1, 2. ¿Baqui miʼ mejlel lac taj lac putsʼib?

ÑAʼTANCU chaʼan maʼ poj loqʼuel ti xʌmbal, cheʼ jiñi, maʼ taj a qʼuel chaʼan jiñi panchan woli (choncol) ti mʌjquel come mi cajel jaʼal. Cheʼ jiñi, miʼ lejmel jiñi chajc i miʼ sub i bʌ yicʼot miʼ tilel tsʌts bʌ jaʼal. Jatet maʼ chaʼlen ajñel chaʼan maʼ sʌclan baʼ maʼ mejlel ti putsʼel. Cheʼ jiñi, maʼ qʼuel chaʼan yaʼ ti a tʼejl an jumpʼejl lejchempat otot. Wen tʌquin yicʼot maʼañic chuqui mi caj i chaʼlen yilal. ¡Wen tijicña maʼ wubin cheʼ bʌ maʼ taj jiñi a putsʼib!

² Wʌle ora wen bʌbʌqʼuen baqui chumulonla yicʼot cabʌl wocol come ti ili pañimil woli (yʌquel) i ñumen pʼojlel mach bʌ weñic. Pero añʌch wem bʌ lac putsʼib, baqui maʼañic chuqui miʼ mejlel lac chaʼlen. ¿Baqui bʌ jiñi? Jiñi Biblia mi yʌl: «Mi caj c sub: Lajalʌch lac Yum bajcheʼ tsʼajquibil bʌ otot baʼ mic putsʼel. C Diosʌch, woli bʌ c ñop» (Salmo 91:2).

3. ¿Bajcheʼ miʼ mejlel lac sujtesan Jehová ti lac putsʼijib?

 ³ Jehová, jiñi tsaʼ bʌ i Meleyonla i Cʼax Ñuc bʌ tiʼ pejtelel Pañimil jiñʌch muʼ bʌ i mejlel ti sujtel ti lac putsʼib. ¡Ñuc bʌ bendición jiñi! Jehová ñumen pʼʌtʌlʌch yicʼot mach lajalic bajcheʼ jiñi wiñicob xʼixicob (quixtañujob) o bajcheʼ muʼ bʌ i mejlel i yʌqʼueñonla la quilan wocol. Anquese an majqui miʼ ticʼlañonla, pero Jehová miʼ mejlel i tojʼesan tiʼ pejtelel jiñi wocol muʼ bʌ lac taj. ¿Bajcheʼ miʼ mejlel lac sujtesan Jehová ti lac putsʼijib? Jiñʌch cheʼ mi mucʼʌch lac ñop chuqui miʼ subeñonla. Cheʼ jaʼel, jiñi Biblia miʼ subeñonla ili tʼan: «Chʌn ajñenla tiʼ cʼuxbiya Dios» (Judas 21). Jin chaʼan, yom mi lac chʌn ajñel tiʼ cʼuxbiya Dios yicʼot mi lac chʌn ajñel tiʼ tʼejl. Mi cheʼʌch mi lac mel, mi caj mejlel lac ñop chaʼan Jehová mucʼʌch caj i sujtel ti lac putsʼijib. Pero ¿bajcheʼ mi lac mejlel ti ajñel ti utsʼat la quicʼot jiñi tsaʼ bʌ i Mele tiʼ pejtelel chuqui tac an?

4, 5. ¿Chuqui an i yʌqʼueyonla Jehová chaʼan miʼ pʌsbeñonla chaʼan mucʼʌch i cʼuxbiñonla?

