1. ¿Baqui bʌ jiñi tʼan ñaʼtʌbil bʌ i chaʼan Dios chaʼan wʌʼ ti Pañimil?

JIÑI tʼan ñaʼtʌbil bʌ i chaʼan Dios chaʼan ili Pañimil jiñʌch chaʼan jiñi wiñicob xʼixicob (quixtañujob) miʼ chumtʌlob ti tijicña yicʼot maʼañix mi caj i cʼamʼañob. Jiñi Biblia mi yʌl chaʼan «Dios tsiʼ pʌcʼʌ pʌcʼʌbʌl ti Edén» yicʼot tsiʼ «yʌcʼʌ ti colel [...] pejtelel i tʼojol bʌ teʼ yicʼot utsʼat bʌ chaʼan i bʌlñʌcʼʌl». Ti wiʼil, tsiʼ mele jiñi ñaxam bʌ lac tat lac ñaʼ, Adán yicʼot Eva, tsiʼ yʌcʼʌyob ti chumtʌl ti tʼojol jax bʌ chumlibʌl i tsiʼ subeyob: «Laʼ pʼojliquetla. Butʼula jiñi pañimil. Cʼʌñʌla» (Génesis 1:28; 2:8, 9, 15). Cheʼ bajcheʼ mi laj qʼuel, yom bʌ Dios jiñʌch chaʼan jiñi quixtañujob miʼ yʌcʼob i yalobil, chaʼan miʼ ñumen ñuqʼuesañob majlel jiñi pʌcʼʌbʌl tiʼ pejtelel Pañimil yicʼot chaʼan miʼ cʌntañob jiñi añimal tac.

2. a) ¿Chucoch mucʼʌch lac ñop chaʼan mi caj i tsʼʌctiyel jiñi ñaʼtʌbil bʌ i chaʼan Dios wʌʼ ti Pañimil? b) Cheʼ bajcheʼ mi yʌl jiñi Biblia, ¿bajcheʼ yilal i melbalob jiñi quixtañu muʼ bʌ caj i chumtʌlob tiʼ pejtelel ora?

² ¿Muʼ baʼ ñop chaʼan jumpʼejl bʌ qʼuin mi caj i tsʼʌctiyel jiñi ñaʼtʌbil bʌ i chaʼan Dios tiʼ tojlel wiñicob xʼixicob chaʼan miʼ chumtʌlob ti jumpʼejl paraíso? Jehová tsaʼix i yʌcʼʌ i tʼan: ‹Tsaʼix bʌ c wʌn subu mi caj c tsʼʌctesan› (Isaías  46:9-11; 55:11). Jin chaʼan, jiñi tsaʼ bʌ i Mele tiʼ pejtelel chuqui tac an, mi caj i tsʼʌctesan jiñi albil bʌ i chaʼan. Mi yʌl chaʼan «mach lolomic jach» tsiʼ mele Pañimil, «tsiʼ mele chaʼan i chumlib wiñicob» (Isaías 45:18). ¿Majqui bʌ quixtañu yom tsiʼ yʌlʌ Dios chaʼan miʼ chumtʌlob wʌʼ ti Pañimil? Jiñi Biblia miʼ yʌqʼuen i jacʼbal: «Mi caj i yʌqʼuentelob jiñi pañimil jiñi tojoʼ bʌ. Mi caj i yajñelob ti pejtelel ora» (Salmo 37:29; Apocalipsis [Revelación] 21:3, 4).

3. ¿Chuqui bʌ wocol tac mi laj qʼuel wʌʼ ti Pañimil yicʼot baqui tac bʌ cʼajtiya yom bʌ mi lac melben lac bʌ?

³ Jiñi tʼan wʌn albil bʌ i chaʼan Dios, maxto tsʼʌctiyemic. Jiñi quixtañujob miʼ cʼamʼañob, miʼ chʌmelob, i cheʼ to jaʼel miʼ jatsʼob i bʌ yicʼot miʼ tsʌnsañob i bʌ. Wen tsiquil chaʼan añʌch mach bʌ weñic tsaʼ ujti. Jehová maʼañic miʼ mulan bajcheʼ yilal jiñi Pañimil ili ora. Pero ¿chuqui tsaʼ ujti? ¿Chucoch maxto i tsʼʌctesa jiñi ñaʼtʌbil bʌ i chaʼan Dios? I jacʼbal ili cʼajtiya tac, maʼañic mi caj lac taj ti jumpʼejl libro chaʼan historia tsʼijbubil bʌ i chaʼan wiñicob come jiñi wocol tsaʼ tejchi yaʼ ti panchan.

