1, 2. ¿Majqui jiñi tsaʼ bʌ sujtiyob tiʼ yamigo Jehová ti wajali?

¿MAJQUI mi caj a sujtesan ti a wamigo? Tajol mi caj a sʌclan juntiquil lajal bʌ a pensar a wicʼot, lajal bʌ chuqui miʼ mulan bajcheʼ jatet yicʼot lajal bʌ i melbal bajcheʼ jatet, juntiquil mach bʌ yujilic xujchʼ yicʼot uts bʌ i pusicʼal.

² Cʼʌlʌl ti wajali, Dios an i sujtesa tiʼ yamigo wiñicob xʼixicob (quixtañujob). Cheʼ bajcheʼ Abraham, Dios tsiʼ pejca tiʼ yamigo (pejcan Isaías 41:8; Santiago 2:23). David jaʼel tsaʼ ‹qʼuejli ti utsʼat› come jiñʌch juntiquil wiñic tsaʼ bʌ i cʼuxbi Dios (Hechos 13:22). Dios tsiʼ ‹cʼuxbi› jiñi xʼaltʼan Daniel (Daniel 9:23).

3. ¿Chucoch miʼ yajcan Jehová jiñi quixtañujob chaʼan miʼ sujtelob ti yamigo?

³ ¿Chucoch tsaʼ sujti tiʼ yamigo Jehová jiñi Abraham, David yicʼot Daniel? Jehová tsiʼ sube Abraham: «Tsaʼ jacʼbeyon c tʼan» (Génesis 22:18). Jehová miʼ lʌcʼtesan i bʌ tiʼ tojlel jiñi muʼ bʌ i melob chuqui yom yicʼot pecʼ  bʌ miʼ melob i bʌ. Jehová tsiʼ sube jiñi israelob: «Jacʼʌla c tʼan. Cheʼ jiñi laʼ Dioson, c wiñiquetla» (Jeremías 7:23). Mi mucʼʌch a jacʼben i tʼan Jehová, mi caj a mejlel ti sujtel tiʼ yamigo jaʼel.

4, 5. ¿Bajcheʼ miʼ pʌs ñuc bʌ i coltaya Jehová tiʼ tojlel i tejclum?

⁴ Ñaʼtancu bajcheʼ yubil mi laj cubin cheʼ mi lac sujtel tiʼ yamigo Dios. Jiñi Biblia mi yʌl chaʼan Jehová miʼ sʌclan «jiñi xucʼuloʼ bʌ i pusicʼal muʼ bʌ i ñopob, chaʼan miʼ pʌsbeñob ñuc bʌ i coltaya» (2 Crónicas 16:9). ¿Bajcheʼ miʼ mejlel i pʌsbeñet Dios ñuc bʌ i coltaya? Jehová mi yʌl ti Salmo 32:8: «Mi caj j cʌntesañet. Mi caj c pʌsbeñet jiñi bij baqui yom maʼ majlel. Mi caj c tojʼesañet majlel tic wut».

⁵ ¡Wen ñucʌch jiñi tʼan muʼ bʌ i yʌl Jehová chaʼan bajcheʼ mi caj i cʌntañet! Mi caj i yʌqʼueñet ticʼojel tac chaʼan miʼ coltañet, mi mucʼʌch a jacʼ mi caj i chʌn cʌntañet. Dios yom i coltañet chaʼan maʼ lʌtʼ cheʼ maʼ wilʌbentel (ñopbentel) a pusicʼal yicʼot yan tac bʌ wocol (pejcan Salmo 55:22). Mi mucʼʌch a melben i yeʼtel Jehová tiʼ pejtelel a pusicʼal, mi caj mejlel a wʌl jiñi tʼan tsʼijbubil bʌ ti Salmo, baqui mi yʌl: «Mic ñaʼtan c Yum ti pejtelel ora. An ti ñoj bʌ j cʼʌb. Maʼañic majqui mi mejlel i tʌtsʼon tiʼ bijlel» (Salmo 16:8; 63:8). Jehová miʼ mejlel i coltañet chaʼan maʼ chumtʌl cheʼ bajcheʼ miʼ mulan. Pero cheʼ bajcheʼ tsaʼ cʌñʌ, an juntiquil i contra Dios mach bʌ yomic i qʼuelet cheʼ wen maʼ chumtʌl.

6. ¿Chuqui tsiʼ yʌlʌ Satanás tiʼ tojlel quixtañujob?

