1, 2. ¿Chuqui tac miʼ yʌqʼueñonla laj quilan wocol yicʼot baqui bʌ cʼajtiya miʼ melbeñob i bʌ cabʌl wiñicob xʼixicob?

TI JUMPʼEJL país baqui tsaʼ ujti cabʌl guerra tsaʼ chʌmiyob cabʌl mil xʼixicob yicʼot alpʼeñelob. Jiñi tsaʼ bʌ chʌmiyob, ti jumpʼejl jach mucoñibʌl tsaʼ mujquiyob joyol bʌ ti cabʌl alʌ cruz tac, i tsʼijbubil ili cʼajtiya: «¿Chucoch?». Jiñʌch jiñi cʼajtiya muʼ bʌ i ñumen melbeñob i bʌ jiñi muʼ bʌ i ñusañob tsʌts tac bʌ wocol. Yicʼot i chʼijiyemlel i pusicʼal miʼ melob ili cʼajtiya cheʼ miʼ yujtel jumpʼejl guerra, cheʼ miʼ ñumel icʼ jaʼal, cheʼ an jumpʼejl cʼamʌjel baqui miʼ chʌmel i familiajob yicʼot jiñi tsʌnsa. Jiñi wiñicob xʼixicob (quixtañujob) yomob i ñaʼtan chucoch miʼ tajob ili wocol tac.

² ¿Chucoch miʼ yʌcʼ ti ujtel Jehová Dios jiñi ilaya wocol? Mi juntiquilʌch Dios mach bʌ añic i pʼisol i pʼʌtʌlel, mi añʌch i cʼuxbiya, mi añʌch i ñaʼtʌbal yicʼot mi tojʌch, ¿chucoch an cabʌl tsʼaʼlentel yicʼot toʼol ticʼlʌntel wʌʼ ti Pañimil? ¿Am baʼ melbe a bʌ ili cʼajtiya tac?

3, 4. a) ¿Baqui bʌ ejemplo miʼ pʌsbeñonla chaʼan maʼañic i wocolel cheʼ mi laj cʼajtin chucoch miʼ yʌcʼ ti ujtel Dios jiñi ilaya wocol? b) ¿Bajcheʼ yilal miʼ qʼuel Jehová jiñi jontolil yicʼot jiñi ilaya wocol?

³ ¿Mulil ba cheʼ an majqui miʼ cʼajtin chucoch miʼ yʌcʼ ti  ujtel Dios jiñi ilaya wocol? An lamital muʼ bʌ i yʌlob chaʼan maʼañobic i ñopoñel (chʼujbiya) ti Dios yicʼot chaʼan maʼañic miʼ qʼuelob ti ñuc Dios cheʼ miʼ melob jiñi cʼajtiya. Pero cheʼ maʼ pejcan jiñi Biblia, mi caj a cʌn chaʼan ti wajali jiñi xucʼul bʌ i wiñicob Dios tsiʼ meleyob jaʼel jiñi cʼajtiya tac. Jumpʼejl ejemplo jiñʌch cheʼ bʌ jiñi xʼaltʼan Habacuc tsiʼ melbe jumpʼejl cʼajtiya Jehová: «¿Chucoch maʼ wʌqʼueñon j qʼuel ili jontolil yicʼot i maña wiñicob? Mulil jach wolij qʼuel tiʼ pejtelel ora. Miʼ ticʼlañob i bʌ wiñicob. Baqui jach mic majlel an aʼleya yicʼot leto» (Habacuc 1:3).

⁴ ¿Tsaʼ ba michʼa Jehová yicʼot jiñi xucʼul bʌ xʼaltʼan Habacuc cheʼ bʌ tsiʼ melbe jiñi cʼajtiya? Maʼañic. Tsaʼ bʌ i mele Jehová jiñʌch cheʼ tsiʼ yʌcʼʌ ti Tsʼijbuntel tsaʼ bʌ i yʌlʌ jiñi xʼaltʼan Habacuc yaʼ ti Biblia. Cheʼ jaʼel, tsiʼ colta i ñumen chʼʌmben isujm chucoch an cabʌl wocol yicʼot tsiʼ colta i ñumen pʼʌtʼesan i chʼujbiya ti Dios. Jiñʌch yom bʌ i mel Jehová ti a tojlel jaʼel. Yom miʼ cʼajtiyel a chaʼan, jiñi Biblia miʼ cʌntesañonla chaʼan ‹i wentajoñʌchla› Jehová (1 Pedro 5:7). Jiñi wiñicob xʼixicob miʼ tsʼaʼleñob jiñi jontolil yicʼot ilaya wocol, pero Dios ñumento miʼ tsʼaʼlen (Isaías 55:8, 9). Cheʼ jiñi, ¿chucoch an cabʌl ilaya wocol wʌʼ ti Pañimil?

