1, 2. ¿Chucoch yom mi laj qʼuel bajcheʼ wen ñuc bʌ majtañʌl jiñi oración yicʼot chucoch cʼʌñʌl mi lac ñaʼtan chuqui mi yʌl jiñi Biblia chaʼan jiñi oración?

CHEʼ mi lac lajeʼ jiñi ecʼ tac yicʼot jiñi Pañimil, ili Pañimil wen chʼoʼchʼoc jax. Jin chaʼan, Jehová, «tsaʼ bʌ i mele panchan yicʼot pañimil», jiñi tejclum tac lajal bajcheʼ junchʌjcʼ (juntʼujy) jaʼ am bʌ ti pʼejt (Salmo 115:15; Isaías 40:15). Pero jiñi Biblia mi yʌl chaʼan «lʌcʼʌl an lac Yum tiʼ tojlel pejtel muʼ bʌ i pejcañob ti pejtelel i pusicʼal» yicʼot mi yʌl chaʼan «miʼ yʌqʼueñob chuqui yomob jiñi muʼ bʌ i cʼuxbiñob [...] miʼ yubibeñob i tʼan cheʼ miʼ pejcañob» (Salmo 145:18, 19). Chʼʌmben i sujmlel ili tʼan tac. Jiñi tsaʼ bʌ i Meleyonla Mach bʌ Añic i Pʼisol i Pʼʌtʌlel lʌcʼʌl an laj quicʼot yicʼot mi caj i ñʌchʼtañonla mi mucʼʌch ‹lac pejcan tiʼ pejtelel lac pusicʼal›, yom i yʌl, cheʼ mi lac pejcan ti toj. ¡Wen ñuc bʌ lac majtan cheʼ miʼ mejlel lac pejcan ti oración!

² Mi laj com chaʼan Jehová miʼ ñʌchʼtan la coración, yom mi lac mel cheʼ bajcheʼ miʼ cʼajtin. Pero ¿bajcheʼ mi caj lac mel mi mach laj cujilic chuqui miʼ cʌntesañonla  jiñi Biblia chaʼan jiñi oración? Wen ñuc i cʼʌjñibal cheʼ mi lac ñaʼtan come jiñi oración miʼ lʌcʼtesañonla ti Jehová.

3. Alʌ junchajp wen ñuc bʌ i cʼʌjñibal chaʼan chucoch yom mi lac pejcan Jehová ti oración.

³ Junchajp chucoch yom mi lac mel oración tiʼ tojlel Jehová come jiñʌch miʼ subeñonla chaʼan mi lac pejcan. Jiñi i Tʼan miʼ subeñonla: «Mach mi laʼ chaʼlen tsic pusicʼal pero ti pejtelel chuqui tac miʼ yujtel subenla Dios chuqui tac yom ti oración. Chʌn cʼajtibenla. Subenla wocolix i yʌlʌ. Cheʼ jiñi, i ñʌchʼtʌlel laʼ pusicʼal chʼoyol bʌ ti Dios mi caj i cʌntan laʼ pusicʼal yicʼot laʼ ñaʼtʌbal ti Cristo Jesús. Maʼañic i pʼisol i ñʌchʼtʌlel lac pusicʼal muʼ bʌ i yʌqʼueñonla» (Filipenses 4:6, 7). Tiʼ sujm mach laj com lac pʼaj jiñi uts bʌ lac pʌyol muʼ bʌ i yʌqʼueñonla jiñi Cʼax Ñuc bʌ Yumʌl.

