CɅNTESɅNTEL 35

¿Bajcheʼ mic mejlel ti sujtel tiʼ yamigo Dios?

Gabriel tsiʼ qʼuele chaʼan wen ñuc i cʼʌjñibal cheʼ la camigo Dios cheʼ woli lac ñusan wen tsʌts bʌ wocol. Miʼ yʌl: «Jiñi c papá tsiʼ cʌyʌyon lojon cheʼ bʌ an jaxto 12 c jabilel. Cʼajal c chaʼan cheʼ ti jumpʼejl acʼʌlel jal tsaʼ c sube Jehová chaʼan miʼ chaʼ tilel jiñi c papá».

Gabriel tsaʼ caji i pejcan i Biblia cheʼ bʌ wen chʼijyem. I tsiʼ taja jumpʼejl versículo muʼ bʌ i yʌl tiʼ tojlel Jehová: «Jini pʼumpʼun bʌ miʼ yʌcʼ i bʌ ti a wenta. Xcoltayajet i chaʼan mebaʼ alʌlob» (Salmo 10:14). Gabriel miʼ yʌl chaʼan jiñi tʼan tsaʼ cʼoti tiʼ pusicʼal: «Cheʼ tsaʼ c pejca, tsaʼ cubi chaʼan Jehová woliʼ yʌqʼueñon i coltaya, i tsiʼ cʼajtesʌbeyon chaʼan jiñʌch jiñi c Tat. ¿Am ba yambʌ ñumen wem bʌ tatʌl bajcheʼ Jehová?».

¿CHEʼ ba woli a ñusan bajcheʼ Gabriel? Tajol cheʼʌchi, o mach cheʼiqui. Pero wen tsiquil chaʼan Jehová yom chaʼan maʼ sujtel tiʼ yamigo. Qʼuele chuqui miʼ yʌl jiñi Biblia: «Lʌcʼtesan laʼ bʌ ti Dios i mi caj i lʌcʼtesan i bʌ ti laʼ tojlel» (Santiago 4:8). ¡Wen tsiquil chuqui miʼ yʌl jiñi Biblia! mach yʌlʌyic mi maʼañic mi lac taj laj qʼuel o mi mach wen ñucoñicla, ¡Jehová miʼ subeñonla chaʼan yom chaʼan mi lac sujtel tiʼ yamigo!

Pero mach ti orajic mi lac sujtel tiʼ yamigo Dios, yomʌch mi lac chaʼlen wersa. Jumpʼejl ejemplo. ¿Am baʼ pʌcʼʌ a ñichteʼ? Mi a wom chaʼan wen miʼ colel, ¿chuqui yom maʼ mel? Yom wen baqui maʼ wʌcʼ yicʼot yom maʼ chʌcʌ mul. Mach cheʼic jach yom maʼ cʌy. Cheʼʌch miʼ yujtel jaʼel mi a wom sujtel tiʼ yamigo Dios. ¿Chuqui yom maʼ mel?

Ñuc i cʼʌjñibal maʼ pejcan a Biblia

Cheʼ bajcheʼ a wujil, chaʼtiquil wem bʌ i yamigojob i bʌ miʼ temel chaʼleñob tʼan yicʼot miʼ lajal ñʌchʼtañob i bʌ. Cheʼʌch miʼ yujtel jaʼel cheʼ la com sujtel tiʼ yamigo Dios. Pero ¿bajcheʼ miʼ mejlel lac ñʌchʼtan Jehová? Cheʼ mi lac pejcʌben i Tʼan, jiñi Biblia (Salmo 1:2, 3).

Tajol maʼañic maʼ wen mulan a pejcan jun. Tajol muʼ bʌ a mulan jiñʌch qʼuel televisión, alas videojuego o maʼ loqʼuel ti xʌmbal a wicʼot a wamigojob. Pero mi a wom sujtel tiʼ yamigo Dios, yom maʼ ñʌchʼtan muʼ bʌ i subeñet tiʼ Tʼan, maʼañic yambʌ bajcheʼ miʼ mejlel a mel.

