1, 2. a) ¿Chuqui ñumen ñuc bʌ maʼ qʼuel ti jumpʼejl majtañʌl? b) Cheʼ bʌ tsaʼ tojle lac mul, ¿chucoch jiñʌch jiñi ñumen ñuc bʌ majtañʌl an chʼʌmbil lac chaʼan?

¿BAQUI bʌ jiñi majtañʌl wen ñuc bʌ an i yʌqʼuetob? Mach cʼʌñʌlic wen letsem i tojol jumpʼejl majtañʌl chaʼan mi laj qʼuel ti ñuc. Mach jiñic mi laj qʼuel jaypʼejl i tojol. Muʼ bʌ laj qʼuel ti ñuc jiñʌch mi mucʼʌch i yʌqʼueñonla lac tijicñʌyel yicʼot miʼ añʌch i cʼʌjñibal lac chaʼan.

² Anquese an aqʼuebilet cabʌl majtañʌl, an jach jumpʼejl wen ñuc bʌ. Jiñʌch jiñi majtañʌl tilem bʌ ti Dios tsaʼ bʌ aqʼuentiyob jiñi wiñicob xʼixicob (quixtañujob). Jehová an i yʌqʼueyonla cabʌl majtañʌl, pero jiñi ñumen ñuc bʌ jiñʌch tsaʼ bʌ i yʌcʼʌ chaʼan miʼ tojtʌl lac mul, cheʼ bʌ tsaʼ chʌmi Jesucristo (pejcan Mateo 20:28). Cheʼ bajcheʼ mi caj laj cʌn ti ili cʌntesʌntel, cheʼ bʌ tsaʼ tojle lac mul jiñʌch jumpʼejl  majtañʌl ñuc bʌ chʼʌmbil lac chaʼan yicʼot miʼ yʌqʼueñonla lac tijicñʌyel come añʌch i cʼʌjñibal lac chaʼan. Jiñʌch tsaʼ bʌ i cʼʌñʌ Jehová chaʼan miʼ pʌsbeñonla jiñi ñumen ñuc bʌ i cʼuxbiya.

3. ¿Chuqui yom i yʌl cheʼ tsaʼ tojle lac mul yicʼot chuqui yom mi lac chʼʌmben isujm chaʼan mi lac ñaʼtan bajcheʼ cʼamel i cʼʌjñibal jiñi majtañʌl?

³ Ili jiñʌch junchajp ñuc bʌ i cʼʌjñibal tsaʼ bʌ i mele Jehová chaʼan miʼ coltañonla o miʼ locʼsañonla tiʼ pʼʌtʌlel mulil yicʼot chʌmel (Efesios 1:7). Chaʼan mi lac chʼʌmben isujm ili cʌntesʌntel am bʌ ti Biblia, yom mi laj cʌn chuqui tsaʼ ujti yaʼ ti pʌcʼʌbʌl i cʼabaʼ Edén. Mi tsaʼix lac chʼʌmbe isujm chuqui tsiʼ sʌtʌ jiñi Adán cheʼ bʌ tsiʼ chaʼle mulil, mi caj lac chʼʌmben isujm chucoch wen ñuc i cʼʌjñibal i tojol jiñi mulil.

4. ¿Chuqui i sujmlel chaʼan Adán cheʼ tsaʼ aqʼuenti i cuxtʌlel mach bʌ xmulilic?

⁴ Cheʼ bʌ Jehová tsiʼ mele Adán, an chuqui tsiʼ yʌqʼue wen ñuc bʌ i cʼʌjñibal: Jiñʌch i cuxtʌlel mach bʌ xmulilic. ¡Ñaʼtancu bajcheʼ yilal tsiʼ qʼuele Adán jiñi! Mach xmulilic, sʌc i ñaʼtʌbal, maʼañic miʼ cʼamʼan, maʼañic miʼ ñoxʼan yicʼot maʼañic miʼ chʌmel. Cheʼ jaʼel, tsaʼ ajñi yicʼot Jehová bajcheʼ ñumen ñuc bʌ i yamigo. Jiñi Biblia mi yʌl chaʼan «Adán jiñʌch i yalobil Dios» (Lucas 3:38). Jin chaʼan, Dios yicʼot Adán tsiʼ wen cʼuxbiyob i bʌ cheʼ bajcheʼ miʼ cʼuxbiñob i bʌ juntiquil tatʌl yicʼot i yalobil. Jehová tsiʼ pejca i yalobil chumul bʌ wʌʼ ti Pañimil, tsiʼ yʌqʼue i mel eʼtel (troñel) muʼ bʌ i yʌqʼuen i tijicñʌyel yicʼot tsiʼ  sube chuqui miʼ pijtan tiʼ tojlel (Génesis 1:28-30; 2:16, 17).