⁶ Cheʼ bajcheʼ tsaʼ tsictesʌnti yaʼ ti cʌntesʌntel 11,  Satanás tsiʼ contraji jiñi am bʌ tiʼ wenta miʼ chaʼlen yumʌntel. Tsiʼ yʌlʌ chaʼan Jehová yujil lot, yicʼot tsiʼ yʌcʼʌ ti ñaʼtʌntel chaʼan mach tojic bʌ yumʌl come tsiʼ yʌlʌ chaʼan maʼañic tsiʼ yʌqʼue Adán yicʼot Eva chaʼan miʼ bajñel ñaʼtañob chuqui wen yicʼot chuqui mach bʌ weñic. Cheʼ bʌ Adán yicʼot Eva tsiʼ chaʼleyob mulil, tsaʼ caji ti bujtʼel i pʼolbalob wʌʼ ti Pañimil. Satanás tsiʼ yʌcʼʌ ti ñaʼtʌntel chaʼan jiñi quixtañu maʼañic miʼ chʼujutesañob Dios yicʼot cʼuxbiya. Satanás tsiʼ yʌlʌ cheʼ muqʼuic i yʌqʼuentel permiso chaʼan miʼ pʌs miʼ sujmʌch chuqui woli (choncol) i yʌl, tsiʼ yʌlʌ chaʼan miʼ mejlel i yʌcʼ chaʼan majqui jach bʌ quixtañu miʼ contrajin Dios. Jiñi muʼ bʌ i yʌjlel chaʼan Job miʼ pʌs chaʼan jiñʌch tsaʼ bʌ i ñaʼta i mel jiñi Diablo. Pero ¿majqui jiñi Job yicʼot chucoch cheʼ bʌ tsiʼ chaʼle lot Satanás tsiʼ taja ti tʼan Job?

7, 8. a) ¿Chucoch tsiʼ ñumen qʼuele Jehová jiñi Job ti wajali i mach jiñic yambʌ quixtañujob? b) ¿Chucoch tsiʼ yʌlʌ jiñi Diablo chaʼan Job an jach chucoch miʼ chʼujutesan Dios?

⁷ Cheʼ bʌ tiʼ yorajlel Job cʼʌlʌ wʌle ora, añix ñumen 3,600 jab tsaʼ chumle. Jiñʌch juntiquil wiñic toj bʌ, jin chaʼan Jehová tsiʼ yʌlʌ: «Maʼañic yambʌ ti pañimil muʼ bʌ i cʼuxbin Dios bajcheʼ jiñi. Miʼ cʌntan i bʌ chaʼan mach miʼ taj mulil» (Job 1:8). Jin chaʼan Jehová utsʼat tsiʼ qʼuele.

⁸ Jiñi Diablo tsaʼ caji i yʌl chaʼan Job an jach chucoch miʼ chʼujutesan Dios. Jiñi Diablo tsiʼ sube Jehová: «Wen qʼuelel a chaʼan jiñi Job yicʼot pejtelel i piʼʌlob yicʼot pejtel i chubʌʼan. Maʼañic i ticʼlʌntel. Tijicña miʼ ñusan qʼuin. Maʼ coltan ti yeʼtel. Maʼ pʼojlesʌben i yʌlacʼ tiʼ joytilel. Pero sʌtsʼʌx a cʼʌb a chilben i chubʌʼan. Cheʼ jiñi mux caj a qʼuel mi caj i pʼajet Job tiʼ tojel a wut» (Job 1:10, 11).

9. ¿Chuqui tsiʼ mele Jehová chaʼan miʼ yʌqʼuen i jacʼbal jiñi tsaʼ bʌ i yʌlʌ Satanás yicʼot chucoch?

 ⁹ Satanás tsiʼ yʌlʌ chaʼan Job miʼ chʼujutesan Dios chaʼan jach an chuqui miʼ yʌqʼuentel. Tsiʼ yʌlʌ jaʼel chaʼan mi caj i contrajin Dios cheʼ muqʼuic i yilʌbentel i pusicʼal Job. ¿Chuqui tsiʼ mele Jehová chaʼan miʼ yʌqʼuen i jacʼbal jiñi tsaʼ bʌ i yʌlʌ Diablo? Come jiñi lot tsaʼ bʌ i yʌlʌ Satanás yaʼ ochem Job jaʼel, jin chaʼan Jehová tsiʼ yʌcʼʌ chaʼan miʼ ñojpel Job. Cheʼ bajcheʼ jiñi, tsaʼ cʌjñi mi jiñi Job mucʼʌch i cʼuxbin Dios o maʼañic.