Mach a pensarin chaʼan wocol jax tiʼ pejcʌntel jiñi Biblia. Mi caj a wen mulan a pejcan mi mucʼʌch a mel, anquese tsaʼ ñaʼta chaʼan maʼañic mi caj a mulan. Yom maʼ wʌqʼuen i yorajlel chaʼan maʼ pejcan. ¿Bajcheʼ miʼ mejlel a mel? Miʼ mejlel a mel bajcheʼ juntiquil xchʼoc i cʼabaʼ Lais. Miʼ yʌl: «An c chaʼan jumpʼejl horario. Cheʼ mic chʼojyel, mic pejcan jumpʼejl capítulo». María, 15 bʌ i jabilel, yambʌ bajcheʼ miʼ mel: «Ti jujumpʼejl acʼʌlel mic pejcan jumucʼ jiñi Biblia cheʼ muʼto j cajel ti wʌyel».

¿Chuqui mi caj a mel jatet chaʼan maʼ pejcan jiñi Biblia? Ñaxan qʼuele jiñi recuadro « Cʌñʌ jiñi Biblia». Cheʼ jiñi, tsʼijbun ila bajcheʼ ora mi caj a jumucʼ pejcan jiñi i Tʼan Dios.

․․․․․

Pero cheʼ maʼ mel jumpʼejl horario i tejchibal jaxto. Cheʼ mi caj a tech a pejcan jiñi Biblia, mi caj a qʼuel chaʼan añʌch i wocolel. Tajol cheʼ maʼ wujtel bajcheʼ Jezreel, 11 bʌ i jabilel, miʼ yʌl: «An parte tac yaʼ ti Biblia wen wocol bʌ ti pejcʌntel, i maʼañic mic ñusan c bʌ». Pero mach lujbʼaquet. Cʼajtesan: Cheʼ maʼ pejcan jiñi Biblia woli a ñʌchʼtan jiñi ñumen wem bʌ a wamigo, Jehová. Mi caj a qʼuel chaʼan mucʼʌch caj a mulan. Cheʼ mucʼʌch a chaʼlen wersa a pejcan, mi caj a ñumen mulan yicʼot mi caj a ñumen tajben i wenlel.

Mach a cʌy a mel oración

Dios tsiʼ yʌcʼʌ jiñi oración chaʼan mi lac mejlel ti tʼan la quicʼot. Jiñʌch wen utsʼatax bʌ lac majtan. Ñaʼtancu: Miʼ mejlel a pejcan jin jach bajcheʼ ora a wom, ti qʼuiñil o ti acʼʌlel. Jehová mucʼʌch caj i ñʌchʼtañet, i yomʌch i ñʌchʼtañet. Jin chaʼan, jiñi Biblia miʼ subeñonla: «Mach yʌlʌyic chuqui mi laʼ ñusan, aqʼuenla i ñaʼtan Dios ti oración, pejcanla ti wocol tʼan ti jumpʼejl laʼ pusicʼal yicʼot aqʼuenla wocolix i yʌlʌ» (Filipenses 4:6).

Ili yom i yʌl chaʼan cabʌl chuqui miʼ mejlel a suben Dios, bajcheʼ jiñi a wocol tac o chuqui tac maʼ pensarin. Pero yomʌch maʼ wʌqʼuen wocolix i yʌlʌ jaʼel. ¿Mach ba cheʼic mi lac mel tiʼ tojlel juntiquil la camigo cheʼ bʌ an chuqui wem bʌ miʼ mel ti lac tojlel? Jehová jiñʌch jiñi ñumen am bʌ i mele chuqui wem bʌ ti lac tojlel (Salmo 106:1).

Tsʼijbun chucoch a wom a wʌqʼuen wocolix i yʌlʌ Jehová.

․․․․․

Mi an i tajol maʼ wubin chaʼan cʌlʌxix chuqui maʼ pensarin o jiñi a bʌqʼuen, ¿chuqui miʼ mejlel a mel? «Aqʼuen a cuch lac Yum. Jini mi caj i cuchbeñet majlel. Maʼanic miʼ junyajlel cʌy [tiʼ bajñelil] jini toj bʌ» (Salmo 55:22.)

Tsʼijbun jiñi muʼ bʌ a pensarin a wom bʌ a wʌl ti a woración.

․․․․․

Cʌñʌ ti chuqui am bʌ a ñusa

An yambʌ chuqui yom maʼ wen chʼʌm ti ñuc cheʼ i yamigojet Dios. David tiʼ tsʼijbu ti jumpʼejl cʼay: «Ñopola utsʼat lac Yum» (Salmo 34:8). Cheʼ bʌ tiʼ tsʼijbu, an chuqui tsaʼ ujti i ñusan. Jiñi rey Saúl colelix i tsʌnsan. Tiʼ caj jiñi, tsaʼ majli ti putsʼel baʼan i contrajob, jiñi filisteojob. I ti orajach tsaʼ cʌjñi. Yaʼix mi caj i tsʌnsʌntel yilal, pero mach cheʼic tsaʼ ujti. ¿A wujil ba chucoch? Tsiʼ wen cʼʌñʌ i ñaʼtʌbal: Sojquem tsiʼ mele i bʌ (1 Samuel 21:10-15).

