¿BAJCHEʼ qui yilal mi cajel maʼ wʌl jiñi i Qʼuiñilel Tojmulil? Yonlel millón wiñicob xʼixicob miʼ ñaʼtañob chaʼan ti jujuntiquil mi caj i majlel i melob i bʌ tiʼ tojlel Dios. Yambʌ miʼ ñaʼtañob chaʼan añʌch muʼ bʌ caj i tajob i cuxtʌlel chaʼan miʼ majlelob ti panchan, yicʼot jaʼel, an muʼ bʌ i yʌlob chaʼan mi caj i majlelob i yilan wocol ti cʼajc tiʼ pejtelel ora. Pero jiñi Biblia mi yʌl chaʼan jiñi i Qʼuiñilel Tojmulil yʌñʌl mi cajel: Mach jumpʼejlic qʼuin muʼ bʌ lac bʌcʼñan jiñʌch jumpʼejl pijtaya yicʼot jiñʌch baqui ora mi caj i sujtelob ti mach bʌ xmulilic tiʼ pejtelel jiñi wiñicob xʼixicob.

Ti Apocalipsis (o Revelación) 20:11, 12, jiñi apóstol Juan mi yʌl chaʼan jiñi i Qʼuiñilel Tojmulil: «Tsaj qʼuele colem bʌ i buchlib Dios sʌsʌc bʌ. Tsaj qʼuele jiñi tsaʼ bʌ buchle yaʼi. Jiñi  pañimil yicʼot panchan tsaʼ putsʼi tiʼ tojel. Maʼañic tsiquil baqui tsaʼ majli. Tsaj qʼuele jiñi chʌmeñoʼ bʌ, jiñi ñucoʼ bʌ yicʼot chʼoʼchʼocoʼ bʌ waʼaloʼ bʌ tiʼ tojel Dios. Tsaʼ jajmi jiñi jun tac. Tsaʼ jajmi yambʌ jun baʼ tsʼijbubil i cʼabaʼob añoʼ bʌ i cuxtʌlel. Lac Yum tsiʼ cʼʌñʌ jiñi jun chaʼan miʼ mel jiñi chʌmeñoʼ bʌ cheʼ bajcheʼ an i melbalob, come yaʼ tsʼijbubil i melbalob ti jiñi jun tac». ¿Majqui jiñi xMeloñel?

Jehová Dios jiñʌch Ñuc bʌ xMeloñel tiʼ tojlel quixtañu. Pero waʼchocobil i chaʼan juntiquil muʼ bʌ caj i mel jiñi eʼtel. Cheʼ bajcheʼ mi yʌl Hechos 17:31, jiñi apóstol Pablo tsiʼ yʌlʌ chaʼan Dios «tsaʼix i wʌn ñaʼta jiñi qʼuin cheʼ mi caj i chaʼlen meloñel ti toj. Tsaʼix i waʼchoco jiñi wiñic muʼ bʌ caj i mel añoʼ bʌ ti pañimil». Jiñi muʼ bʌ caj i chaʼlen meloñel jiñʌch Jesucristo tsaʼ bʌ tejchisʌnti (Juan 5:22). Pero ¿jala mi caj i tejchel jiñi i Qʼuiñilel Tojmulil yicʼot jaypʼejl qʼuin mi caj i jalʼan?

Yaʼ ti libro chaʼan Apocalipsis mi yʌl chaʼan jiñi i Qʼuiñilel Tojmulil mi caj i tejchel cheʼ miʼ yujtel jiñi guerra i cʼabaʼ Armagedón yaʼ baqui mi caj i jilel jiñi pañimil i chaʼan bʌ Satanás (Apocalipsis 16:14, 16; 19:19–20:3). * Cheʼ miʼ yujtel jiñi guerra chaʼan Armagedón, mi caj i ñujpʼel Satanás yicʼot i xibajob ti jumpʼejl colem chʼen mach bʌ añic i yebal, yaʼi mi caj i yajñelob mil jab. Ti jiñi mil jab, jiñi 144 mil wiñicob yicʼot xʼixicob i piʼʌloʼ bʌ ti eʼtel Cristo jiñʌch muʼ bʌ caj i chaʼleñob meloñel tiʼ tojlel jiñi quixtañujob yicʼot mi caj ‹i chaʼleñob yumʌntel yicʼot Cristo ti mil jab› (Apocalipsis 14:1-3; 20:1-4; Romanos 8:17). Cheʼ bajcheʼ woli laj cʌn, jiñi i Qʼuiñilel Tojmulil mach cojic jach mi caj i jalʼan jumpʼejl qʼuin yicʼot jumpʼejl acʼʌlel, mi caj i jalʼan mil jab.

Cheʼ bʌ woliʼ ñumel majlel jiñi mil jab, Jesucristo mi caj «i mel jiñi cuxuloʼ bʌ yicʼot jiñi chʌmeñoʼ bʌ» (2 Timoteo 4:1). Jiñi tʼan «cuxuloʼ bʌ» woliʼ taj ti tʼan jiñi quixtañujob cʌmbiloʼ bʌ bajcheʼ ‹junmojt wiñicob xʼixicob maʼañic bʌ miʼ mejlelob  ti tsicol›, cuxul bʌ mi caj i ñumelob ti jiñi guerra i cʼabaʼ Armagedón (Apocalipsis 7:9-17). Jiñi apóstol Juan tsiʼ qʼuele jaʼel tiʼ ñajal «jiñi chʌmeñoʼ bʌ [...] waʼalob tiʼ tojel i buchlib Dios» yaʼ ti tojmulil. Cheʼ bajcheʼ tsiʼ wʌn acʼʌ i tʼan Jesús, «mi caj i yubibeñob i tʼan i Yalobil Wiñic jiñi añoʼ bʌ ti mucoñibʌl. [...], mi caj i chʼojyelob loqʼuel ti mucoñibʌl» (Juan 5:28, 29; Hechos 24:15). Cheʼ jiñi, ¿chuqui mi caj i qʼuejlel ti ñuc cheʼ tiʼ yorajlel Tojmulil?

