1, 2. a) ¿Muʼ ba i mejlel laj cʌmben tiʼ pejtelel i melbal juntiquil quixtañu cheʼ tsaʼ jach la cubi ti alol i cʼabaʼ? b) ¿Chuqui mach bʌ junlajalic miʼ ñaʼtʌntel chaʼan majqui jiñi Jesús?

TI JIÑI pañimil (mulawil) an cabʌl wiñicob xʼixicob (quixtañujob) wen cʌmbiloʼ bʌ. An lamital wen cʌmbilob yaʼ baqui chumulob o ti jiñi país baqui chʼoyolob, i an yañoʼ bʌ wen cʌmbilob tiʼ pejtelel pañimil. Anquese wen a wujilix chuqui i cʼabaʼ juntiquil quixtañu wen cʌmbil bʌ, pero mach yomic i yʌl chaʼan wen a cʌñʌyix come mach cʌmbilic a chaʼan tiʼ pejtelel i melbal.

² Anquese tsaʼix ñumi 2,000 jab cheʼ bʌ Jesucristo tsajñi wʌʼ ti Pañimil, miʼ wen tajob ti tʼan tiʼ pejtelel pañimil. Pero mach junlajalic miʼ ñaʼtʌntel chaʼan majqui jiñi Jesús. An muʼ bʌ i yʌlob chaʼan juntiquil jach wiñic tsaʼ bʌ i mele chuqui wen. An yañoʼ bʌ miʼ ñaʼtañob chaʼan juntiquil jach xʼaltʼan. I an yambʌlob miʼ ñopob chaʼan Jesús jiñʌch juntiquil Dios yom bʌ mi lac chʼujutesan. ¿Melel ba jiñi?

3. ¿Chucoch ñuc i cʼʌjñibal cheʼ jatet maʼ cʌn i sujmlel chaʼan Jehová Dios yicʼot Jesucristo?

³ Ñuc i cʼʌjñibal cheʼ maʼ cʌn majqui Jesús tiʼ sujmlel. ¿Chucoch? Come jiñi Biblia mi yʌl: «Jiñʌch i cuxtʌlel mach bʌ añic miʼ jilel, cheʼ miʼ cʌñetob jiñi mero Dios, jiñi cojach bʌ yicʼot Jesucristo, tsaʼ bʌ a choco tilel» (Juan 17:3). Cheʼ miʼ cʼotel laj cʌn Jehová Dios yicʼot Jesucristo tiʼ sujmlel,  miʼ mejlel i yʌqʼueñonla lac taj laj cuxtʌlel mach bʌ añic miʼ jilel ti jumpʼejl paraíso wʌʼ ti Pañimil (Juan 14:6). Cheʼ jaʼel, Jesús tsiʼ pʌsʌ ñumen wem bʌ ejemplo chaʼan bajcheʼ yom mi lac chumtʌl yicʼot chaʼan bajcheʼ yom mi laj qʼuel lac piʼʌlob (Juan 13:34, 35). Ti ili libro yaʼ ti ñaxam bʌ cʌntesʌntel tsaʼix laj qʼuele baqui bʌ i sujmlel tiʼ tojlel Dios. Wʌle mi caj laj qʼuel chuqui miʼ cʌntesañonla jiñi Biblia tiʼ tojlel Jesucristo.

4. ¿Chuqui yom i yʌl jiñi título Mesías yicʼot Cristo?

⁴ Cheʼ bʌ anto yom chaʼan miʼ yilan pañimil (chʼocʼan)  Jesús, jiñi Biblia tsiʼ wʌn alʌ chaʼan tal jiñi chocbil bʌ tilel ti Dios, cʌmbil bʌ bajcheʼ Mesías o Cristo. Jiñi título Mesías (tilem ti tʼan hebreo) yicʼot jiñi título Cristo (tilem ti tʼan griego) yom i yʌl «Bombil bʌ». Jiñi tsaʼ bʌ wʌn ajli chaʼan mi caj i chojquel tilel, bombil ti chʼujul bʌ espíritu, ili yom i yʌl chaʼan yajcʌbil ti Dios chaʼan miʼ mel cojach bʌ i yeʼtel (troñel). Ti yan tac bʌ cʌntesʌntel ti ili libro mi caj lac ñumen cʌn chaʼan jiñi Mesías an jumpʼejl wen ñuc bʌ i yeʼtel chaʼan miʼ tsʼʌctiyel jiñi tʼan wʌn albil bʌ i chaʼan Dios. Cheʼ jaʼel, mi caj laj cʌn chaʼan Jesús miʼ mejlel i yʌqʼueñonla bendición tac ti ili ora. Tajol cheʼ bʌ muʼto caj i yilan pañimil Jesús, cabʌl quixtañujob tsiʼ cʼajtibeyob i bʌ: «¿Majqui wʌle jiñi Mesías?».