⁴ Jehová cabʌl bajcheʼ miʼ pʌsbeñonla i cʼuxbiya. Laʼ laj qʼuel bajcheʼ tac ili miʼ coltañonla chaʼan mi lac chʌn ajñel tiʼ cʼuxbiya Dios. Ñaʼtan baqui tac bʌ cʌntesʌntel loqʼuem bʌ ti Biblia tsaʼ bʌ a cʌñʌ ti ili libro. Jumpʼejl ejemplo, Jehová tsiʼ yʌqʼueyonla i tʼojol jax (lecax) bʌ lac chumlib chaʼan mi lac mejlel ti ajñel ti tijicña, bajcheʼ bʌlñʌcʼʌl tac, jaʼ, icʼ, añimal tac yicʼot teʼel tac i tʼojol jax bʌ. La cujil jaʼel chaʼan Dios jiñʌch tsaʼ bʌ i yʌcʼʌ ti tsʼijbuntel jiñi Biblia, baqui miʼ subeñonla chuqui i cʼabaʼ yicʼot baqui tac bʌ i melbal an i chaʼan. Jiñi Tsʼijbujel miʼ tsictesan chaʼan Jehová tsiʼ choco tilel wʌʼ ti Pañimil i Yalobil muʼ bʌ i wen cʼuxbin, tsiʼ yʌcʼʌ chaʼan miʼ yilan wocol yicʼot tsiʼ yʌcʼʌ ti chʌmel ti laj caj (Juan 3:16). Cheʼ  bajcheʼ ili, tsiʼ yʌqʼueyonla jumpʼejl lac majtan chaʼan i yutslel i pusicʼal, i wocolix i yʌlʌ jiñi, an lac pijtaya ti talto bʌ qʼuin.

⁵ Ili lac pijtaya mach cojic jach yom i yʌl jiñi tsaʼ bʌ i yʌqʼueyonla Dios. Jehová tsiʼ waʼchoco juntiquil yumʌl yaʼ ti panchan, jiñʌch jiñi Mesías. Ili Yumʌl mach jalix mi caj i jisan tiʼ pejtelel jiñi ilaya wocol yicʼot mi caj i sujtesan ili Pañimil ti jumpʼejl paraíso. ¡Wen utsʼatax miʼ cajel jiñi! Ti jiñi bʌ ora, tijicña mi caj lac chumtʌl tiʼ pejtelel ora yicʼot tiʼ ñʌchʼtʌlel (Salmo 37:29). Pero cheʼ woli to lac pijtan jiñi, jiñi ticʼojel tilem bʌ ti Dios miʼ mejlel i coltañonla chaʼan mi lac chaʼlen wersa chumtʌl cheʼ bajcheʼ yom Dios. Cheʼ jaʼel, an i yʌqʼueyonla yambʌ majtañʌl: Jiñʌch jiñi oración, baqui miʼ mejlel lac pejcan bajcheʼ jach ora la com. Ili tsaʼ bʌ ujti laj cʌn, jin jaxto chaʼpʼejl uxpʼejl bajcheʼ an i pʌsʌ i cʼuxbiya Dios ti a tojlel yicʼot tiʼ tojlel yambʌ quixtañu, pero anto cabʌl bajcheʼ miʼ pʌs i cʼuxbiya Dios.

6. ¿Bajcheʼ miʼ mejlel a pʌs chaʼan mucʼʌch a qʼuel ti ñuc jiñi i cʼuxbiya Dios tsaʼ bʌ i pʌsʌ ti a tojlel?

⁶ Wʌle yom maʼ melben a bʌ jumpʼejl ñuc bʌ cʼajtiya: «¿Bajcheʼ yom mic jacʼben jiñi i cʼuxbiya Dios?». Tajol an yonlel wiñicob xʼixicob muʼ bʌ i yʌlob chaʼan jiñʌch cheʼ mi laj «Cʼuxbin lac yum». ¿Cheʼ ba maʼ wʌl jatet? Jesús tsiʼ yʌlʌ chaʼan jiñi ñumen ñuc bʌ mandar jiñʌch: «Cʼuxbin a Yum Dios ti pejtelel a pusicʼal, ti pejtelel a chʼujlel [«cuxtʌlel», TNM], ti pejtelel a ñaʼtʌbal» (Mateo 22:37). Cabʌl chucoch yom maʼ cʼuxbin Jehová. Cheʼ jiñi, ¿jasʌl ba cheʼ maʼ wʌl chaʼan maʼ cʼuxbin Dios?