5. ¿Chuqui tiʼ caj mi laj quilan wocol miʼ yʌlob lamital, pero chuqui miʼ cʌntesañonla jiñi Biblia?

⁵ Cabʌl wiñicob xʼixicob ti yan tac bʌ ñopbalʌl miʼ cʼajtibeñob jiñi ñaxam bʌ miʼ yʌcʼob i bʌ tiʼ ñopbal chucoch mi lac ñusan cabʌl ilaya wocol. Jiñi jacʼbal muʼ bʌ i yʌcʼob jiñʌch chaʼan cheʼʌch yom Dios yicʼot chaʼan tsaʼix i wʌn alʌ chuqui tac miʼ caj ti ujtel, bajcheʼ jiñi tsʌts tac bʌ wocol. An jacʼbentiyob jaʼel chaʼan maʼañic majqui miʼ mejlel i cʌmben i bijlel Dios, cheʼ jaʼel miʼ yʌlob chaʼan miʼ pʌy majlel jiñi wiñicob xʼixicob yicʼot alʌlob yaʼ ti panchan chaʼan miʼ yajñelob yicʼot Dios. Pero cheʼ bajcheʼ tsaʼ laj cʌñʌ, Jehová maʼañic miʼ mel jontolil ti lac tojlel. Jiñi Biblia mi yʌl: «Ti pejtelel ora maʼañic miʼ wis chaʼlen mulil Dios. Jiñi Pʼʌtʌl bʌ Mach bʌ Añic i Pʼisol i Pʼʌtʌlel mach yujilic jontolil» (Job 34:10).

6. ¿Chucoch cabʌl quixtañu miʼ yʌqʼueñob tiʼ mul Dios jiñi ilaya wocol am bʌ wʌʼ ti Pañimil?

⁶ ¿A wujil ba chucoch jiñi quixtañu miʼ yʌqʼueñob tiʼ mul Dios jiñi ilaya wocol tac? Come miʼ yʌlob chaʼan jiñi Dios Mach bʌ Añic i Pʼisol i Pʼʌtʌlel jiñʌch woli (choncol) i yuman ili pañimil (mulawil). Cabʌl quixtañujob an chuqui mach bʌ yujilobic muʼ bʌ i yʌl jiñi Biblia ñuc bʌ i cʼʌjñibal, pero jatet tsaʼix a cʌñʌ yaʼ ti cʌntesʌntel 3 ti ili libro. Woli (yʌquel) lac taj ti tʼan chaʼan jiñi mero isujm bʌ i yum ili pañimil, jiñʌch Satanás.

7, 8. a) ¿Bajcheʼ miʼ pʌs i melbal i yum ili pañimil? b) ¿Chucoch an i chʼʌmʌ tilel ilaya wocol jiñi mulil yicʼot cheʼ «maʼañic majqui yujil baqui ora mi caj i tajtʌl ti wocol»?

⁷ Jiñi Biblia wen tsiquil mi yʌl chaʼan jiñi ‹pañimil an tiʼ cʼʌb jiñi xjontolil›, jiñʌch jiñi Diablo (1 Juan 5:19). Ili texto miʼ tsictesʌbeñonla majqui i yum ili pañimil. Jiñi Diablo mi «i lotin pejtel wiñicob ti pañimil». Jin chaʼan, jiñi quixtañujob miʼ lajibeñob i melbal (Apocalipsis [Revelación] 12:9). Satanás miʼ chaʼlen lot, tsʼaʼleya yicʼot ticʼlaya. Jin  chaʼan, ti ili pañimil am bʌ tiʼ cʼʌb, wen an lotiya, tsʼaʼleya yicʼot ticʼlaya. Jiñʌch ñaxam bʌ i caj cheʼ an cabʌl ilaya wocol.