4. Cheʼ maʼ chʌn pejcan Jehová ti oración, ¿chucoch maʼ ñumen lʌcʼtesan a bʌ?

⁴ Yambʌ junchajp chucoch yom mi lac chaʼlen oración, jiñʌch cheʼ mi lac ñumen lʌcʼtesan lac bʌ ti Jehová. Jiñi wem bʌ i yamigojob i bʌ mach jiñic jach miʼ pejcañob i bʌ cheʼ an chuqui yomob, miʼ pejcañob i bʌ tiʼ pejtelel ora come miʼ qʼuelob i bʌ ti ñuc. Miʼ ñumen lʌcʼtesañob i bʌ cheʼ miʼ subeñob i bʌ chuqui miʼ ñaʼtañob, chuqui miʼ cʼojoʼtañob yicʼot bajcheʼ yubil miʼ yubiñob i bʌ. Cheʼ lʌcʼʌ lajal la quicʼot Jehová jaʼel. Ti ili libro tsaʼix a wen cʌñʌ chuqui miʼ cʌntesañonla jiñi Biblia tiʼ tojlel Jehová, bajcheʼ yilal yicʼot chuqui yom bʌ i mel. Tsaʼ cʼoti a cʌn Dios cheʼ bajcheʼ juntiquil quixtañu. Ti jiñi oración jiñʌch baqui miʼ mejlel a suben a Tat am bʌ ti panchan chuqui maʼ ñaʼtan yicʼot  bajcheʼ yubil maʼ wubin a bʌ. Cheʼ bajcheʼ jiñi, mi caj a ñumen lʌcʼtesan a bʌ tiʼ tojlel (Santiago 4:8).

5. ¿Bajcheʼ mi lac ñaʼtan chaʼan Jehová maʼañic miʼ ñʌchʼtan tiʼ pejtelel jiñi oración tac?

⁵ ¿Muʼ ba i ñʌchʼtan Jehová tiʼ pejtelel jiñi oración tac? Qʼuele chuqui tsiʼ subeyob jiñi jontoloʼ bʌ chʼoyoloʼ bʌ ti Israel cheʼ tiʼ yorajlel jiñi xʼaltʼan Isaías: «Anquese cabʌl mi laʼ chaʼlen oración, mi wisilic mi caj c jacʼbeñetla chaʼan tiʼ caj stsʌnsajetla, xbecʼ chʼichʼetla» (Isaías 1:15). Jin chaʼan, mi tsaʼ caji lac mel maʼañic bʌ miʼ mulan Dios, maʼañic mi caj i ñʌchʼtan laj coración tac. Mi laj comʌch chaʼan miʼ ñʌchʼtan, yom mi lac tsʼʌctesan muʼ bʌ i subeñonla lac mel.

6. Chaʼan miʼ ñʌchʼtan Dios la coración, ¿chuqui yom an lac chaʼan yicʼot bajcheʼ mi lac pʌs chaʼan añʌch lac chaʼan jiñi?

⁶ Junchajp jiñʌch cheʼ yom an lac ñopoñel (chʼujbiya) ti Dios (pejcan Marcos 11:24). Jiñi apóstol Pablo tiʼ tsʼijbu: «Mi maʼan mi cʌcʼla ti ñuc Dios,  mach mejl i qʼuelonla ti utsʼat. Come jiñi muʼ bʌ i lʌcʼ i bʌ baʼan Dios, wersa yom miʼ ñaʼtan mi an Dios. Wersa mi yʌcʼ ti ñuc jeʼel chaʼan Dios mi yʌben i chobejtʌbal machqui muʼ bʌ i sʌclan» (Hebreos 11:6, Cuxul bʌ tʼan). Pero chaʼan mi lac pʌs ñopolʌch lac chaʼan, mach jasʌlic jach mi lac ñop chaʼan añʌch Dios yicʼot chaʼan mucʼʌch i ñʌchʼtan yicʼot miʼ jacʼ la coración. Jiñi lac ñopoñel ti Dios mi lac pʌs ti lac melbal tac. Yom tsiquil mi lac pʌs chaʼan añʌch lac ñopoñel cheʼ bajcheʼ chumulonla (Santiago 2:26).

7. a) ¿Chucoch yom mi laj qʼuel ti ñuc Jehová cheʼ mi lac pejcan ti oración? b) ¿Bajcheʼ mi lac pʌs lac pecʼlel yicʼot chaʼan ti jumpʼejl jach lac pusicʼal woli lac mel jiñi oración?