Jiñi tsaʼ bʌ i qʼuele tiʼ ñajal jiñi apóstol Juan jiñʌch cheʼ bʌ «tsaʼ jajmi jiñi jun tac», cheʼ jiñi «Lac Yum tsiʼ cʼʌñʌ jiñi jun chaʼan miʼ mel jiñi chʌmeñoʼ bʌ cheʼ bajcheʼ an i melbalob, come yaʼ tsʼijbubil i melbalob ti jiñi jun tac» (Apocalipsis 20:12). ¿Yaʼ ba tsʼijbubil jujunchajp i melbal jiñi quixtañujob ti wajali yaʼ ti jun? Maʼañic. Ti jiñi tojmulil mach jiñic jach mi caj i qʼuejlel bajcheʼ yilalob i melbal cheʼ bʌ maxto chʌmeñob. ¿Bajcheʼ miʼ mejlel lac ñaʼtan? Come jiñi Biblia mi yʌl chaʼan «jiñi tsaʼix bʌ chʌmi, colbilix tiʼ pʼʌtʌlel mulil» (Romanos 6:7). Jiñi muʼ bʌ caj i chaʼ tejchelob maʼañix mi caj i cʼajtesʌbentelob jiñi mulil tsaʼ bʌ i meleyob wajali. Jin chaʼan, jiñi yaʼ bʌ tsʼijbubil ti jun jiñʌch tsijiʼ bʌ i mandar tac Dios. Chaʼan miʼ chumtʌlob tiʼ pejtelel ora jiñi muʼ bʌ caj i chʼojyelob yicʼot jiñi cuxul bʌ miʼ ñumelob ti jiñi guerra i cʼabaʼ Armagedón, wersa yom mi jacʼbeñob i mandar tac Dios. Ti jiñi mandar tac yaʼ mi caj lac taj jaʼel jiñi tsijiʼ tac bʌ mandar muʼ bʌ caj i yʌcʼ Jehová ti jiñi mil jab. Cheʼ bajcheʼ jiñi, Jehová mi caj i chaʼlen meloñel tiʼ tojlel jujuntiquil quixtañu chaʼan chuqui miʼ melob cheʼ tiʼ yorajlel i Qʼuiñilel Tojmulil.

Tiʼ Qʼuiñilel Tojmulil, mi caj i tejchelob cabʌl quixtañu chaʼan miʼ cʌñob chuqui yom Jehová, come ti wajali maʼañic tsiʼ cʌñʌyob. Cheʼ jaʼel, mi caj i melob jiñi woli bʌ i cʌñob majlel. Chaʼan miʼ tsʼʌctiyel jiñi, mi cajel i cʌntesʌntelob tiʼ pejtelel wiñicob xʼixicob. Tiʼ sujmlel, «mi caj i cʌyob i jontolil jiñi añoʼ bʌ ti pañimil. Mi caj i ñopob chuqui toj» (Isaías 26:9). Pero mach tiʼ pejtelelic wiñicob xʼixicob mi caj i jacʼob i mel chuqui yom Dios. Isaías 26:10 mi yʌl: «Anquese maʼ pʌsbeñob i yutslel a pusicʼal jiñi jontoloʼ bʌ, miʼ chʌn chaʼleñob  jontolil. Maʼañic miʼ pʼisob tiʼ wenta [Jehová] cheʼ tijicñayob i pusicʼal». Jiñi jontol bʌ wiñicob xʼixicob mi caj i jisʌntelob tiʼ Qʼuiñilel Tojmulil (Isaías 65:20).

Cheʼ baqui ora miʼ yujtel i Qʼuiñilel Tojmulil, jiñi quixtañujob cuxul bʌ miʼ cʌytʌlob ‹mi caj i tajob i cuxtʌlel› tiʼ sujmlel come mach xmulilobix (Apocalipsis 20:5). Jiñi chaʼan, cheʼ woliʼ ñumel majlel i Qʼuiñilel Tojmulil, jiñi wiñicob xʼixicob xucʼu xucʼul mi caj i cʌyob i mul cheʼ bajcheʼ Adán yicʼot Eva ti ñaxan (1 Corintios 15:24-28). Cheʼ jiñi, mi caj i tilel jiñi cojix bʌ i yilʌbentel i pusicʼal. Jin chaʼan, Satanás mi caj i cojlel chaʼan miʼ chaʼ jopʼ i lotin jiñi wiñicob xʼixicob (Apocalipsis 20:3, 7-10). Jiñi quixtañujob maʼañic bʌ miʼ jacʼbeñob i tʼan jiñi Diablo, mi caj i qʼuelob bajcheʼ mi caj i tsʼʌctiyel tiʼ pejtelel jiñi tʼan wʌn albil bʌ yaʼ ti Biblia: «Mi caj i yʌqʼuentelob jiñi pañimil jiñi tojoʼ bʌ. Mi caj i yajñelob ti pejtelel ora» (Salmo 37:29). Jin chaʼan, i Qʼuiñilel Tojmulil jumpʼejlʌch bendición mi cajel chaʼan jiñi wiñicob xʼixicob xucʼuloʼ bʌ.