5. ¿Chuqui jiñi wen ñopol bʌ i chaʼañob tiʼ sujm jiñi xcʌntʼañob i chaʼan Jesús?

⁵ Cheʼ ti ñaxam bʌ siglo cheʼ bʌ tsajñix Cristo, jiñi xcʌntʼañob i chaʼan Jesús chʼoyoloʼ bʌ ti Nazaret tsiʼ ñopoyob tiʼ sujm chaʼan Jesús jiñʌch jiñi Mesías wʌn albilix bʌ (Juan 1:41). Juntiquil apóstol i cʼabaʼ Simón Pedro toj jamʌl tsiʼ sube: «Jatet Cristojet» (Mateo 16:16). Cheʼ jiñi, ¿chucoch tsaʼʌch i ñopoyob jiñi xcʌntʼañob i chaʼan Jesús, chaʼan jiñʌch jiñi Mesías wʌn albilix bʌ? ¿Chucoch mucʼʌch lac ñop joñonla jaʼel?

6. ¿Baqui bʌ lajiya miʼ coltañonla chaʼan mi lac chʼʌmben isujm chaʼan bajcheʼ Jehová tsiʼ colta jiñi quixtañujob chaʼan miʼ cʌñob majqui jiñi Mesías?

⁶ Jiñi xʼaltʼañob i chaʼan Dios tsaʼ bʌ chumleyob ti wajali cheʼ bʌ maxto i yila pañimil Jesús tsiʼ wʌn alʌyob bajcheʼ mi caj ti cʌjñel jiñi Mesías. Laʼ la cʌl jumpʼejl lajiya, cheʼ muqʼuic a majlel a pʌy tilel juntiquil mach bʌ cʌmbilic a chaʼan yaʼ baqui miʼ cottʌl autobús, tren o yaʼ baqui miʼ jubel avión. ¿Mach ba ñumen weñic cheʼ tsʼitaʼ a wujilix bajcheʼ yilal jiñi quixtañu muʼ bʌ caj a majlel a pʌy tilel yaʼi? Jin chaʼan, Jehová tsiʼ cʼʌñʌ jiñi xʼaltʼañob muʼ bʌ i yʌjlelob yaʼ ti Biblia chaʼan miʼ tsictesañob chuqui tac mi  caj i mel jiñi Mesías yicʼot chuqui miʼ caj ti ujtel tiʼ tojlel. Cheʼ jiñi, jiñi xucʼul bʌ quixtañujob mach wocolic mi caj i cʌñob cheʼ miʼ qʼuelob ti tsʼʌctiyel tiʼ pejtelel jiñi profecía tac.

7. Alʌ chaʼpʼejl profecía tsaʼ bʌ tsʼʌctiyi tiʼ tojlel Jesús.

⁷ Laʼ laj qʼuel chaʼchajp ejemplo. Jiñi ñaxam bʌ jiñʌch iliyi: Cheʼ bʌ anto yom 700 jab chaʼan miʼ yilan pañimil jiñi Mesías, jiñi xʼaltʼan Miqueas tsiʼ wʌn alʌ chaʼan mi caj i yilan pañimil yaʼ ti Belén, jumpʼejl alʌ tejclum mach bʌ colemic yaʼ ti Judá (Miqueas 5:2). Cheʼ jiñi, ¿baqui tsaʼ chʼocʼa Jesús? Yaʼʌch baqui tsaʼ wʌn ajli (Mateo 2:1, 3-9). Yambʌ ejemplo jiñʌch jiñi profecía muʼ bʌ lac taj ti Daniel 9:25, baqui tsiʼ yʌlʌ cheʼ bʌ anto yom cabʌl siglo chaʼan miʼ tilel jiñi Mesías, pero wʌn ñaʼtʌbilix chuqui ti jabil mi caj i tilel: Jiñʌch ti jabil 29 cheʼ bʌ tsajñix Cristo. * Cheʼ bʌ tsaʼ tsʼʌctiyi ili profecía yicʼot jiñi yan tac bʌ miʼ pʌsbeñonla chaʼan Jesús jiñʌch jiñi Mesías wʌn albilix bʌ.

