¿CʼAJAL baʼ chaʼan chucoch juntiquil i yángel Dios tsaʼ sujti ti Satanás, jiñi Diablo?... Come jin jach tsiʼ bajñel ñaʼta i bʌ i tsiʼ mulaj chaʼan jin miʼ chʼujutesʌntel, jin chaʼan tsaʼ sujti tiʼ contra Dios. ¿Tsaʼ ba i taja Satanás yambʌ ángelob muʼ bʌ i coltañob?... Tsaʼʌch. Jiñi Biblia miʼ subeñob bajcheʼ «jiñi i yángelob» Satanás, o xibajob (Apocalipsis 12:9).

¿Muʼ ba i ñopob Dios ili jontol bʌ ángelob?... Jiñi Biblia miʼ yʌl chaʼan jiñi xibajob yujilob chaʼan añʌch Dios (Santiago 2:19). Pero ili ora añob i bʌqʼuen come yujilob chaʼan Dios mi caj i yʌqʼueñob i toj pejtelel am bʌ i meleyob. ¿Baqui tac bʌ?...

Jiñi Biblia miʼ yʌl chaʼan ili ángelob tsiʼ cʌyʌyob jiñi i chumlib am bʌ ti panchan i tsaʼ jubiyob tilel ila ti Lum. Tsiʼ meleyob come yomob i piʼleñob jiñi i tʼojol jax bʌ xʼixicob ila ti Lum (Génesis 6:1, 2; Judas 6). ¿Chuqui a wujil chaʼan jiñi piʼleya?...

Juntiquil wiñic yicʼot juntiquil xʼixic miʼ piʼleñob i bʌ cheʼ bʌ an jach bajcheʼ miʼ temob i bʌ. Ili miʼ mejlel i yʌcʼ chaʼan miʼ tilel juntiquil alʌl muʼ bʌ caj i colel majlel tiʼ ñʌcʼ i mamá. Dios yom chaʼan cojach jiñi ñujpuñemoʼ bʌ miʼ temob i bʌ bajcheʼ jiñi. Jin chaʼan, cheʼ bʌ miʼ yilan pañimil juntiquil alʌl, jiñi wiñic yicʼot jiñi xʼixic miʼ mejlel i cʌntañob. Pero maʼañic tsaʼ ajqʼui chaʼan jiñi ángelob miʼ chaʼleñob piʼleya.

Cheʼ bʌ jiñi ángelob tsiʼ meleyob i bʌcʼtal bajcheʼ wiñicob i tsiʼ piʼleyob jiñi xʼixicob, tsaʼ tiliyob i yalobil i tsaʼ sujtiyob ti wen chan bʌ wiñicob. Iliyob wen jontolob i miʼ ticʼlañob jiñi yambʌ lac piʼʌlob. Jin chaʼan Dios tsiʼ choco tilel jumpʼejl diluvio, jumpʼejl ñuc bʌ butʼjaʼ, chaʼan miʼ jisañob jiñi wen chan bʌ wiñicob yicʼot pejtelel jiñi jontol bʌ lac piʼʌlob. Pero tiʼ sube Noé chaʼan miʼ mel jumpʼejl arca, o jumpʼejl colem barco, chaʼan miʼ coltan jiñi weñoʼ bʌ lac piʼʌlob. Jiñi Ñuc bʌ xcʌntesa tsiʼ yʌlʌ chaʼan ñuc i cʼʌjñibal cheʼ bʌ mi laj cʼajtesan jiñi tsaʼ bʌ ujti ti jiñi Diluvio (Génesis 6:3, 4, 13, 14; Lucas 17:26, 27).

¿A wujil ba chuqui tsiʼ meleyob jiñi jontol bʌ ángelob cheʼ bʌ tsaʼ tili jiñi ñuc bʌ butʼjaʼ?... Tsiʼ cʌyʌyob jiñi i bʌcʼtal tsaʼ bʌ i meleyob i tsaʼ chaʼ sujtiyob majlel ti panchan. Pero maʼañix miʼ mejlelob ti chaʼ ajñel bajcheʼ i yángelob Dios, jin chaʼan tsaʼ sujtiyob tiʼ yángelob Satanás, ti xibajob. ¿I chuqui tsiʼ chaʼleyob jiñi i yalobilob, jiñi wen chan bʌ wiñicob?... Tsaʼ chʌmiyob ti jiñi ñuc bʌ butʼjaʼ, yicʼot pejtelel jiñi maʼañic bʌ tsiʼ jacʼbeyob i tʼan Dios.