4, 5. a) ¿Majqui jiñi tsaʼ bʌ i cʼʌñʌ juncojt lucum chaʼan miʼ pejcan Eva? b) ¿Bajcheʼ miʼ mejlel ti sujtel ti aj xujchʼ juntiquil quixtañu wem bʌ i melbal ti ñaxan?

⁴ Ti jiñi ñaxam bʌ libro yaʼ ti Biblia miʼ subeñonla chaʼan yaʼ ti pʌcʼʌbʌl Edén, tsiʼ pʌsʌ i bʌ juntiquil i contra Dios. Anquese cʌmbil bajcheʼ «jiñi lucum», pero mach ñoj lucumic tiʼ sujm. Jiñi cojix bʌ libro yaʼ ti Biblia miʼ subentel bajcheʼ ‹Diablo yicʼot Satanás, jiñʌch muʼ bʌ i lotin pejtelel quixtañujob ti pañimil›. Cheʼ jaʼel miʼ subentel bajcheʼ «jiñi oñiyix bʌ lucum» (Génesis 3:1; Apocalipsis 12:9). Jiñʌch juntiquil pʼʌtʌl bʌ ángel, maʼañic bʌ miʼ mejlel laj qʼuel, tsiʼ cʼʌñʌ juncojt lucum chaʼan  miʼ pejcan Eva, tsiʼ poj mele i bʌ bajcheʼ jiñʌch woli (choncol) ti tʼan. Jiñi ángel yaʼ tsaʼ ajñi yicʼot Dios cheʼ bʌ tsiʼ mele jiñi Pañimil chaʼan i chumlib quixtañujob (Job 38:4, 7).

⁵ Tiʼ pejtelel muʼ bʌ i mel Jehová la cujil chaʼan tojʌch. Cheʼ jiñi, ¿majqui tsiʼ mele jiñi cʌmbil bʌ bajcheʼ «Diablo» yicʼot «Satanás»? Juntiquil pʼʌtʌl bʌ i yángel Dios tsiʼ bajñel sutqʼuesa i bʌ ti Diablo. ¿Bajcheʼ tsaʼ ujti jiñi? Lajal bajcheʼ juntiquil mach bʌ yujilic xujchʼ waʼli, pero ti yijcʼʌlel miʼ tech i chaʼlen xujchʼ. ¿Chucoch tsaʼ caji i mel bajcheʼ jiñi? Tajol jiñi wiñic o xʼixic tsiʼ yʌcʼʌ ti colel mach bʌ weñic tiʼ pusicʼal. Miʼ tsaʼ caji i chʌn ñaʼtan i mel jiñi jontolil am bʌ tiʼ pusicʼal mi caj i ñumen colel majlel. Ti wiʼil, mi tsaʼ i tajbe i yorajlel, mi caj i mel jiñi woli (yʌquel) bʌ i chʌn ñaʼtan (pejcan Santiago 1:13-15).

6. ¿Bajcheʼ tsaʼ pʌntʌyi jiñi pʼʌtʌl bʌ i yángel Dios ti Satanás yicʼot ti Diablo?

⁶ Jiñʌch tsaʼ bʌ ujti tiʼ tojlel Satanás. Tsiʼ yubi cheʼ bʌ Jehová tsiʼ sube Adán yicʼot Eva chaʼan miʼ pʼojlel i yalobilob i miʼ butʼob jiñi Pañimil tiʼ pʼolbalob (Génesis 1:27, 28). Tajol tsiʼ ñaʼta Satanás tiʼ pusicʼal: «¡Tiʼ pejtelel ili quixtañujob, joñon miʼ mejlel i chʼujutesañoñob i mach jiñic miʼ chʼujutesañob Dios!». Jiñi leco bʌ i pensar tsiʼ chʌn ñaʼta ti pusicʼal, cʼʌlʌl jinto tsaʼ cʼoti i lotin Eva baqui tsiʼ sube lot tac tiʼ tojlel Dios (pejcan Génesis 3:1-5). Cheʼ bajcheʼ jiñi, jiñi ángel tsaʼ sujti (pʌntʌyi) ti «Diablo», i cʼabaʼ yom i yʌl juntiquil «muʼ bʌ i wen chaʼlen leco bʌ lot tiʼ tojlel yambʌ i piʼʌl». Cheʼ jaʼel, tsaʼ cʼoti ti cʌjñel bajcheʼ «Satanás», i sujmlel i cʼabaʼ jiñʌch «xcontra o xmʌctaya».