5. ¿Chuqui yom i yʌl jiñi Biblia cheʼ bʌ mi yʌl chaʼan Adán tsaʼ mejli «tiʼ yejtal Dios»?

⁵ Adán tsaʼ mejli «tiʼ yejtal Dios» (Génesis 1:27). Iliyi mach yomic i yʌl chaʼan lajal i ñiʼ i wut bajcheʼ Dios. Cheʼ bajcheʼ ti laj cʌñʌ ti cʌntesʌntel 1 ti ili libro, Jehová jiñʌch juntiquil Espíritu mach bʌ mejlic laj qʼuel (Juan 4:24). Mach lajalic bajcheʼ joñonla am bʌ lac bʌcʼtal. Adán tsaʼ mejli tiʼ yejtal Dios, ili yom i yʌl chaʼan lajal i melbal bajcheʼ Dios, añʌch jaʼel i cʼuxbiya, i ñaʼtʌbal, i tojel, i pʼʌtʌlel yicʼot yan tac bʌ. Cheʼ jaʼel, tsaʼ cʼoti i qʼuel bajcheʼ i Tat yicʼot tsaʼ aqʼuenti jiñi libre albedrío, ili yom i yʌl chaʼan librejʌch miʼ bajñel ñaʼtan chuqui yom i mel. Maʼañic tsaʼ mejli bajcheʼ jumpʼejl máquina mucʼ jach bʌ i mel chuqui miʼ subentel. Tsaʼ bajñel aqʼuenti i ñaʼtan mi yom i mel jiñi wem bʌ o mach bʌ weñic. Cheʼ tsaʼic i jacʼbe i tʼan Dios, tsaʼ mejli ti chumtʌl tiʼ pejtelel ora ti Paraíso wʌʼ ti Pañimil.

6. ¿Chuqui tsiʼ sʌtʌ Adán cheʼ bʌ maʼañic tsiʼ jacʼbe i tʼan Dios yicʼot chuqui tsaʼ ujti tiʼ tojlel i pʼolbalob?

⁶ Cheʼ bʌ maʼañic tsiʼ jacʼbe i tʼan Dios jiñi Adán la cujil chaʼan wen lets tsiʼ tojo jiñi i mul come tsaʼ ajqʼui ti chʌmel. Tiʼ caj i mul, tsiʼ sʌtʌ i cuxtʌlel mach bʌ xmulilic yicʼot tiʼ pejtel i wenlel tac (Génesis 3:17-19). Pero mach tiʼ bajñelic jach tsiʼ sʌtʌ jiñi, cheʼ jaʼel tsiʼ yʌqʼue i sʌt tiʼ pejtelel jiñi i pʼolbalob. Jiñi i Tʼan Dios mi yʌl: «Tsaʼ ochi mulil ti pañimil chaʼan tiʼ mul juntiquil wiñic i cʼabaʼ Adán. Jiñi mulil tsiʼ yʌcʼʌ ti chʌmel pejtelel quixtañujob. Jiñi chaʼan mi lac chʌmel ti lac pejtelel come tsaʼ lac chaʼle mulil ti lac pejtelel»  (Romanos 5:12). Ti lac pejtelel xmulilonla come tilemonla tiʼ pʼolbal Adán. Jiñi Biblia miʼ tsictesan chaʼan Adán tsiʼ «chucuyonla» tiʼ pʼʌtʌlel mulil yicʼot chʌmel (Romanos 7:14). Jiñi Adán yicʼot Eva maʼañobix i pijtaya come jiñobʌch tsiʼ bajñel ñaʼtayob chaʼan miʼ ñusʌbeñob i tʼan Dios. Pero ¿chuqui mi caj i chaʼleñob tiʼ pejtelel i pʼolbalob?