⁷ Yambʌ chuqui miʼ cʼajtin Jehová jiñʌch chaʼan yom mi lac pʌs lac pecʼlel cheʼ mi lac mel jiñi oración yicʼot mi lac mel tiʼ pejtelel lac pusicʼal. ¿Mach ba melelic chaʼan añʌch cabʌl chucoch yom pecʼonla cheʼ mi lac pejcan Dios ti oración? Cheʼ bʌ juntiquil quixtañu miʼ pejcan juntiquil rey o juntiquil presidente cʼʌñʌl miʼ qʼuel ti ñuc come yujil wen ñuc i yeʼtel jiñi woli (choncol) bʌ i pejcan. Cheʼ jaʼel ñumen ñuc to yom mi laj qʼuel Jehová (Salmo 138:6). Cheʼʌchi come jiñʌch ‹Pʼʌtʌl bʌ Dios› (Génesis 17:1). Cheʼ mi lac pejcan Dios ti oración yom mi lac pʌsben lac pecʼlel ti bajcheʼ yilal mi lac pejcan. Jiñi lac pecʼlel mi caj i coltañonla chaʼan mi lac melben oración ti jumpʼejl jach lac pusicʼal i mach jiñic jach mi lac chʌn al jiñi albilix bʌ lac chaʼan (Mateo 6:7, 8).

8. ¿Bajcheʼ mi lac pʌs chaʼan woliyʌch lac mel cheʼ bajcheʼ mi laj cʼajtin ti la coración tac?

⁸ Yambʌ junchajp muʼ bʌ i cʼajtin Dios chaʼan mucʼʌch i ñʌchʼtañonla jiñʌch cheʼ yom mi lac mel cheʼ bajcheʼ woli (yʌquel) laj cʼajtin ti la coración tac. Jumpʼejl ejemplo, cheʼ mi laj cʼajtiben Jehová chaʼan  miʼ yʌqʼueñonla lac «waj chaʼan ili qʼuin», yom mi lac chaʼlen tsʌts bʌ eʼtel (troñel) cheʼ bʌ mucʼʌch i mejlel lac mel (Mateo 6:11; 2 Tesalonicenses 3:10). Cheʼ jaʼel, cheʼ bʌ mi laj cʼajtiben chaʼan miʼ coltañonla laj cʌy jumpʼejl laj cʼunlel, mach yomic mi lac sajcan muʼ bʌ i mejlel i yʌcʼonla ti yajlel ti mulil (Colosenses 3:5). Cheʼ tsaʼix laj qʼuele chaʼpʼej uxpʼejl yom bʌ Dios mi lac mel cheʼ mi lac melben oración, yom mi laj cʌmben i jacʼbal chaʼpʼej uxpʼejl cʼajtiya tac chaʼan jiñi oración.

9. ¿Majqui yom mi lac pejcan ti oración, i majqui tiʼ cʼabaʼ yom mi lac choc majlel?

⁹ ¿Majqui yom mi lac pejcan ti oración? Jesús tsiʼ cʌntesa jiñi xcʌntʼañob chaʼan miʼ chaʼleñob oración bajcheʼ iliyi: «C Tat lojon añet bʌ ti panchan» (Mateo 6:9). Jin chaʼan, cojach Jehová Dios yom mi lac pejcan ti oración. Pero yom chaʼan mi laj cʌn baqui bʌ i yajñib tsiʼ yʌqʼue jiñi Cojach bʌ i Yalobil, Jesucristo. Cheʼ bajcheʼ tsaʼ laj qʼuele yaʼ ti cʌntesʌntel 5, Jehová tsiʼ choco tilel Jesús wʌʼ ti Pañimil chaʼan miʼ locʼsañonla tiʼ tojlel jiñi mulil yicʼot jiñi chʌmel (Juan 3:16; Romanos 5:12). Cheʼ jaʼel, tsiʼ waʼchoco bajcheʼ Cʼax ñuc bʌ Motomaj chaʼan miʼ ñusan lac mul yicʼot tsiʼ waʼchoco bajcheʼ xMeloñel (Juan 5:22; Hebreos 6:20). Jin chaʼan, jiñi Biblia mi yʌl chaʼan yom mi lac chaʼlen oración tiʼ cʼabaʼ Jesús. Tsiʼ yʌlʌ: «Joñon i bijlelon isujmlelon, i cuxtʌlelon. Maʼañic majch miʼ cʼotel baʼan c Tat, jiñi jach am bʌ tic wenta» (Juan 14:6). Chaʼan miʼ ñʌchʼtʌntel jiñi la coración tac, cojach yom mi lac pejcan Jehová tiʼ cʼabaʼ i Yalobil.