7. a) ¿Chucoch tsaʼ chʌmi Adán yicʼot Eva? b) ¿Chucoch mi lac ñoxʼan yicʼot mi lac chʌmel yaʼ bʌ tilemonla tiʼ pʼolbal Adán?

⁷ Satanás tsiʼ cʼʌñʌ lot tac yicʼot yac chaʼan maʼañic miʼ jacʼbeñob i tʼan Dios jiñi Adán yicʼot Eva (Génesis 2:17;  3:6). Tiʼ caj chaʼan tsaʼ bʌ i meleyob, tsaʼ chʌmiyob, cheʼ bajcheʼ tsaʼ wʌn subentiyob ti Dios (Génesis 3:17-19). Adán xmulil tsaʼ sujti cheʼ bʌ tsiʼ chaʼle mulil, cheʼ jaʼel tiʼ pejtelel i pʼolbalob tsaʼ sujtiyob ti xmulil (pejcan Romanos 5:12). Laʼ laj cʌl cheʼ muqʼuic laj cʼʌn jumpʼejl molde tojqʼuem bʌ chaʼan mi lac mel caxlan waj, ¿bajcheʼ yilal mi caj i loqʼuel tiʼ pejtelel jiñi caxlan waj tac? Mach weñic, luʼ tojqʼuem mi caj i loqʼuel. Cheʼʌch joñonla jaʼel, ti lac pejtelel xmulilonla come tilemonla tiʼ pʼolbal Adán. Jiñʌch chaʼan mi lac ñoxʼan yicʼot mi lac chʌmel (Romanos 3:23).

8, 9. a) Cheʼ bajcheʼ tsaʼ laj qʼuele, ¿baqui bʌ lot tsiʼ yʌlʌ Satanás tiʼ tojlel Dios? b) ¿Chucoch maʼañic tsiʼ jisa Dios ti jiñi jach bʌ ora jiñi jontoloʼ bʌ?

⁸ Cheʼ bʌ Satanás tsiʼ sube Adán yicʼot Eva chaʼan miʼ chaʼleñob mulil tiʼ contra Dios, tsaʼ sujti tiʼ yum jontoloʼ bʌ. Tsiʼ contraji Jehová come tsiʼ yʌlʌ tʼan mach bʌ isujmic chaʼan bajcheʼ miʼ chaʼlen yumʌntel. Tajol tsiʼ yʌlʌ ili tʼan: «Mach weñic bʌ rey come miʼ lotin i yaj eʼtelob (troñelob) yicʼot maʼañic miʼ yʌqʼueñob i wenlel. Jiñi quixtañujob mach cʼʌñʌlic miʼ yumʌntelob ti Jehová come miʼ mejlel i bajñel ñaʼtañob chuqui wen yicʼot chuqui mach bʌ weñic. Tiʼ sujm, ñumen wen mi caj i yajñelob cheʼ muqʼuic i jacʼbeñoñob c tʼan». ¿Bajcheʼ tsiʼ jacʼʌ Dios jiñi contrajintel? An cabʌl muʼ bʌ i yʌlob chaʼan ñumen wen cheʼ tsaʼic i jisa jiñi jontoloʼ bʌ. Cheʼic tsiʼ mele Dios bajcheʼ jiñi, ¿tsaʼ ba mejli i pʌs chaʼan choncolʌch ti lot jiñi Satanás yicʼot bajcheʼ miʼ ñaʼtʌntel mi jiñʌch ñumen wen i yumʌntel Jehová?

