CHEʼ bʌ maʼ wubin ti alol jiñi tʼan «chʼujlel», ¿chuqui miʼ tilel ti a ñaʼtʌbal? Cabʌl wiñicob xʼixicob miʼ ñaʼtañob chaʼan jiñʌch am bʌ ti lac malil mach bʌ yujilic chʌmel yicʼot maʼañic bʌ miʼ mejlel laj qʼuel. Miʼ yʌlob chaʼan cheʼ bʌ mi lac chʌmel, jiñi am bʌ ti lac malil mucʼ abi i loqʼuel ti lac bʌcʼtal yicʼot chʌn cuxul to abi miʼ cʌytʌl. Ili cʌntesa wen cʌmbil i chaʼañob jiñi quixtañujob, jin chaʼan toj sajtelob i pusicʼal cheʼ bʌ miʼ cʼotel i cʌñob chaʼan mach cheʼic mi yʌl jiñi Biblia bajcheʼ miʼ ñaʼtañob. Cheʼ jiñi, ¿chuqui jiñi chʼujlel yaʼ bʌ mi lac taj tiʼ Tʼan Dios?

Jiñi tsaʼ bʌ i tsʼijbuyob jiñi Biblia tsiʼ cʼʌñʌyob jiñi tʼan rúaj am bʌ ti hebreo yicʼot tsiʼ cʼʌñʌyob jiñi tʼan pnéuma am bʌ ti griego chaʼan miʼ yʌlob jiñi tʼan «chʼujlel». Jiñi Biblia mi yʌl chuqui i sujmlel jiñi tʼan. Jumpʼejl ejemplo jiñʌch Santiago 2:26, mi yʌl chaʼan «cheʼ loqʼuemix lac chʼujlel [pnéuma] ti lac bʌcʼtal chʌmeñoñixla». Ti ili versículo, ti toj jamʌl miʼ pʌsbeñonla chaʼan jiñi tʼan «chʼujlel» yom i yʌl chaʼan jiñʌch muʼ bʌ i yʌqʼuen i cuxtʌlel lac bʌcʼtal. Mi maʼañix i chʼujlel jiñi lac bʌcʼtal, miʼ chʌmel. Yaʼ ti Biblia, jiñi tʼan rúaj mach cojach miʼ cʼʌjñel bajcheʼ «chʼujlel», miʼ cʼʌjñel jaʼel bajcheʼ «japob icʼ» o i pʼʌtʌlel laj cuxtʌlel. Jumpʼejl ejemplo jiñʌch tsaʼ bʌ i yʌlʌ Dios cheʼ bʌ tsaʼ ujti jiñi Butʼjaʼ tiʼ yorajlel Noé, jiñi Biblia mi yʌl: «Tsaʼ chʌmi pejtel añoʼ bʌ ti pañimil muʼ bʌ i japob icʼ [rúaj]» (Génesis 7:22). Jin chaʼan, jiñi «chʼujlel» yom i yʌl chaʼan jiñʌch jiñi pʼʌtʌlel mach bʌ tsiquilic, jiñʌch muʼ bʌ i yʌqʼuen i cuxtʌlel tiʼ pejtelel cuxul tac bʌ.