⁸ Jiñi i chaʼchajplel jiñʌch cheʼ bajcheʼ tsaʼ laj cʌñʌ yaʼ ti cʌntesʌntel 3, luʼ xmulilonla cʼʌlʌl cheʼ bʌ Adán tsiʼ chaʼle mulil. Jin chaʼan, jiñi quixtañu miʼ mulan i yumañob i bʌ yicʼot miʼ chaʼleñob wersa chaʼan miʼ tajob jiñi, ili an i chʼʌmʌ tilel guerra, ticʼlʌntel yicʼot ilaya wocol (Eclesiastés 4:1; 8:9). Jiñi Biblia mi yʌl chaʼan «maʼañic majqui yujil baqui ora mi caj i chujquel ti wocol», iliyi jiñʌch i yuxchajplel cheʼ mi laj quilan wocol (pejcan Eclesiastés 9:11, 12). Come Jehová maʼañic woliʼ yuman ili pañimil, maʼañic woliʼ cʌntan. Jin chaʼan, mi lac taj wocol baqui jach mi lac majlel yicʼot baqui jach bʌ ora cheʼ mach ñaʼtʌbilic lac chaʼan.

9. ¿Chucoch miʼ mejlel laj cʌl chaʼan Jehová añʌch chucoch cheʼ woli i yʌcʼ chaʼan miʼ yujtel ilaya wocol?

⁹ Miʼ yʌqʼueñonla lac tijicñʌyel cheʼ mi lac ñaʼtan chaʼan mach jiñic Dios miʼ choc tilel ilaya wocol. Mach i mul Dios cheʼ an guerra, tsʌnsa, ticʼlʌntel yicʼot yujquel lum muʼ bʌ i yʌqʼueñonla cabʌl wocol. Pero muʼto caj laj qʼuel chucoch miʼ yʌcʼ ti ujtel Dios jiñi ilaya wocol. Miʼ mejlel i jisan ilaya wocol come juntiquilʌch Dios Mach bʌ Añic i Pʼisol i Pʼʌtʌlel. Mi cheʼʌchi, ¿chucoch maʼañic miʼ mel? Come tsaʼix laj cʌñʌ majqui Jehová yicʼot chaʼan juntiquilʌch Dios cʼuxbiya bʌ, miʼ mejlel laj cʌl chaʼan añʌch chucoch cheʼ maʼañic miʼ mel jiñi (1 Juan 4:8).

10. ¿Chuqui mach bʌ utsʼatic tsiʼ yʌcʼʌ ti ñaʼtʌntel Satanás yicʼot bajcheʼ tsiʼ mele?

¹⁰ Chaʼan mi lac ñaʼtan chucoch miʼ yʌcʼ ti ujtel Dios jiñi ilaya wocol, yom mi laj cʼajtesan jalix tsaʼ tejchi tiʼ pejtelel jiñi wocol tac. Cheʼ bʌ Satanás tsaʼ mejli i mel chaʼan jiñi Adán yicʼot Eva miʼ ñusʌbeñob i tʼan Jehová, jiñʌch baqui  tsaʼ tejchi jiñi tsʌts bʌ wocol. Satanás maʼañic tsiʼ yʌlʌ chaʼan maʼañic i pʼʌtʌlel Jehová come yujil chaʼan maʼañic i pʼisol i pʼʌtʌlel. Pero tsaʼ caji i contrajin tiʼ tʼan bajcheʼ woliʼ chaʼlen yumʌntel Jehová. Cheʼ bʌ tsiʼ yʌlʌ chaʼan Dios juntiquilʌch xlot yicʼot chaʼan miʼ mʌctan jiñi quixtañujob chaʼan miʼ yubiñob i tijicñʌyel, jiñi Diablo tsiʼ yʌlʌ chaʼan mach weñic bʌ yumʌl (pejcan Génesis 3:2-5). Cheʼ jaʼel, tsiʼ yʌcʼʌ ti ñaʼtʌntel chaʼan ñumen wen miʼ yajñel jiñi quixtañujob cheʼ maʼañic miʼ yumʌntelob ti Dios. Cheʼ bajcheʼ jiñi, tsaʼ caji i contrajin jiñi am bʌ tiʼ wenta miʼ chaʼlen yumʌntel.

