CɅNTESɅNTEL 37

¿Yomix ba mic chʼʌmjaʼ?

Chaʼlen ti marcar miʼ sujm o mach i sujmic:

Pejtelel jiñi xñoptʼañob yomʌch miʼ chaʼleñob chʼʌmjaʼ.

□ I sujm

□ Mach i sujmic

Jiñi chʼʌmjaʼ miʼ coltañonla chaʼan maʼañic mi lac chaʼlen mulil.

□ I sujm

□ Mach i sujmic

Jiñi chʼʌmjaʼ i tejchibalʌch laj coltʌntel.

□ I sujm

□ Mach i sujmic

Dios maʼañic mi caj i chaʼlen meloñel tic tojlel miʼ maʼañic chʼʌmʌl c chaʼan jaʼ.

□ I sujm

□ Mach i sujmic

Come jiñi camigojob tsaʼix i chaʼleyob chʼʌmjaʼ, yom mic mel jaʼel.

□ I sujm

□ Mach i sujmic

¿Woli ba i tsictiyel ti a cuxtʌlel chaʼan mucʼʌch a jacʼ jiñi mandar tac am bʌ ti Biblia? ¿Muʼ baʼ chaʼlen wersa chaʼan maʼ sujtel tiʼ yamigo Dios? ¿Muʼ baʼ suben yambʌlob jiñi ñopol bʌ a chaʼan? Mi mucʼʌch a mel ili uxchajp, miʼ maxto a chaʼle chʼʌmjaʼ tajol woliyʌch a ñaʼtan a mel. Pero chaʼan maʼ mel yom maʼ ñaxan ñaʼtan mi chajpʌbiletix. Jiñi cʼajtiya tac am bʌ ti ñaxan mi caj i coltañet a qʼuel mi chajpʌbiletix.

● Pejtelel jiñi xñoptʼañob yomʌch miʼ chaʼleñob chʼʌmjaʼ.

I sujm. Jesús tiʼ sube jiñi xcʌntʼañob i chaʼan chaʼan jiñʌch yom bʌ miʼ melob (Mateo 28:19, 20). Jesús jiñʌch tsaʼ bʌ i mele jaʼel. Jin chaʼan, mi a wujilix chuqui a wom yicʼot chajpʌbiletix maʼ wubin yom maʼ chaʼlen chʼʌmjaʼ.

● Jiñi chʼʌmjaʼ miʼ coltañonla chaʼan maʼañic mi lac chaʼlen mulil.

Mach i sujmic. Jiñi chʼʌmjaʼ jiñʌch baqui miʼ tsictiyel tiʼ tojlel yambʌlob chaʼan tsaʼix a wʌcʼʌ a bʌ ti Jehová. Mi la cʌcʼ lac bʌ ti Jehová come com lac mel muʼ bʌ i mulan, i mach chaʼañic jach mʌctʌbilonla mi lac ubin chaʼan mi lac mel jiñi la com bʌ anquese tajol mach weñic.

● Jiñi chʼʌmjaʼ i tejchibalʌch laj coltʌntel.

I sujm. Cheʼ bajcheʼ miʼ yʌl jiñi Biblia, jiñi chʼʌmjaʼ ñuc i cʼʌjñibal chaʼan mi laj coltʌntel (1 Pedro 3:21). Pero iliyi mach cheʼ jach yom mi lac ti mel tiʼ caj chaʼan maʼañic chuqui mi lac chaʼlen. Mach cheʼiqui, yom mi lac mel come mi laj cʼuxbin Jehová yicʼot com lac melben i yeʼtel tiʼ pejtelel ora ti jumpʼejl lac pusicʼal (Marcos 12:29, 30).

● Dios maʼañic mi caj i chaʼlen meloñel tic tojlel miʼ maʼañic chʼʌmʌl c chaʼan jaʼ.