Jiñi lac bʌcʼtal cʼʌñʌl an i chʼujlel chaʼan miʼ ñijcan i bʌ, lajal bajcheʼ jumpʼejl radio cʼʌñʌl an luz chaʼan miʼ tsʼʌjyel. Laʼ la cʌl yambʌ radio muʼ bʌ i cʼʌn pila. Cheʼ bʌ mi laj cotsʌben i pilajlel, jiñi luz tempʌyem bʌ yaʼ ti pila jiñʌch muʼ bʌ i yʌcʼ ti tsʼʌjyel jiñi radio. Mi maʼañic i pilajlel, maʼañic miʼ tsʼʌjyel. Lajalʌch jaʼel bajcheʼ jiñi radio muʼ bʌ lac chuc ti luz. Cheʼʌch jaʼel jiñi chʼujlel, jiñʌch jiñi pʼʌtʌlel muʼ bʌ i yʌqʼueñonla laj cuxtʌlel ti lac bʌcʼtal. Lajal bajcheʼ jiñi luz, jiñi chʼujlel maʼañic chuqui miʼ yubin yicʼot  maʼañic i pensar. Jiñi chʼujlel mach lajalic bajcheʼ juntiquil quixtañu. Jin chaʼan, cheʼ maʼañix lac chʼujlel o maʼañix i pʼʌtʌlel laj cuxtʌlel, cheʼʌch miʼ yujtel bajcheʼ mi yʌl Salmo 104:29 ‹mi lac chʌmel. Mi lac chaʼ sujtel ti tsʼubejn›.

Cheʼ bʌ miʼ chʌmelob jiñi wiñicob xʼixicob, Eclesiastés 12:7 mi yʌl: «Jiñi tsʼubejn [i chaʼan bʌcʼtal] miʼ caj i sujtel ti lum baqui tilem. Jiñi espíritu [chʼujlel] miʼ sujtel ti Dios tsaʼ bʌ i yʌcʼʌ». Cheʼ bʌ jiñi chʼujlel, o i pʼʌtʌlel laj cuxtʌlel, miʼ cʌy lac bʌcʼtal, jiñi lac bʌcʼtal miʼ chʌmel yicʼot miʼ chaʼ sujtel baqui tilem: Yaʼ ti lum. Cheʼʌch jaʼel, i pʼʌtʌlel laj cuxtʌlel miʼ chaʼsujtel baqui tilem: Ti Dios (Job 34:14, 15; Salmo 36:9). Pero ili mach yomic i yʌl chaʼan jiñi i pʼʌtʌlel laj cuxtʌlel miʼ majlel cʼʌlʌl ti panchan. Yom bʌ i yʌl jiñʌch cheʼ bʌ an majqui miʼ chʌmel cojach Jehová yujil mi mucʼʌch caj i chaʼ aqʼuen i cuxtʌlel ti talto bʌ qʼuin o maʼañic. Miʼ mejlel la cʌl jaʼel, chaʼan jiñi i cuxtʌlel miʼ cʌlel ti cʼʌb Dios. Jiñi i pʼʌtʌlel Dios jiñʌch an tiʼ wenta chaʼan miʼ chaʼ sutqʼuiben i chʼujlel o i pʼʌtʌlel i cuxtʌlel jiñi quixtañu, chaʼan miʼ chaʼ cuxtʌyel.

¡Miʼ wen aqʼueñonla lac tijicñʌyel cheʼ bʌ mi lac ñaʼtan chaʼan Dios jiñʌch muʼ bʌ caj i mel tiʼ tojlel jiñi wiñicob xʼixicob «añoʼ bʌ ti mucoñibʌl»! (Juan 5:28, 29.) Cheʼ miʼ cʼotel i yorajlel chaʼan miʼ chaʼ tejchesʌntelob, Jehová mi caj i melben tsijiʼ bʌ i bʌcʼtal yicʼot mi caj i chaʼ aqʼuen i cuxtʌlel cheʼ bʌ miʼ yʌqʼuen i chʼujlel o i pʼʌtʌlel i cuxtʌlel. ¡Mi caj i wen aqʼueñonla lac tijicñʌyel!

Mi a wom to a bej cʌn majlel chaʼan jiñi tʼan «chʼujlel» yaʼ ti Biblia, mi caj a ñumen tsictesʌbentel yaʼ ti folleto ¿Qué nos sucede cuando morimos? yicʼot yaʼ ti libro Razonamiento a partir de las Escrituras, ti i yopol 136 cʼʌlʌl 140. Jiñi folleto yicʼot jiñi libro, melbil bʌ i chaʼan i testigojob Jehová.