8, 9. Cheʼ bʌ tsiʼ chaʼle chʼʌmjaʼ Jesús, ¿bajcheʼ tsaʼ ñumen tsictesʌnti chaʼan jiñʌch Mesías?

⁸ Cheʼ tiʼ jilibal jiñi jabil 29 tsaʼ tsictiyi chaʼan Jesús jiñʌch jiñi Mesías. Tsaʼ ujti iliyi cheʼ bʌ Jesús tsiʼ cʼajtibe Juan muʼ bʌ i yʌcʼ chʼʌmjaʼ, chaʼan miʼ yʌcʼ ti chʼʌmjaʼ yaʼ ti Jordán jaʼ. Jehová tsiʼ wʌn sube Juan chaʼan mi caj i yʌqʼuen jumpʼejl señal chaʼan miʼ mejlel i cʌn majqui jiñi Mesías, tsiʼ pʌsbe cheʼ bʌ tsiʼ chʼʌmʌ jaʼ. Jiñi Biblia mi yʌl: «Cheʼ bʌ tsaʼ loqʼui ti jaʼ, tsiʼ bʌcʼ qʼuele tsaʼ cajli o [jajmi] panchan. Jiñi espíritu tsaʼ jubi tilel tiʼ tojlel Jesús cheʼ bajcheʼ xʼujcuts. Tsaʼ loqʼui tilel tʼan ti panchan tsaʼ bʌ i yʌlʌ: ‹Calobilet, mij cʼuxbiñet, wen utsʼat mij qʼuelet›» (Marcos 1:10, 11). Cheʼ bʌ Juan tsiʼ qʼuele yicʼot tsiʼ ñʌchʼta jiñi tʼan, tsiʼ ñopo chaʼan Jesús jiñʌch jiñi chocbil bʌ tilel i  chaʼan Dios (Juan 1:32-34). Ti jimbʌ qʼuin, jiñi chʼujul bʌ i yespíritu Dios, yom bʌ yʌl jaʼel i pʼʌtʌlel Dios, tsaʼ cʼoti tiʼ tojlel Jesús, jin chaʼan tsaʼ cʼoti ti cʌjñel bajcheʼ Mesías o Cristo, yajcʌbil bʌ chaʼan miʼ yochel bajcheʼ Yumʌl (Isaías 55:4).

⁹ Jiñi profecía tac tsaʼix bʌ tsʼʌctiyi yaʼ bʌ mi lac taj ti Biblia yicʼot tsaʼ bʌ i yʌlʌ Jehová miʼ pʌs tiʼ sujmlel chaʼan Jesús jiñʌch jiñi Mesías wʌn albil bʌ. Pero jiñi Biblia miʼ yʌqʼuen i jacʼbal yambʌ chaʼpʼejl ñuc bʌ cʼajtiya tac chaʼan tiʼ tojlel Jesucristo: Baqui tsaʼ tili yicʼot bajcheʼ yilal i melbal ti wajali.

10. ¿Chuqui miʼ cʌntesañonla jiñi Biblia chaʼan Jesús yaʼix an ti panchan cheʼ bʌ maxto tilemic wʌʼ ti Pañimil bajcheʼ wiñic?

¹⁰ Jiñi Biblia miʼ cʌntesañonla chaʼan Jesús tsaʼ chumle yaʼ ti panchan cheʼ bʌ maxto tilemic wʌʼ ti Pañimil. Cheʼ jaʼel, jiñi xʼaltʼan Miqueas tsiʼ wʌn alʌ chaʼan jiñi Mesías mi caj i yilan pañimil ti Belén yicʼot chaʼan ‹cuxul cʼʌlʌl ti oñiyi› (Miqueas 5:2). Jesús mach cojach tsiʼ yʌlʌ chaʼan tsaʼ chumle ti panchan cheʼ bʌ maxto i yila pañimil bajcheʼ wiñic wʌʼ ti Lum (pejcan Juan 3:13; 6:38, 62; 17:4, 5). Yaʼ ti panchan, tsaʼ chumle bajcheʼ juntiquil ángel yicʼot tsaʼ wen ajñi ti lʌcʼʌl yicʼot Jehová.