11. ¿Chucoch maʼañic tsiʼ jisa Jehová tsaʼ bʌ i meleyob jontolil yaʼ ti pʌcʼʌbʌl ti Edén?

¹¹ Cheʼ bʌ Adán yicʼot Eva tsiʼ contrajiyob Jehová, tajol tsiʼ yʌlʌyob: «Mach cʼʌñʌlic miʼ yumañonla Dios. Miʼ mejlel lac bajñel ñaʼtan chuqui wen yicʼot mach bʌ weñic». ¿Chuqui mi caj i mel Jehová chaʼan jiñi tsʌts bʌ wocol? ¿Bajcheʼ mi caj i pʌsben Jehová jiñi ángelob chaʼan chuqui muʼ bʌ i mel jiñʌch ñumen wem bʌ, i mach isujmic chuqui tsiʼ yʌlʌ Satanás, Adán yicʼot Eva? An muʼ bʌ i yʌlob chaʼan ñumen  wen cheʼ tsaʼic i jisa Dios jiñi Adán yicʼot Eva i miʼ chaʼ mel yambʌlob. Pero Jehová tsaʼix i wʌn alʌ chaʼan yom miʼ sujtel ti jumpʼejl paraíso yicʼot miʼ bujtʼel tiʼ pʼolbalob Adán yicʼot Eva ili Pañimil (Génesis 1:28). Jehová miʼ tsʼʌctesan tiʼ pejtelel ora chuqui mi yʌl (Isaías 55:10, 11). Cheʼ tsaʼic i jisa Jehová jiñi tsaʼ bʌ i meleyob jontolil yaʼ ti pʌcʼʌbʌl ti Edén, maʼañic tsaʼ chʼʌmbenti isujm mi jiñʌch am bʌ tiʼ wenta miʼ chaʼlen eʼtel bajcheʼ yumʌl.

12, 13. ¿Chuqui bʌ lajiya miʼ pʌsbeñonla chucoch Jehová woliʼ yʌcʼ chaʼan Satanás miʼ yuman ili pañimil yicʼot chaʼan jiñi quixtañu miʼ bajñel yumañob i bʌ?

¹² Laʼ laj cʌl jumpʼejl lajiya. Juntiquil maestro woliʼ tsictesʌben i alumnojob jumpʼejl tarea wen wocol bʌ chaʼan matemáticas. Pero mach yʌxʌlic yo, juntiquil i alumno wen yujil bʌ, pero jontol bʌ i pusicʼal, miʼ tech i yʌl chaʼan mach weñic bajcheʼ woliʼ pʌs i maestro. Cheʼ bajcheʼ jiñi, miʼ yʌcʼ ti ñaʼtʌntel chaʼan mach yujilic jiñi maestro. Jiñi alumno miʼ wersa al chaʼan yujil yambʌ bajcheʼ miʼ mejlel i ñumen tsictesan jiñi tarea wen wocol bʌ. Chaʼtiquil uxtiquil i piʼʌlob tsiʼ ñopoyob chaʼan isujmʌch woli bʌ i yʌl jiñi yambʌ alumno, jin chaʼan miʼ contrajiñob jaʼel jiñi maestro. ¿Chuqui yom miʼ mel jiñi maestro? Miʼ mejlel i choc loqʼuel ti clase jiñi jontol bʌ alumnojob, pero ¿chuqui mi caj i yʌl jiñi yambʌlob? Tajol mi caj i ñaʼtañob chaʼan isujmʌch chuqui tsiʼ yʌlʌ jiñi tsaʼ bʌ i ñaxan teche tʼan yicʼot jiñi tsaʼ bʌ i coltayob. Cheʼ jaʼel, tajol maʼañix mi caj i qʼuelob ti ñuc jiñi maestro yicʼot mi caj i ñaʼtañob chaʼan mucʼ ti bʌqʼuen chaʼan machʌch weñic bajcheʼ miʼ pʌs jiñi clase. Pero laʼ lac ñaʼtan chaʼan jiñi maestro miʼ cʌy chaʼan jiñi jontol bʌ alumno miʼ pʌs yaʼ ti clase bajcheʼ miʼ mejlel i tojʼesan jiñi tarea wen wocol bʌ chaʼan matemáticas.