Cheʼ bʌ tsaʼix ñumi jiñi ñuc bʌ butʼjaʼ, Dios maʼañix tsiʼ yʌcʼʌ chaʼan jiñi xibajob miʼ mejlel i melob i bʌcʼtal bajcheʼ juntiquil wiñic. Pero, anquese maʼañic miʼ mejlel laj qʼuelob, jiñi xibajob wolito i bej chaʼleñob wersa chaʼan jiñi lac piʼʌlob miʼ melob mach bʌ weñic. Ili ora ñumento woliʼ techob wocol come tsaʼ chojquiyob tilel ila ti Lum.

¿A wujil ba chucoch maʼañic miʼ mejlel laj qʼuel jiñi xibajob?... Come espíritujob. Pero mucʼʌch i mejlel lac ñop chaʼan añobʌch. Jiñi Biblia miʼ yʌl chaʼan Satanás yicʼot i xibajob woliʼ lotiñob «pejtelel lac piʼʌlob ti pañimil» (Apocalipsis 12:9, 12).

¿Mejl ba i lotiñonla jiñi Diablo yicʼot i xibajob?... Mucʼʌch, mi caj i melob mi maʼañic mi laj cʌntan lac bʌ. Pero mach yomic mi lac chaʼlen bʌqʼuen. Jiñi Ñuc bʌ xcʌntesa tsiʼ yʌlʌ: «Jiñi [Diablo] maʼañic i pʼʌtʌlel tic tojlel». Mi bej lʌcʼʌl mi la cajñel ti Dios, mi caj i cʌntañonla ti jiñi Diablo yicʼot tiʼ xibajob (Juan 14:30).

Ñucʌch i cʼʌjñibal cheʼ bʌ mi lac ñaʼtan baqui tac bʌ jiñi mach bʌ weñic yom chaʼan mi lac mel jiñi xibajob. Jin chaʼan, ñaʼtancu: ¿Chuqui tac mach bʌ weñic tsiʼ meleyob jiñi xibajob cheʼ bʌ tsaʼ tiliyob ila ti Lum?... Cheʼ bʌ muʼto caj i tilel jiñi ñuc bʌ butʼjaʼ, tsiʼ piʼleyob jiñi xʼixicob, anquese mach yomic chaʼan miʼ melob jiñi. Ili ora, jiñi xibajob tijicña miʼ yubiñob cheʼ bʌ jiñi lac piʼʌlob maʼañic miʼ jacʼob jiñi i mandar tac Dios chaʼan bʌ jiñi piʼleya. Laʼcu laj qʼuel mi cʼajal a chaʼan: ¿Majquiyob jach miʼ mejlel i piʼleñob i bʌ?... Cheʼʌchi, jin jach jiñi ñujpuñemoʼ bʌ.

Ti ili ora an chʼitoñob yicʼot xchʼocob muʼ bʌ i piʼleñob i bʌ, i mach weñic jiñi. Jiñi Biblia miʼ taj ti tʼan jiñi i «winiclel» jiñi wiñic, cʌmbil bʌ jaʼel bajcheʼ pene (Deuteronomio 23:1). Jiñi i chaʼan bʌ xʼixic cʌmbil bajcheʼ vagina. Jeho­vá tsiʼ yʌcʼʌ iliyi chaʼan miʼ ñusañob i bʌ jiñi ñujpuñemoʼ bʌ. Jiñi xibajob tijicña miʼ yubiñob i bʌ cheʼ bʌ jiñi lac piʼʌlob miʼ melob jiñi maʼañic bʌ miʼ mulan Jeho­vá, jumpʼejl ejemplo, jiñʌch cheʼ bʌ juntiquil chʼiton yicʼot xchʼoc miʼ tʌlbeñob i bʌ jiñi i yebalob. Mach la comic la cʌqʼueñob i tijicñʌyel jiñi xibajob, ¿ñomach?...