11. ¿Bajcheʼ miʼ pʌsbeñonla jiñi Biblia chaʼan Jesús jiñʌch jiñi ñumen cʼuxbibil bʌ i Yalobil Jehová?

¹¹ An cabʌl chucoch chaʼan Jesús jiñʌch ñumen cʼuxbibil bʌ i yalobil Jehová. Yaʼ ti Biblia mi yʌl chaʼan jiñʌch «yʌx alʌl bʌ i chaʼan cheʼ maxto añic melbil tac bʌ» come jiñʌch tsaʼ bʌ ñaxan mejli ti Dios (Colosenses 1:15). * Yambʌ jiñʌch cheʼ «cojach bʌ i Yalobil» (Juan 3:16).  Iliyi yom i yʌl chaʼan maʼañic majqui tsiʼ colta Jehová cheʼ bʌ tsiʼ mele Jesús. Cheʼ jaʼel, cojach Jesús tsiʼ colta Jehová tiʼ melol tiʼ pejtelel chuqui tac an (Hebreos 1:2). Cheʼ jaʼel, miʼ subentel bajcheʼ «jiñi Tʼan» (Juan 1:14). Ili título miʼ yʌqʼueñonla lac ñaʼtan chaʼan jiñʌch tsaʼ bʌ aqʼuenti tiʼ tojlel chaʼan miʼ chaʼlen tʼan tiʼ cʼabaʼ i Tat. Tajol jiñʌch tsaʼ bʌ i yʌcʼʌ tʼan tac chaʼan chuqui yom miʼ melob jiñi yambʌ i yalobilob Dios, cheʼ bajcheʼ jiñi ángelob yicʼot quixtañujob.

12. ¿Chucoch mi laj cʌl chaʼan Jesús mach lajalic bajcheʼ Dios?

¹² ¿Lajal ba Dios yicʼot jiñi ñaxam bʌ i Yalobil cheʼ bajcheʼ miʼ ñopob cabʌlob? Jiñi Biblia mach cheʼic miʼ cʌntesañonla. Cheʼ bajcheʼ tsaʼ laj cʌñʌ yaʼ ti yambʌ párrafo, añʌch majqui tsiʼ mele Jesús. Jin chaʼan, miʼ mejlel laj cʌl chaʼan Jesús añʌch i tejchibal, pero Jehová maʼañic i tejchibal mi añic i jilibal (Salmo 90:2). Jiñi ñaxam bʌ i Yalobil Dios maʼañic tsiʼ ñopo i lajin i bʌ bajcheʼ i Tat. Jiñi Biblia miʼ cʌntesañonla chaʼan jiñi Tatʌl ñumen ñuc bajcheʼ i Yalobil (pejcan Juan 14:28; 1 Corintios 11:3). Cojach Jehová Dios «mach bʌ Añic i Pʼisol i Pʼʌtʌlel» (2 Corintios 6:18). Jin chaʼan, maʼañic yambʌ lajal bʌ bajcheʼ jiñi. *

13. ¿Chuqui yom i yʌl cheʼ bʌ jiñi Biblia mi yʌl chaʼan Jesús jiñʌch «i yejtal bʌ Dios»?

¹³ Jehová yicʼot jiñi cojach bʌ i yalobil, wen tijicña tsaʼ chumleyob yonlel jab cheʼ bʌ maxto melbil jiñi ecʼ tac yicʼot jiñi Pañimil, i cheʼ jaʼel tsiʼ wen cʼuxbiyob i bʌ (Juan 3:35; 14:31). Jesús lajalʌch i melbal bajcheʼ i Tat. Jin chaʼan, jiñi Biblia mi yʌl chaʼan jiñʌch «i yejtal bʌ Dios» (2 Corintios 4:4). Lajal bajcheʼ jiñi alʌlob muʼ bʌ i locʼsʌbeñob i melbal i tat, cheʼʌch jaʼel jiñi Jesús tsiʼ locʼsʌbe i melbal i Tat.

14. ¿Chuqui tsiʼ mele Jehová chaʼan miʼ yilan pañimil bajcheʼ juntiquil quixtañu jiñi cojach bʌ i Yalobil?