10. ¿Chuqui bʌ wocol tsiʼ taja Job yicʼot bajcheʼ yilal tsiʼ qʼuele jiñi wocol?

¹⁰ Mach cabʌlic ora tsaʼ ñumi cheʼ bʌ Satanás tsaʼ caji i yʌqʼuen wocol tac jiñi Job. Jin chaʼan, Satanás tsiʼ yʌcʼʌ ti xujchʼibentel lamital i wacax Job, yambʌ lamital tsaʼ laj chʌmi yicʼot ñumen ti lamital i wiñicob tsaʼ tsʌnsʌntiyob. Job tsiʼ wen ila wocol ti taqʼuin come tsaʼ laj jisʌbenti chuqui an i chaʼan. Ti wiʼil, jiñi Diablo tsiʼ yʌqʼue yambʌ wocol, tsaʼ chʌmi 10 i yalobil ti sutujt icʼ. Anquese Job tsiʼ taja jiñi cabʌl wocol, pero «maʼañic tsiʼ chaʼle mulil. Maʼañic tsiʼ pʼaja Dios» (Job 1:22).

11. a) ¿Chuqui tsiʼ ñopo i pʌs Satanás tiʼ tojlel Job yicʼot chuqui tsiʼ mele Jehová? b) ¿Chuqui tsiʼ mele Job cheʼ bʌ jiñi Diablo tsiʼ yʌqʼue tsʌts bʌ cʼamʌjel?

¹¹ Pero anto yambʌ chuqui tsiʼ mele Satanás. Tajol tsiʼ ñaʼta chaʼan, anquese miʼ mejlel i lʌtʼ cheʼ miʼ sʌt tiʼ pejtelel chuqui an i chaʼan yicʼot i wiñicob i cheʼ jaʼel i yalobilob, pero mi tsaʼ cʼamʼa, mi caj i contrajin Dios. Jin chaʼan, Jehová tsiʼ yʌqʼue tiʼ cʼʌb Diablo chaʼan miʼ yʌqʼuen wen tsʌts bʌ cʼamʌjel. Pero Job maʼañic baʼ ora  tsiʼ sʌtʌ i chʼujbiya ti Dios. Jehová tsiʼ yʌlʌ ili tʼan tiʼ tojlel Job: «[...] Chʌn xucʼul to quicʼot» (Job 2:10).

12. ¿Chuqui tsiʼ pʌsʌ Job chaʼan jiñi tʼan tsaʼ bʌ i yʌlʌ jiñi Diablo?

¹² Job mach yujilic mi Satanás tsiʼ yʌqʼue jiñi wocol tac. Come mach yujilic jiñi tsaʼ bʌ i yʌlʌ Satanás chaʼan tiʼ contraji jiñi am bʌ tiʼ wenta miʼ chaʼlen yumʌntel, Job tsiʼ bʌcʼña chaʼan tajol Dios woli (yʌquel) i yʌqʼuen jiñi wocol tac (Job 6:4; 16:11-14). Anquese mach yujilic majqui tsiʼ chocbe tilel jiñi wocol, pero chʌn xucʼul tsaʼ ajñi ti Jehová. Jiñi xucʼul bʌ i melbal tsiʼ pʌsʌ chaʼan jumpʼejlʌch lot cheʼ bʌ tsiʼ yʌlʌ Satanás chaʼan an jach chucoch miʼ chʼujutesan Dios.

13. ¿Chuqui tsaʼ ujti cheʼ bʌ tsiʼ pʌsʌ Job chaʼan xucʼulʌch ti Dios?

¹³ Jehová tsaʼ mejli i yʌcʼ wem bʌ i jacʼbal chaʼan jiñi i lot Satanás, come Job xucʼul tsaʼ ajñi ti Jehová. Job tsiʼ pʌsʌ chaʼan jiñʌch isujm bʌ i yamigo Jehová, jin chaʼan tsiʼ yʌqʼue cabʌl bendición chaʼan i xucʼtʌlel (Job 42:12-17).

14, 15. ¿Chucoch mi la cʌl chaʼan yaʼ ochemonla jaʼel ti lac pejtelel ti jiñi lot tsaʼ bʌ i yʌlʌ Satanás i mach cojic jach Job?