Pero David maʼañic tsiʼ ñaʼta chaʼan cuxul tsaʼ loqʼui chaʼan wen an i ñaʼtʌbal. Tiʼ tejchibal jiñi i cʼay tsiʼ yʌlʌ: «Tsaʼ c sajca lac Yum. Tsiʼ yubiyon. Tsiʼ locʼsʌbeyon pejtelel c bʌqʼuen» (Salmo 34:4). David tsaʼ mejli i yʌl: «Ñopola utsʼat lac Yum», come cheʼʌch tsiʼ qʼuele ti jiñi tsaʼ bʌ i ñusa.

Ñaʼtan baqui ora tsaʼ qʼuele chaʼan Jehová tsiʼ cʌntayet, i tsʼijbun chuqui tsaʼ ujti. Mach a pensarin mi mach jiñic jiñi toj sajtel bʌ lac pusicʼal cheʼ mi la cubin, tajol jiñʌch jiñi mach bʌ añic mi lac wen qʼuel ti ñuc cheʼ miʼ yujtel.

․․․․․

Ti jujuntiquilonla yom mi lac chaʼlen wersa chaʼan mi lac sujtel tiʼ yamigo Dios, mach yʌlʌyic mi jiñi lac tat lac ñaʼ tsiʼ cʌntesayonla tiʼ sujmlel. ¿Woli baʼ chaʼlen wersa chaʼan maʼ sujtel tiʼ yamigo Dios? Mi maxto añic, ili cʌntesʌntel mi caj i coltañet chaʼan maʼ tech a mel. Jehová mi caj i yʌqʼueñet i bendición cheʼ maʼ chaʼlen wersa, come jiñi Biblia miʼ yʌl: «Chʌn cʼajtinla i mi caj laʼ wʌqʼuentel, chʌn sʌclanla i mi caj laʼ taj» (Mateo 7:7).

TEXTO ÑUC BɅ I CʼɅJÑIBAL

«Tijicñayob jiñi muʼ bʌ i ñaʼtañob chaʼan i cʼʌjñibalʌch i chaʼañob Dios» (Mateo 5:3)

MUʼ BɅ MEJLEL A MEL

Mi ti jujumpʼejl qʼuin maʼ pejcan chʌmpʼejl página jiñi Biblia, mi caj i yujtel a pejcan ti jumpʼejl jab.

¿A WUJIL BA?

Cheʼ woli a chʼʌm ili estudio loqʼuem bʌ ti Biblia i maʼ jacʼ ili ticʼojel tac miʼ pʌs chaʼan Jehová yom chaʼan maʼ sujtel tiʼ yamigo (Juan 6:44).

¡MELE TSAʼ BɅ A ÑAʼTA!

Ili jiñʌch muʼ bʌ caj c mel chaʼan mic ñumen locʼsʌben i wenlel cheʼ mic pejcan jiñi c Biblia: ․․․․․

Ili jiñʌch muʼ bʌ caj c mel chaʼan ti bele ora mic mel oración: ․․․․․

¿Chuqui com j cʼajtiben c papá o c mamá chaʼan ili tema? ․․․․․

IXCU JATET, ¿CHUQUI MAʼ ÑAʼTAN?

● ¿Chuqui miʼ mejlel a mel chaʼan maʼ ñumen ñusan a bʌ cheʼ maʼ pejcan a Biblia?

● ¿Chucoch yomʌch i ñʌchʼtan la coración Jehová cheʼ xmulilonla?

● ¿Bajcheʼ miʼ mejlel a ñumen weñʼesan a woración?

[Comentario]

«Cheʼ bʌ chʼochʼoconto, tiʼ pejtelel ora lajal jach chuqui mi cʌl ti coración. Ili ora mic chaʼlen wersa cʌl chuqui wem bʌ yicʼot mach bʌ weñic mic ñusan ti jujumpʼejl qʼuin. Come jujumpʼejl qʼuin mach lajalic, mach jiñix mic chʌcʌ al jiñi tsaʼix bʌ cʌlʌ». (Eva)

[Recuadro yicʼot foto]

 Cʌñʌ jiñi Biblia

1. Yajcan jumpʼejl relato muʼ bʌ a mulan. Chaʼan maʼ ñumen chʼʌmben i sujm, cʼajtiben Jehová chaʼan miʼ yʌqʼueñet a ñaʼtʌbal.

