Jehová tsiʼ mele Adán yicʼot Eva i tsiʼ sube chaʼan mi mejlelob ti chumtʌl tiʼ pejtelel ora yaʼ ti Paraíso. Satanás tsiʼ pʼaja i cʼabaʼ Jehová yicʼot tsiʼ yʌlʌ chaʼan maʼanic tiʼ wenta chaʼan miʼ chaʼlen yumʌntel. Adán yicʼot Eva tsiʼ temeyob i bʌ ti ñusa tʼan yicʼot Diablo, cheʼ bajcheʼ ili tsiʼ yotsa ti mulil yicʼot ti chʌmel jini winicob xʼixicob

Dios tsiʼ sube chuqui mi caj i chaʼleñob jini xñusatʼañob yicʼot tsiʼ wʌn alʌ chaʼan mi caj i tilel juntiquil i Pʼolbal muʼ bʌ caj i jisan Satanás yicʼot muʼ bʌ caj i chaʼ tojʼesan jini tsaʼ bʌ jejmi chaʼan ti caj jini ñusa tʼan yicʼot mulil

Dios tsiʼ wʌn sube jini Abraham yicʼot David chaʼan tiʼ tojlelob mi caj i tilel i Pʼolbal, jini Mesías muʼ bʌ caj i chaʼlen yumʌntel tiʼ pejtelel ora

Jehová tsiʼ subu tiʼ tojlel xʼaltʼañob i chaʼan, chaʼan jini Mesías mi caj i jisan jini mulil yicʼot chʌmel yicʼot chaʼan jiñʌch jini Rey chaʼan i Yumʌntel Dios. Mi caj i chaʼlen yumʌntel jaʼel yicʼot junmojt winicob xʼixicob, yicʼot temel mi caj i jisañob jini guerra tac, cʼamʌjel tac yicʼot jini chʌmel

Jehová tsiʼ yʌcʼʌ ti cʌjñel Jesús chaʼan jiñʌch jini Mesías. Jin tsiʼ choco tilel ila ti Pañimil chaʼan miʼ sub i Yumʌntel Dios yicʼot chaʼan mi yʌcʼ i cuxtʌlel ti tojlel winicob xʼixicob. Cheʼ tsaʼ chʌmi, Jehová tsiʼ chaʼ aqʼue i cuxtʌlel cheʼ bajcheʼ espíritu

Dios tsiʼ waʼchoco ti Rey jini Cristo yaʼ ti panchan, i tsaʼ tejchi jini cojix tac bʌ qʼuin chaʼan ili pañimil. Jesús jiñʌch muʼ bʌ i qʼuel jini subtʼan ti petol pañimil chaʼan i Yumʌntel Dios

Jehová tsiʼ sube i Yalobil chaʼan miʼ tech i yeʼtel ila ti Pañimil. Jini i Yumʌntel Dios mi jisan jini yumʌlob ti pañimil, mi chaʼ mel jini Paraíso yicʼot chaʼan jini xucʼuloʼ bʌ mach chʌn mulilobix mi yajñelob. Jini am bʌ tiʼ wenta Jehová chaʼan miʼ chaʼlen yumʌntel maʼanix majch mi caj i chʌn al chaʼan maʼanic ti wenta, chʼujul mi caj i yajñel i cʼabaʼ yicʼot sʌc mi caj i yajñel tiʼ pejtelel ora