JEHOVÁ yujilix chaʼan mi caj yʌcʼ i cuxtʌlel jini wen cʼuxbibil bʌ i Yalobil. Cheʼʌch mi yʌl ti Génesis 3:15 anquese mach jamʌlic mi yʌl. Chaʼan miʼ ñaʼtan jini winicob xʼixicob bajcheʼ cʼamel i cʼuxel mi caj i yubin cheʼ mi caj i chʌmel i yalobil, Dios tsiʼ yʌlʌ chaʼan miʼ tsʼijbuntel ti Biblia chuqui tsaʼ bʌ ujti tiʼ tojlel Abraham cheʼ tsaʼ cʼajtibenti i yalobil Isaac chaʼan mi yʌcʼ cheʼ bajcheʼ majtañʌl.

Mach yomic mi ñajʌyel lac chaʼan jini tsaʼ bʌ yʌlʌ Dios chaʼan jini Xcoltaya mi caj i tilel tiʼ pʼolbal Isaac. Tsiʼ wen ñopo chuqui tsaʼ subenti yicʼot yujil chaʼan, Dios miʼ mejlel i chaʼ techben chʼojyel i yalobil. Jini chaʼan tsiʼ yʌlʌ chaʼan mi yʌcʼ bajcheʼ majtañʌl. Pero, cheʼ muqʼuix caj i tsʌnsan, Jehová tsiʼ choco tilel juntiquil ángel chaʼan miʼ mʌctan. Cheʼ jini Dios tsiʼ qʼuele ti ñuc jini Abraham chaʼan tsiʼ wen ñopo yicʼot tsiʼ yʌqʼue i xucʼtilel i tʼan.

Tiʼ wiʼil, Isaac tsaʼ tili chaʼtiquil i yalobil: Esaú yicʼot Jacob. Tiʼ chaʼticlelob, cojach jini Jacob tsiʼ cʼuxbi i chaʼan bʌ Dios yicʼot tsiʼ taja bendición. Dios tsiʼ qʼuextʌbe i cʼabaʼ ti Israel, jini lajchʌntiquil i yalobilob tsaʼ sujtiyob tiʼ pʼolbal Israel. Pero ¿bajcheʼ tsaʼ ochi ti colem bʌ tejclum jini Israel?

Tsaʼ tejchi cheʼ bʌ i yʌscuñob jini José tsaʼ caji i michʼ qʼuelob. Tsiʼ qʼueleyob ti cabʌl i tsʌytsʌñʌyel i pusicʼal, jini chaʼan tsiʼ choñoyob bajcheʼ moso. Jini tsaʼ bʌ i mʌñʌyob tsiʼ pʌyʌyob majlel ti Egipto, yaʼi tsiʼ taja cabʌl wocol. Dios tsiʼ colta jini chʼiton winic xucʼul bʌ yicʼot chʼejl bʌ, jumpʼejl bʌ qʼuin jini faraón tsiʼ waʼchoco ti ñuc bʌ i yeʼtel. José tsaʼ mejli i coltan i chaʼañoʼ bʌ cheʼ tsaʼ tili wiʼñal cheʼ baʼ ora Jacob tsiʼ choco majlel i yalobilob chaʼan miʼ majlel i mʌñob bʌlñʌcʼʌl yaʼ ti Egipto. ¿Majqui jini am bʌ tiʼ wenta bʌlñʌcʼʌl? ¡Jiñʌch José! Wen tijicña tsaʼ yubi cheʼ tsaʼ cʼoti i taj i yerañob —pero i bajñelob mach tijicñayobic— José tsiʼ ñusʌbeyob i mul i tsiʼ choco ti pʌyol i chaʼañoʼ bʌ. Jini faraón tsiʼ yʌqʼue ñumen wem bʌ lum, yaʼi tsaʼ cajiyob ti pʼojlel yicʼot i chubʌʼan. José tsaʼ cʼoti i ñaʼtan chaʼan Jehová tsiʼ colta chaʼan mi tsʼʌctiyel jini albil bʌ i chaʼan.

Jacob tsaʼ chumle ti Egipto, yicʼot i chaʼañoʼ bʌ cʼʌlʌl cheʼ tsaʼ chʌmi. Cheʼ lʌcʼʌlix miʼ caj ti chʌmel tsiʼ wʌn alʌ chaʼan jini Xcoltaya jiñʌch juntiquil rey pʼʌtʌl bʌ muʼ bʌ caj i tilel tiʼ tojlel i yalobil Judá. Cheʼ tsaʼ ñumi jabil, José tsiʼ yʌlʌ chaʼan Dios mi caj i locʼsan ti Egipto jini i chaʼañoʼ bʌ Jacob.

(Loqʼuem ti capítulo 20 cʼʌlʌl ti 50 chaʼan Génesis yicʼot Hebreos 11:17-22.)