2. Xucʼul yom maʼ pejcan. Mach ti orajic yom maʼ pejcan. Cʼʌñʌ a pensar cheʼ woli a pejcan majlel: ñopo a qʼuel jiñi woli bʌ i yujtel, ñʌchʼtan jiñi woliyoʼ bʌ ti tʼan, ubiben i yujtsʼil yicʼot i sumuclel jiñi yaʼ tac bʌ an... Cheʼ bajcheʼ ili mi caj a chumtan ili relato.

3. Melben a bʌ cʼajtiya tac. Cheʼ miʼ yujtel a pejcan jiñi relato cʼajtiben a bʌ:

● ¿Chucoch tsiʼ yʌcʼʌ ti tsʼijbuntel Jehová ila ti Biblia?

● ¿Majqui miʼ mejlel c lajibeñob i melbal, i majqui jiñi maʼañic bʌ?

● ¿Chuqui tac miʼ cʌntesañon chaʼan ili ora?

● ¿Chuqui miʼ cʌntesañon tiʼ tojlel Jehová yicʼot chaʼan bajcheʼ yilal i melbal?

4. Mele jumpʼejl alʌ oración. Suben Jehová chuqui an a cʌñʌ cheʼ woli a pejcan jiñi Biblia yicʼot bajcheʼ a wom a wʌcʼ ti ñuc ti a cuxtʌlel. I cʼajtesan chaʼan yom maʼ wʌqʼuen wocolix i yʌlʌ cheʼ an a chaʼan jiñi i Tʼan, jiñi Biblia.

[Foto]

«Jini a tʼan lajalʌch bajcheʼ lámpara chaʼan coc. I sʌclelʌch c bijlel» (Salmo 119:105)

[Recuadro yicʼot foto]

Ñaxan mele jiñi ñuc bʌ i cʼʌjñibal

¿Maʼañic ba maʼ tajben i yorajlel chaʼan maʼ mel oración yicʼot maʼ pejcan jiñi Biblia? Mi cheʼ maʼ wujtel maʼ wubin, tajol yom maʼ wen qʼuel chuquiyes jiñi muʼ bʌ a ñumen acʼ ti ñuc.

Mele iliyi: Sʌclan jumpʼejl balde i butʼu colem xajlel tac. Cheʼ jiñi butʼu jiʼ jinto miʼ pajmel jiñi balde. ¿Chuqui tsaʼ ujti? Jiñi balde butʼul tsaʼ cʌyle ti xajlel yicʼot jiʼ.

Chaʼ locʼsañix jiñi jiʼ yicʼot xajlel, wʌle ñaxan otsan jiñi jiʼ, i cheʼ jiñi, jiñi xajlel tac. ¿Chuqui tsaʼ ujti? Maʼañix tsaʼ ochi jiñi xajlel tac, ¿mach ba cheʼi? ¿Chucoch? Come ñaxan tsaʼ wotsaʼ jiñi jiʼ.

¿Chuqui miʼ pʌsbeñonla? Mi ñaxan maʼ mel jiñi mach bʌ ñuc taquic i cʼʌjñibal bajcheʼ jiñi alas o ñusaqʼuin tac, maʼañic mi caj a tajben i yorajlel chaʼan maʼ mel jiñi ñuc tac bʌ i cʼʌjñibal, bajcheʼ jiñi i chaʼan bʌ Dios. Jin chaʼan, jiñi Biblia miʼ suben jiñi xñoptʼañob chaʼan yom miʼ qʼuelob «chuqui tac jiñi ñumen ñuc bʌ i cʼʌjñibal» (Filipenses 1:10). Mi mucʼʌch a jacʼ ili ticʼojel, mi caj a qʼuel chaʼan mucʼʌch caj a tajben i yorajlel chaʼan maʼ mel jiñi i chaʼan tac bʌ Dios yicʼot chaʼan maʼ mel jiñi yan tac bʌ. Cʼajtesan: Ñaxan yom maʼ wʌcʼ jiñi ñumen ñuc tac bʌ i cʼʌjñibal.

[Foto]

Chaʼan mi lac sujtel tiʼ yamigo Dios yom mi lac chaʼlen wersa, lajal bajcheʼ jumpʼejl ñichteʼ yom mi laj cʌntan chaʼan wen miʼ colel