¹³ Cheʼ tsiʼ mele Jehová jaʼel bajcheʼ jiñi maestro. Yom cʼajal a chaʼan, mach cojic jach jiñi tsaʼ bʌ i chaʼleyob jontolil yaʼ ti pʌcʼʌbʌl ti Edén tsiʼ qʼueleyob jiñi tsaʼ bʌ ujti. Cabʌl  millón ángelob tsiʼ qʼueleyob jaʼel (Job 38:7; Daniel 7:10). Cheʼ bʌ woli ti ñumel majlel ora, jiñi yambʌ ángelob yicʼot tiʼ pejtelel quixtañujob mi caj i tajob i wenlel chaʼan bajcheʼ mi caj i pʌs Jehová chaʼan jumpʼejlʌch lot tsaʼ bʌ i yʌlʌ Satanás. Jin chaʼan, ¿chuqui an i mele Jehová? Woliʼ yʌcʼ chaʼan Satanás miʼ pʌs bajcheʼ yilal miʼ yuman jiñi quixtañujob. Yicʼot jaʼel woliʼ yʌcʼ chaʼan jiñi quixtañujob miʼ bajñel yumañob i bʌ tiʼ cʼʌb Satanás.

14. ¿Baqui bʌ wenlel mi lac taj cheʼ Jehová tsiʼ yʌcʼʌ chaʼan jiñi quixtañujob miʼ bajñel yumañob i bʌ?

¹⁴ Jiñi maestro tsaʼ bʌ laj cʌlʌ yujil chaʼan mach isujmic tsaʼ bʌ i yʌlʌ jiñi jontol bʌ alumno yicʼot jiñi tsaʼ bʌ i coltayob. Pero yujil jaʼel chaʼan mi tsiʼ yʌcʼʌ chaʼan jiñi jontol bʌ alumnojob miʼ melob jiñi tarea wen wocol bʌ, mi caj i tajob i wenlel tiʼ pejtelel jiñi alumnojob yaʼ bʌ añob ti clase. Jin chaʼan, cheʼ bʌ jiñi jontol alumnojob miʼ pʌsob chaʼan mach mejlic i melob jiñi tarea wen wocol bʌ chaʼan matemáticas, jiñi alumnojob mach bʌ jontolobic mi caj i cʌñob chaʼan cojach jiñi maestro chajpʌbil chaʼan miʼ yʌcʼ jiñi clase. Cheʼ jaʼel, mi caj i ñaʼtañob chucoch jiñi maestro miʼ choc loqʼuel ti clase jiñi jontol bʌ alumnojob. Jehová yujil jaʼel chaʼan tiʼ pejtelel jiñi ángelob yicʼot quixtañujob mach bʌ jontolobic, miʼ tajob i wenlel cheʼ miʼ qʼuelob chaʼan Satanás yicʼot jontol bʌ i yángelob mach isujmic tsaʼ bʌ i yʌlʌyob yicʼot chaʼan jiñi quixtañujob maʼañic miʼ mejlel i bajñel yumañob i bʌ. Mi caj i qʼuelob isujmʌch bajcheʼ tsiʼ yʌlʌ jiñi xʼaltʼan Jeremías: «C Yum, cujil maʼañic i ñaʼtʌbal wiñic chaʼan miʼ bajñel tojʼesan majlel i bʌ. Mach mejlic i bajñel yajcan i bijlel» (Jeremías 10:23).

15, 16. a) ¿Chucoch wolito i yʌcʼ ti jalʼan Jehová jiñi ilaya wocol? b) ¿Chucoch maʼañic chuqui miʼ mel Dios chaʼan maʼañic ticʼlaya yicʼot yan tac bʌ wocol?