 ¹⁴ Cheʼ bʌ tsaʼ jubi tilel jiñi cojach bʌ i Yalobil Dios chaʼan miʼ sujtel bajcheʼ juntiquil wiñic wʌʼ ti Pañimil, mach xicʼbilic tsaʼ tili. Pero tajol maʼ cʼajtiben a bʌ: «¿Chuqui tsaʼ ujti chaʼan juntiquil ángel tsaʼ mejli ti sujtel ti juntiquil quixtañu?». Jehová tsiʼ mele jumpʼejl milagro. Tsiʼ cʼaxtesʌbe i cuxtʌlel i Yalobil tiʼ matriz juntiquil xchʼoc i cʼabaʼ María, maxto bʌ piʼlebilic i chaʼan wiñic chʼoyol bʌ ti Judá. Come maʼañic tsiʼ piʼle juntiquil wiñic, tsiʼ yʌcʼʌ ti pañimil juntiquil alʌl mach bʌ xmulilic, i tsiʼ yotsʌbe i cʼabaʼ ti Jesús (Lucas 1:30-35).

15. ¿Bajcheʼ miʼ cʼotel lac ñumen cʌn Jehová tiʼ tojlel Jesús?

¹⁵ Tiʼ pejtelel tsaʼ bʌ i mele yicʼot tsaʼ bʌ i yʌlʌ Jesús cheʼ bʌ wʌʼ to an ti Pañimil, miʼ coltañonla chaʼan mi lac ñumen cʌn, cheʼ jaʼel miʼ coltañonla lac ñumen cʌn Jehová. ¿Bajcheʼ? Yom cʼajal a chaʼan, Jesús i yejtalʌch (loc’ombajlel) i Tat. Jin chaʼan, tsiʼ sube juntiquil xcʌntʼan i chaʼan: «Jiñi tsaʼ bʌ i qʼueleyon, tsaʼix i qʼuele c Tat» (Juan 14:9). Ti jiñi chʌmpʼejl libro am bʌ yaʼ ti Biblia cʌmbil bʌ bajcheʼ Evangelio tac (Mateo, Marcos, Lucas yicʼot Juan), yaʼʌch baqui mi lac taj chuqui miʼ yʌjlel chaʼan Jesucristo, chuqui tsiʼ mele yicʼot bajcheʼ yilal i melbal tac.

16. ¿Baqui bʌ jiñi wen tʼan tac tsaʼ bʌ i yʌcʼʌ ti ñumen cʌjñel Jesús yicʼot baqui tsaʼ tili jiñi i cʌntesa?

¹⁶ Jesús tsaʼ subenti bajcheʼ «Maestro» (Juan 1:38; 13:13). ¿Chuqui tac tsiʼ yʌcʼʌ ti cʌjñel? Tsiʼ ñumen acʼʌ ti cʌjñel jiñʌch «jiñi wen tʼan chaʼan i Yumʌntel Dios». Ili yumʌl jiñʌch muʼ bʌ caj i chaʼlen yumʌntel tiʼ pejtelel Pañimil anquese yaʼan ti panchan yicʼot mi caj i choc tilel cabʌl bendición tiʼ tojlel jiñi quixtañujob xucʼuloʼ bʌ tiʼ tojlel Dios (Mateo 4:23). ¿Majqui tsiʼ choco tilel jiñi tʼan tac? Jesús tsiʼ yʌlʌ: «Jiñi j cʌntesʌbal mach c chaʼañic. I  chaʼañʌch c Tat tsaʼ bʌ i chocoyon tilel», jiñʌch Jehová (Juan 7:16). Jesús yujil chaʼan i Tat yom chaʼan jiñi quixtañujob miʼ cʌñob jiñi wen tʼan tac chaʼan i Yumʌntel Dios. Yaʼ ti cʌntesʌntel 8 mi caj lac ñumen cʌn chaʼan jiñi yumʌntel yicʼot chuqui mi caj i mel.

17. ¿Baqui tsiʼ chaʼle cʌntesa Jesús yicʼot chucoch tsiʼ chaʼle wersa chaʼan miʼ mel?