7. ¿Cojach ba yom mi laj cʌl chaʼan mi laj cʼuxbin Dios? Tsictesan chucoch cheʼ maʼ wʌl bajcheʼ jiñi.

 ⁷ Jiñi Biblia miʼ cʌntesañonla chaʼan mach cojic jach mi la cʌl chaʼan mi laj cʼuxbin Dios. Ñucʌch cheʼ mi la cʌl bajcheʼ jiñi, pero i tejchibal jaxto jiñi isujm bʌ cʼuxbiya tiʼ tojlel Dios. Chaʼan mi lac ñumen chʼʌmben isujm iliyi, laʼ la cʌl jumpʼejl lajiya: Mi a wom a cʼux jumpʼejl manzana, ¿jasʌl ba maʼ wubin cheʼ miʼ yʌqʼueñetob jumpʼejl i bʌcʼ? Mach jasʌlic. La cujilix chaʼan i cʼʌjñibalʌch i bʌcʼ jiñi manzana chaʼan miʼ mejlel ti colel yambʌ, pero a wom bʌ a cʼux jatet jiñʌch i wut. Lajal cheʼ miʼ yujtel jiñi laj cʼuxbiya am bʌ lac chaʼan ti Jehová: Cheʼ bajcheʼ jiñi i bʌcʼ manzana yom miʼ colel chaʼan miʼ yʌcʼ i wut. Jiñi Biblia mi yʌl: «Come i cʼuxbintel Dios jiñʌch i chʼujbibentel i mandar. Mach wocolic i mandar» (1 Juan 5:3). Cheʼ bajcheʼ jiñi, jiñi isujm bʌ cʼuxbiya tiʼ tojlel Dios yom miʼ yʌcʼ wem bʌ i wut, i yom miʼ pʌstʌl ti lac melbal (pejcan Mateo 7:16-20).

8, 9. ¿Bajcheʼ mi lac pʌs chaʼan mi laj cʼuxbin Dios yicʼot chaʼan mucʼʌch la cʌqʼuen wocolix i yʌlʌ chaʼan chuqui melbil tac bʌ i chaʼan ti lac tojlel?

 ⁸ Mi lac pʌs chaʼan mucʼʌch laj cʼuxbin Dios cheʼ bʌ mi lac chʼujbiben i mandar yicʼot cheʼ mi lac mel cheʼ bajcheʼ mi yʌl jiñi principio tac loqʼuem bʌ ti Biblia. Mach wen wocolic i mandar Jehová. Jiñi i mandar Dios tsaʼ mejli chaʼan tijicña mi la cajñel yicʼot ti laj cuxtʌlel (Isaías 48:17, 18). Cheʼ mi la cʌqʼuen chaʼan Jehová miʼ subeñonla chuqui yom mi lac mel, mi lac pʌs chaʼan mucʼʌch la cʌqʼuen wocolix i yʌlʌ chaʼan tiʼ pejtelel am bʌ i mele ti lac tojlel. Pero mach tiʼ pejtelelic quixtañu cheʼ añob i melbal bajcheʼ jiñi. Joñonla mach cheʼic la com lac pʌs lac bʌ bajcheʼ tsiʼ meleyob chaʼtiquil uxtiquil wiñicob xʼixicob cheʼ bʌ tsajñi Jesús wʌ ti Pañimil. Ti jumpʼejl bʌ qʼuin, Cristo tsiʼ lajmesʌbe i cʼamʌjel 10 quixtañu añoʼ bʌ leco bʌ i tsoy, pero cojach juntiquil tsiʼ yʌlʌ wocolix i yʌlʌ (Lucas 17:12-17). Cheʼʌch la com lac mel bajcheʼ tsiʼ mele jiñi juntiquil, i mach cheʼic bajcheʼ jiñi 9 quixtañujob maʼañic bʌ tsiʼ subeyob Jesús wocolix i yʌlʌ.