¹⁴ Satanás mach cojic jach tsiʼ taja ti tʼan Job cheʼ bʌ tsiʼ yʌlʌ chaʼan maʼañic majqui miʼ mejlel ti ajñel ti xucʼul ti Dios. Tsiʼ tajayonla tiʼ tʼan jaʼel ti jujuntiquilonla. Jamʌ tsiquil mi yʌl i Tʼan Dios yaʼ ti Proverbios 27:11, baqui mi yʌl: «Yom pʼipʼ a pusicʼal calobil. Ñuqʼuesʌbeñon c pusicʼal. Cheʼ jiñi utsʼat mi caj i qʼuelon jiñi tsaʼ bʌ i pʼajayon». Ili tʼan tsaʼ tsʼijbunti cheʼ bʌ añix cabʌl siglo i chʌmel Job, miʼ pʌs chaʼan Satanás tsaʼ to i chʌn contraji Dios yicʼot tsaʼto i chʌn jopʼbe i mul i wiñicob. Cheʼ mucʼʌch lac chumtʌl bajcheʼ yom  Jehová, mi laj coltan lac pʌs chaʼan lotʌch tsaʼ bʌ i yʌlʌ Satanás yicʼot mi lac tijicñesʌben i pusicʼal Jehová. ¿Bajcheʼ yilal maʼ qʼuel jiñi? Anquese an chuqui mi caj a qʼuextan ti a melbal, ¿maʼañic ba mi caj i yʌqʼueñet a tijicñʌyel cheʼ maʼ pʌs chaʼan jumpʼejlʌch lot tsaʼ bʌ i yʌlʌ jiñi Diablo?

¹⁵ Qʼuelecu tsaʼ bʌ i yʌlʌ Satanás: «Junlajal wiñicob. Jujuntiquil miʼ bajñel cʼuxbiñob i bʌ» (Job 2:4). Cheʼ bʌ tsiʼ yʌlʌ jiñi tʼan «wiñicob», Satanás tsaʼ yʌcʼʌ ti ñaʼtʌntel chaʼan mach cojach tsiʼ jopʼbe i mul Job, tsiʼ jopʼbe i mul jaʼel tiʼ pejtelel quixtañu. Ili yom mi lac wen chʼʌmben isujm. Jiñi Diablo tsiʼ yʌlʌ chaʼan jatet mach toʼol jach woliʼ a chʼujutesan Dios. Satanás miʼ mulan cheʼ maʼ taj wocol tac, maʼ cʌy a jacʼben i tʼan Dios yicʼot maʼ cʌy a mel jiñi wem bʌ. ¿Chuqui bʌ yac miʼ cʼʌn Satanás chaʼan miʼ mel chuqui yom bʌ ti lac tojlel?

16. a) ¿Chuqui miʼ cʼʌn Satanás chaʼan miʼ ñajtʼesan wiñicob xʼixicob tiʼ tojlel Dios? b) ¿Bajcheʼ miʼ mejlel i cʼʌn ti a tojlel jiñi yac?

¹⁶ Cheʼ bajcheʼ tsaʼ laj cʌñʌ yaʼ ti cʌntesʌntel 10, Satanás miʼ cʼʌn cabʌl yac chaʼan miʼ ñajtʼesan quixtañu ti Dios. Cheʼ jaʼel «woli ti pam ñumel cheʼ bajcheʼ colem bajlum woli bʌ ti jujuj tʼan» (1 Pedro 5:8). Mi caj a qʼuel iliyi cheʼ bʌ jiñi a wamigojob, a familia yicʼot yan tac bʌ wiñicob xʼixicob mi caj i wajleñetob cheʼ maʼ pejcan jiñi Biblia, o cheʼ mi caj a pʌs jiñi cʌmbilix bʌ a chaʼan (Juan 15:19, 20). * Cheʼ jaʼel Satanás «miʼ  cuy i bʌ ti ángel muʼ bʌ i pʌs i cʼʌcʼal» (2 Corintios 11:14). Jiñi Diablo wen yujil baqui bʌ yac miʼ cʼʌn chaʼan miʼ lotiñet yicʼot chaʼan maʼañic maʼ mel chuqui yom bʌ Dios. Junchajp muʼ bʌ i cʼʌn Satanás jiñʌch cheʼ an i tajol miʼ yʌcʼ i chʼijiyemlel lac pusicʼal. Tajol miʼ yʌqʼueñet a ñaʼtan jaʼel chaʼan maʼañic baqui ora mi caj mejlel a mel yom bʌ Dios. Anquese Satanás woli i mel i bʌ «bajcheʼ colem bajlum woli bʌ ti jujuj tʼan» o bajcheʼ juntiquil muʼ bʌ i «cuy i bʌ ti ángel muʼ bʌ i pʌs i cʼʌcʼal», woliʼ chʌn chaʼlen lot come miʼ ñaʼtan cheʼ maʼ taj jumpʼejl wocol, mi caj a cʌy a melben i yeʼtel Dios. ¿Bajcheʼ miʼ mejlel a jacʼben jiñi lot tsaʼ bʌ i yʌlʌ Satanás ti a tojlel yicʼot maʼ pʌs chaʼan xucʼuletʌch ti Dios cheʼ bajcheʼ tsiʼ mele Job?