¹⁷ ¿Baqui tsiʼ chaʼle cʌntesa Jesús? Jiñʌch baqui an quixtañu: Cheʼ bajcheʼ tiʼ bijlel cholel, ti tejclum tac, ti mercado yicʼot ti otot tac. Jesús maʼañic tsaʼ buchle i pijtan chaʼan jin miʼ tilelob jiñi wiñicob xʼixicob yaʼ baqui an, jin tsaʼ loqʼui majlel i sajcañob (Marcos 6:56; Lucas 19:5, 6). ¿Chucoch tsiʼ wen aqʼue i yorajlel chaʼan miʼ chaʼlen wersa ti subtʼan yicʼot ti cʌntesa? Come jiñʌch yom bʌ i Tat, i cheʼʌch tsiʼ mele tiʼ pejtelel ora (Juan 8:28, 29). Pero an yambʌ chucoch tsiʼ mele iliyi come tsiʼ wen pʼunta jiñi quixtañujob tsaʼ bʌ cʼoti i qʼuelob yaʼ baqui an (pejcan Mateo 9:35, 36). Jiñi ñaxam bʌ miʼ yʌcʼob i bʌ ti ñopbalʌl  maʼañic tsiʼ cʌntesa jiñi quixtañujob chaʼan baqui bʌ jiñi i sujmlel i chaʼan Dios yicʼot chuqui jiñi ñaʼtʌbil bʌ i chaʼan, pero cheʼ jach tsaʼ cʌjyiyob chaʼan miʼ bajñel qʼuelob i bʌ. Pero Jesús yujil chaʼan yom i cʌñob jiñi wen tʼan chaʼan jiñi Yumʌntel.

18. ¿Baqui tac bʌ i melbal Jesús maʼ ñumen mulan?

¹⁸ Cheʼ bʌ tsajñi Jesús wʌʼ ti Pañimil, tsiʼ pʌsʌ i cʼuxbiya yicʼot chaʼan añʌch i wenlel i pusicʼal. Wen uts tsiʼ qʼuele jiñi quixtañujob, i cheʼ jaʼel jiñi alʌlob wen tijicña tsaʼ ajñiyob yicʼot (Marcos 10:13-16). Mach yajcʌbilic jach majqui tsiʼ cʼuxbi. Ti tsʼaʼle jiñi muʼ bʌ i chʼʌm taqʼuin chaʼan miʼ mel mach bʌ weñic yicʼot jiñi muʼ bʌ i toʼol ticʼlan yañoʼ bʌ (Mateo 21:12, 13). Ti wajali maʼañic miʼ wen qʼuejlelob ti ñuc jiñi xʼixicob, pero Jesús tsiʼ wen qʼuele ti ñuc jiñi xʼixicob (Juan 4:9, 27). Jesús tsiʼ pʌsʌ cabʌl i pecʼlel. Ti jumpʼejl bʌ qʼuin tsiʼ pocbe i yoc jiñi apóstolob, jumpʼejl eʼtel muʼ bʌ i yʌqʼuentelob i mel jiñi xʼeʼtelob mach bʌ muqʼuix i qʼuejlelob ti ñuc.

19. ¿Baqui bʌ ejemplo miʼ pʌs chaʼan Jesús mucʼʌch i pʼuntan jiñi quixtañujob muʼ bʌ i yilañob wocol?

 ¹⁹ Tsiʼ pʌsʌ Jesús chaʼan mucʼʌch i pʼuntan jiñi quixtañujob woli (choncol) bʌ i yilañob wocol, cheʼ bʌ tsiʼ mele milagro tac baqui tsiʼ cʼʌñʌ i pʼʌtʌlel i yespíritu Dios (Mateo 14:14). Jumpʼejl ejemplo jiñʌch juntiquil am bʌ leco bʌ i tsoy tsaʼ bʌ i sajca ñumel Jesús, i cheʼ bʌ tsaʼ cʼoti i taj tsiʼ sube: «Mi a wom mi mejlel a lajmesañon». Jesús tsiʼ yubi tiʼ pusicʼal i cʼuxel i cʼamʌjel jiñi wiñic. Tsiʼ pʼunta, tsiʼ sʌtsʼʌ i cʼʌb, tsiʼ tʌlʌ i tsiʼ sube: «Com cu. Laʼ lajmiquet». ¡Tsaʼ lajmesʌbenti i cʼamʌjel! (Marcos 1:40-42.) ¿Muʼ baʼ ñaʼtan bajcheʼ yubil tsiʼ yubi i bʌ jiñi wiñic?

20, 21. ¿Chucoch miʼ mejlel la cʌl chaʼan Jesús jiñʌch ñumen wem bʌ ejemplo chaʼan bajcheʼ yom mi lac jacʼben i tʼan Dios yicʼot chaʼan mi la cajñel ti toj?