⁹ Cheʼ jiñi, ¿baqui tac bʌ i mandar Jehová yom mi lac chʼujbin? Lamital tsaʼ tsictesʌnti ti ili libro. Pero laʼ lac chaʼ pam qʼuel chaʼpʼejl uxpʼejl baqui tac bʌ jiñi i mandar Dios, come mi mucʼʌch lac jacʼ jiñi, mach wocolic mi caj la cubin chaʼan mi lac chʌn ajñel tiʼ cʼuxbiya Dios.

10. ¿Chucoch wen ñuc i cʼʌjñibal cheʼ maʼ chʌn taj majlel a ñaʼtʌbal ti Jehová Dios?

¹⁰ Cheʼ mi laj cʌn tiʼ sujm Jehová woli lac mel wen ñuc bʌ i cʼʌjñibal chaʼan mi lac lʌcʼtesan lac bʌ tiʼ tojlel. Ili mach yomic miʼ cʌjyel ti melol. Ñaʼtancu chaʼan yaʼañet ti mateʼel cheʼ bʌ ti acʼʌlel i baqui an cabʌl tsʌñal i tsaʼ tsʼʌbʌ a cʼajc chaʼan maʼ qʼuixñesan a bʌ. ¿Muʼ ba caj a wʌcʼ  chaʼan miʼ cʼunteʼ yʌjpel majlel jiñi cʼajc? Maʼañic. Mi caj a chʌn otsʌben majlel i siʼilel jiñi cʼajc chaʼan maʼañic miʼ yʌjpel i chaʼan maʼañic maʼ chʌmel ti tsʌñal. Lajal bajcheʼ jiñi siʼ miʼ chʌn acʼ ti lejmel jiñi cʼajc, jiñi laj ‹cʌmbal ti Dios› maʼañic miʼ yʌcʼ ti yʌjpel jiñi laj cʼuxbiya am bʌ lac chaʼan ti Jehová (Proverbios 2:1-5).

11. ¿Bajcheʼ yilal tsiʼ qʼueleyob jiñi xcʌntʼañob, chaʼan jiñi i cʌntesa Jesús?

¹¹ Jesús yom chaʼan maʼañic miʼ yʌjpel i cʼuxbiya jiñi xcʌntʼañob i chaʼan ti Jehová yicʼot ti jiñi isujm bʌ i Tʼan. Cheʼ bʌ tsaʼ tejchi loqʼuel yaʼ ti mucoñibʌl, tiʼ tsictesʌbe chaʼtiquil xcʌntʼañob i chaʼan, chaʼan jiñi profecía am bʌ yaʼ ti Tsʼijbujel tsaʼ bʌ i tsʼʌctesa. ¿Bajcheʼ yila tsaʼ qʼuejli jiñi tʼan tsaʼ bʌ i yʌlʌ Jesús? Ti wiʼil jiñi xcʌntʼañob tsiʼ yʌlʌyob: «¿Mach ba utsʼatic jax lac pusicʼal tsaʼ la cubi cheʼ bʌ tsiʼ pejcayonla Jesús ti bij, cheʼ bʌ tsiʼ subeyonla i sujmlel i Tsʼijbujel Dios?» (Lucas 24:32).

12, 13. a) Jiñi lamital quixtañujob, ¿woli ba i cʼuxbiñob Dios yicʼot jiñi Biblia? b) ¿Chuqui yom mi lac mel chaʼan maʼañic miʼ jilel laj cʼuxbiya ti Dios?

¹² Cheʼ bʌ tsaʼ cʌñʌ majlel jiñi muʼ bʌ i cʌntesañonla tiʼ sujmlel jiñi Biblia, ¿maʼañic ba tsaʼ pʼojli cabʌl a cʼuxbiya ti Dios? Mi cʌl tsaʼʌch. An cabʌl cheʼ bʌ ujtemob bajcheʼ jiñi. Jiñi yom bʌ maʼ mel ili ora jiñʌch chaʼan chʌn cuxul miʼ yajñel jiñi a cʼuxbiya ti Dios yicʼot maʼ wʌcʼ ti colel. Mach comic lac mel cheʼ bajcheʼ tsaʼ bʌ i wʌn alʌ Jesús chaʼan bajcheʼ yilal mi cajel i melbal jiñi wiñicob xʼixicob ti ili ora: «Miʼ caj ti lajmel i cʼuxbiya cabʌlob» (Mateo 24:12). ¿Chuqui yom maʼ mel chaʼan maʼañic miʼ lajmel a cʼuxbiya ti Jehová yicʼot chaʼan jiñi i sujmlel am bʌ ti Biblia?