10. ¿Chucoch mach jiñic ñuc i cʼʌjñibal cheʼ junsujm jach bajcheʼ yom mi laj cajñel cheʼ mi lac mel oración?

¹⁰ ¿Junsujm jach ba bajcheʼ yom mi laj cajñel?  Maʼañic. Jehová maʼañic miʼ subeñonla bajcheʼ yom mi la cʌcʼ laj cʼʌb o bajcheʼ yom mi laj cajñel. Jiñi Biblia miʼ cʌntesañonla chaʼan an cabʌl bajcheʼ yom mi laj cajñel cheʼ mi lac chaʼlen oración. Mi lac mejlel ti ajñel ti buchul, ti ñucul, ti ñocol o ti waʼal (1 Reyes 8: 22, 23; Nehemías 8:6; Daniel 6:10). Pero ñumen ñuc bʌ, mach jiñic bajcheʼ añonla cheʼ mi lac mel jiñi oración, jiñʌch chucoch mi lac mel. Cheʼ jaʼel, miʼ mejlel lac bajñel pejcan Jehová ti lac pusicʼal yicʼot cheʼ baqui jach añonla ñumel, yicʼot cheʼ woli lac mel la queʼtel o cheʼ mi lac waʼ taj wocol. Tajol maʼañic majqui miʼ ñaʼtan chaʼan woli lac mel oración, pero Jehová mucʼʌch i ñʌchʼtañonla (Nehemías 2:1-6).

11. ¿Chuqui muʼ bʌ i mejlel laj cʌl ti la coración tac?

¹¹ ¿Chuqui miʼ mejlel laj cʌl ti la coración tac? Jiñi Biblia miʼ jacʼ: «La cujil [Jehová] miʼ yubibeñonla chuqui jach mi laj cʼajtiben cheʼ bajcheʼ yom i pusicʼal» (1 Juan 5:14). Jin chaʼan, miʼ mejlel lac taj ti tʼan chuqui jach la com wem bʌ miʼ qʼuel Dios. Jumpʼejl ejemplo, ¿yom ba Jehová cheʼ mi lac suben chuqui mi laj cʼojoʼtan? ¡Yomʌch! Cheʼ mi lac pejcan Jehová ti oración lajal bajcheʼ woli lac pejcan juntiquil wem bʌ laj camigo. Miʼ mejlel lac jamben lac pusicʼal, yom i yʌl, maʼañic mi lac bʌcʼñan cheʼ mi lac suben bajcheʼ yubil mi laj cubin lac bʌ (Salmo 62:8). Yom mi laj cʼajtiben jaʼel chaʼan miʼ coltañonla yicʼot chʼujul bʌ i yespíritu chaʼan mi lac mel chuqui wen (Lucas 11:13). Cheʼ jaʼel, mi laj cʼajtiben ti wocol tʼan chaʼan miʼ coltañonla lac chʼʌm wem bʌ lac ñaʼtʌbal yicʼot chaʼan miʼ yʌqʼueñonla lac pʼʌtʌlel chaʼan mi laj cuch wocol tac (Santiago 1:5). Cheʼ mi lac chaʼlen mulil yom mi laj cʼajtiben ti wocol tʼan chaʼan miʼ ñusʌbeñonla, mi ñopolʌch lac chaʼan tiʼ tojlel i cuxtʌlel tsaʼ bʌ i yʌcʼʌ jiñi Cristo (Efesios 1: 3, 7). Pero mach cojach yom mi lac mel oración chaʼan lac bajñel wenlel, yom mi lac chaʼlen oración tiʼ tojlel yambʌ quixtañujob o bajcheʼ tiʼ tojlel la quermañojob jaʼel (Hechos 12:5; Colosenses 4:12).

12. ¿Bajcheʼ mi caj lac pʌs chaʼan jiñʌch ñumen ñuc mi laj qʼuel i chaʼan bʌ lac Tat am bʌ ti panchan cheʼ mi lac mel oración tac?

