Tsaʼ coliyon ti Montreal ti jumpʼejl barrio pʼumpʼun bʌ. Cheʼ bʌ an jaxto seis uw tsaʼ quila pañimil, jiñi c papá tsaʼ chʌmi. I bajñel jach c mamá tsiʼ cosa jiñi yambʌ siete querañob yicʼot joñon.

Yaʼ baqui tsaʼ coliyon wen an jontolil, jin chaʼan cʼʌlʌl cheʼ chutonto tsaʼ caji j cʼʌn droga yicʼot tsaʼ cajiyon ti alas taqʼuin, yicʼot jaʼel wen jontolon. Cheʼ bʌ an jaxto 10 c jabilel, tsaʼ caji c melbeñob eʼtel jiñi xʼixicob muʼ bʌ i choñob i bʌ yicʼot muʼ bʌ i yʌcʼob ti majan taqʼuin. Tsaʼ c wen mulaj c lotin jiñi lac piʼʌlob yicʼot mic xujchʼibeñob i taqʼuin. Lajalʌch bajcheʼ droga.

Cheʼ bʌ 14 c jabilel wen cujilix bajcheʼ mic lotin jiñi lac piʼʌlob. On mic mʌn jiñi reloj, pulsera tac yicʼot anillo lajal bʌ bajcheʼ oro, pero joñon mic tsʼijbun ochel chaʼan 14 quilate bʌ oro, tsaʼ caji c chon ti calle tac yicʼot tiʼ pat colem choñoñibʌl tac. ¡Orajach mic taj taqʼuin! Ti jumpʼejl jach qʼuin tsaʼ c taja 10 mil dólar canadiense.

Cheʼ bʌ an jaxto 15 c jabilel, tsaʼ chojquiyon loqʼuel yaʼ ti escuela yaʼ baqui chumulon. Tsaʼ cajiyon ti wʌyel ti calle tac, ti parque yicʼot tiʼ yotot camigojob.

Jiñi policía mach junsujtelic jach tsiʼ chucuyoñob. Pero jiñi muʼ bʌ c chon mach xujchʼibilic, jin chaʼan maʼañic tsaʼ majliyon ti cárcel, anquese tsaʼʌch c tojo multa chaʼan mic lotin jiñi lac piʼʌlob i mic xujchʼiñob yicʼot chaʼan maʼañic c permiso chaʼan mic chaʼlen choñoñel. Maʼañic majqui mic bʌcʼñan, tsaʼ c chaʼle eʼtel yicʼot jiñi muʼ bʌ i yʌcʼob ti majan i taqʼuin. Come bʌbʌqʼuen jax bʌ eʼtel, mic chʼʌm majlel c juloñib. I tsaʼto c chaʼle eʼtel yicʼot jiñi wen jontoloʼ bʌ lac piʼʌlob.

Cheʼ bʌ 17 c jabilel cojaxto tsaʼ cubi chaʼan bʌ Biblia. Chumulon quicʼot c novia, pero tsaʼ caji ti estudio yicʼot jiñi i testigojob Jehová i maʼañic tsaʼ c mulaj. Jin chaʼan, tsaʼ majliyon quicʼot yambʌ wolix bʌ c loqʼuel quicʼot ti ñaxan.

Pero tsaʼ caji ti estudio jaʼel yicʼot jiñi i testigojob Jehová. Tsiʼ yʌcʼʌ ti toj sajtel c pusicʼal cheʼ bʌ tsaʼ j qʼuele chaʼan woliʼ qʼuextan majlel i melbal, tsaʼ caji i ñumen pʌs i yutslel yicʼot i pijt. Ti jumpʼejl bʌ qʼuin tsiʼ pʌyʌyoñob majlel ti tempa bʌ, i tsajñoñʌch. Tsaʼ j qʼuele chaʼan qʼuexelobʌch, come wen tsiʼ pejcayoñob i tijicña tsaʼ cubi c bʌ. Maʼañic baʼ ora an cubi c bʌ bajcheʼ jiñi. Cʼʌlʌl cheʼ bʌ chutonto jiñi c familia maʼañic tsiʼ cʼuxbiyoñob i mach i wentajoñobic. Pero jiñi testigojob tsiʼ pʌsbeyoñob cʼuxbiya, i jiñʌch i cʼʌjñibal bʌ c chaʼan. Cheʼ bʌ tiʼ subeyoñob estudio orajach tsaʼ c jacʼʌ.