17. ¿Chucoch mi lac chʼujbin i mandar tac Jehová?

¹⁷ Mi mucʼʌch a chumtʌl bajcheʼ yom Dios, mi caj a pʌs chaʼan jiñʌch jumpʼejl lot tsaʼ bʌ i yʌlʌ Satanás. ¿Chuqui yom i yʌl jiñi? Jiñi Biblia mi yʌl: «Yom mi laʼ cʼuxbin lac Yum Dios. Chaʼlenla xʌmbal tiʼ bijlel. Yom mi laʼ jacʼben i mandar. Yom mi laʼ tsajcan majlel. Yom xucʼul mi laʼ wajñel ti pejtelel laʼ pusicʼal» (Josué 22:5). Cheʼ maʼ ñumen cʼuxbin Dios, mi caj a ñumen mulan a mel chuqui miʼ cʼajtibeñet. Jiñi apóstol Juan tiʼ tsʼijbu: «Come i cʼuxbintel Dios jiñʌch i chʼujbibentel i mandar». Mi mucʼʌch a cʼuxbin Jehová tiʼ pejtelel a pusicʼal, mi caj a qʼuel chaʼan «mach wocolic i mandar» (1 Juan 5:3).

18, 19. a)¿Baqui tac bʌ i mandar Jehová mi yʌl yaʼ ti recuadro « Mach lac mel muʼ bʌ i tsʼaʼlen Jehová». b) ¿Bajcheʼ mi lac ñaʼtan chaʼan Jehová mach cabʌlic chuqui miʼ cʼajtibeñonla?

¹⁸ ¿Baqui bʌ mandar miʼ yʌqʼueñonla Jehová?  Lamital iliyi jiñʌch chaʼan melbal tac yom bʌ mi laj cʌy. Junchajp ejemplo jiñʌch muʼ bʌ i yʌl yaʼ ti recuadro baqui mi yʌl: « Mach lac mel muʼ bʌ i tsʼaʼlen Jehová», am bʌ ti ili i yopol. Chʼʌmʌ tilel i chaʼan jumpʼejl lista melbalʌl muʼ bʌ i tsʼaʼlen Biblia. Cheʼ mucʼ jach a pam qʼuel, tajol mach wen tsʌtsic bʌ mulil yilal. Pero cheʼ maʼ wen ñaʼtan ti a jol jiñi texto tac yaʼ bʌ an ti recuadro, tajol mi caj a ñaʼtan chaʼan mucʼʌch i wen coltañonla jiñi i mandar tac Dios. Tajol an muʼ bʌ a  mel wajali, muqʼuix caj a cʌy a mel, pero jiñʌch wen wocol bʌ ti cʌyol maʼ wubin. Pero jiñi chumuloʼ bʌ bajcheʼ yom Dios miʼ tajob cabʌl i tijicñʌyel (Isaías 48:17, 18). Jiñʌch muʼ bʌ mejlel a taj jaʼel. ¿Bajcheʼ mi lac ñaʼtan?