Mach i sujmic. Santiago 4:17 miʼ yʌl: «Mi an yujil bʌ melol chuqui wen i maʼañic miʼ mel, wolix i chaʼlen mulil», mach yʌlʌyic mi chʼʌmʌlix i chaʼan jaʼ o maxto añic. Jin chaʼan, ñaʼtancu: ¿Mucʼʌch baʼ chʼʌmben i sujm chuqui yom bʌ Dios ti a tojlel? ¿Wen añʌchix baʼ ñaʼtʌbal chaʼan maʼ qʼuel chuqui jiñi a wom bʌ ti a cuxtʌlel? Tajol i yorajlelix chaʼan maʼ pejcan jiñi a tat a ñaʼ o juntiquil hermano añix bʌ i ñaʼtʌbal. Jiñʌch muʼ bʌ caj i coltañetob a taj jiñi a wom bʌ chaʼan maʼ mejlel ti chʼʌmjaʼ.

● Come jiñi camigojob tsaʼix i chaʼleyob chʼʌmjaʼ, yom mic mel jaʼel.

Mach i sujmic. Yom loqʼuem ti a pusicʼal mi a womix a chaʼlen chʼʌmjaʼ (Salmo 110:3). I yomʌch maʼ mel cheʼ bʌ muqʼuix a chʼʌmben i sujm chuqui yom i yʌl cheʼ i testigojetix Jehová yicʼot mi chajpʌbiletix chaʼan maʼ tsʼʌctesan jiñi (Eclesiastés 5:4, 5).

Jiñi chʼʌmjaʼ miʼ qʼuextan a cuxtʌlel

Jiñi chʼʌmjaʼ cabʌl chuqui wem bʌ miʼ mejlel i yʌqʼueñet ti a cuxtʌlel. Pero cheʼ jaʼel cabʌlʌch chuqui yom bʌ maʼ tsʼʌctesan. ¿Chuqui? Maʼ tsʼʌctesan pejtelel tsaʼ bʌ a sube Jehová cheʼ bʌ ti a wʌcʼʌ a bʌ tiʼ tojlel.

¿Lʌcʼʌlix ba chaʼan maʼ chaʼlen chʼʌmjaʼ? Cheʼ jiñi, añʌch i sujmlel chucoch tijicñayet. ¿Am ba yambʌ ñumen ñuc bʌ i cʼʌjñibal cheʼ bʌ maʼ melben i yeʼtel Jehová tiʼ pejtelel a pusicʼal yicʼot chaʼan ti jujumpʼejl qʼuin maʼ pʌsben chaʼan cuxuletʌch tiʼ melol i yeʼtel? (Mateo 22:36, 37.)

TI JIÑI YAMBɅ CɅNTESɅNTEL

Qʼuele bajcheʼ maʼ ñumen locʼben i wenlel jiñi a cuxtʌlel.

PRINCIPIO AM BɅ TI BIBLIA

«Chaʼan mi laʼ wʌcʼ jiñi laʼ bʌcʼtal bajcheʼ cuxul bʌ majtañʌl, chʼujul bʌ yicʼot muʼ bʌ i mulan Dios, cheʼ bajcheʼ jiñi mi caj laʼ cʼʌn pejtelel laʼ ñaʼtʌbal chaʼan mi laʼ melben jiñi chʼujul bʌ i yeʼtel» (Romanos 12:1).

MUʼ BɅ I MEJLEL A MEL

Cʼajtiben a tat a ñaʼ majqui bʌ hermano o hermana yaʼ ti congregación miʼ mejlel i coltañet chaʼan maʼ ñumen taj majlel a ñaʼtʌbal tiʼ chaʼan bʌ Dios (Hechos 16:1-3).

¿A WUJIL BA ILIYI?

Jiñi chʼʌmjaʼ lajal bajcheʼ lac «marcajlel» ñuc bʌ i cʼʌjñibal chaʼan mi laj coltʌntel (Ezequiel 9:4-6).

¡MUʼ BɅ I MEJLEL C MEL!

Cʌntesa tac am bʌ ti Biblia yom bʌ mic ñumen chʼʌmben i sujm chaʼan mic mejlel ti chʼʌmjaʼ: ․․․․․

¿Chuqui miʼ mejlel j cʼajtibeñob c papá c mamá chaʼan bʌ jiñi chʼʌmjaʼ? ․․․․․

¿CHUQUI MAʼ ÑAʼTAN JATET?