7, 8. ¿Baqui bʌ jiñi chaʼchajp yom i yʌl cheʼ tsaʼ tojle jiñi mulil?

⁷ Jehová tsiʼ colta jiñi quixtañujob cheʼ bʌ tsiʼ tojo jiñi mulil. ¿Chuqui yom i yʌl cheʼ tsaʼ tojle jiñi mulil? An chaʼchajp i sujmlel. Jiñi ñaxam bʌ, yom i yʌl cheʼ mi lac toj chaʼan mi lac chaʼ taj chuqui tsaʼ bʌ lac sʌtʌ o chaʼan miʼ chaʼ cojlel juntiquil quixtañu chucul bʌ, lajal bʌ bajcheʼ jumpʼejl secuestro. I chaʼchajplel, yaʼ ti Biblia mi yʌl chaʼan i tojol jiñi mulil yom i yʌl cheʼ an majqui miʼ toj chuqui tsaʼ bʌ i mele tiʼ tojlel juntiquil quixtañu. Laʼ laj cʌl jumpʼejl ejemplo, cheʼ añic juntiquil quixtañu muʼ bʌ i jatsʼben i carro yambʌ i piʼʌl, wersa yom miʼ toj cheʼ bajcheʼ cʼamel miʼ cʼajtibentel.

⁸ Cheʼ bajcheʼ tsaʼ laj qʼuele, wen cabʌl chuqui tsiʼ yʌqʼueyonla lac sʌt jiñi Adán. ¿Bajcheʼ miʼ mejlel ti tojtʌl jiñi tsaʼ bʌ lac sʌtʌ yicʼot chaʼan mi lac locʼsʌntel tiʼ pʼʌtʌlel mulil yicʼot chʌmel? Mi caj laj qʼuel bajcheʼ Jehová tsiʼ tojo jiñi lac mul yicʼot chuqui lac wenlel miʼ mejlel lac taj.

9. ¿Bajcheʼ yilal yom i tojol jiñi mulil?

⁹ Jiñi tsaʼ bʌ sajti jiñʌch jumpʼejl cuxtʌlel mach bʌ xmulilic. Chaʼan miʼ chaʼ tajtʌl jiñi, mach jasʌlic miʼ yʌcʼ i cuxtʌlel juntiquil quixtañu xmulil bʌ (Salmo  49:7, 8). Chaʼan miʼ tojtʌl jiñi mulil, wersa yom lajal i tojol bajcheʼ jiñi ñaxam bʌ. Cheʼʌch mi yʌl jiñi toj bʌ principio tac yaʼ bʌ mi lac taj tiʼ Tʼan Dios. Yaʼ ti Deuteronomio 19:21 mi yʌl: «Tsʌnsan jiñi muʼ bʌ i chaʼlen tsʌnsa». Cheʼ jiñi, ¿chuqui miʼ mejlel i toj jiñi cuxtʌlel mach bʌ xmulilic tsaʼ bʌ i sʌtʌ Adán? Jiñi wem bʌ i tojol mulil jiñʌch cheʼ miʼ yʌcʼ i cuxtʌlel juntiquil mach bʌ xmulilic (1 Timoteo 2:6).

10. ¿Chuqui tsiʼ mele Jehová chaʼan miʼ toj jiñi mulil?

¹⁰ ¿Chuqui tsiʼ mele Jehová chaʼan miʼ toj jiñi mulil? Tsiʼ choco tilel juntiquil i yalobil mach bʌ xmulilic wʌʼ ti Pañimil. Pero maʼañic tsiʼ choco tilel majqui jach bʌ i yalobil, tsiʼ choco tilel jiñi muʼ bʌ i ñumen cʼuxbin: Jiñʌch cojach bʌ i yalobil (pejcan 1 Juan 4:9, 10). Maʼañic chuqui tsiʼ yʌlʌ cheʼ bʌ tsiʼ cʌyʌ i chumlib yaʼ ti panchan (Filipenses 2:7). Cheʼ bajcheʼ tsaʼ laj qʼuele ti yambʌ cʌntesʌntel, Jehová tsiʼ mele jumpʼejl milagro chaʼan miʼ cʼaxtesʌben i cuxtʌlel i Yalobil tiʼ matriz María. Wocolix i yʌlʌ jiñi chʼujul bʌ i yespíritu Dios Jesús tsiʼ yila pañimil (chʼocʼa) bajcheʼ quixtañu mach bʌ xmulilic, mach bʌ chucbilic tiʼ pʼʌtʌlel mulil (Lucas 1:35).

