JIÑI Biblia maʼañic miʼ wen subeñonla ti tsʼʌcʌl jalix tsaʼ yila pañimil Jesús. Pero mucʼʌch i wen tsictesʌbeñonla chaʼan mach ti diciembre tsaʼ yila pañimil.

Yaʼ ti Belén baqui tsaʼ yila pañimil Jesús, ¿i yorajlel ba jaʼal cheʼ ti diciembre, o i jajmeñal pañimil? Jiñi calendario i chaʼan bʌ judíojob miʼ chʼʌm tilel jumpʼejl uw i cʼabaʼ kislev, ili jiñʌch cheʼ ti noviembre yicʼot diciembre, i yorajlel tsʌñal yicʼot jaʼlel. Yaʼi miʼ tilel yambʌ jumpʼejl uw i cʼabaʼ tebet, ili jiñʌch cheʼ ti diciembre  yicʼot enero. Jiñʌch baqui ñumen anto cabʌl tsʌñal yicʼot an tac wits baqui miʼ yajlel hielo.

Esdras, jiñi tsaʼ bʌ i tsʼijbu jumpʼejl libro am bʌ ti Biblia, miʼ pʌsbeñonla chaʼan jiñi uw kislev jiñʌch jumpʼejl uw baqui i yorajlel tsʌñal yicʼot jaʼlel. Tsiʼ yʌlʌ chaʼan cabʌl wiñicob xʼixicob tsiʼ tempayob i bʌ ti Jerusalén «cheʼ ti 5 i chaʼan diciembre» (o cheʼ ti 20 i chaʼan noveno uw cheʼ bajcheʼ miʼ yʌjlel ti hebreo, iliyi jiñʌch kislev) i «tsiltsilñayob chaʼan cabʌl jaʼlel». Cheʼ jaʼel tsiʼ yʌlʌ chaʼan jiñi quixtañujob tsiʼ yʌlʌyob chaʼan ti jiñi uw tac «woli jaʼal. Mach mejlix c chʌn ajñel lojon ti jumpat» (Esdras 10:9, 13; Jeremías 36:22). Jin chaʼan, cheʼ tsaʼix cʼoti diciembre, jiñi xcʌnta tiñʌmeʼob cheʼ ti acʼʌlel miʼ lotob i tiñʌmeʼ tac chaʼan maʼañic miʼ cʌytʌl yaʼ ti jamil.

Jiñi Biblia mi yʌl chaʼan jiñi xcʌnta tiñʌmeʼob yaʼañob ti jamil ti jiñi acʼʌlel cheʼ bʌ tsaʼ chʼocʼa Jesús. Lucas, juntiquil tsaʼ bʌ i tsʼijbu jiñi Evangelio tac, mi yʌl chaʼan «ti jiñi jach bʌ lum an xcʌnta tiñʌmeʼob ti jamil. Woli i cʌntañob i tiñʌmeʼ ti acʼʌlel» yaʼ tiʼ tʼejl Belén (Lucas 2:8-12). Ti jiñi texto mi laj cʌn chaʼan jiñi xcʌnta tiñʌmeʼob tsiʼ cʌntayob i tiñʌmeʼ ti acʼʌlel yaʼ ti jamil. Mi ti diciembre an cabʌl tsʌñal yicʼot i yorajlel jaʼal yaʼ ti  Belén, ¿tsaʼ ba mejliyob ti cʌytʌl ti jamil jiñi xcʌnta tiñʌmeʼob? Maʼañic. Jin chaʼan, cheʼ bajcheʼ woli laj cʌn miʼ yʌqʼueñonla lac ñaʼtan chaʼan mach ti diciembre tsiʼ yila pañimil Jesús. *

Jiñi i Tʼan Dios wen tsiquil mi yʌl jalix tsaʼ chʌmi Jesús, pero maʼañic miʼ wen al baqui ora tsiʼ yila pañimil. Ili miʼ cʼajtesʌbeñonla i tʼan jiñi rey Salomón: «Cheʼ mi lac sujbel ti utsʼat, ñumen tijicña yubil bajcheʼ xojocña bʌ perfume letsem bʌ i tojol [yicʼot] jiñi qʼuin cheʼ mi la chʌmel ñumen tijicñayʌch bajcheʼ jiñi qʼuin cheʼ mi laj qʼuel pañimil» (Eclesiastés 7:1). Muʼ bʌ i wen al yaʼ ti Biblia chaʼan Jesús jiñʌch chaʼan i subtʼan yicʼot chaʼan baqui ora tsaʼ chʌmi, pero maʼañic miʼ wen al chaʼan baqui ora tsiʼ yila pañimil.