An yambʌ muʼ bʌ i mulañob jiñi xibajob, pero Jehová miʼ tsʼaʼlen. ¿A wujil ba chuquiyes?... Jiñʌch jiñi jontolil (Salmo 11:5). Jiñi jontoloʼ bʌ miʼ ticʼlañob jiñi yañoʼ bʌ. Cʼajtesan, jiñʌch tsaʼ bʌ i meleyob jiñi wen chan bʌ wiñicob, jiñi i yalobiloʼ bʌ jiñi xibajob.

Cheʼ jaʼel, jiñi xibajob miʼ mulañob i bʌcʼtesañob jiñi lac piʼʌlob. An i tajol miʼ poj melob i bʌ bajcheʼ jiñi chʌmeñoʼ bʌ, i muʼto i lajibeñob jiñi i tʼan. Cheʼ bajcheʼ jiñi miʼ lotiñob yonlelob chaʼan miʼ ñopob chaʼan jiñi chʌmeñoʼ bʌ bej cuxulobto yicʼot chaʼan miʼ mejlel i pejcañob jiñi cuxuloʼ bʌ. Jin chaʼan, cabʌl lac piʼʌlob miʼ ñopob chaʼan añʌch jiñi fantasma.

Jin chaʼan, yom yʌxʌl la co chaʼan Satanás yicʼot i xibajob maʼañic miʼ lotiñonla. Jiñi Biblia miʼ yʌl: «Jiñi Satanás miʼ cuy i bʌ ti ángel chaʼan bʌ sʌcjamañiyel [...]. Jiñi i wiñicob miʼ cuyob i bʌ ti xʼeʼtelob muʼ bʌ i melob chuqui toj» (2 Corintios 11:14, 15). Pero tiʼ sujm, jiñi xibajob jontolob. Laʼ laj qʼuel chuqui tac miʼ mejlel i cʼʌñob chaʼan mi lac lajiñob.

¿Baqui miʼ wen cʌñob chaʼan bʌ jontolil, tsʼiʼlel, chaʼan bʌ espíritujob yicʼot chaʼan bʌ fantasma jiñi lac piʼʌlob?... ¿Mach ba yaʼic ti jiñi programa tac chaʼan televisión, ti videojuego tac, ti Internet yicʼot ti libro tac? ¿Muʼ ba i lʌcʼtesañonla ti Dios pejtelel iliyi, o tiʼ tojlel jiñi Diablo yicʼot i xibajob? ¿Chuqui maʼ wʌl?...

¿Majqui yomob chaʼan mi lac ñʌchʼtan yicʼot mi laj qʼuel mach tac bʌ weñic?... Jiñʌch Satanás yicʼot i xibajob. Jin chaʼan, ¿chuqui yom mi lac mel?... Yom mi lac pejcan, mi lac ñʌchʼtan yicʼot mi laj qʼuel chuqui tac wem bʌ yicʼot muʼ bʌ i coltañonla lac melben i yeʼtel ­Jehová. ¿Am ba muʼ bʌ i tilel ti a jol?...

Mi mucʼʌch lac mel chuqui wen, maʼañic mi caj lac bʌcʼñan jiñi xibajob, come Jesús ñumen pʼʌtʌl. Ti jumpʼejl bʌ qʼuin, jiñi xibajob woliyob ti bʌqʼuen i tsiʼ cʼajtibeyob: «¿Tsaʼ ba tiliyet a jisañon lojon?» (Marcos 1:24). ¿Mach ba tijicña mi caj la cubin lac bʌ cheʼ ba ora Jesús miʼ jisañob?... Cheʼ wolito lac pijtan chaʼan miʼ yujtel jiñi, miʼ mejlel lac ñop chaʼan Jesús mi caj i cʌntañonla mi chʌn lʌcʼʌl mi la cajñel tiʼ tojlel yicʼot tiʼ tojlel jiñi i Tat.