¹² Yom bʌ mi lac ñumen acʼ ti ñuc ti la coración jiñʌch i chaʼan Jehová Dios. An cabʌl chucoch yom mi lac chʼujutesan yicʼot mi laj cʌqʼuen wocolix i yʌlʌ tiʼ pejtelel lac pusicʼal come miʼ pʌsbeñonla wen ñuc bʌ i yutslel (1 Crónicas 29:10-13). Yaʼ ti Mateo 6:9-13 (pejcan) mi lac taj jumpʼejl oración tsaʼ bʌ i cʌyʌ Jesús chaʼan bajcheʼ yom mi lac mel. Jiñʌch baqui mi laj cʌntesʌntel laj cʼajtin chaʼan miʼ chʼujutesʌntel i cʼabaʼ Dios, yom i yʌl, miʼ sʌqʼuesʌntel o miʼ qʼuejlel ti chʼujul. Ti wiʼil miʼ cʼajtintel chaʼan miʼ tilel i Yumʌntel Dios yicʼot chaʼan miʼ mejlel chuqui yom bʌ Dios wʌʼ ti Pañimil cheʼ bajcheʼ ti panchan. Yom mi laj qʼuel chaʼan Jesús ñaxan tsiʼ luʼ alʌ jiñi ñuc tac bʌ i cʼʌjñibal i chaʼan Jehová, cheʼ jiñi tsiʼ taja ti tʼan chuqui tac yom i chaʼan ti jujumpʼejl qʼuin. Mi joñonla jaʼel mi lac pʌs chaʼan Dios jiñʌch ñumen ñuc bʌ ti laj cuxtʌlel, mi caj lac pʌs chaʼan mach bajñel jach lac wenlel mi laj qʼuel ti ñuc.

13. ¿Chuqui mi yʌl jiñi Biblia chaʼan bajcheʼ jalel yom miʼ mejlel jiñi oración tac?

¹³ ¿Bajcheʼ jalel yom mi lac mel oración tac? Jiñi Biblia maʼañic miʼ subeñonla bajcheʼ jalel yom mi lac mel jiñi oración tac muʼ bʌ lac mel ti lac bajñelil o tiʼ wut yambʌ quixtañujob. Tajol mach wen jalic yom mi lac mel, cheʼ bajcheʼ tiʼ yorajlel cheʼ mi laj cajel ti uchʼel, o miʼ mejlel lac mel jal, cheʼ bajcheʼ jiñi muʼ bʌ lac mel cheʼ mi lac jamben lac pusicʼal Jehová ti lac bajñelil (1 Samuel 1:12, 15). Pero Jesús tsiʼ pʼaja jiñi wen toj bʌ miʼ yubiñob i  bʌ come miʼ melob wen tam bʌ oración tac chaʼan jach miʼ qʼuejlelob (Lucas 20:46, 47). Jiñi maʼañic miʼ qʼuel ti ñuc Jehová. Ñuc bʌ i cʼʌjñibal jiñʌch cheʼ mi lac chaʼlen oración tiʼ pejtelel lac pusicʼal. Muʼ bʌ caj i yʌl bajcheʼ jalel yom mi lac mel laj coración tac jiñʌch chuqui o bajcheʼ woli lac ñusan, o mi an tac chuqui la com i cʼʌjñibal bʌ.

14. ¿Chuqui i sujmlel jiñi tʼan «pejcanla Dios ti pejtelel ora», i baqui tac bʌ bendición mi lac taj?

¹⁴ ¿Jaysujtel yom mi lac chaʼlen oración? Jiñi Biblia miʼ subeñonla: «Pejcanla Dios ti pejtelel ora» yicʼot «chʌn chaʼlenla oración» (Romanos 12:12; 1 Tesalonicenses 5:17). Ili mach yomic i yʌl chaʼan mi caj lac chaʼlen oración tsʼʌcʌl jumpʼejl qʼuin. I sujmlel bʌ jiñʌch chaʼan ti jujumpʼejl qʼuin yom mi lac mel oración tiʼ tojlel Jehová chaʼan mi laj cʌqʼuen wocolix i yʌlʌ cheʼ miʼ pʌsbeñonla i yutslel, cheʼ jaʼel miʼ pʌsbeñonla bajcheʼ yom mi lac chaʼlen xʌmbal chaʼan miʼ tijicñesan lac pusicʼal yicʼot chaʼan miʼ yʌqʼueñonla lac pʼʌtʌlel. ¡Jiñʌch wen ñuc bʌ bendición iliyi! Jehová miʼ yʌqʼueñonla chaʼan mi lac pejcan jiñʌch jaysujtel laj com yicʼot bajcheʼ jalel laj com. Mi mucʼʌch laj qʼuel ti ñuc cheʼ miʼ mejlel lac pejcan lac Tat am bʌ ti panchan, mi caj lac mel baqui jach añonla ñumel.