Tsaʼ bʌ j cʌñʌ tsiʼ qʼuexta j cuxtʌlel. Chajpʌbilix lon c chaʼan chaʼan mic xujchʼin lojon 50 mil dólar chaʼan mic toj c bet ti alas. Weñʌch cheʼ maʼañic tsajñiyon come jiñi yambʌ chaʼtiquilob tsajñobʌch, pero juntiquil tsaʼ tsʌnsʌnti i yambʌ tsaʼ otsʌnti ti cárcel.

Cheʼ bʌ woliyon ti estudio tsaʼ j qʼuele chaʼan anto cabʌl chuqui yom mij qʼuextan tic melbal. Ti 1 Corintios 6:10 miʼ yʌl: «Jiñi xujchʼob, jiñi muʼ bʌ i cʌlʌx mulañob chuqui an, jiñi xyʌcʼʌjelob, jiñi muʼ bʌ i ticʼlañob yambʌlob tiʼ tʼan yicʼot jiñi muʼ bʌ i chaʼleñob lot chaʼan miʼ chʼʌmbeñob i chubʌʼan yambʌlob maʼañic mi caj i yʌqʼuentelob jiñi i Yumʌntel Dios». Cheʼ bʌ tsaʼ c pejca ili versículo, tsiʼ wen acʼʌyon ti uqʼuel. Yomʌch mic junyajl qʼuextan c melbal (Romanos 12:2). Come wen jontolon i maʼañix i cʼʌjñibal j cuxtʌlel.

Pero cheʼ jaʼel tsaʼ cʼoti j cʌn chaʼan Jehová toj yicʼot miʼ ñusan lac mul (Isaías 1:18). Jin chaʼan, tsaʼ c wen melbe oración chaʼan miʼ coltañon j cʌy mach bʌ wen taquic c melbal i mij qʼuextan j cuxtʌlel. Yicʼot i coltaya, cʼunteʼ cʼunteʼ tsaʼ j qʼuexta c bʌ. Junchajp ñuc bʌ i cʼʌjñibal jiñʌch cheʼ tsaʼ ñujpuñiyon quicʼot c novia.

Ti jimbʌ ora, 24 c jabilel i añix uxtiquil calobil. Yom jumpʼejl wem bʌ queʼtel chaʼan miʼ mejlel c mʌcʼlañob. Pero mach wen tsajñoñic ti escuela yicʼot mach cabʌlic chuqui cujil melol. Jin chaʼan tsaʼ c chaʼ cʼajtibe i coltaya Jehová i tsaʼ loqʼui c sajcan eʼtel. Ti jiñi entrevista tac tsaʼ cʌlʌ chaʼan com j qʼuextan c bʌ yicʼot mic chaʼlen eʼtel ti wen. An i tajol mi cʌl chaʼan woli c chʼʌm estudio loqʼuem bʌ ti Biblia chaʼan mic tojʼesan c melbal, pero maʼañic miʼ ñopob c tʼan. Ti jumpʼejl bʌ qʼuin, juntiquil wiñic tiʼ subeyon cheʼ bʌ wolix i yujtel jiñi entrevista: «Mach cujilic chucoch, pero an chuqui miʼ subeñon chaʼan yom mi cʌqʼueñet eʼtel». Mi cʌl chaʼan i jacʼbalʌch coración. Ti wiʼil, quijñam yicʼot joñon tsaʼ sujtiyon lojon tiʼ testigo Jehová.

Ili ora cuxulon come mic mel cheʼ bajcheʼ miʼ yʌl jiñi Biblia yicʼot mic tsajcʌben i melbal Cristo. An utsʼatax bʌ c familia yicʼot tijicñayon come cujil chaʼan Jehová ñusʌbil i chaʼan c mul.

Añix 14 jab cajel j coltan jiñi lac piʼʌlob chaʼan miʼ cʌñob chuqui miʼ yʌl jiñi Biblia. Mic chaʼlen subtʼan 70 hora ti jujumpʼejl uw. I maxto wen jali, jiñi quijñam tsaʼ caji i mel jaʼel ili eʼtel. Jiñi 30 jab ñumen bʌ an j colta 22 c piʼʌlob ti eʼtel chaʼan miʼ sujtelob tiʼ testigo Jehová. Muʼto c ñumel ti colem tienda tac, pero mach chaʼañix mic xujchʼin jiñi lac piʼʌlob. Mic subeñob chaʼan miʼ mejlelob ti chumtʌl ti jumpʼejl pañimil baqui maʼañix xujchʼ (Salmo 37:10, 11).