i piʼleñob jiñi wiñicob tsajñi bʌ i julaʼtañob Lot (Génesis 19:4, 5).

Jesús tsaʼʌch cʌntʌnti i jatet jeʼel yom maʼ cʌntʌntel, come an lac piʼʌlob yom bʌ i piʼleñetob, yaʼ ochem jiñi ñucobix bʌ yicʼot yambʌ xbiʼtalob. Jiñi yom bʌ i ticʼlañetob miʼ poj alob chaʼan i yamigojet, tajol miʼ subeñetob chaʼan an chuqui mi caj i yʌqʼueñetob cheʼ maʼañic majqui maʼ suben. Pero i bajñel jach woliʼ ñaʼtañob i bʌ lajal bajcheʼ Satanás yicʼot i xibajob. Come yomob jach i bajñel wenlel, jin chaʼan miʼ sʌclañob jiñi xbiʼtalob chaʼan miʼ piʼleñob. ¡Ili mach yoque weñic!

¿A wujil ba chuqui miʼ melob chaʼan tijicña miʼ yubiñob i bʌ?... Tajol mi caj i wen yʌsibeñet o jaxubeñet jiñi a wat o a vagina, o jiñi i chaʼan mi caj i ñusan ti a chaʼan. Pero maʼañic baqui ora yom maʼ wʌcʼ a bʌ ti tʌjlel. Mi jiñicto yom miʼ mel jiñi a werañob o jiñi a tatob. Iliyi maʼañic majqui yom miʼ tʌlbeñet.

¿Bajcheʼ miʼ mejlel a cʌntan a bʌcʼtal tiʼ tojlelob jiñi muʼ bʌ i melob mach bʌ weñic?... Ñaxam bʌ, mach a wʌcʼ chaʼan miʼ tʌlbeñetob jiñi a wat o jiñi a vagina. Mi an majqui yom i tʌlbeñet, suben ti tsʌts bʌ tʼan: «¡Mach a tʌlon! ¡Mi caj c subet!». Mi jiñi yom bʌ i tʌlet miʼ subeñet chaʼan a mulʌch, mach a ñopben, i lot jach. Loqʼuen yaʼi, i subu chuqui tsiʼ melbet o chaʼan jiñi tsaʼ bʌ laʼ mele. Anquese miʼ subeñet chaʼan jatet jach yom laʼ wujil jiñi. Tajol miʼ subeñet chaʼan mi caj i yʌqʼueñet utsʼatax bʌ a majtan o mi chʼʌquet, mach yomix maʼ chʌn ñochtan.

Mach yom maʼ bʌcʼñan, pero yomʌch maʼ cʌntan a bʌ. Cheʼ bʌ jiñi papá o a mamá miʼ subeñet chaʼan mach yomic maʼ majlel baqui bʌbʌqʼuen yom maʼ jacʼben i tʼan. Cheʼ bajcheʼ jiñi mi caj i mejlel a cʌntan a bʌ chaʼan maʼañic majqui miʼ melbeñet mach bʌ weñic.