⁹ Jehová jiñʌch ñumen wem bʌ xMeloñel. Jin chaʼan maʼañic tsiʼ jisa ti ora jiñi jontoloʼ bʌ. Cheʼ jaʼel tsiʼ yʌcʼʌ ti ñumel ora chaʼan miʼ yʌqʼuen i jacʼbal tsaʼ bʌ i yʌlʌ Satanás cheʼ bʌ tsiʼ contraji yicʼot chaʼan miʼ pʌs chaʼan xlotʌch jiñi Satanás. Cheʼ jaʼel, choncol i yʌcʼ ti ñumel  ora chaʼan miʼ bajñel yumañob i bʌ jiñi quixtañujob añoʼ bʌ tiʼ cʼʌb Satanás. Yaʼ ti cʌntesʌntel 11 ti ili libro, miʼ tsictesʌntel chucoch cheʼ tsiʼ mele Jehová bajcheʼ jiñi yicʼot chucoch woliʼ yʌcʼ ti ñumel cabʌl ora chaʼan miʼ yʌqʼuen i jacʼbal jiñi cʼajtiya tac. Pero yom maʼ cʼajtiben a  bʌ: ¿Chucoch Adán yicʼot Eva tsiʼ ñopbeyob i tʼan Satanás cheʼ maʼañic tsaʼ chuqui melbil i chaʼan tiʼ tojlelob? Jehová tsiʼ yʌqʼue tiʼ pejtelel chuqui yomob jiñi Adán yicʼot Eva, ¿wem ba chuqui tsiʼ ñaʼtayob cheʼ bʌ tsiʼ cuyuyob ti xlot? Cheʼ jatetiqui, ¿chuqui tsaʼ mele?

10. ¿Bajcheʼ miʼ mejlel a wʌcʼ a bʌ tiʼ tojlel Jehová chaʼan maʼ wʌqʼuen i jacʼbal jiñi lot tsaʼ bʌ i yʌlʌ Satanás?

¹⁰ Yom mi lac wen ñaʼtan ili cʼajtiya tac come ti lac pejtelel mi lac ñusan wocol ili ora. Jatet maʼ mejlel a wʌcʼ a bʌ tiʼ tojlel Jehová, chaʼan maʼ wʌqʼuen i jacʼbal jiñi lot tsaʼ bʌ i yʌlʌ Satanás tiʼ tojlel Jehová. Cheʼ maʼ jacʼben i tʼan Jehová bajcheʼ Yumʌl, mi caj a pʌs chaʼan jiñi Diablo juntiquilʌch xlot (Salmo 73:28; pejcan Proverbios 27:11). Anquese wʌʼ ti Pañimil an yonlel millón quixtañujob, pero mach cabʌlic miʼ lʌcʼtesañob i bʌ tiʼ tojlel Jehová. Iliyi miʼ yʌqʼueñonla laj cʼajtiben lac bʌ: ¿Muʼ ba i cʌntesañonla tiʼ sujm jiñi Biblia chaʼan Satanás jiñʌch woli bʌ ti yumʌntel ti pañimil (mulawil)?

11, 12. a) ¿Bajcheʼ tsiʼ pʌsʌ Satanás chaʼan jiñʌch yʌquel i yuman ili pañimil cheʼ bʌ tsiʼ ñopo i yilʌben i pusicʼal Jesús? b) ¿Baqui bʌ yambʌ miʼ yʌqʼueñonla lac ñaʼtan chaʼan Satanás jiñʌch woliʼ yuman ili pañimil?

¹¹ Tiʼ pejtelel ora, Jesús tsiʼ ñaʼta chaʼan Satanás jiñʌch woli i yuman ili pañimil. Jumpʼejl bʌ qʼuin, jiñi Diablo tsiʼ pʌsbe Jesús ti jumpʼejl milagro tiʼ «pejtelel i yumʌntel tac jiñi yumʌlob ti pañimil yicʼot i ñuclel», i tsiʼ yʌqʼue i tʼan: «Muqʼuic a ñocchocon a bʌ a chʼujutesañon, mi cʌqʼueñet ti pejtelel» (Mateo 4:8, 9; Lucas 4:5, 6). Ñaʼtancu jiñi. Mi mach i chaʼañic Satanás tiʼ pejtelel jiñi yumʌntel tac, ¿tiʼ sujm ba miʼ yilʌbentel i pusicʼal (ñojpel) Jesús? Yicʼot jaʼel, Jesús maʼañic baqui ora tsiʼ yʌlʌ chaʼan jiñi Diablo mach i chaʼañic jiñi am bʌ ti pañimil.