● ¿Chucoch jiñi chʼʌmjaʼ yomʌch mi lac wen chʼʌm ti ñuc?

● ¿Chucoch an xcolelob mucʼʌch bʌ i waʼ chaʼleñob chʼʌmjaʼ?

● ¿Chucoch an xcolelob muʼ bʌ i ñaʼtañob chaʼan maxto i yorajlelic chaʼan miʼ yʌcʼob i bʌ ti Jehová yicʼot chaʼan miʼ chaʼleñob chʼʌmjaʼ?

[Comentario]

«Cheʼ bʌ mij cʼajtesan chaʼan tsaʼix c chaʼle chʼʌmjaʼ miʼ coltañon c mel chuqui wen yicʼot chaʼan maʼañic mi cotsan c bʌ ti wocol» (Noemí).

[Recuadro yicʼot foto]

Cʼajtiya tac muʼ bʌ i ñumen mejlel chaʼan jiñi chʼʌmjaʼ

¿Chuqui i sujmlel jiñi chʼʌmjaʼ? Cheʼ bʌ maʼ sujpʼel ti jaʼ lajal bajcheʼ maʼ chʌmel, maʼ cʌy a ñaʼtan a mel chuqui bajñel a wom. I cheʼ bʌ maʼ chaʼ loqʼuel ti jaʼ lajal bajcheʼ maʼ chaʼ cuxtʌyel, pero ili ora chaʼañix maʼ melben i yeʼtel Jehová, yom bʌ i yʌl chaʼan maʼ mel muʼ bʌ i mulan.

¿Chuqui yom i yʌl cheʼ bʌ maʼ wʌqʼuen a cuxtʌlel Jehová? Yom i yʌl chaʼan jiñi a cuxtʌlel mach a chaʼañix, muqʼuix a wʌqʼuen Jehová (Mateo 16:24). Jin chaʼan, cheʼ muʼto a cajel ti chʼʌmjaʼ yom chaʼan tsaʼix a ñaxan sube Jehová ti oración chaʼan jiñʌch ñaxan mi caj wʌcʼ jiñi i yeʼtel.

¿Chuqui choncolix bʌ c mel i wentʌlel cheʼ bʌ muʼto j caj ti chʼʌmjaʼ? Yom chaʼan cheʼix maʼ chumtan cheʼ bajcheʼ miʼ yʌl jiñi Biblia yicʼot chaʼan wolix a suben yambʌlob jiñi ñopol bʌ a chaʼan. Cheʼ jaʼel yom lʌcʼʌl an a wicʼot Dios, ili mi caj i mejlel a mel cheʼ bʌ maʼ pejcan jiñi Biblia yicʼot maʼ mel oración. Yom loqʼuemʌch ti a pusicʼal cheʼ a wom a melben i yeʼtel Jehová i mach chaʼañic jach miʼ xiqʼuetob.

¿Jaypʼejl c jabilel yom an c chaʼan chaʼan mic chʼʌmjaʼ? Mach yʌlʌyic jaypʼejl a jabilel, ñumen ñuc bʌ i cʼʌjñibal jiñʌch cheʼ a wujilix chucoch mi caj a wʌqʼuen a bʌ Jehová.

¿Ixcu mi jiñi c papá yicʼot c mamá miʼ subeñoñob chaʼan yomto mic pijtan chaʼan mic chaʼlen chʼʌmjaʼ? Mi tsaʼ i subeyetob chaʼan añixto yom maʼ ñumen weñʼesan chaʼan bajcheʼ maʼ jacʼ jiñi principio tac am bʌ ti Biblia, jacʼbeñob i tʼan. I cheʼ bajcheʼ jiñi muʼto a mejlel a ñumen pʼʌtʼesan chaʼan bajcheʼ an a wicʼot Jehová (1 Samuel 2:26).

[Recuadro]

Muʼ bʌ i mejlel a mel

¿Wolix baʼ ñaʼtan chʼʌmjaʼ?