¹³ Chʌn cʌñʌ majlel Jehová Dios yicʼot Jesucristo (Juan 17:3). Wen ñaʼtan ti utsʼat jiñi muʼ bʌ a pejcan yaʼ tiʼ Tʼan Dios, i cʼajtiben a bʌ: «¿Chuqui miʼ cʌntesañon tiʼ  tojlel Jehová jiñi? ¿Muʼ ba i subeñon chucoch yom mij cʼuxbin tiʼ pejtelel c pusicʼal, tiʼ pejtelel c ñaʼtʌbal yicʼot tiʼ pejtelel j cuxtʌlel?» (pejcan 1 Timoteo 4:15). Mi mucʼʌch a wen ñaʼtan bajcheʼ ili, jiñi a cʼuxbiya ti Jehová maʼañic baqui ora mi caj i jilel.

14. ¿Chucoch wen ñuc i cʼʌjñibal jiñi oración chaʼan chʌn cuxul miʼ yajñel laj cʼuxbiya ti Jehová?

¹⁴ Yambʌ bajcheʼ yom mi lac mel chaʼan chʌn cuxul miʼ yajñel laj cʼuxbiya ti Jehová jiñʌch cheʼ mi lac chʌn mel oración (1 Tesalonicenses 5:17). Yaʼ ti cʌntesʌntel 17 tsaʼ laj cʌñʌ chaʼan jiñi oración jiñʌch wen ñuc bʌ majtañʌl tilem bʌ ti Dios. Chaʼan mi lac ñumen lʌcʼtiyel tiʼ tojlel juntiquil lac piʼʌl yom mi lac chʌn pejcan tiʼ pejtelel ora yicʼot ti isujm bʌ tʼan. Cheʼ lajal jaʼel, chaʼan mi lac ñumen lʌcʼtiyel ti Jehová yom mi lac chʌn pejcan ti oración. Cheʼ mi lac mel oración yom mi lac wen ñaʼtan chuqui mi caj la cʌl, mach jiñic jach yom mi lac chʌn al muʼ bʌ la cʌl tiʼ pejtelel ora. Yom mi lac pejcan Jehová cheʼ bajcheʼ miʼ pejcan i tat juntiquil alʌ chʼiton. Jin chaʼan, cheʼ mi lac mel oración yom mi lac wen ñaʼtan chuqui mi caj la cʌl, i mach jiñic jach jiñi tʼan muʼ bʌ la cʌl tiʼ pejtelel ora (Salmo 62:8). Chaʼan mi lac chʼujutesan Dios wen ñuc i cʼʌjñibal cheʼ mi lac bajñel pejcan jiñi Biblia yicʼot cheʼ mi lac pejcan ti oración tiʼ pejtelel lac pusicʼal. Mi cheʼʌch mi lac mel bajcheʼ jiñi, mach wocolic mi caj lac chʌn ajñel tiʼ cʼuxbiya Dios.

15, 16. ¿Chucoch yom mi laj qʼuel jiñi subtʼan chaʼan Yumʌntel bajcheʼ jumpʼejl ñuc bʌ eʼtel yicʼot bajcheʼ wen letsem bʌ i tojol?