 ¹² La cujil chaʼan Jehová jiñʌch jiñi Dios Mach bʌ Añic i Pʼisol i Pʼʌtʌlel, jiñʌch tsaʼ bʌ i Mele panchan yicʼot Pañimil (Apocalipsis 4:11). Pero yaʼ ti Biblia maʼañic baqui mi yʌl chaʼan jiñʌch yumʌl ila ti pañimil, cheʼ lajal jaʼel tiʼ tojlel Jesucristo. Jesús tsiʼ yʌlʌ chaʼan jiñi Diablo jiñʌch «i yum pañimil» (Juan 12:31; 14:30; 16:11). Mi yʌl chaʼan jiñi xmʌctaya o Satanás, jiñʌch «i dios jiñi jontoloʼ bʌ ti pañimil» (2 Corintios 4:3, 4). Jiñi apóstol Juan tsiʼ taja ti tʼan jaʼel cheʼ bʌ tiʼ tsʼijbu ili tʼan: «Pejtelel i chaʼañoʼ bʌ pañimil añob tiʼ cʼʌb jiñi xjontolil» (1 Juan 5:19).

13. ¿Chucoch yom miʼ tilel jiñi tsijiʼ bʌ pañimil?

¹³ Jujumpʼejl jab muʼ bʌ i ñumel, jiñi pañimil ñumen bʌbʌqʼuen jax. An cabʌl guerra, an jontol bʌ yumʌlob yicʼot ñaxam bʌ miʼ yʌcʼob i bʌ ti ñopbalʌl mach bʌ weñic chuqui miʼ melob yicʼot xtsʌnsajob. Ili jontol bʌ pañimil mach tojʼax. Jiñi Biblia mi yʌl chaʼan Dios mach jalix mi caj i jisan jontolil ti jiñi guerra i cʼabaʼ Armagedón, cheʼ jiñi mi caj i tilel jiñi tsijiʼ bʌ pañimil (Apocalipsis 16:14-16).

14. ¿Majqui tsaʼ waʼchoconti chaʼan miʼ yochel bajcheʼ Rey yaʼ tiʼ yumʌntel Dios yicʼot bajcheʼ tsaʼ wʌn ajli iliyi?

¹⁴ Jehová tsiʼ waʼchoco Jesucristo bajcheʼ Rey tiʼ Yumʌntel yaʼ ti panchan. Wajalix tsiʼ wʌn alʌ jiñi Biblia: «Come mi caj i yilan pañimil alʌ chʼiton chaʼan miʼ coltañonla. Mi caj i yotsʌbentel i cʼabaʼ [...] xLajmesa leto. Mach jilic i yumʌntel ti pejtelel ora. Ñoj ñʌchʼʌl i yumʌntel» (Isaías 9:6, 7). Jesús tsiʼ cʌntesa jiñi xcʌntʼañob i chaʼan, chaʼan yom miʼ cʼajtiñob jaʼel ti oración jiñi yumʌntel: «Laʼ tilic a yumʌntel. Laʼ mejlic chuqui a wom ti pañimil cheʼ bajcheʼ ti panchan» (Mateo 6:10). Cheʼ bajcheʼ mi caj laj cʌn majlel, jiñi i Yumʌntel Dios, lʌcʼʌlix mi caj i jisan jiñi yumʌlob wʌʼ ti Pañimil,  i mi caj i choc tilel tsijiʼ bʌ i yumʌntel (pejcan Daniel 2:44). Cheʼ jiñi, mi caj i sujtesan ti jumpʼejl paraíso jiñi Pañimil.

15. ¿Chuqui jiñi «tsijiʼ bʌ pañimil»?

