CɅNTESɅNTEL 8

¿Bajcheʼ yilalob jiñi wem bʌ amigojob?

«Mi michʼon an majqui com c suben. Mi chʼijyemon an majqui com miʼ subeñon chaʼan mi caj i tojʼan jiñi wocol. Mi tijicñayon an majqui com c suben. Ñumen an i cʼʌjñibal mij qʼuel cheʼ an la camigojob» (Brittany).

MIʼ yʌjlel chaʼan jiñi xbiʼtalob i cʼʌjñibal añob i piʼʌl ti alas, i jiñi xcolelob i cʼʌjñibal an i yamigojob.¿Chucoch qʼuexelob?

Juntiquil a piʼʌl ti alas yaʼan tiʼ pejtelel ora a wicʼot.

Juntiquil a wamigo miʼ coltañet.

Jiñi Biblia miʼ yʌl chaʼan juntiquil i sujm bʌ la camigo miʼ «cʼuxbiñonla tiʼ pejtelel ora. Junlajalʌch bajcheʼ lac piʼʌl baʼ ora woli la cubin wocol» (Proverbios 17:17). Juntiquil la camigo mach lajalic bajcheʼ jiñi alobob añoʼ bʌ i piʼʌl ti alas.

Tiʼ sujm cheʼ bʌ colel majlel muqʼuet i cʼʌjñibal a chaʼan juntiquil a wamigo...

1) utsʼat bʌ i melbal.

2) muʼ bʌ i mel chuqui wen.

3) muʼ bʌ i cʌntesañet a mel chuqui utsʼat.

Jin chaʼan, jiñi cʼajtiya jiñʌch, ¿cheʼ ba yilal jiñi a wamigo bajcheʼ tsaʼ bʌ la cʌlʌ? Laʼ laj qʼuel chuqui ochem ti ili jujunchajp.

Ñaxam bʌ: Utsʼat bʌ i melbal

Yom bʌ maʼ ñaʼtan. Mach pejtelel jiñi muʼ bʌ i yʌl chaʼan wamigo mi caj i mel muʼ bʌ a mulan. Jiñi Tsʼijbujel miʼ yʌl chaʼan «an muʼ bʌ i lon cʼuxbiñonla cheʼ an chuqui yomob i taj ti lac tojlel» (Proverbios 18:24). Tajol mach utsʼat maʼ wubin, pero ñaʼtancu: ¿Am ba tsaʼ taja juntiquil a wamigo tsaʼ bʌ i mele mach bʌ weñic ti a tojlel o tsiʼ yʌlʌ mach bʌ i sujmic? ¿Mach ba jiñic ili muʼ bʌ i yʌqʼueñonla laj cʌy lac pejcan la camigo? * Ñumen wem bʌ tiʼ tojlel la camigo, jiñʌch wem bʌ i melbal i mach jiñic jaytiquilob.

Yom bʌ maʼ mel. Yajcan juntiquil a wamigo utsʼat bʌ i melbal.

«Cabʌlob utsʼat bʌ chuqui miʼ yʌlob tiʼ tojlel jiñi camiga Fiona. Cheʼ com sujtel bajcheʼ Fiona yicʼot com chuqui utsʼat miʼ yʌlob tic tojlel. Come weñʌch i melbal» (Yvette, 17 i jabilel).

Mele iliyi:

1. Pejcan Gálatas 5:22, 23.

2. Cʼajtiben a bʌ: «¿Am ba i chaʼan jiñi camigojob jiñi melbalʌl tac muʼ bʌ i yʌcʼ jiñi espíritu?».

3. Tsʼijbubeñob i cʼabaʼ jiñi a wamigojob i cheʼ jaʼel jiñi i melbal muʼ bʌ i ñumen tsictiyel.

I cʼabaʼ

․․․․․

I melbal

․․․․․

Jumpʼejl ticʼojel: Mi cojach miʼ tilel ti a pensar mach bʌ utsʼatic i melbal, tajol yomix maʼ sʌclan yambʌ a wamigojob.