Ili cʼajtiya tac mi caj i coltañet a ñaʼtan mi weñʌch bajcheʼ woli a mel. Pero machme ñajayic a chaʼan a ñaxan pejcan jiñi texto tac chaʼan maʼ jacʼ ili cʼajtiya tac.

¿Muʼ ba a ñop tiʼ tojlel Jehová? ¿Bajcheʼ woli a pʌs chaʼan mucʼʌch? (Salmo 71:5). ․․․․․

¿Mucʼʌch baʼ cʌn baqui bʌ jiñi wem bʌ yicʼot baqui bʌ mach weñic?¿Baqui an a pʌsʌ chaʼan mucʼʌch? (Hebreos 5:14). ․․․․․

¿Jaysujtel maʼ mel oración? ․․․․․

Cheʼ bʌ maʼ mel oración, ¿muʼ baʼ jamʌ al chuqui muʼ bʌ a ñaʼtan?¿Muʼ ba i pʌs ti jiñi muʼ bʌ a wʌl chaʼan maʼ cʼuxbin Jehová? (Salmo 17:6). ․․․․․

¿Chuqui a wom bʌ a ñumen weñʼesan cheʼ bʌ maʼ mel oración? ․․․․․

¿Mucʼʌch ba a wen pejcan jiñi a Biblia? (Josué 1:8, Traducción del Nuevo Mundo). ․․․․․

¿Chuqui tac ti tema maʼ qʼuel cheʼ bʌ maʼ bajñel chajpan a bʌ? ․․․․․

¿Chuqui jiñi yambʌ a wom bʌ a taj cheʼ bʌ maʼ bajñel chajpan a bʌ? ․․․․․

¿Mejl baʼ wʌl chaʼan ñumen weñʌch bajcheʼ woli a mel jiñi subtʼan? (Jumpʼejl ejemplo:¿Mejl baʼ tsictesan jiñi mach bʌ wen wocolic am bʌ ti Biblia? ¿Muʼ baʼ chaʼ julaʼtan jiñi muʼ bʌ i ñʌchʼtañetob? ¿Mucʼʌch baʼ chaʼlen wersa a taj jumpʼejl estudio?)

□ Mucʼʌch □ Maʼañic

¿Mucʼʌch baʼ loqʼuel ti subtʼan anquese jiñi a papá o a mamá maʼañic miʼ loqʼuelob? (Hechos 5:42).

□ Mucʼʌch □ Maʼañic

¿Chuqui jiñi a wom bʌ a ñumen taj cheʼ bʌ maʼ chaʼlen subtʼan? (2 Timoteo 2:15). ․․․․․

¿Mucʼʌch baʼ luʼ ajñel ti jiñi tempa bʌ o ñʌmʌlet a cʌy a bʌ? (Hebreos 10:25). ․․․․․

¿Chuqui tac muʼ bʌ a mel cheʼ bʌ yaʼañet ti tempa bʌ? ․․․․․

Cheʼ maʼañic chuqui miʼ yʌlob jiñi a tatob, ¿mucʼʌch baʼ majlel ti tempa bʌ cheʼ maʼañic miʼ majlelob?

□ Mucʼʌch □ Maʼañic

¿Muʼ baʼ ñusan a bʌ tiʼ melol i yeʼtel Dios? (Salmo 40:8).

□ Mucʼʌch □ Maʼañic

¿Cʼajal baʼ chaʼan baqui maʼañic ti a jacʼʌ cheʼ bʌ an chuqui tiʼ xiqʼuiyetob a mel? (Romanos 12:2). ․․․․․

¿Chuqui a wom bʌ a mel chaʼan maʼañic maʼ cʌy a cʼuxbin Jehová? (Judas 20, 21). ․․․․․

¿Mucʼʌch ba caj a chʌn melben i yeʼtel Jehová cheʼ bʌ jiñi a tatob o a wamigojob miʼ cʌyob jiñi i sujmlel? (Mateo 10:36, 37).

□ Mucʼʌch □ Maʼañic

[Dibujo]

Cheʼ bʌ maʼ ñaʼtan a chaʼlen chʼʌmjaʼ lajal bajcheʼ woli a ñaʼtan chaʼan maʼ ñujpuñel: Mach ti orajic maʼ mel