11. ¿Bajcheʼ an i sujmlel cheʼ juntiquil jach wiñic tsaʼ mejli i tojben i mul cabʌl quixtañujob?

¹¹ ¿Bajcheʼ an i sujmlel cheʼ juntiquil jach wiñic tsiʼ locʼo tiʼ pʼʌtʌlel mulil cabʌl wiñicob xʼixicob? Cheʼ jiñi, ¿bajcheʼ tsaʼ sujtiyob ti xmulil tiʼ pejtelel jiñi quixtañujob? Yom cʼajal a chaʼan cheʼ bʌ Adán tsiʼ chaʼle mulil tsiʼ sʌtʌ jiñi i cuxtʌlel mach bʌ xmulilic, jin chaʼan, maʼañix chuqui wen tsaʼ mejli i cʼaxtesʌben i pʼolbalob. Tsaʼ jach bʌ mejli i cʼaxtesʌben i pʼolbal, jiñʌch mulil yicʼot chʌmel. Jesús miʼ subentel yaʼ ti Biblia  bajcheʼ «jiñi cojix bʌ Adán» come maʼañic baʼ ora tsiʼ chaʼle mulil (1 Corintios 15:45, TNM). Jesús tsaʼ ochi tiʼ qʼuexol Adán chaʼan miʼ locʼsañonla tiʼ pʼʌtʌlel mulil. Tsiʼ jacʼbe i tʼan i Tat ti tsʼʌcʌl yicʼot tsiʼ yʌcʼʌ i cuxtʌlel mach bʌ xmulilic. Cheʼ bajcheʼ jiñi, tsiʼ tojbe i mul Adán yicʼot tsiʼ yʌqʼueyonla lac pijtaya come i pʼolbalonla Adán (Romanos 5:19; 1 Corintios 15:21, 22).

12. ¿Chuqui tsiʼ pʌsʌ Jesús cheʼ bʌ tsiʼ lʌtʼʌ wocol tac?

¹² Jiñi Biblia mi yʌl ti tsʼʌcʌl jiñi wocol tac tsaʼ bʌ i ñusa Jesús cheʼ bʌ muʼto caj i chʌmel. Tsiʼ wen ila wocol cheʼ bʌ tsaʼ chʌmi, tsiʼ wen jatsʼʌyob yicʼot tsiʼ chʼijiyob (bajayob) ti teʼ (Juan 19:1, 16-18, 30; qʼuele jiñi apéndice «¿Yom ba miʼ cʼʌñob cruz jiñi xñoptʼañob?»). ¿Chucoch tsiʼ wen ila wocol Jesús? Cheʼ bajcheʼ mi caj laj qʼuel yaʼ ti yambʌ cʌntesʌntel, Satanás tsiʼ yʌlʌ chaʼan mi juntiquil quixtañu miʼ mejlel ti ajñel ti xucʼul tiʼ tojlel Jehová cheʼ miʼ taj jumpʼejl tsʌts bʌ wocol. Cheʼ bʌ Jesús tsiʼ cuchu tiʼ pejtelel jiñi wocol, tsiʼ pʌsʌ chaʼan Satanás woliyʌch (choncolʌch) ti lot. Jesús jiñʌch juntiquil wiñic mach bʌ xmulilic, tsaʼ aqʼuenti tiʼ wenta chaʼan miʼ yajcan chuqui yom i mel yicʼot tsiʼ pʌsbeyonla chaʼan mucʼʌch lac mejlel ti ajñel ti xucʼul tiʼ tojlel Jehová anquese cabʌl wocol miʼ yʌcʼ jiñi Diablo. ¡Wen tijicña tsiʼ yubi Dios cheʼ bʌ tsiʼ qʼuele chaʼan i Yalobil xucʼul tsaʼ ajñi tiʼ tojlel! (Proverbios 27:11.)