¹⁵ Tiʼ pejcʌntel jiñi Biblia yicʼot tiʼ melol oración jiñʌch bajcheʼ mi lac chʼujutesan Dios ti lac bajñelil. Laʼ laj cʌl junchajp muʼ bʌ lac mel cheʼ yaʼan la quicʼot yambʌ quixtañu: Jiñʌch cheʼ mi lac subeñob jiñi ñopol bʌ lac  chaʼan. ¿Añix baʼ sube yañoʼ bʌ jiñi cʌntesa tac am bʌ ti Biblia? Mi añix a mele jiñi, woli a taj a wenlel chaʼan jiñi wen ñuc bʌ a weʼtel (troñel) (Lucas 1:74). Cheʼ bʌ mi lac sub jiñi cʌmbil bʌ lac chaʼan tiʼ tojlel Jehová Dios, mi lac tsʼʌctesan jumpʼejl eʼtel wen ñuc bʌ i cʼʌjñibal aqʼuebiloʼ bʌ chaʼan miʼ melob jiñi isujm bʌ xñoptʼañob: I subol jiñi wen tʼan chaʼan i Yumʌntel Dios (pejcan Mateo 24:14; 28:19, 20).

¹⁶ Jiñi apóstol Pablo tsiʼ wen qʼuele ti ñuc jiñi eʼtel chaʼan subtʼan come tsiʼ yʌlʌ chaʼan jiñʌch jumpʼejl wen letsem bʌ i tojol (2 Corintios 4:7). Jiñʌch jumpʼejl wen ñuc bʌ eʼtel cheʼ mi la cʌl bajcheʼ yilal Jehová yicʼot cheʼ mi laj cʌl chuqui ñaʼtʌbil i chaʼan. Cheʼ mi lac mel iliyi chaʼañʌch la com lac chʼujbiben i tʼan jiñi ñumen wem bʌ Yumʌl yicʼot chaʼan mucʼʌch i yʌqʼueñonla cabʌl lac wenlel. Cheʼ mi lac chaʼlen subtʼan, mi laj coltan wiñicob xʼixicob utsoʼ bʌ i pusicʼal chaʼan miʼ lʌcʼtesañob i bʌ ti lac Tat am bʌ ti panchan yicʼot chaʼan miʼ yochelob ti jiñi bij baʼ mi lac taj laj cuxtʌlel mach bʌ añic i jilibal. ¿Am ba yambʌ eʼtel muʼ bʌ mejlel i ñumen aqʼueñonla lac tijicñʌyel? Cheʼ jaʼel, cheʼ mi laj cʌcʼ ti cʌñol Jehová yicʼot i Tʼan, miʼ pʼʌtʼan lac chʼujbiya yicʼot laj cʼuxbiya ti Dios. Jehová miʼ wen qʼuel ti ñuc cheʼ mi lac chaʼlen wersa lac mel chuqui yom (Hebreos 6:10). Cheʼ bajcheʼ woli laj cʌn, cheʼ mi lac chʌn mel ili eʼtel miʼ coltañonla chaʼan mi lac chʌn ajñel tiʼ cʼuxbiya Dios (pejcan 1 Corintios 15:58).

17. ¿Chucoch jiñi subtʼan jiñʌch jumpʼejl eʼtel ti ora bʌ yom miʼ mejlel?

¹⁷ Mach yomic miʼ ñajʌyel lac chaʼan, jiñi subtʼan chaʼan Yumʌntel jiñʌch jumpʼejl eʼtel ti ora bʌ yom miʼ mejlel. ¿Chucoch? Come jiñi i Tʼan Dios mi yʌl: «Lʌcʼʌlix jiñi bʌbʌqʼuen bʌ qʼuin. Mach jalix miʼ tilel» (Sofonías 1:14). Cheʼʌchi, woli ti lʌcʼtiyel ti ora jiñi qʼuin baqui  Jehová mi caj i jisan tiʼ pejtelel jiñi mach bʌ weñic ila ti pañimil (mulawil). ¡Jiñi wiñicob xʼixicob yom miʼ wersa ñaʼtañob jiñi! Yom miʼ ñaʼtañob chaʼan i yorajlelix chaʼan mi jacʼbeñob i Tʼan Jehová cheʼ bajcheʼ jiñi Cʼax  Ñuc bʌ, come i yujtibal «mi caj i bʌcʼ tilel cheʼ tiʼ yorajlel» (Habacuc 2:3).

18. ¿Chucoch yom mi lac chʼujutesan Jehová yicʼot jiñi isujm bʌ xñoptʼañob?