¹⁵ Pero ¿chucoch wolito i yʌcʼ ti jalʼan Jehová jiñi ilaya  wocol? ¿Cʼajal baʼ chaʼan jiñi lajiya tsaʼ bʌ laj cʌlʌ? Jiñi maestro maʼañic tsaʼ caji i mʌctan jiñi jontol bʌ alumno chaʼan miʼ tsictesan jiñi tarea wen wocol bʌ chaʼan matemáticas. Lajal jaʼel, Jehová maʼañic an i mʌcta Satanás yicʼot tsaʼ bʌ i coltayob chaʼan miʼ pʌsob mi isujmʌch chuqui tsiʼ yʌlʌyob. Jin chaʼan, Jehová tsiʼ yʌcʼʌ ti ñumel ora. Jiñi quixtañujob an i yajcayob tiʼ chajp tiʼ chajp yumʌlob, jiñi wen yujiloʼ bʌ an i meleyob tsʼac tac, máquina tac yicʼot yan tac bʌ. Pero maʼañic jilen jiñi toʼol ticʼlʌntel, pʼumpʼuñiyel, jiñi tsʌnsa yicʼot guerra tac. Tsiquil chaʼan cheʼ miʼ yumañob i bʌ jiñi quixtañujob maʼañic chuqui miʼ mejlel i melob.

¹⁶ Yambʌ muʼ bʌ i mejlel laj cʌl jiñʌch: ¿Chucoch maʼañic chuqui miʼ mel Jehová cheʼ mi cʼotel wocol ti lac tojlel? Ti jiñi lajiya tsaʼix bʌ laj cʌlʌ, tsaʼ laj qʼuele chaʼan jiñi maestro maʼañic tsiʼ colta jiñi jontol bʌ alumno chaʼan miʼ tsictesan jiñi tarea wen wocol bʌ chaʼan matemáticas. Cheʼ lajal Jehová jaʼel, maʼañic miʼ coltan Satanás chaʼan miʼ mel i yumʌntel ti pañimil. Muqʼuic i jisan Dios jiñi tsʌnsa yicʼot yan tac bʌ wocol, ¿mach ba muqʼuic a wʌl chaʼan weñʌch miʼ qʼuel Dios jiñi jontoloʼ bʌ jaʼel? Tajol mi caj lac ñaʼtan chaʼan mucʼʌch mejlel lac yuman lac bʌ cheʼ maʼañic miʼ pʼojlel wocol. Muqʼuic i mel Jehová bajcheʼ jiñi, lajalix yubil bajcheʼ Satanás ti xlot. Pero, «Dios mach mejlic i chaʼlen lot» (Hebreos 6:18).

17, 18. ¿Chuqui mi caj i mel Jehová chaʼan tiʼ pejtelel jiñi wocol pʼolbil bʌ i chaʼan yumʌlob yicʼot tiʼ caj i pʼʌtʌlel Satanás?

¹⁷ Pero ¿chuqui miʼ mejlel laj cʌl chaʼan pejtelel wocol tsaʼ bʌ i pʼolo Satanás cheʼ tiʼ  contraji Dios? La cujilix chaʼan Jehová juntiquilʌch Dios Mach bʌ Añic i Pʼisol i Pʼʌtʌlel. Jin chaʼan, miʼ mejlel i tojʼesan tiʼ pejtelel jiñi wocol i mucʼʌch caj i mel. Cheʼ bajcheʼ tsaʼ laj cʌñʌ, ili Pañimil mi caj i chaʼ tojʼesʌntel yicʼot mi caj i chaʼ sujtel ti jumpʼejl paraíso. Mi caj lac mejlel ti loqʼuel tiʼ wocolel mulil come añʌch lac chʼujbiya tiʼ cuxtʌlel tsaʼ bʌ i yʌcʼʌ Jesús. Jiñi chʌmeñoʼ bʌ tiʼ caj mulil mi caj i tejchesʌntelob. Cheʼ bajcheʼ jiñi, Dios mi caj i cʼʌn Jesús «chaʼan miʼ jisʌben i yeʼtel [Diablo]» (1 Juan 3:8). Baqui ora wen miʼ qʼuel Jehová mi caj i luʼ mel jiñi. Tijicña mi laj cubin cheʼ maʼañic tsiʼ mele ti wajali jiñi come tiʼ caj i pijtaya muʼto mejlel laj cʌn i sujmlel yicʼot chaʼan mi lac melben i yeʼtel (troñel) (pejcan 2 Pedro 3:9, 10). Dios wolito i sʌclan quixtañujob yom bʌ i chʼujutesañob yicʼot miʼ coltan chaʼan miʼ lʌtʼob jiñi ilaya wocol am bʌ wʌʼ ti Pañimil (Juan 4:23; 1 Corintios 10:13).