¹⁹ Come Jehová maʼañic miʼ subeñonla chaʼan mi lac mel mach bʌ mejlic lac mel (pejcan Deuteronomio 30:11-14). Jehová yujil bajcheʼ cʼamel miʼ mejlel lac melben i yeʼtel (Salmo 103:14). Cheʼ jaʼel, miʼ  yʌqʼueñonla lac pʼʌtʌlel chaʼan mi lac jacʼben i tʼan. Jiñi apóstol Pablo tiʼ tsʼijbu: «Xucʼul i pusicʼal Dios. Maʼañic miʼ yʌqʼueñetla laʼ taj laʼ pʌyol ti mulil mach bʌ mejlic laʼ cuch. Cheʼ mi laʼ pʌjyel ti mulil, Dios miʼ yʌqʼueñetla laʼ pʼʌtʌlel chaʼan mi laʼ cuch. Cheʼ jiñi mi mejlel laʼ loqʼuel baʼ pʌybilet ti mulil» (1 Corintios 10:13). Chaʼan mi lac lʌtʼ jiñi wocol tac, Jehová miʼ mejlel i yʌqʼueñonla «ñuc bʌ lac pʼʌtʌlel» (2 Corintios 4:7).

20. ¿Baqui bʌ melbal wen tac bʌ miʼ qʼuel Dios yom bʌ maʼ pʌs yicʼot chucoch wen ñuc i cʼʌjñibal?

²⁰ Chaʼan wen miʼ qʼuelonla Jehová, mach cojic mi laj cʌy lac mel muʼ bʌ i tsʼaʼlen. Yom mi laj cʼuxbin muʼ bʌ i cʼuxbin jaʼel (Romanos 12:9). ¿Mach ba tijicñayic maʼ wubin cheʼ yaʼan a wicʼot juntiquil lajal bʌ i pensar a wicʼot, lajal bʌ chuqui miʼ mulan yicʼot lajal bʌ i melbal bajcheʼ jatet? Jehová tijicña miʼ yubin jaʼel. Jin chaʼan, cʼuxbin jaʼel muʼ bʌ i cʼuxbin Jehová. Yaʼ ti Salmo 15 miʼ yʌjlel lamital jiñi, yaʼi miʼ yʌjlel bajcheʼ yilal i yamigojob Dios (pejcan Salmo 15:1-5). I yamigojob Jehová añob i chaʼan muʼ bʌ i yʌl jiñi Biblia o cʌmbil bʌ bajcheʼ «i yʌcʼbal jiñi Espíritu», jiñʌch jiñi melbal cheʼ bajcheʼ «cʼuxbiya, i tijicñʌyel lac pusicʼal, i ñʌchʼtʌlel lac pusicʼal, lac pʼʌtʌlel tiʼ cuchol wocol, yicʼot pʼuntaya, coltaya, i xucʼtʌlel lac pusicʼal, la cutslel, yicʼot i ticʼol lac pusicʼal» (Gálatas 5:22, 23).

21. ¿Chuqui mi caj i coltañet chaʼan maʼ taj wem bʌ a melbal bajcheʼ yom Dios?

²¹ Muʼ bʌ caj i coltañet chaʼan maʼ pʌs wem bʌ a melbal bajcheʼ yom Dios, jiñʌch cheʼ maʼ pejcan yicʼot  cheʼ maʼ tsajin tiʼ pejtelel ora jiñi Tsʼijbujel. Yicʼot jaʼel, cheʼ woli a cʌn majlel chuqui yom Jehová ti a tojlel, cheʼʌch mi caj a chaʼlen pensar bajcheʼ Jehová (Isaías 30:20, 21). Cheʼ maʼ ñumen cʼuxbin Jehová, mi caj a chaʼlen wersa chumtʌl bajcheʼ yom Jehová.

22. ¿Chuqui mi caj a taj mi cheʼʌch woli a chumtʌl bajcheʼ yom Dios?

²² Yom mi lac chaʼlen wersa chumtʌl bajcheʼ yom Jehová. Jiñi Biblia mi yʌl cheʼ mi laj qʼuextan lac melbal jiñʌch cheʼ mi lac choc lac tsucul pusicʼal i mi lac xoj jiñi tsijiʼ bʌ. Lajalʌch bajcheʼ mi laj cʌy laj cʼʌn lac tsucul pislel i mi lac xoj tsijiʼ bʌ (Colosenses 3:9, 10). Jiñi David, tsaʼ bʌ i tsʼijbu ili Salmo, tsiʼ yʌlʌ: «An cabʌl c chobejtʌbal tiʼ jacʼol a tʼan» (Salmo 19:11). Mi cheʼʌch woli a chumtʌl bajcheʼ yom Dios, mi caj a taj cabʌl bendición. Yicʼot jaʼel mi caj a pʌs chaʼan jumpʼejlʌch lot jiñi tsaʼ bʌ i yʌlʌ Satanás yicʼot mi caj a tijicñesʌben i pusicʼal Jehová.