¹⁸ Jehová yom chaʼan mi lac chʼujutesan yicʼot yambʌ isujm bʌ xñoptʼañob. Jin chaʼan jiñi i Tʼan mi yʌl: «Laʼ laj coltan lac bʌ ti pejtelel chuqui wen, chaʼan mi laj cʼuxbin lac bʌ bajcheʼ yom yicʼot wen bʌ lac melbal. Mach yomic mi laj cʌy lac tempan lac bʌ cheʼ bajcheʼ miʼ bixel melob lamital. Laʼ lac chʼejlʼesan lac bʌ. Cojcoj wʌle cheʼ woli ti lʌcʼtiyel jiñi cojix bʌ qʼuin cheʼ bajcheʼ woli laʼ qʼuel» (Hebreos 10:24, 25). Cheʼ mi lac majlel yaʼ ti tempa bʌ la quicʼot la quermañojob lajal bʌ lac chʼujbiya la quicʼot, yaʼʌch baqui miʼ mejlel lac ñuqʼuesan yicʼot lac chʼujutesan Dios. Cheʼ jaʼel mi lac pʼʌtʼesan lac bʌ yicʼot mi laj coltan lac bʌ.

19. ¿Chuqui miʼ mejlel lac mel chaʼan miʼ pʼʌtʼan laj cʼuxbiya yaʼ ti congregación?

¹⁹ Cheʼ bʌ mi lac tempan lac bʌ yicʼot yambʌ i wiñicob Jehová, miʼ ñucʼan laj cʼuxbiya ti jujuntiquilonla yicʼot mi lac ñumen taj la camigojob ti congregación. Wen ñuc i cʼʌjñibal cheʼ mi laj qʼuelben wem bʌ i melbal jiñi yañoʼ bʌ, cheʼ bajcheʼ miʼ mel Jehová ti lac tojlel. Mach a pijtan chaʼan yom wen tojob jiñi a wermañojob o chaʼan mach xmulilobic. Yom miʼ cʼajtiyel a chaʼan, ti lac pejtelel mi lac chaʼlen mulil yicʼot mach junlajalic mi laj colel tiʼ chaʼan bʌ Dios (pejcan Colosenses 3:13). Sujtesan ti a wamigojob jiñi muʼ bʌ i cʼuxbiñob Jehová tiʼ pejtelel i pʼʌtʌlel, i mi caj a qʼuel bajcheʼ mi caj a cʼʌjquel majlel tiʼ chaʼan bʌ Dios. Cheʼ mucʼʌch a chʼujutesan Jehová yicʼot a wermañojob, mach wocolic mi caj a wubin chaʼan maʼ chʌn ajñel tiʼ cʼuxbiya Dios. Laʼ laj qʼuel bajcheʼ mi caj i yʌqʼuen i majtan Jehová jiñi xucʼul bʌ miʼ chʼujutesañob yicʼot jiñi muʼ bʌ i chʌn ajñelob tiʼ cʼuxbiya.

20, 21. ¿Chuqui jiñi «cuxtʌlel mach bʌ yujilic jilel», i chucoch wen ñuc cheʼ mi la cʌqʼuentel?

²⁰ Jiñi majtan muʼ bʌ caj i yʌqʼuen Jehová i wiñicob jiñʌch jiñi cuxtʌlel, pero ¿bajcheʼ yilal bʌ cuxtʌlel? Tajol cabʌl miʼ yʌlob chaʼan cuxulonla tiʼ sujmlel come mi lac chaʼlen jap icʼ, mi lac chaʼlen uchʼel yicʼot mi lac jap chuqui jach la com. Cheʼ bʌ wen utsʼat woli lac ñusan qʼuin, tajol mi laj cʌl: «¡Ñusabʌjix to i bajñel iliyi!». Jiñi Biblia miʼ pʌsbeñonla chaʼan wʌle ora maʼañic juntiquil quixtañu cuxul bʌ tiʼ sujmlel.

