CHEʼ bʌ maxto anic melbil jini winic yicʼot xʼixic, Dios tsiʼ mele jini ángelob, jiñobʌch espíritu mach bʌ muqʼuic i mejlel laj qʼuel. Juntiquil —tsaʼ bʌ otsʌbenti i cʼabaʼ ti Satanás o jini Diablo— tsiʼ chanʼesa i bʌ yicʼot tsiʼ loti Eva chaʼan miʼ cʼux jini cojach bʌ i wut teʼ tsaʼ bʌ subentiyob ti Dios chaʼan mach yomic miʼ cʼuxob.

Satanás tsiʼ cʼʌñʌ juncojt lucum chaʼan miʼ suben Eva yicʼot chaʼan mi yʌqʼuen i ñaʼtan an chuqui woliʼ sʌtob wem bʌ chaʼan tiʼ mul Dios. Yicʼot jaʼel tsiʼ sube chaʼan maʼanic mi caj i chʌmelob mi tsiʼ cʼuxuyob jini i wut teʼ ticʼbil bʌ chaʼan miʼ cʼuxob; cheʼ bajcheʼ ili tsiʼ yʌqʼueyob i ñaʼtan chaʼan Dios tsiʼ lotiyob. Jini Diablo utsʼatax bajcheʼ tsiʼ subeyob, tsiʼ yʌlʌ mi tsaʼ i ñusʌbeyob i tʼan Dios mi caj i tajob cojach bʌ i ñaʼtʌbal yicʼot mi caj mejlel i melob chuqui yomob. Pero mach isujmic jini: jiñʌch ñaxam bʌ lot. Jini tsaʼ bʌ i chaʼle lot tsiʼ mele ili cʼajtiya: ¿Am ba tiʼ wenta Dios chaʼan miʼ chaʼlen yumʌntel? ¿Toj ba jini i mandar tac? ¿Wem ba chaʼan mi lac jacʼben?

Eva tsaʼ yajli ti lot. Tsaʼ cajiʼ mulan jini i wut teʼ i tsiʼ cʼuxu. Cheʼ jini tsiʼ yʌqʼue i ñoxiʼal, tsiʼ cʼuxu jaʼel. Anquese mach lecojic yilal, pero tsiʼ ñusayob tʼan, yicʼot tsiʼ chaʼleyob mulil. Yujilobix chuqui tsaʼ bʌ i meleyob: maʼanic tsiʼ chʼʌmbeyob ti ñuc i mandar jini tsaʼ bʌ i Meleyob, tsaʼ bʌ i luʼ aqʼueyob ti pejtelel i chubʌʼan yicʼot i cuxtʌlelob mach bʌ xmulilic.

Dios maʼanic tsiʼ ñusʌbeyob i mul jini xñusatʼañob. Tsiʼ yʌlʌ ti ñaxan chaʼan mi caj i choc tilel, —juntiquil i Pʼolbal albilix bʌ i chaʼan— muʼ bʌ caj i jisan jini lucum o Satanás. Cheʼ jini tsiʼ sube jini Adán yicʼot Eva chaʼan mi caj i chʌmelob, pero tsiʼ pʼunta jini i yalobilob, ti jim bʌ ora maʼanic tsaʼ jisʌntiyob. ¿Baqui bʌ i pijtaya añob i chaʼan i yalobil? Jehová tsiʼ wʌn alʌ chaʼan mi caj i choc tilel juntiquil muʼ bʌ caj i luʼ jisan jini wocol chaʼan ñusa tʼan tsaʼ bʌ tejchi ti Edén. Pero ¿majqui jini Xcoltaya, yicʼot bajcheʼ mi caj i tsʼʌctiyel tiʼ tojlel chaʼan tsaʼ chojqui tilel ti Dios? Jini i sujmlel tsaʼ tsictiyi majlel, cheʼ tsaʼ tsʼijbunti majlel jini Biblia.

Cheʼ jini, Dios tsiʼ choco loqʼuel jini Adán yicʼot Eva yaʼ ti Paraíso. Cheʼ bʌ tsaʼix chojquiyob loqʼuel yaʼ ti pʌcʼʌbʌl, tsaʼ cajiyobix ti tsʌts bʌ eʼtel chaʼan mi tajob chuqui yomob. Cheʼ bʌ ora jini, Eva tsiʼ yʌcʼʌ ti pañimil ñaxam bʌ i yalobil, jiñʌch Caín. Cheʼ jini, Adán yicʼot Eva tsaʼ tili yambʌ i yalobilob chʼiton bʌ yicʼot xchʼocob, Abel, yicʼot Set, i ñojteʼel Noé.

(Loqʼuem ti capítulo 3 cʼʌlʌl ti 5 chaʼan Génesis yicʼot Apocalipsis 12:9.)