¹⁵ Jiñi Biblia miʼ subeñonla chaʼan «woli lac pijtan tsijiʼ bʌ panchan yicʼot tsijiʼ bʌ pañimil baʼ miʼ mejlel chuqui toj cheʼ bajcheʼ albil i chaʼan Dios» (2 Pedro 3:13; Isaías 65:17). Cheʼ bʌ jiñi Biblia mi yʌl «pañimil», an i tajol miʼ taj ti tʼan jiñi quixtañujob (Génesis 11:1). Jin chaʼan, jiñi «tsijiʼ bʌ pañimil» yom i yʌl quixtañujob muʼ bʌ i qʼuejlelob ti wen tiʼ tojlel Dios.

16. ¿Chuqui ti majtañʌl mi caj i yʌqʼuentelob ti Dios jiñi quixtañujob muʼ bʌ i jacʼbeñob i tʼan yicʼot chuqui yom mi lac mel chaʼan mi lac taj jiñi?

¹⁶ Jesús tsiʼ wʌn acʼʌ i tʼan chaʼan cheʼ bʌ añix jiñi tsijiʼ bʌ pañimil, jiñi quixtañujob muʼ bʌ i jacʼbeñob i tʼan Dios, mi caj i yʌqʼuentelob i majtan: Jiñi «cuxtʌlel mach bʌ añic miʼ jilel» (Marcos 10:30). A wocolic poj jamʌ a Biblia yaʼ ti Juan 3:16 yicʼot 17:3, chaʼan maʼ pejcan chuqui tsiʼ yʌlʌ Jesús chaʼan chuqui yom mi lac mel chaʼan mi lac taj laj cuxtʌlel mach bʌ añic miʼ jilel. Wʌle, laʼ laj qʼuel yaʼ ti Biblia jiñi bendición muʼ bʌ caj i taj jiñi quixtañujob cheʼ chumulobix wʌʼ ti Pañimil jiñʌch cheʼ mi caj i yʌqʼuentelob jiñi majtañʌl tilem bʌ ti Dios.

17, 18. ¿Chucoch miʼ mejlel laj cʌl chaʼan mi caj lac taj ñʌchʼtʌlel yicʼot chaʼan maʼañix chuqui miʼ cajel lac bʌcʼñan wʌʼ tiʼ Pañimil?

¹⁷ Maʼañix miʼ chʌn cajel jontolil, guerra mi jiñic to tsʌnsa. «Cheʼ mi caj a qʼuel jiñi xjontolil mach yaʼix an [...]. Jiñi utsoʼ bʌ i pusicʼal mi caj i yʌqʼuentel i wenlel.» (Salmo 37:10, 11.) Ñʌchʼʌl mi caj yajñel jiñi pañimil come Dios «miʼ yujtesan guerra cʼʌlʌl ti pejtelel pañimil» (Salmo 46:9; Isaías 2:4). Cheʼ miʼ cʼotel i yorajlel jiñi,  «mux i tajob i wenlel jiñi tojoʼ bʌ» yicʼot mi caj «i tajob cabʌl i ñʌchʼtʌlel i pusicʼal wiñicob cheʼ anto uw», ili yom i yʌl tiʼ pejtelel ora (Salmo 72:7).

¹⁸ Jiñi i wiñicob Jehová maʼañix chuqui mi caj i bʌcʼñañob. Ti wajali, cheʼ bʌ jiñi i tejclum Israel tsiʼ jacʼbeyob i tʼan Dios, wen tijicña jax tsaʼ chumleyob (Levítico 25:18, 19). ¡Wen tijicña jax mi caj la cubin jaʼel cheʼ chumuloñixla ti Paraíso! (pejcan Isaías 32:18; Miqueas 4:4.)

19. ¿Bajcheʼ mi lac ñaʼtan chaʼan Dios maʼañic mi caj i yʌcʼ ti jilel bʌlñʌcʼʌl yaʼ ti tsijiʼ bʌ pañimil?

¹⁹ Maʼañix mi caj i jilel bʌlñʌcʼʌl. «Mi caj i yʌcʼ cabʌl i cuch jiñi cholel yaʼ ti joctʌl cʼʌlʌl ti pam tac jiñi wits», cheʼ tiʼ cʼʌyi jiñi salmista (Salmo 72:16). Jehová Dios mi caj i yʌqʼuen i bendición jiñi xucʼuloʼ bʌ tiʼ tojlel, cheʼ jaʼel ‹jiñi cholel mi caj i yʌcʼ i wut› (Salmo 67:6).