²¹ Jiñi Biblia miʼ subeñonla chaʼan yom mi la cʌcʼ ti lac «pusicʼal [...] cuxtʌlel mach bʌ yujilic jilel» (1 Timoteo 6:19). Jiñi tʼan «cuxtʌlel mach bʌ yujilic jilel» yom i yʌl jumpʼejl cuxtʌlel woli bʌ lac pijtan ti talto bʌ qʼuin. Cheʼ bʌ mach xmuliloñixla, mi caj mejlel la cʌl chaʼan cuxuloñixla tiʼ sujmlel come cheʼix mi caj lac chumtʌl cheʼ bajcheʼ tsiʼ wʌn ñaʼta Dios ti ñaxan. Cheʼ baqui ora chumuloñixla ti Paraíso, maʼañix mi caj laj cʼamʼan, ñʌchʼʌl mi caj la cajñel yicʼot lac tijicñʌyel, cheʼ jiñi mi caj lac taj jiñi laj «cuxtʌlel mach bʌ yujilic jilel» (1 Timoteo 6:12). Woli lac pijtan jiñi ñuc bʌ lac majtan, ¿mach ba cheʼiqui?

22. ¿Bajcheʼ maʼ mejlel a taj a «cuxtʌlel mach bʌ yujilic jilel»?

²² ¿Bajcheʼ miʼ mejlel juntiquil i taj i «cuxtʌlel mach bʌ yujilic jilel»? Cheʼ bʌ maxto i yʌlʌ Pablo ili tʼan, tsiʼ ñaxan sube jiñi xñoptʼañob chaʼan «miʼ melob chuqui utsʼat» yicʼot ‹chaʼan miʼ pʼojlel wem bʌ i melbalob› (1 Timoteo 6:18). Jin chaʼan, joñonla cujil mi mucʼʌch lac mel chuqui mi laj cʌn ti Biblia. Pero ¿tsaʼ ba i yʌlʌ Pablo chaʼan jasʌl an wem bʌ lac melbal mi caj lac taj laj «cuxtʌlel mach bʌ yujilic jilel»? Maʼañic, come jiñi laj cuxtʌlel muʼ bʌ cajel lac taj ti talto bʌ qʼuin yaʼ cʌyʌl  tiʼ «yutslel i pusicʼal Dios» (Romanos 5:15). Pero Jehová miʼ mulan i yʌqʼuen i majtan jiñi xucʼul bʌ miʼ melben i yeʼtel. Yom chaʼan jatet maʼ taj tijicña bʌ a «cuxtʌlel mach bʌ yujilic jilel». Jiñʌch jiñi cuxtʌlel muʼ bʌ caj i tajob jiñi muʼ bʌ i chʌn ajñelob tiʼ cʼuxbiya Dios.

23. ¿Chucoch wen ñuc i cʼʌjñibal mi lac chʌn ajñel tiʼ cʼuxbiya Dios?

²³ Ti jujuntiquilonla yom mi laj cʼajtiben lac bʌ: «¿Woli ba c chʼujutesan Dios cheʼ bajcheʼ mi yʌl jiñi Biblia?». Mi mucʼʌch lac chʌn jacʼ ti jujumpʼejl qʼuin chaʼan cheʼʌch woli lac mel, utsʼatʌch baqui woli lac chaʼlen xʌmbal. Miʼ mejlel la cʌl chaʼan Jehová jiñʌch lac putsʼib. Jiñʌch mi caj i coltan i tejclum ti ili cojix bʌ qʼuin wen wocol bʌ. Cheʼ jaʼel, Jehová mi caj i yotsañonla ti tsijiʼ bʌ pañimil wen lʌcʼʌlix bʌ. ¡Cʼax utsʼatax miʼ cajel ti ujtel jiñi! ¡Mi caj lac wen ubin lac tijicñʌyel chaʼan weñʌch chuqui ti lac yajca lac mel ti ili cojix bʌ qʼuin! Mi jatet maʼ yajcan a mel jiñi wem bʌ ti ili ora, mi caj a taj a «cuxtʌlel mach bʌ yujilic jilel», jiñʌch jiñi cuxtʌlel yom bʌ Jehová Dios ti ñaxan.