15. ¿Chucoch yom mi laj cʌl «amén» cheʼ mi yujtel lac mel oración muʼ bʌ lac mel ti lac bajñelil o tiʼ wut yambʌ quixtañujob?

¹⁵ ¿Chucoch yom mi laj cʌl «amén» cheʼ miʼ laj cujtel ti oración? Ili tʼan yom i yʌl chaʼan «cheʼʌchi» o «cheʼʌch yom». An ejemplo ti Biblia muʼ bʌ i pʌsbeñonla chaʼan weñʌch cheʼ mi laj cʌl «amén» cheʼ miʼ yujtel lac mel jiñi oración ti lac bajñelil o tiʼ wut yambʌ wiñicob xʼixicob (quixtañujob) (1 Crónicas 16:36; Salmo 41:13). Cheʼ mi la cʌl «amén» ti lac bajñelil, woli la cʌl chaʼan  jiñi tʼan tac tsaʼ bʌ laj cʌlʌ loqʼuemʌch ti lac pusicʼal. Cheʼ mi la cʌl tiʼ wut yambʌ quixtañujob (ti lac pusicʼal jach o ti tsʌts bʌ tʼan), woli lac pʌs chaʼan cheʼʌch la com bajcheʼ tsaʼ ajli (1 Corintios 14:16).

16. ¿Chuqui yom bʌ mi lac ñop cheʼ bʌ mi lac chaʼlen oración tiʼ tojlel Dios?

¹⁶ ¿Tiʼ sujm ba miʼ jacʼ Jehová jiñi la coración tac?  ¡Cheʼʌchi! Mucʼʌch mejlel lac ñop come Jehová, ‹muʼ bʌ i ñʌchʼtan la coración›, mucʼʌch i jacʼbeñonla tiʼ pejtelel jiñi muʼ bʌ lac suben loqʼuem bʌ ti lac pusicʼal (Salmo 65:2). An cabʌl bajcheʼ miʼ mejlel i jacʼbeñonla.

17. ¿Chucoch miʼ mejlel laj cʌl chaʼan Dios mucʼʌch i cʼʌn i yángelob yicʼot wiñicob xʼixicob chaʼan miʼ jacʼ jiñi oración tac?

¹⁷ Jumpʼejl ejemplo, Jehová miʼ cʼʌn i yángelob yicʼot quixtañujob muʼ bʌ i chʼujutesañob chaʼan miʼ jacʼ la coración tac (Hebreos 1:13, 14). Cabʌl wiñicob xʼixicob am bʌ i cʼajtibeyob i coltaya Jehová chaʼan miʼ chʼʌmbeñob isujm jiñi Biblia, mach cabʌl ora tsaʼ ñumi cheʼ bʌ jiñi i wiñicob Jehová tsaʼ cʼoti i julaʼtañob. Iliyi miʼ pʌsbeñonla chaʼan jiñʌch jiñi ángelob woliʼ pʌsob jiñi bij chaʼan miʼ sujbel jiñi Yumʌntel (Apocalipsis [Revelación] 14:6). Cheʼ jaʼel, cheʼ miʼ sʌjlel lac chubʌʼan tac, Jehová miʼ mejlel i ñijcʌben i pusicʼal juntiquil la quermaño chaʼan miʼ coltañonla (Proverbios 12:25; Santiago 2:16).

18. ¿Bajcheʼ miʼ cʼʌn Jehová jiñi chʼujul bʌ espíritu yicʼot i Tʼan chaʼan miʼ jacʼben i yoración i wiñicob?

