ACOMODADOROB. Jiñi acomodadorob yaʼʌch añob chaʼan miʼ coltañetob. A wocolic, jacʼʌ muʼ bʌ i subeñetob chaʼan baqui yom miʼ cottʌl jiñi carro tac, chaʼan baqui yom maʼ chaʼlen xʌmbal, chaʼan jiñi buchlibʌl tac yicʼot yan tac bʌ.

CHʼɅMJAʼ. Mi maʼañic chuqui yambʌ miʼ yʌjlel, mi caj i mʌctʌntel jiñi ñaxan tac bʌ buchlibʌl am bʌ yaʼ tiʼ tojel jiñi plataforma chaʼan jiñi muʼ bʌ caj i chʼʌmob jaʼ. Jiñi muʼ bʌ caj i chʼʌmob jaʼ yom yaʼix buchulob cheʼ bʌ miʼ tejchel jiñi discurso chaʼan bʌ chʼʌmjaʼ cheʼ ti sábado ti sʌcʼan. Yom añob i toalla yicʼot wen jach bʌ i pislelob chaʼan miʼ cʼʌñob ti chʼʌmjaʼ.

DONACIÓN TAC. Tsaʼ wen cʼʌjñi taqʼuin chaʼan jiñi sonido, video, chaʼan wen tac bʌ lac buchlib yicʼot yan tac bʌ chaʼan wen mi lac ñusan ili colem tempa bʌ yicʼot chaʼan mi lac ñumen lʌcʼtesan lac bʌ ti Jehová. Jiñi taqʼuin muʼ bʌ laʼ wʌcʼ miʼ coltan chaʼan miʼ tojtʌl iliyi yicʼot miʼ coltan jiñi subtʼan tiʼ petol pañimil. Jin chaʼan, tsaʼ ajqʼui caja tac wen tsiquil bʌ i letrajlel baqui miʼ mejlel laʼ wotsan laʼ taqʼuin. Cheʼ jaʼel, miʼ mejlel laʼ wʌcʼ laʼ donación ti internet, ti donate.pr418.com. Ñuc miʼ qʼuejlel jiñi taqʼuin muʼ bʌ laʼ wʌcʼ. Jiñi Junmojt muʼ bʌ i pʌsob bij miʼ yʌqʼueñetla wocolix laʼ wʌlʌ chaʼan jiñi coltaya muʼ bʌ laʼ wʌcʼ chaʼan jiñi i Yumʌntel Dios.

PRIMEROS AUXILIOS. Ili departamento cojach miʼ qʼuel jiñi muʼ bʌ i waʼ cʼamʼañob cheʼ tiʼ yorajlel jiñi colem tempa bʌ.

SɅTBIL BɅ A CHAʼAN. Mi an chuqui tsaʼ taja mach bʌ a chaʼañic, yom maʼ cʌy ti ili departamento. Mi an chuqui tsaʼ sʌtʌ, cucu ti ili departamento chaʼan maʼ qʼuel mi yaʼʌch an. Yaʼ yom maʼ pʌy majlel jaʼel jiñi xbiʼtalob tsaʼ bʌ i sʌtʌyob i bʌ. Jin chaʼan, chaʼan maʼañic maʼ wʌcʼ ti wocol yambʌlob, wen qʼuele chaʼan jiñi a walobilob yaʼʌch an a wicʼotob tiʼ pejtelel ora.

BUCHLIBɅL TAC. Mic poj subeñet lojon chaʼan maʼ qʼuel ti ñuc yambʌlob. Cojach miʼ mejlel a mʌctʌben i buchlib jiñi lajal bʌ chumul a wicʼot, jiñi lajal bʌ miʼ tilel a wicʼot ti carro o jiñi woli bʌ a wʌqʼuen estudio. Maʼañic chuqui yom maʼ wʌcʼ yaʼ ti buchlibʌl tac mi maʼañic mi caj a cʼʌn.

YOMOʼ BɅ COLTAYA. Mi a wom a chaʼlen coltaya, cucu yaʼ baqui an jiñi añoʼ bʌ tiʼ wenta jiñi yom bʌ i chaʼleñob coltaya.