13. ¿Bajcheʼ tsaʼ tojle jiñi mulil?

¹³ ¿Bajcheʼ tsaʼ tojle jiñi mulil? Ti jiñi jabil 33 cheʼ bʌ tsajñix Cristo, cheʼ ti 14 chaʼan nisán ti jiñi calendario judío, Dios tsiʼ yʌcʼʌ chaʼan miʼ tsʌnsʌntel i Yalobil mach bʌ xmulilic. Cheʼ bajcheʼ iliyi, Jesús «junyajl jach» tsiʼ yʌcʼʌ i cuxtʌlel mach bʌ xmulilic (Hebreos 10:10). Cheʼ bʌ añix uxpʼejl qʼuin i chʌmel, Jehová tsiʼ  tejchesa bajcheʼ juntiquil ángel. Tsaʼ cʼoti i pʌsben i Tat yaʼ ti panchan chaʼan bajcheʼ cʼamel i tojol i cuxtʌlel tsaʼ bʌ i yʌcʼʌ tiʼ tojlel i pʼolbalob Adán (Hebreos 9:24). Jehová wen lets i tojol tsiʼ qʼuele i cuxtʌlel Jesús tsaʼ bʌ i yʌcʼʌ, tsaʼ cʼʌjñibʌyi tiʼ tojlel quixtañujob chaʼan miʼ locʼsʌntelob tiʼ pʼʌtʌlel mulil yicʼot chʌmel (pejcan Romanos 3:23, 24).

14, 15. ¿Chuqui yom mi lac mel chaʼan miʼ «ñusʌntel lac mul»?

¹⁴ Anquese xmulilonla, pero miʼ mejlel lac taj cabʌl bendición come tsaʼix tojle jiñi lac mul. Laʼ laj qʼuel chuqui bʌ wenlel an lac chaʼan wʌle ora yicʼot ti jiñi tal to bʌ qʼuin chaʼan jiñi ñuc bʌ lac majtan tsaʼ bʌ i yʌqʼueyonla Dios.

¹⁵ I ñusʌntel lac mul. Come xmulilonla ti lac pejtelel, jin chaʼan, wocol mi la cubin tiʼ melol chuqui wen. Ti lac pejtelel mi lac chaʼlen mulil, tajol ti lac tʼan o ti lac melbal. Wocolix i yʌlʌ Jesús cheʼ tsiʼ yʌcʼʌ i cuxtʌlel tsiʼ «ñusʌbeyonla lac mul tiʼ chʼichʼel» (Colosenses 1:13, 14). Pero yom mi laj cʌy lac mul tiʼ pejtelel lac pusicʼal. Cheʼ jaʼel, yom mi laj cʼajtiben Jehová yicʼot i pecʼlel lac pusicʼal chaʼan miʼ ñusan lac mul come yaʼʌch chucbil ti lac ñopoñel am bʌ lac chaʼan ti Jesús (pejcan 1 Juan 1:8, 9).

16. ¿Chucoch miʼ mejlel lac chʼujutesan Dios tiʼ sʌclel laj conciencia yicʼot chuqui bʌ wenlel mi caj lac taj cheʼ sʌc laj conciencia?

¹⁶ Sʌc bʌ laj conciencia tiʼ tojlel Dios. Mi maʼañic sʌc laj conciencia, maʼañic lac pijtaya yicʼot tajol maʼañic laj cʼʌjñibal mi la cubin lac bʌ. Pero wocolix i  yʌlʌ Jehová cheʼ tsiʼ tojo jiñi mulil, cheʼʌch bajcheʼ jiñi tsiʼ ñusʌbeyonla lac mul i cheʼ jaʼel miʼ yʌqʼueñonla chaʼan miʼ mejlel lac chʼujutesan yicʼot i sʌclel laj conciencia anquese xmulilonla (Hebreos 9:13, 14). Jin chaʼan, maʼañix mi lac bʌcʼñan lac pejcan Jehová ti oración (Hebreos 4:14-16). Cheʼ añʌch jumpʼejl sʌc bʌ laj conciencia, ñumen tijicña mi caj la cubin lac bʌ.