20. ¿Chucoch mucʼʌch i mejlel laj cʌl chaʼan wʌʼ ti Pañimil mi caj i sujtel ti jumpʼejl paraíso?

²⁰ Tiʼ pejtelel jiñi Pañimil mi caj i sujtel ti jumpʼejl paraíso. Jiñi lum tsaʼix bʌ i yʌsiyob jiñi xjontolilob, mi caj i sujtel ti jumpʼejl i tʼojol (cʼoʼta) jax bʌ chumlibʌl yicʼot ti pʌcʼʌbʌl tac (pejcan Isaías 65:21-24; Apocalipsis 11:18). Xucʼu xucʼul jiñi Pañimil mi caj i sujtel ti wen tʼojol jax bʌ yicʼot mi caj i yʌcʼ cabʌl i wut pʌcʼʌbʌl cheʼ bajcheʼ yaʼ ti Edén. Tiʼ pejtelel ora, Dios ‹mach chʌquic, mi caj i ñajʼesan pejtelel jiñi cuxul bʌ› (Salmo 145:16).

21. ¿Chuqui miʼ cʌntesañonla cheʼ tijicña mi caj i yajñel jiñi quixtañujob i cheʼ jaʼel jiñi añimal tac?

²¹ Tijicña mi caj i yajñel jiñi quixtañujob i cheʼ jaʼel añimal tac. Jiñi bʌteʼel tac, temel mi caj i chaʼlen weʼel yicʼot alʌcʼʌl tac. Mi jiñic jax jiñi alʌ chʼiton mi caj i bʌcʼñan jiñi añimal tac bʌbʌqʼuen bʌ am bʌ wʌle ora (pejcan Isaías 11:6-9; 65:25).

22. ¿Chuqui mi caj i chaʼlen jiñi cʼamʌjel tac?

²² Maʼañix miʼ cajel cʼamʌjel. Cheʼ woliyix ti yumʌntel  Jesús bajcheʼ Rey ti panchan, mi caj i tsʼʌcan quixtañujob, ñumento cheʼ bʌ tsajñi wajali wʌʼ ti Pañimil (Mateo 9:35; Marcos 1:40-42; Juan 5:5-9). «Maʼañix mi juntiquilic muʼ bʌ caj i yʌl: ‹Cʼamon›.» (Isaías 33:24; 35:5, 6.)

23. ¿Chucoch miʼ cajel cabʌl tijicñʌyel cheʼ baʼ ora miʼ chaʼ chʼojyelob jiñi chʌmeñoʼ bʌ?

²³ Jiñi lac piʼʌlob tsaʼix bʌ chʌmiyob mi caj i chaʼ tejchelob yicʼot mi caj i chumtʌlob tiʼ pejtelel ora. Mi caj i tejchelob jiñi chʌmeñoʼ bʌ añoʼ bʌ tiʼ ñaʼtʌbal Dios. Tiʼ sujmlel, «mi caj i chʼojyelob jiñi chʌmeñoʼ bʌ, jiñi tojoʼ bʌ yicʼot jiñi mach bʌ tojobic» (Hechos 24:15; pejcan Juan 5:28, 29).

24. ¿Bajcheʼ yilal miʼ cajel maʼ wʌl jiñi chumtʌl wʌʼ ti Pañimil cheʼ sujtemix ti jumpʼejl Paraíso?

²⁴ Wen utsʼatax chuqui woliʼ pijtañob jiñi yomoʼ bʌ i ñumen cʌn Jehová yicʼot jiñi yomoʼ bʌ i melbeñob i yeʼtel. Jesús tsiʼ taja ti tʼan jiñi Paraíso talto bʌ cheʼ bʌ tsiʼ sube jiñi xjontolil tsaʼ bʌ chʌmi tiʼ tʼejl: «Mi caj a wajñel a wicʼoton ti Paraíso» (Lucas 23:43, TNM). Wen ñuc i cʼʌjñibal cheʼ mi lac ñumen cʌn chaʼan Jesucristo come jiñʌch mi caj i cʼʌjñel chaʼan mi la cʌqʼuentel jiñi bendición tac.