¹⁸ Tajol an muʼ bʌ i yʌlob: «Cheʼ tsaʼic i mele Dios jiñi Adán yicʼot Eva ti mach bʌ yujilobic mulil, maʼañic ilaya wocol». Chaʼan mi lac ñaʼtan chucoch maʼañic tsiʼ mele bajcheʼ jiñi, cʼajtesan chaʼan Jehová tsiʼ yʌqʼueyonla jumpʼejl lac majtan.

19. ¿Chuqui wen ñuc bʌ majtañʌl tsiʼ yʌqʼueyonla Jehová yicʼot chucoch yom mi laj qʼuel ti ñuc?

¹⁹ Cheʼ bajcheʼ tsaʼ laj cʌñʌ ti cʌntesʌntel 5, tsaʼ mejliyonla yicʼot jiñi libre albedrío, yom i yʌl, tsaʼ mejliyonla chaʼan mi lac bajñel ñaʼtan chuqui com lac mel. ¿Mach ba wen ñuc bʌ majtañʌl maʼ qʼuel jiñi? Dios tsiʼ mele añimal tac, pero maʼañic miʼ mejlel i bajñel yajcañob chuqui yomob i mel. Jiñi quixtañujob an i meleyob carro tac, pero yaʼ jach miʼ majlel baqui miʼ ñijcʌntel majlel, mach mejlic i bajñel ñijcan i bʌ. Cheʼic tsiʼ meleyonla Dios bajcheʼ jiñi, ¿am ba lac tijicñʌyel? Maʼañic. Jin chaʼan, tijicñayonla cheʼ  miʼ mejlel lac bajñel ñaʼtan chuqui com lac mel, bajcheʼ la com chumtʌl yicʼot bajcheʼ yilal com laj camigojob. Wen tijicñayonla cheʼ joñonla mi lac bajñel ñaʼtan chuqui laj com, i cheʼʌch yom Dios bajcheʼ jiñi.

20, 21. ¿Bajcheʼ miʼ mejlel laj cʼʌn ti wen jiñi ñuc bʌ lac majtan chaʼan libre albedrío yicʼot chucoch yomʌch mi lac mulan lac mel?

²⁰ Jehová mach yomic cheʼ xicʼbilonla mi lac melben i yeʼtel (2 Corintios 9:7). ¿Baqui bʌ ñumen wen miʼ yubin jiñi tatʌlob: Jin ba cheʼ wersa xicʼbil mi yʌl i yalobil «wocolix a wʌlʌ», o jin cheʼ bajñel loqʼuen tiʼ pusicʼal? Jin chaʼan, yom bʌ maʼ cʼajtiben a bʌ jiñʌch: «¿Bajcheʼ mi caj j cʼʌn jiñi libre albedrío tsaʼ bʌ i yʌqʼueyon Jehová?». Jiñi Satanás, Adán yicʼot Eva maʼañic tsiʼ cʼʌñʌyob ti wen come maʼañic tsiʼ jacʼbeyob i tʼan Jehová. ¿Ixcu jatet? ¿Chuqui mi caj a mel?

²¹ Jatet miʼ mejlel a cʼʌn ti wen jiñi libre albedrío. Miʼ mejlel a tsajcañob tiʼ pejtelel jiñi añoʼ bʌ tiʼ tojlel Jehová. Ili wiñicob xʼixicob miʼ yʌqʼueñob i tijicñʌyel Dios come miʼ pʌsob chaʼan Satanás juntiquilʌch xlot yicʼot mach utsʼatic bʌ yumʌl (Proverbios 27:11). Maʼ mejlel a pʌs jaʼel mi mucʼʌch a yajcan jiñi wem bʌ chaʼan a cuxtʌlel. Ti yambʌ cʌntesʌntel mi caj i tsictesʌntel baqui bʌ jiñi.