17. ¿Baqui tac bʌ bendición mi caj i tsʼʌctiyel cheʼ tsaʼ chʌmi Jesús chaʼañonla?

¹⁷ Lac pijtaya chaʼan mi lac chumtʌl tiʼ pejtelel ora ti jumpʼejl paraíso wʌʼ ti Pañimil. Romanos 6:23 mi yʌl: «An i tojol mulil. Jiñi muʼ bʌ i chaʼleñob mulil wersa miʼ chʌmelob, jiñʌch i tojol». Pero anto chuqui yambʌ mi yʌl jiñi versículo: «Pero lac majtan chʼoyol bʌ ti Dios jiñʌch laj cuxtʌlel mach bʌ añic miʼ jilel ti lac Yum Cristo Jesús». Yaʼ ti cʌntesʌntel 3 ti ili libro tsaʼix laj qʼuele baqui bʌ jiñi bendición mi caj lac taj ti jiñi Paraíso lʌcʼʌlix bʌ wʌʼ ti Pañimil (Apocalipsis [Revelación] 21:3, 4). Jiñi bendición tac, cheʼ bajcheʼ jiñi chumtʌl baqui maʼañix mi cajel cʼamʌjel, mi caj i tsʼʌctiyel  come Jesús tsaʼix chʌmi chaʼañonla. Chaʼan miʼ mejlel lac taj, yom mi lac pʌs chaʼan mucʼʌch laj qʼuel ti ñuc cheʼ tsaʼ tojle jiñi mulil.

18. ¿Chucoch yom mi la cʌqʼuen wocolix i yʌlʌ Jehová cheʼ tsiʼ tojo jiñi mulil?

¹⁸ ¿Chucoch yom mi lac wen aqʼuen wocolix i yʌlʌ Jehová cheʼ tsiʼ tojo jiñi mulil? Mi lac ñumen cʼuxbin jumpʼejl majtañʌl cheʼ jiñi tsaʼ bʌ i yʌqʼueyonla tsiʼ yʌqʼue i yorajlel i chajpan yicʼot tsiʼ cʼʌñʌ i taqʼuin chaʼan miʼ yʌqʼueñonla. Cheʼ jaʼel, miʼ ñijcan lac pusicʼal come tsiʼ pʌsbeyonla chaʼan mucʼʌch i cʼuxbiñonla. Jin chaʼan, cheʼ bʌ tsaʼ tojle jiñi mulil jiñʌch jumpʼejl majtañʌl ñumen ñuc bʌ come Dios tsiʼ yʌcʼʌ i yalobil chaʼan miʼ toj jiñi. Juan 3:16 mi yʌl: «Come cheʼi tsiʼ wen cʼuxbi jiñi añoʼ bʌ ti pañimil Dios. Tsiʼ yʌcʼʌ cojach bʌ i Yalobil». I tojol jiñi mulil jiñʌch ñumen ñuc bʌ cʼuxbiya tsiʼ pʌsʌ Jehová ti lac tojlel. Cheʼ jaʼel, tsiʼ pʌsbeyonla Jesús chaʼan mucʼʌch i cʼuxbiñonla come tsiʼ yʌcʼʌ i cuxtʌlel chaʼañonla (pejcan Juan 15:13). Cheʼ bʌ tsaʼ tojle jiñi mulil, miʼ pʌsbeñonla chaʼan Jehová yicʼot Jesús miʼ wen cʼuxbiñonla ti jujuntiquilonla (Gálatas 2:20).

19, 20. ¿Bajcheʼ miʼ mejlel a pʌs chaʼan mucʼʌch a qʼuel ti ñuc i tojol jiñi mulil tsaʼ bʌ i yʌcʼʌ Dios?

¹⁹ Cheʼ jiñi, ¿bajcheʼ miʼ mejlel a pʌsben Dios chaʼan mucʼʌch a qʼuel ti ñuc i tojol jiñi mulil? Ñaxan yom maʼ cʌn majqui jiñi tsaʼ bʌ i yʌcʼʌ tojol, jiñʌch Jehová (Juan 17:3). Mi caj a mejlel a mel jiñi, cheʼ maʼ pejcan jiñi Biblia yicʼot ili libro. Cheʼ bʌ miʼ cʼotel a cʌn Jehová, mi caj a ñumen cʼuxbin. Cheʼ maʼ ñumen cʼuxbin,  mi caj a ñumen mulan a mel chuqui muʼ bʌ i mulan (1 Juan 5:3).