I chaʼpʼejlel: Muʼ bʌ i mel chuqui wen

Yom bʌ maʼ ñaʼtan. Mi ti orajach a wom a taj a wamigojob tajol mach utsʼatic jiñi muʼ bʌ caj a yajcan. I mach yomic miʼ ñajʌyel a chaʼan ili ticʼojel am bʌ ti Biblia: «Jini muʼ bʌ i piʼleñob majlel jini mach bʌ weñobic i pusicʼal miʼ yutsi pʼojlel i mul» (Proverbios 13:20). Jiñi tʼan «mach bʌ weñobic i pusicʼal» mach yomic i yʌl jiñi mach bʌ utsʼatic miʼ loqʼuelob tiʼ examen o jiñi mach bʌ wen añic chuqui yujilob, woliʼ bʌ i taj tiʼ tʼan jiñʌch jiñi maʼañic bʌ miʼ jacʼob tʼan. ¿Muʼ baʼ mulan cheʼ bʌ i melbal juntiquil a wamigo bajcheʼ jiñi?

Yom bʌ maʼ mel. Sʌclan ti wen jiñi a wamigojob, mach a chʼʌm majqui jach (Salmo 26:4). Ili mach yomic i yʌl chaʼan mi caj a mel jumpʼejl grupo baqui yajcʌbil jach majqui mi caj a wotsan. Ili yom i yʌl chaʼan yom maʼ wen ñaxan qʼuel chaʼan miʼ mejlel a cʌn jiñi toj bʌ yicʼot mach bʌ tojic, majqui muʼ bʌ i melben i yeʼtel Dios i jiñi mach bʌ añic miʼ mel (Malaquías 3:18).

«Tijicña mi cubin chaʼan jiñi c tatob tsiʼ coltayoñob c sʌclan wem bʌ camigo lajaloʼ bʌ i jabilel quicʼot yicʼot wem bʌ añob tiʼ chaʼan bʌ Dios» (Christopher, 13 i jabilel).

Jacʼʌ ili cʼajtiya tac:

¿Muʼ baʼ bʌcʼñan chaʼan jiñi a wamigojob miʼ xiqʼuetob a mel mach bʌ utsʼatic?

□ Mucʼʌch

□ Maʼañic

¿Muʼ baʼ bʌcʼñan a suben jiñi a tatob majqui jiñi a wamigojob ti caj mach utsʼatic mi caj i qʼuelob?

□ Mucʼʌch

□ Maʼañic

Jumpʼejl ticʼojel: Mi tsaʼ jacʼʌ mucʼʌch, yom maʼ sʌclan a wamigojob ñumen wem bʌ i melbal tajol ti jiñi xñoptʼañob muʼ bʌ i yʌjlel chuqui wen tiʼ tojlelob.

I yuxpʼejlel: Muʼ bʌ i cʌntesañet a mel chuqui utsʼat

Yom bʌ maʼ ñaʼtan. Jiñi i Tʼan Dios miʼ yʌl chaʼan mi tsaʼ lac ñochta jiñi mach bʌ weñobic lac piʼʌlob mi caj laj cʌy lac mel chuqui tac wen (1 Corintios 15:33). Cheʼʌch miʼ pʌs chaʼan tsaʼ bʌ ujti tiʼ tojlel Lauren. «Com chaʼan jiñi c piʼʌlob ti clase miʼ qʼueloñob bajcheʼ i yamiga. Pero chaʼan miʼ mejlel bajcheʼ jiñi yom mic mel muʼ bʌ i yʌlob. Come c bajñel tsaʼ cubi c bʌ tsaʼ caji c mel bajcheʼ miʼ melob, chaʼan miʼ chʼʌmoñob». Lauren tsaʼ cʼoti i qʼuel chaʼan mi cojach maʼ mel cheʼ bajcheʼ miʼ subeñet jiñi a wamigojob, añetob tiʼ cʼʌb.

Yom bʌ maʼ mel. Cʌyʌ jiñi muʼ bʌ i xiqʼuetob chaʼan maʼ yʌn a melbal. Tajol mach cabʌlic a wamigo mi caj a cʌytʌl a wicʼot, pero tijicña mi caj a wubin a bʌ. Cheʼ jaʼel miʼ mejlel a taj wem bʌ a wamigojob muʼ bʌ i mejlel i coltañetob wem bʌ a melbal (Romanos 12:2).

«Juntiquil wem bʌ camigo jiñʌch Clint. Wen chuqui miʼ yajcan i mel i miʼ chʼʌmben i sujm bajcheʼ yubil miʼ yubin yambʌlob» (Jason, 21 i jabilel).

Jacʼʌ ili cʼajtiya tac:

¿Muʼ baʼ qʼuextan bajcheʼ maʼ xoj a pislel, a tʼan o a melbal chaʼan wem miʼ qʼuelet jiñi a wamigojob?

□ Mucʼʌch

□ Maʼañic

¿Muʼ baʼ majlel baqui a wujil chaʼan mach weñic tiʼ cajach chaʼan miʼ majlel jiñi a wamigojob?