¹⁸ Jehová Dios miʼ cʼʌn jaʼel jiñi chʼujul bʌ i yespíritu yicʼot i Tʼan, jiñi Biblia, chaʼan miʼ jacʼben i yoración i wiñicob. Cheʼ mi laj cʼajtiben chaʼan miʼ coltañonla lac ñusan jumpʼejl wocol, Jehová miʼ mejlel i cʼʌn jiñi  chʼujul bʌ i yespíritu chaʼan miʼ pʌsbeñonla jiñi bij yicʼot miʼ pʼʌtʼesañonla (2 Corintios 4:7). Cheʼ bʌ mi laj cʼajtiben chaʼan miʼ coltañonla lac chʼʌm wem bʌ lac ñaʼtʌbal, an i tajol miʼ jacʼbeñonla yicʼot jiñi Biblia. Tajol mi lac taj versículo tac muʼ bʌ i coltañonla cheʼ mi lac bajñel pejcan jiñi Biblia o cheʼ mi lac pejcan jiñi jun tac loqʼuem bʌ ti Biblia, cheʼ bajcheʼ ili libro. Cheʼ jaʼel, tajol mi laj cʼajtesʌbentel jiñi principio tac loqʼuem bʌ ti Biblia yom bʌ mi lac chʼʌm ti ñuc. Ili miʼ mejlel lac taj cheʼ mi lac majlel ti jumpʼejl tempa bʌ o cheʼ bʌ juntiquil anciano chaʼan congregación muʼ bʌ i qʼuelonla ti ñuc miʼ yʌqʼueñonla jumpʼejl ticʼojel (Gálatas 6:1).

19. ¿Chuqui yom cʼajal lac chaʼan cheʼ bʌ an i tajol mi laj qʼuel chaʼan Dios maʼañic woli i jacʼ laj coración yilal?

¹⁹ An i tajol mi lac ñaʼtan chaʼan Jehová jal miʼ jacʼ la coración tac, pero jiñi mach yomic i yʌl chaʼan maʼañic miʼ mejlel i jacʼ. Yom cʼajal lac chaʼan, Jehová mi caj i qʼuel bajcheʼ yicʼot jala mi caj i jacʼ la coración tac. Jehová wen i cʌñʌ chuqui anto bʌ yom lac chaʼan yicʼot ñumen yujil to bajcheʼ mi caj i yʌqʼueñonla. An i tajol miʼ yʌcʼonla chaʼan mi lac chʌn ‹cʼajtin›, ‹sajcan› yicʼot chaʼan mi lac chʌn ‹pejcan› (Lucas 11:5-10). Mi cheʼʌch mi lac mel bajcheʼ jiñi, mi caj lac pʌsben chaʼan la comʌch miʼ coltañonla yicʼot mi caj lac pʌsben chaʼan añʌch jiñi isujm bʌ lac ñopoñel ti Dios. Cheʼ jaʼel, tajol mach tsiquilic bajcheʼ mi caj i jacʼbeñonla Jehová.  Jumpʼejl ejemplo, mi woli laj cʼajtiben i coltaya Jehová come tsaʼ tajleyonla ti jumpʼejl wocol, tajol mucʼ jach caj i yʌqʼueñonla lac pʼʌtʌlel chaʼan mi laj cuch, pero maʼañic miʼ jisan ti ora (pejcan Isaías 12:2).

20. ¿Chucoch yom mi lac wen cʼʌn ti utsʼat jiñi ñuc bʌ lac majtan, jiñi oración?

²⁰ Mi lac wen aqʼuen wocolix i yʌlʌ jiñi tsaʼ bʌ i Mele tiʼ pejtelel chuqui tac an come lʌcʼʌl an ti lac tojlel mi wolʌch lac pejcan ti oración cheʼ bajcheʼ miʼ mulan (pejcan Salmo 145:18). Laʼ laj cʼʌn ti utsʼat jiñi ñuc bʌ lac majtan, jiñi oración. Mi cheʼʌch mi lac mel bajcheʼ jiñi, mi caj lac wen ubin lac tijicñʌyel come la cujil chaʼan mucʼʌch mejlel lac ñumen lʌcʼtesan lac bʌ ti Jehová, jiñi ‹muʼ bʌ i ñʌchʼtan la coración›.