²⁰ Jesús jiñʌch tsaʼ bʌ i pʌsʌ ñumen wem bʌ ejemplo chaʼan bajcheʼ yom mi lac jacʼben i tʼan Dios yicʼot bajcheʼ yom mi la cajñel ti toj. Anquese cabʌl chuqui tsiʼ taja Jesús, chʌn xucʼul tsaʼ ajñi tiʼ tojlel i Tat am bʌ ti panchan, tsiʼ ñusa ilaya wocol yicʼot ticʼlʌntel. Tsʌts tsiʼ yʌcʼʌ i bʌ chaʼan maʼañic miʼ yajlel tiʼ yac jiñi Satanás (Mateo 4:1-11). Tsaʼ cʼoti i yorajlel cheʼ bʌ lamital i familia maʼañic tsiʼ yʌcʼʌyob ti ñuc chuqui tsaʼ bʌ i yʌlʌ Jesús. Cheʼ to jaʼel tsiʼ yʌlʌyob: «Sojquem i jol» (Marcos 3:21). Pero mach jiñic chaʼan Jesús tsiʼ cʌyʌ i chaʼlen wersa i chʌn melben i yeʼtel Dios. Cheʼ bʌ jiñi i contrajob tsiʼ subeyob tʼan tac mach bʌ weñic yicʼot tsiʼ jatsʼʌyob, tiʼ pejtelel ora tsiʼ bajñel tiqʼui i bʌ yicʼot mi tsaʼic i ñopo i melben chuqui mach bʌ weñic i contrajob (1 Pedro 2:21-23).

²¹ Jesús xucʼul tsaʼ ajñi cʼʌlʌl tsaʼ chʌmi, tsiʼ wen ila wocol tiʼ cʼʌb i contrajob cheʼ bʌ tiʼ tsʌnsayob (pejcan 1 Pedro 2:24). Ñaʼtancu bajcheʼ tsiʼ cuchu jiñi wocol cheʼ bʌ cojachix jumpʼejl qʼuin cuxul bajcheʼ wiñic. Tsaʼ chujqui ti jiñi  añoʼ bʌ i yeʼtel yicʼot tsiʼ jopʼbeyob i mul. Jiñi xmeloñelob tsiʼ yʌcʼʌyob ti cʌchol bajcheʼ juntiquil aj xujchʼ, tsiʼ wen wajleyob, i cheʼ jaʼel jiñi soldadojob tsiʼ wen ticʼlayob cheʼ bʌ muqʼuix i cajel ti chʌmel, pero tiʼ pejtelel ili wocol tsaʼ bʌ i ñusa tsiʼ lʌtʼʌ. Cheʼ bʌ yaʼix chʼijil o bajal ti teʼ, tsiʼ yʌlʌ: «¡Tsaʼix luʼ tsʼʌctiyi tsaʼ bʌ tyʌliyon c chaʼlen» (Juan 19:30, Jini wen bʌ tʼan). Cheʼ bʌ tsaʼix ñumi uxpʼejl qʼuin i chʌmel Jesús, jiñi i Tat am bʌ ti panchan tsiʼ tejchesa bajcheʼ juntiquil ángel (1 Pedro 3:18). Cheʼ bʌ tsaʼ tsʼʌctiyi 40 qʼuin i tejchel Jesús ti chaʼ sujti majlel ti panchan, «tsaʼ buchle yaʼ tiʼ ñoj Dios» chaʼan miʼ pijtan miʼ yʌqʼuentel i yumʌntel (Hebreos 10:12, 13).

22. ¿Chuqui tsiʼ taja Jesús cheʼ xucʼul tsaʼ ajñi cʼʌlʌl tsaʼ chʌmi?

²² ¿Chuqui tsiʼ taja Jesús cheʼ xucʼul tsaʼ ajñi cʼʌlʌl tsaʼ chʌmi? Tsiʼ jamʌ jiñi bij chaʼan miʼ mejlel lac taj laj cuxtʌlel mach bʌ añic miʼ jilel ti jumpʼejl paraíso wʌʼ ti Pañimil, cheʼ bajcheʼ tsiʼ ñaʼta i mel Jehová ti ñaxan. Ti yambʌ cʌntesʌntel mi caj laj cʌn bajcheʼ mi caj i tsʼʌctiyel ili pijtaya chaʼan jiñi tsaʼ bʌ i mele Jesús cheʼ bʌ tsaʼ chʌmi.