□ Mucʼʌch

□ Maʼañic

Jumpʼejl ticʼojel: Mi tsaʼ jacʼʌ chaʼan mucʼʌch, suben jiñi a tatob o juntiquil hermano añix bʌ i jabilel chaʼan miʼ coltañet a sʌclan wem bʌ a wamigo muʼ bʌ i mejlel i coltañet. Miʼ testigojet Jehová, miʼ mejlel a pejcan juntiquil anciano ti a congregación.

[Nota]

PRINCIPIO AM BɅ TI BIBLIA

«An muʼ bʌ i cʼuxbiñonla ti isujm ñumen bajcheʼ lac piʼʌlob» (Proverbios 18:24).

JUNCHAJP MUʼ BɅ I MEJLEL A MEL

Chaʼlen wersa chaʼan maʼ pʌs utsʼat bʌ a melbal. Cheʼ jiñi, mi caj i lʌcʼtesañet jiñi yom bʌ i pʌs wem bʌ i melbal jaʼel. ¡I cheʼ bajcheʼ jiñi, wem bʌ a wamigo miʼ cajel!

¿A WUJIL BA ILI?

Anquese Dios junlajal miʼ qʼuel jiñi lac piʼʌlob, mucʼʌch i sʌclan majqui mi caj i chʼʌm tiʼ yamigo (Salmo 15:1-5).

¡MELE ILIYI!

¿Chuqui mi caj c mel chaʼan mic taj wem bʌ camigojob? ․․․․․

Ili jiñobʌch añobix bʌ i jabilel com bʌ c ñumen cʌñob: ․․․․․

¿Chuqui jiñi com bʌ j cʼajtibeñob jiñi c tat yicʼot c ñaʼ chaʼan bʌ ili tema? ․․․․․

¿CHUQUI MAʼ ÑAʼTAN JATET?

● ¿Baqui bʌ jiñi ñumen ñuc bʌ maʼ qʼuel tiʼ tojlel juntiquil a wamigo? Alʌ chucoch.

● ¿Chuqui jiñi yom bʌ maʼ weñʼesan jaʼel chaʼan maʼ sujtel ti wem bʌ amigo?

[Comentario]

Jiñi c tatob tiʼ subeyoñob chaʼan an yom bʌ mij cʌy c ñochtañob. Ti ñaxan mach comic c jacʼbeñob i tʼan come mic ñaʼtan chaʼan jin jach cojach bʌ camigojob. Jumpʼejlʌch wem bʌ ticʼojel come tsaʼ cʼoti j qʼuel chaʼan añʌch ñumen wem bʌ miʼ mejlel c taj bajcheʼ camigojob» (Carlos).

[Recuadro]

Yan tac bʌ muʼ bʌ i mejlel a mel

Chaʼlen tʼan a wicʼot a tatob. Cʼajtibeñob bajcheʼ yilalob i yamigojob cheʼ bʌ xcolelobto. ¿Tsaʼ ba i sʌclayob mach bʌ weñobic i yamigo? ¿Chucoch? Cʼajtibeñob chuqui yom maʼ mel chaʼan maʼañic maʼ taj wocol.

Aqʼueñob i cʌñob a tatob jiñi a wamigojob. Mi mach a womic miʼ cʌñob, ñaʼtan chucoch. ¿A wujil ba chuqui maʼañic bʌ mi caj i mulañob jiñi a tatob? Mi añʌch, yom maʼ sʌclan wem bʌ a wamigojob.

Ñʌchʼtan muʼ bʌ i subeñet jiñi a wamigojob. Pʌsʌ chaʼan mucʼʌch a qʼuel ti ñuc chuqui muʼ bʌ i subeñetob yicʼot chaʼan mucʼʌch a ñaʼtañob (Filipenses 2:4).

Chʼʌmbeñob i sujm i ñusʌbeñob i mul. Mach a pijtan chaʼan tojob. Cheʼ bajcheʼ miʼ yʌl Santiago 3:2, «ti lac pejtelel mi lac wen taj lac sajtemal».

Mach a bajñel chaʼañob jiñi a wamigojob. Mi a wamigojobʌch tiʼ sujm, yaʼañob cheʼ bʌ i cʼʌjñibal a chaʼañob (Eclesiastés 4:9, 10).

[Dibujo]

Mi cojach maʼ mel cheʼ bajcheʼ miʼ subeñet jiñi a wamigojob, añetob tiʼ cʼʌb