²⁰ Yom maʼ wʌcʼ a ñopoñel tiʼ tojol jiñi mulil. Jesús tsiʼ yʌlʌ: «Jiñi muʼ bʌ i ñop i Yalobil Dios, an i chaʼan i cuxtʌlel mach bʌ añic miʼ jilel» (Juan 3:36). ¿Bajcheʼ miʼ mejlel lac pʌs chaʼan añʌch lac ñopoñel ti Jesús? Mach ti lac tʼañic jach. Cheʼ bajcheʼ Santiago 2:26 mi yʌl: «Mi toʼol tʼan jach woli lac ñop Dios cheʼ maʼañic wen bʌ lac melbal, chʌmeñoñixla yubil [...]». Jiñi isujm bʌ chʼujbiya mi lac pʌs ti chuqui mi lac mel. Junchajp bajcheʼ mi lac pʌs chaʼan añʌch lac ñopoñel ti Jesús jiñʌch cheʼ mi lac lajin tsaʼ bʌ i mele, ti lac tʼan yicʼot ti lac melbal (Juan 13:15).

21, 22. a) ¿Chucoch yom mi lac majlel ti jiñi tempa bʌ muʼ bʌ i mejlel ti jujumpʼejl jab chaʼan jiñi i Cena lac Yum? b) ¿Chuqui mi caj laj cʌn yaʼ ti cʌntesʌntel 6 yicʼot 7?

²¹ Yom maʼ majlel ti jiñi tempa bʌ muʼ bʌ i mejlel ti jujumpʼejl jab i cʼabaʼ i Cena lac Yum. Ti jiñi acʼʌlel cheʼ ti 14 chaʼan nisán ti jabil 33, Jesús tsiʼ mele jumpʼejl qʼuiñijel maʼañic bʌ yambʌ lajal bʌ bajcheʼ jiñi, cʌmbil bʌ ti Biblia bajcheʼ «i Cena lac Yum» (1 Corintios 11:20; Mateo 26:26-28). Cheʼ jaʼel cʌmbil bajcheʼ i Cʼajtesʌntel i chʌmel Cristo. Jesús jiñʌch tsiʼ yʌqʼue i tejchibal jiñi qʼuiñijel chaʼan miʼ coltan i apóstolob yicʼot jiñi isujm bʌ xñoptʼañob chaʼan miʼ chʌn cʼajtesañob jiñi wen ñuc bʌ i cʼʌjñibal, cheʼ bʌ tsaʼ chʌmi, tsiʼ yʌcʼʌ i cuxtʌlel chaʼan miʼ toj jiñi mulil. Jesús tsiʼ taja ti tʼan ili qʼuiñijel cheʼ bʌ tsiʼ yʌlʌ: «Cheʼʌch yom mi laʼ mel chaʼan c ñaʼtʌntel» (Lucas 22:19). Jiñi i Cʼajtesʌntel i chʌmel Cristo miʼ cʼajtesʌbeñonla jiñi ñuc bʌ cʼuxbiya tsiʼ pʌsbeyoñobla Jehová yicʼot Jesús cheʼ bʌ tsiʼ yʌcʼʌyob i tojol jiñi mulil. Cheʼ mucʼʌch lac  majlel ti jiñi tempa bʌ muʼ bʌ i mejlel ti jujumpʼejl jab chaʼan i Cʼajtesʌntel i chʌmel Cristo, woli (yʌquel) lac pʌs chaʼan mucʼʌch laj qʼuel ti ñuc cheʼ tsaʼ tojle jiñi mulil. *

²² I tojol jiñi mulil jiñʌch jiñi wen letsem bʌ i tojol lac majtan aqʼuebil i chaʼañonla Jehová (2 Corintios 9:14, 15). Cheʼ jaʼel, miʼ mejlel i tajob i wenlel jiñi tsaʼix bʌ chʌmiyob, cheʼ bajcheʼ mi caj laj cʌn yaʼ ti cʌntesʌntel 6 yicʼot 7.